JOHAN 6
6
Mipi Sangnga A Vâkna
(Mat 14.13-21; Mar 6.30-44; Luk 9.10-17)
1Zia nung ah chun, Jesu chu Galili Dil, Tiberia Dil le a tiu, gâl langkhat lam a gâl kâi kit a.
2Damlote chung ah thilmak a hi’te chu a la mu ziak un, mipi tam tak in ama a zui tau hi.
3Jesu chu tâng in a chia to ah, zia tak ah chun a nungzuite tawh a kichuu a.
4Zia hun ah chun Judate Chiakân Kût chu a nai ta’n.
5Jesu a hung dâkdaw leh, mipi tam tak hung khawmte chu a mu’n; Philip kiang in, “Ziate haw nêk ding hi vaithum khoi tak ah I vachaw ta diam uh?” a tia.
6Ama chun a hi’ding chu a hezing ngal a; himaleh, ama a patepna ding ah a gen ahi.
7Philip chun a dawnhu a, “Tha guk law in kichaw leh le, neucha chiat ah chan dinginle kiting diak pua’n a,” a tia.
8A nungzuite lak ah pakhat, Simon Peter suapipa Andria khan,
9“Zia tak ah hin pawsal naupang pakhat, barli bu vaithum panga leh sanga neucha cha pani nei a um in; himaleh, mi zia jat â ding hin bang kham hiding a hem?” a tia.
10Ziaphatchun Jesu’n, “Mipite chutsak un,” a tia. Zia tak ah chun hampa a tam ah; tichun, mipite chu a hung kichuu ah, a leng un sang nga ding vêl a hiu a.
11Jesu chun, vaithum chu a lâ, kipak thu a gen zaw in, a nungzuite kiang in a hawm ah, a nungzuite chun mipi kichute kiang in a hawm tau a; zia gual ma chun sangate chule a doikhop chiat un a hawm piak tau hi.
12A hung vâ chiat phat un a nungzuite kiang in, “A nêkbang uh kha hun luak khawm kit un, bangma a mangthai umlo dingin,” a tia.
13Tichun, a luak khawm kit ua, barli bu vaithum panga a hawmnau ah chun, a nêkbang uh bawm sawm leh ni a hun luak dim kit tau hi.
14A thilmak bawl chu a musak phatin, amau haw chun, “Jawlnei khawvel ah hung dingpa chu ama ngei hi a hita hi,” a ti tau hi.
15Ama chu a chamlo ah a lengpa ding ua siam ding ah, mat hung gua a hiu ti, Jesu’n a het ziakin, tâng lam ah chun ama ngawn in a chia mang tai.
Tui Chung ah Jesu A Chia’na
(Mat 14.22-23; Mar 6.45-52)
16Nitâk lam a hung hi in, a nungzuite chu dil ah chun a vachiau a,
17kuang in a chuang ua, Kapernaum khua lam zuan in a kitawl tau a. Zia hun ah chun khua a thim ta’n, ahiziak in, Jesu chu a hung tung nai puai.
18Huipi nasa tak a hân ziak in tui chu a fawn nasa ma ma ziang ta’n.
19Mêl thum a hem mêl li a hem a kitawl nung un, Jesu chu a keng ah tui chung in, amau umna lam hun zuan in a muu ah; a la lau ma mau a.
20Himaleh, ama chun, “Keima ka hi, lau kiu in,” a hun tia.
21Tichun, kuang sung ah kipak tak in a ko lut un; chomlokâl cha’n kuang ah chun a zotnau khawmual chu a tung kawm tau hi.
Van Ah Kipat Vaithum
22A jing ah chun Dilgâl langkhat lam ah mipi ding haw chun, zia tak ah chun a nungzuite chuanna longal chu kuang dang a um puai ti leh, Jesu chu a nungzuite chuanna kuang ah chu chuang lo in, a nungzuite amau ngawn in a chiau hi ti a he tau a.
23Ahi’n, Tiberia lam ah kipat in Lalpa‘n kipak thu a gen zaw ah, vaithum a nêknau mun kiangnai ah khan kuang pakhat a hung a.
24Mipite chun, zia tak ah chun Jesu leh, a nungzuite chule a um ta puau hi ti, a het phat un, kuang ah chuang in Jesu hawl in Kapernaum khua a hung tung tau hi.
25Dilgâl langkhat lam ah a hung mu phât un, “Rabbi, bangtik ah zia lam hi a la tung la hem?” a tiu a.
26Jesu’n a dawnhu a, “Titakzet in ka hil la hiu, thilmakte la mu ziak ua ei hawl la hipuau in, vaithum la nekvâ ziak ua ei hawl la hizawu hi;
27an mangthai ding hawl in sêmgim kiu inla, Mihing chapa’n a hun piak ding, kumtuang ah um zing ding an chu hawl in sêmgim zawu in. Zia ding ah chun Pathian in ama chu a tepte’ tangal a,” a tia.
28Tichun, amau haw chun, “Pathian na ka septheina ding un bang ka hi diam uh?” a hung tiu a.
29Jesu’n, “Pathian nasep chu zia hi ahi: a mi hun sawl hi gingcha leu chin,” ti’n a dawnhu a.
30Amau chun a kiang in, “Aleh, nang ka hun gintheina ding un, bang tepte’na lei etsak thei diam? Bang la hi’ diam?
31 #
Pdt 16.4,15; Sam 78.24 Ka pu leh pateu in gamthip ah khan manna a neu ah; ‘Van ah kipat in a nêk ding uh vaithum a pia’i,’ ti ah zik gual ah khan,” a tiu a.
32Ziaphatchun, Jesu’n a kiang un, “Titakzet in, ka hil la hiu, zia van ah kipat vaithum kha, Mosi hun piak a hipua’n, ka Pa’n van ah kipat vaithum tak chu a hun pia ahi.
33Pathian vaithum chu van ah kipat hung suk ah, khawvel â ding ah a hinna pepa hiding ahi,” a tia.
34Amau chun, “Lalpa, zia vaithum chu ei pia ta’n la,” a hun tiu a.
35Jesu’n a kiang un, “Keima hi hinna vaithum chu ka hi, ka kiang ah hung tapo chu a gilkial ngai pua’n tin, ei ging tapo chu bangmatik in a dangchâk ngai ta pua’n a.
36Himaleh, ka hil la hiu, nanghaw hin lei mu zing un, ahi’n, lei gingcha puau hi.
37Ka Pa’n ei piak zosia chu ka kiang ah hung ding a hiu; a hung tapo chu deldok lo hial ding ka hi;
38keima doigual hi’ding ah van ah kipat hung ka hipua’n, ei sawlpa doigual hi’ding ah hung kum ka hizawi.
39Zia hi ka Pa ei sawlpa doigual chu ahi, ama’n ei piak zosia chu, bangma matsua neilo in, nitawp ni leh kaitho zaw leng.
40Chuleh, zia hi ka Pa doigual chu ahi, kuale Chapa mu ah, ama gingcha chun kumtuang hinna nei uh hen la; chuleh, nitawp ni leh ama chu keima’n kaitho leng,” a tia.
41Keima hi van ah kipat vaithum hung suk chu ka hi, a ti ziakin, Judate chu a chung in a phun tau a:
42“Ama hi Joseph chapa, Jesu kiti kha hilo a hem, a nu leh pale I hiau hilo a hem? Bangatileh, ‘Van ah kipat hung suk ka hi,’ ti thei a hem?” a tiu a.
43Ziaziakchun, Jesu’n a dawnhu ah, a kiang un, “Phun phun kiu in,
44ka Pa, ei sawlpa chun a hîplo leh, kuama ka kiang ah hung theilo a hiu. Ahi’n, keima’n nitawp ni leh kaitho ing ka.
45 #
Isa 54.13
Jawlneite Lekhabu khan, ‘Amau haw chu Pathian hil in um in au,’ ti’n zik ahi. Ziaziakchun, mitin Pa thu he ah, zil taphot chu ka kiang in a hung sek ui.
46Pathian ah kipat hung bep longal chun, kuama’n Pa chu a mu kha puau in, ama bep chun Pa chu a mu ahi.
47Titakzet in ka hil la hiu, kuale keima ei gingcha chun kumtuang hinna a nei hi.
48Keima hinna vaithum chu ka hi.
49La pu la pateu in gamthip ah khan manna a neu ah; himaleh, a thizo tau hi.
50Zia hi van ah kipat hung suk vaithum chu ahi, la nêk ua, la thilona ding un.
51Keima hi vaithum hing, van ah kipat hung suk chu ka hi. Zia vaithum ne tapo chu kumtuang in hing zing intin; zia vaithum, khawvel hinna ding ah ka piak ding chu ka taksa hi ahi,” a tia.
52Ziaphatchun, Judate chu a kinial tau a; “Zia mipa hin bang ti’n a taksa I nêk ding un ei pia thei ding a hem,” a tiu a.
53Jesu’n a kiang un, “Titakzet in ka hil la hiu, Mihing Chapa taksa la nêk ua, a thisan la dawn lo ua leh, nang un hinna neilo la hiu.
54Kuale ka taksa hi ne’, ka thisan dawn chun kumtuang hinna a nei hi, zia mi chu nitawp ni phat leh kaitho kit ding ka hi;
55ka taksa hi an tak tak chu ahi’n, ka thisan chule dawn dingtak tak chu ahi.
56Kua’nle, ka taksa hi a nêk ah ka thisan a dawn chun, keima ah chêng ahi’n, keima le ama ah chun ka um ahi.
57Pa hing chun ei sawl ka hiziak in, Pa ah hing ka hi; ziaziakchun, kuale ei ne’ chu keima ah hing ding ahi.
58Zia hi van ah kipat vaithum hung suk chu ahi, la pu leh pateu in manna a nêk ua, a thi gual uh kha ahi puai; kuale zia vaithum ne’ hi kumtuang ah hingden ta ding ahi,” a tia.
59Zia thute hi Kapernaum khua kikhopna In ah a thuhilna a gen ahi.
Kumtuang Hinna Thute Chu
60A nungzui tam takte chun zia thu chu a het phat un, “Zia hi thu haksa tak ahi; kua’n pom thei ding a hem?” a tiu a.
61Zia thu chun a nungzuite a phun ui ti Jesu’n a het phat in, a kiang un, “Zia thu hin a hun subuai ahi maw?
62Chuti ahileh, Mihing Chapa hi masang ah a umna ngai ah khan, a kal to mu leuchin bang la tiding awm?
63Hinna pia chu thagau ahi’n, taksa chu bangma ahi puai. La kiang ua ka thugente hi thagau ahi’n, hinnale ahi.
64Himaleh, la lak un khenkhat a gingcha theilo la um ui,” a tia. Jesu chun, a tîl ah kipat in a gin lo uh chu a hiatsa him ahi’n; ama matsak dingpa chule a he him ahi.
65Chun, ama’n, “Ziaziakchun ahi la kiang ua, ‘Pa’n a panpi lo chun kuama ka kiang ah hung thei pua’n a,’ ka ti kha,” a tia.
66Zia kipat chun, a nungzuite lak ah tam tak a chia mang tau ah, ama a zui ta puau hi.
67Chutichun, Jesu’n sawm leh nite kiang ah chun, “Nang hawle chia mang la nuam awm?” a tia.
68 #
Mat 16.16; Mar 8.29; Luk 9.20 Simon Peter in a hun dawnhu ah, “Lalpa, kua kiang ah chia ding ka hiu em? Nang in kumtuang hinna thute chu la nei hi.
69Nangma hi, Pathian Mithiangtho chu la hi ngei hi ti ka he tau in, ginle ka hun gingcha tau hi,” a tia.
70Jesu’n a dawnhu, “Nanghaw sawm leh nite hi keima hun têl hilo la hiu em? Ahi’n, la lak ua pakhat Diabol la hi zing ui,” a tia.
71Simon chapa Juda Iskariot chung thu kha a genna ahi’n; ama chu sawm leh nite lak ah pang hinapi’n, a mat gua pang ahi ngal a.
Currently Selected:
JOHAN 6: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
