JOHAN 20

Jesu Thawkitna

(Mat 28.1-8; Mar 16.1-8; Luk 24.1-12)

1Hapta khat ah ni masa pen ni, phalvak in, Mari Magdalin chu thân lam ah a chia leh, thân sitna suang chu likdaw sa’n a vamu ta’n.

2A hung tai ah, Simon Peter leh Jesu’n a hepi nungzui kiang in a hung a, “Lalpa kha thân ah kipat in a la kila mang tai, khoi ah a koi uh a hem ka he ta puai,” a hung ti’n.

3Simon Peter tawh nungzui dang pakhatpa chu thân lam zuan in a chia tau a.

4A paniu chun a tai ua, nungzui pakhat chun Peter chu a makhel ah, thân chu a la tung masa tai.

5A bok ah, a sung chu a zuk en ah, a puan malngat kha a um ngai ah um in a mu’n; ahiziak in a sung in a lût ziang puai.

6Ama nung ah chun Simon Peter le a hung tung ah, thân sung ah chun a lût ngal a. Ama’nle zia puan malngat a um ngai gual ah um zing chu a mu’n;

7a luchang tuamna puan, a luchang lam jawn ah um chu puan malngat chu tawh a um khawm ta pua’n, a kiang ah chun a lom ah jialdawsa’n a la um ta’n.

8Nungzui pakhatpa, thân a la tung masa zawkpa khale a lut ah, a mu phatin a taksang tai;

9zia hun ah chunle, Pathian lekhabu’n, “Ama chu thina kipat thokit ding ahi,” ti thu kha a hedok nai diak puau a.

10Ziazaw a chun, nungzuite chu a In lam un a chia kit tau hi.

Mari Magdalin Kiang ah A Kilâkna

(Mat 28.9-10; Mar 16.9-11)

11Mari chu thân pawlam ah ding in a kap a. A kâ kawm in a khûn ah, thân sung chu a vak en a;

12vansawlchâk pani puan vâm sil in, Jesu luang lupna mun ah chun, pakhat a lu lam ah, pakhat a keng lam ah kichu a mu’n.

13Amau chun, a kiang in, “Numei, bang ding ah kap la hem?” a tiu a. Ama chun a kiang un, “Ka Lalpa a lamang un, a koinau ka he pua ahi,” a tia.

14Zia a gen zaw chun a hung kihei leh, Jesu a kiang ah a la ding chu a mu ta’n; Jesu ahi ti a he ziang puai.

15Jesu’n a kiang in, “Numei, bang ding ah kap la hem? Kua a hem la hawl?” ti’n a dong a. Amanu chun huan neipa hiding ah a ginchâk ziakin a kiang in, “He pu, zia tak ah kipat la lakdaw ahileh, la koina mun ei hil in, keima’n pawdok ing ka,” a tia.

16Jesu’n a kiang in, “Mari!” a hun tia. Ama chu a hung kihei ah, a kiang in, “Rabboni!” a hun tia, zia chu “Hotupa,” ti’na ahi.

17Jesu’n a kiang in, “Ei tu kin, tu’tiang hinle Pa kiang ah ka kal to nai puai; himaleh, ka unaute kiang ah vachia’n la, a kiang un, ‘Ka Pa, la Pau, ka Pathian, la Pathian kiang un kal to ding ka hi, a tii,’ vati’n,” a tia.

18Mari Magdalin chu a vachia ah, a nungzuite kiang in, “Lalpa ka mu tai,” a tia; a kiang un zia a thu gente chule a hil tai.

A Nungzuite Kiang ah Jesu Kilâkna

(Mat 28.16-20; Mar 16.14-18; Luk 24.36-49)

19Chun, zia ni, hapta khat ah a ni masa pen nitâk lam ah chun, Judate a lau ziak un nungzuite chu kot a kikhak khum lai un, Jesu chu a lak un a hung ding ah, “La chung un thamuanna um ta hen!” a tia.

20Ama’n zia chu a gen zaw in, a khut leh a nâk a etsak a. Lalpa chu a mu phât un nungzuite chu a kipak ma mau a.

21Jesu’n a kiang un, “Ka Pa’n ei sawl gual in nang hawle ka hun sawl la hiu, la lak un thamuanna um ta hen!” a ti kit a.

22Zia a gen zaw chun amau chu a hu a tha khum ah, “Thagau Thiangtho nei un.

23 # Mat 16.19; 18.18 Kua gitlona le la ngaidam taphot uh chu, ngaidam hi’ntin, kua gitlona le la ngaidam lo uh chu ngaidam hilo ding a hiu,” a tia.

Jesu leh Thoma

24Jesu a lak ua a kilâk lai khan Thoma, Diduma (piangkop) a tiu, sawm leh nite lak ah pakhat kha a la um pua’n.

25Nungzui dangte chun a kiang in, “Lalpa chu ka mu tau hi!” a tiu a. Ama chun vang a kiang un, “A khut thikkil kikhetna beliamte kha ka mu ah, thikkil kikhetna beliam leh a nâk liam ah ka khutzung ka thun zet lo chun taksang pua’ng ka,” a tia.

26Ziazaw ni giat nung ah chun, a nungzuite chu In ah a kikhawm kit un; Thoma le a lak un a pang ta; kot kikhak zing lai ah chun Jesu chu a hung ah, a umna lailung tak ua chun a hung ding ah, “La lak un thamuanna um ta hen!” a hun tia.

27Thoma kiang ah chun, “La khut in hun bân inla, ka nâk ah thun in. La khutzung in hun khoi in, ka khutte hi en in. Taksanglo in um kin la, taksang in,” a tia.

28Thoma chun, “Ka Lalpa leh ka Pathian!” a tia.

29Jesu’n a kiang in, “Thoma, nang in lei mu ziak ah ei gingcha la hi maw? Mulo ah ei gingte chu mi hampha a hiu,” a tia.

Zia Chanchinpha Thiltup

30Zia lekhabu kizik lo hile, Jesu’n a nungzuite mu in tepte’na tam tak a bawl ah; ziate haw zosia chu zia lekhabu hin zik ahi puai;

31himaleh, zia lekhabu hi, Jesu chu Pathian Chapa Messiah chu ahi ngei hi, ti la hun taksan ua, ama ging ah, a min ah kumtuang hinna la neina ding ua zik ahi zawi.

Currently Selected:

JOHAN 20: VAIPBSI

Highlight

Copy