JOHAN 11
11
Lazar Thisa Kaithawna
1 #
Luk 10.38,39 Mari leh a suapinu Martha te umna Bethani khua chun Lazar kiti, mi pakhat a dam pua’n.
2 #
Joh 12.3
Zia Mari chu Lalpa sathau hung nu’, a sam ah a keng hung thiak kha a hia; zia damlo Lazar chu a suapi ahi.
3Chun, a suapinute chun, a kiang in mi a hun sawl ua, “Lalpa, hung en tia, la hepi kha a dam puai,” a hung tiu a.
4Jesu’n zia chu a het phat in, “Zia natna hi thina ding ahi puai, Pathian lopina ding ahi zawi, Pathian Chapa chu ziaziak hin chawihoi ah um ding ahi,” a tia.
5Jesu chun Martha leh a suapinu leh Lazar chu hepi maleh,
6a dam puai ti a het nung in, a umna ngai ah chun ni ni’ a châm nalai hi.
7Zia nung ah chun, a nungzuite kiang in, “Judea gam lam in chia kit tai tiu,” a tia.
8A nungzuite chun, a kiang in, “Hotupa, tu’ma deu khan Judate’n suang ah hun se a guau ah, tu’hin chia kit ding la ti a hem?” a tiu a.
9Jesu’n a dawnhu, “Ni khat sung hin dakkal sawm leh ni a um hilo a hem? Sûn ah chiate chu kipal pua’n au, zia khawvel vâk hi a mu zing ziak un.
10Himaleh, jan ah a chia chun, a kipal sek hi, amau ah chun vâk a umlo ziakin,” a tia.
11Zia thute chu a gen zaw in, a kiang un, “I gualpau Lazar kha a ipmu tai; a ipmu kaitho dingin chia ding ka hi,” a tia.
12Ziaphatchun, a nungzuite chun, “Lalpa, a ipmu ahileh, a pha lam hita’n a” a tiu a.
13Himaleh, Jesu chun a thi thu a gen ahi zaw ngal ah; amau chun a ipmu chawldam mai mai hiding in a gingchau a.
14Ziaziakchun, Jesu’n kichian tak in, “Lazar kha a thi tai.
15Nang un la taksan theina ding un, zia tak ah ka umlo chu nang uh â dingin ka kipak ahi; banghilehle, tu’hin hung un, a kiang in vachia hitiu,” a tia.
16Tichun, Thoma, Diduma a tiu chun, nungzui dangte kiang ah chun, “Ei hawle chia hitiu in, ama tawh vathikhawm hitiu,” a tia.
Jesu Chu Hinna leh Thawkitna
17Jesu a tun phat chun, ama chu ni li hial thân ah a la um ahi tai ti a he ngal a.
18Bethani khua chu Jerusalem tawh kinaicha ahi’n, a kikâl uh chu mêl ni ding vêl bep ahi;
19Mari leh Martha kiang ah chun a suapipau ziak ah thamuan dingin Judate tam tak a hung kikhawm un.
20Martha chun Jesu a hung hi ti a het phat in, a lamtua dingin a vachia ah; Mari chu Insung in a chu zing hi.
21Martha’n Jesu kiang in, “Lalpa, zia tak hin a la um hilechin ka suapipau thilo ding hi ve’n.
22Himaleh, tu’hin le, la dot taphot chu Pathian in hun pia’n ah ti ka hia’i,” a la tia.
23Jesu chun, “La suapipau hung thokit ding ahi,” a tia.
24Martha chun a kiang in, “Nitawp ni thawkit ni tak leh hung tho kit ding ahi ti ka hia’i,” a tia.
25Jesu’n a kiang in, “Keima hi thawkitna leh hinna chu ka hi, ei gingcha taphot chu thi maleule hing zing in au;
26chuleh, hing ah, keima ei gingcha chu thi ngai ta pua’n au. Zia chu la taksang em?” a tia.
27Ama chun, a kiang in, “Taksang e Lalpa, nangma hi Messiah, Pathian Chapa, zia khawvel ah hung ding pa chu la hi ti ka taksang hi,” a tia.
Jesu A Kap Hi
28Zia a gen zaw ah chun, a chia ah, a gûkcha’n a suapinu Mari chu a ko ah, “Hotupa a hung ta’n, a hun ko hi,” a tia.
29Ama’n zia chu a het phat in, kin tak in a hung ding ah, a kiang lam ah chun a hung a.
30Ziaphatchun, Jesu chu khawpi sung a hung lut naipua’n; Martha tawh a kituakna mun ua khan a la um zing nalai a.
31Judate a Insung ah ama thamuan ah a la umte chun, Mari kin tak ah ding ah hung pawt a mu phât un, a hun zui tau a, “Ama chu thân ah vakap ding ah chia ding hi’n a,” a tiu a.
32Mari chu Jesu umna a hung tun ah ama a mu phât in, a kengbul in a bokkhup ah, a kiang in, “Lalpa, zia tak ah hin a la um hilechin ka suapipa hi thilo ding hive’n,” a hun ti kit a.
33Jesu’n ama leh Judate a hun zuite kâ chu a mu in a lunggil in a thûm ah, a lung a khoi ma ma a.
34“Ama chu khoi ah la vui uh a hem?” a tia. Amau chun, “Lalpa, hung in la, hung en in,” a tiu a.
35Jesu a kap tai.
36Judate chun, “En tiam un, a hepina lawm lawm e!” a tiu a.
37A lak ua khenkhatte chun, “Zia mitthûmte mitle hi’vâk sekpa hin, zia pa thi lona ding hile hitheilo a diam?” a tiu a.
Jesu’n Lazar A Kaithawkitna
38Jesu chu lunggil lam ah thûm kawm in, thân lam ah chun a hung a. Zia chu suang kikhuak hawm, suang lian tak khat in a sit ahi’n.
39Jesu chun, “Zia suang hi likdok un,” a tia. Martha, a thipa suapinu chun, “Lalpa, tu’hin vang ui ta’n ah, a thina ni li ei tai,” a tia.
40Jesu’n a kiang in, “La gin leh Pathian lopi zia mu’n la, ka ti pua a hem?” a tia.
41Tichun, suang chu a likdok tau ah, Jesu’n van lam a en a, “He Pa, ka thu lei ngaithâk piak zing ziakin ka kipak hi.
42Keima hi lei la ngaitha zing hi ti le ka hia’i; ahi’n, zia mipite, ka kiang ah dingte ziak ah hin nang in lei sawl ka hi dan a hun taksan theina ding un, zia hi ka ti ahi,” a tia.
43Zia a hun ti zaw ah chun, aw ngai tak in a hung kiko ah, “Lazar, hung pawt in,” a tia.
44Ziaphatchun, mithi chu a khut leh kengte puan ah kituam in, a mâile mâituamna kituam zing kawm in a hung pawtdok tai. Jesu’n, a kiang un, “Phel unla, chiasak un,” a tia.
Jesu Thalup A Guatnau
(Mat 26.1-5; Mar 14.1-2; Luk 22.1-2)
45Mari hun zui Judate tam tak haw khan, Jesu thilhite chu a mu phât un, ama chu a hun gingcha tau a.
46Himaleh, khenkhatte chu Pharisaite kiang lam in a chiau ah, Jesu thilhi’te chu a valawtsia tau hi.
47Ziaphatchun, thiampu lalte leh Pharisaite chun vai a hawm khawm un, “Zia pa hin thilmak tak tak a hi’ta’n, bang law ding I hitau em?
48Hitia hi I thathawt zing ua leh, ama hi mi zosia’n hun gingcha’n tiu in, zia tak chuleh Rom mite hung intiu in, I mun thiangtho leh I nam uh hi hung susia ding a hiu,” a tiu a.
49Zia kum ah thiampu lianpen ah hung pang Kaiapha a tiu chun, a kiang un, “Bangma la hepuau hi!
50‘Nam pumpi a manthai sâng in mi pakhat a thi chu a phazaw ma ma hi,’ ti hi la ngaitua kha puau ah ahi,” a tia.
51Zia a thu gen chu ama lungthim ah kipat a gen a hipua’n, zia kum ah chu ama thiampu lianpen a hung hi’n, ziate nam sik ah chun Jesu a thi ding a hi, ti a genlawkna a hizawi;
52zia namte â ding bep chule hilo in, Pathian chate gam tin ah kithejak ah umte a puikhawm kit theina dinginle ahi.
53Tichun, zia ni kipat chun, Jesu chu a tha theina ding uh a ngaitua khawm tau hi.
54Jesu chu Judate lak in langchang tak in a tawi ta pua’n; gamthip tawh kinai khawpi khat, Ephraim kiti chun a chia ah, zia tak ah chun a nungzuite tawh a um zing tau hi.
55Judate Chiakân Kût a hung nai ta’n; mi tam tak chu a gam ua kipat in, Jerusalem ah Chiakân Kût masang ah a la kithiansak dingin a hung sau sau tau hi.
56Amau chun Jesu a hawl ua, tempul ah chun a ding ua, “Ama chu Kûtna hung dingin la gingcha em?” a kitiu a.
57Thiampu lalte leh Pharisaite chun, ama chu a mat theina ding un, Jesu umna he taphot in a hun hil diu ahi, ti’n thu a than tau a.
Currently Selected:
JOHAN 11: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
