LUKA 22
22
Jesu Tha’na Ding Vaisawmna
(Mat 26.1-5,14-16; Mar 14.1-2,10-11; Joh 11.45-53)
1 #
Pdt 12.1-27
Chiakân Kût kiti, thawipanglo vaithum Kût chu a hung nai ta’n.
2Thiampu lalte leh lekhazikte chun mipite chu ki’cha maleule, Jesu thalup ding dan a ngaitua tau a.
3Juda Iskariot kiti sekpa sung ah chun Setan a lut ah, ama chu sawm leh nite lak ah pakhat kha ahi’n;
4thiampu lalte leh sepai hotute kiang in a vachia ah, a mat piak ding dan a vavaisawmpi tai.
5Amau haw chu a kipak ma mau a, sum piak dingin a kitiampi tau a.
6Tichun, ama’nle lem a sa ta’n; mipi um lona mun ah a mat piakna ding lemchâng a ngaitua pan tai.
Chiakân Kût janan Siamna
(Mat 26.17-25; Mar 14.12-21; Joh 13.21-30)
7Chiakân Kût, belamno latna ni â ding ah thawipanglo vaithum Kût ni chu a hung tung ta’n.
8Peter leh Johan chu a sawl ah, “Vachiau inla, Chiakân Kût an I nêkna ding uh a la guanggal masau in,” a tia.
9Amau chun, “Khoi tak ah ka va guanggal diam uh?” ti’n a dong ua.
10Ama chun, “Ngai un, khawpi’ valût leu chin, tuibêl pu mi pakhat tawh kituak in la tiu in; zia pa chu zui lut un la.
11Zia tak chuleh a In neipa kiang in: Hotupa’n, ka nungzuite tawh Chiakân Kût janan ka nêkna ding uh malzin pindan chu khoitak a hem? a tii, vati leuchin;
12ama chun, Indan chungnung lam ah pindan siamtupsa a la kawkmu intin; zia tak ah chun va guanggal un,” a tia.
13Tichun, avachiau ah, a kiang ua a gen gual khan a vamuu ah; zia tak ah chun Chiakân Kût janan ding chu a bawl ngal tau hi.
Lalpa Janan Nêkna
(Mat 26.26-30; Mar 14.22-26; 1 Ko 11.23-25)
14A hun a hung hi’phat in, a hung kichu, a nungzui sawm leh nite chu a kiang in a kichuu a.
15Chuleh, a kiang un, “Ka thok dingte hi ka thok masang in, zia Chiakân ankuang hi hun nêkpi leng nuam ma ma ka hi;
16ka hil la hiu, Pathian gam ah, a guitun masang sia, zia an hi ne kit talo ding ka hi,” a tia.
17Tichun, no chu a la, kipak thu a gen a, “Zia hi lau inla, kihawm un;
18ka hil la hiu, tu’kipat hin Pathian gam a hung tun masang sia, grep ga tui hi dawn kit talo ding ka hi,” a tia.
19Vaithum chule a la, kipak thu a gen zaw in, a hun phelsua ah, a kiang un a pia, “Zia hi ka taksa nang uh â ding ah kipia chu ahi. Lei hetzingna un hun bawl zing sek un,” a tia.
20 #
Jer 31.31-34
Zia gual ma chun an a nêk zaw phat un, no chule a la, “Zia no, ka thisan ah thuthunna thak, nang uh â ding ah pawt chu ahi;
21 #
Sam 41.9
ahi’n, en un, ei matsak ding pa chu ka kiang in a um ah, a khut chu dawkân ah hin a um tai.
22Mihing Chapa hi guat ah a um dungzui in um ngei ding chu a hi; ei matsak ding pa chu vang a chung a gik hi!” a tia.
23Ziaphatchun, “I lak ua zia gual thilbawl ding chu kua ahi ta diam maw,” ti’n a kidongtua sau sau tau hi.
A Lianpen Kichu ah Kinialna
24 #
Mat 18.1; Mar 9.34; Luk 9.46 A lak ua lopi pen ding kua ahi diam, ti thu ah kinialna a hung um ta’n.
25Ziaphatchun, a kiang un, Jentelte lak ah lengte chun lal tak in a chung un vai a hawm sek ui; a chung ua thuneina chawite chu mi lawting, a la ti sek ui.
26 #
Mat 23.11; Mar 9.35 #
Mat 20.25-27; Mar 10.42-44 Nanghaw vang zia gual ah chu la umlo diu ahi; la lak ua a lopi pen ding chu, a naupang pen gual ah a um ding ahi; a lalpen ding chu a nasem pen ah a pan ding ahi.
27 #
Joh 13.12-15
Aleh, a an nêk ding bawlpa leh a ne ding ah kichu sekte hi a kua zawk hi a lopi zawu em? A ankuang ah a la kichu sekte hi hilo a hiu em? Himaleh, keima hi nang uh lak ah nêk bawlpen in ka pang sek hi.
28Thepna ka tuak sung ah ei umpite nanghaw la hiu in,
29ka pa’n ei piak gual ah hin, ke’n le nang uh leng gam ka hun pia la hiu;
30 #
Mat 19.28
ka lenggam ah chun, ka dawkan ah an lei nekpi theina ding uh leh, Israel nam sawm leh nite vaihawmna lalchutpha ka kiang ah la hung chut theina ding un, a tia.
Peter in Jesu A Kilepsan Ding A Genlawkna
(Mat 26.31-35; Mar 14.27-31; Joh 13.36-38)
31Lalpa chun, “Simon, Simon, ngaitia, Setan in bungel ah a hun ngel theina ding a hawl hi,
32himaleh, la ginna a basap lona dingin ka hun pauchap piak hi; la hung kihei kit tak leh la suapite la hun suk-hat ding ahi,” a tia.
33Ama chun, a kiang in, “Lalpa, suangkul ah hi’hen la, thina ding hi ziang leh le, la chia chiana hung ding ah kisa zo ka hi,” a tia.
34Ama chun, “Ka hil la hi, Peter, thumvei lei kilepsan masangsia tu’ni hin âk khuang pua’n a,” a tia.
Sumbawm, Sakhau leh Chemjam
35 #
Mat 10.9,10; Mar 6.8,9; Luk 9.3; 10.4 Jesu’n a kiang un, “Dangka dip tawh, sakhau tawh kengtawdap le keng lo ah ka hun sawldaw lai khan, bang tâksap la nei awm?” a tia. Amau chun, “Bangma tasam lo,” a tiu a.
36Ama chun, a kiang un, “Ahileh, tu’hin vang dangka dip la nei ua leh vala unla, sakhau la nei ua leh le. Chuleh, chemjam neilote’nle la puan uh zuak unla, pakhat vachawu in.
37 #
Isa 53.12
Ka hil la hiu, ka chungchâng thu ah kizik: Ama chu migilote lak ah simkhawm ahi, ti thu kha; zia gual ah ka chung thu ah kigente kha guitung kim ding ahi tai,” a tia.
38Ziaphatchun, amau chun, “Lalpa, en tia, zia tak ah hin chemjam pani a um hi,” a tiu a. Ama chun, “A hun tawk hi,” a tia.
Oliv Tâng ah Jesu Pauchapna
(Mat 26.36-46; Mar 14.32-42)
39A hung pawtdok ah, a bawl dan ngai gual in, Oliv tâng lam in a chia ah; a nungzuite’nle a zui pek un.
40A tun phat un a kiang un, “Thepna la lut lona ding un pauchap un,” a tia.
41Tichun, ama chu suang ah vak se’phâkna ding tiang ah hin a vachia chuam a, khiangkho in a pauchap ta’n:
42“He Pa, lem la sak leh, zia no hi ei lâkchawn piak in; ahi’n la, keima thu hilo in nangma thu hizaw hen,” a tia.
43Zia lai tak ah chun, van ah kipat in vansawlchâk pakhat a kiang in a hung kilâk ah, a hung hi’hat a.
44A lunggim ma ma ziakin, titak zaw diak in a pauchap kit a; tichun, a khawsa-ul chu thisan tang lian tak vatha gual in leitual in a vatha tai#châng 43 leh 44 hi Ms khen khat in a um puai.
45Chutia, a pauchap zaw phat chun, a dingdok ah a nungzuite kiang in a hung ah, a lungngai ziak un ipmu’n a hung mu ta’n, a kiang un:
46“Bangatia, ipmu la hiu em? Hung tho unla, thepna la lut lona ding un pauchap un,” a tia.
Jesu A Matnau
(Mat 26.47-56; Mar 14.43-50; Joh 18.3-11)
47Zia thute chu a la gen zing lai in, Juda kiti, sawm leh nite lak ah pakhat khan mipi a hun pui a. Ama chun Jesu chu chawp ding gua’n a hun nai a.
48Jesu’n a kiang in, “Juda, nang in Mihing Chapa hi chawp ah mat gua la hi maw?” a tia.
49A kiang ah umte chun, thil umdan chu a hun het phat un, “Lalpa, chemjam in sat ding ka hiu em?” a hun tiu a.
50A lak ua pakhat chun thiampu lianpen suakpa chu a sât leh, a bil changlam a satthâk piak tai.
51Himaleh, Jesu’n, “Zia khêl chu hita kiu in,” a hun tia. A bil chu a vak khoi ah, a dam kit ngal tai.
52Ziazaw chun, thiampu lalte leh tempul hotute leh upate kiang ah chun, “Gucha man ding gual in chemjam tawh, thingtum tawh la hung kuan ziang uh maw?
53 #
Luk 19.47; 21.37 Nisi’n ah tempul sung ah ka um sek lai khan la lei man puau a; himaleh, tu’hi nanghaw leh thim thilhitheina hun chu ahi,” a tia.
Peter in Jesu A Kilepsanna
(Mat 26.57-58,69-75; Mar 14.53-54,66-72; Joh 18.12-18,25-27)
54Tichun, ama chu a man ua a pui tau a, thiampu lianpen In ah chun a puilût tau a. Peter chun gamla tak in a zui a.
55Zia vaihawmna In tual ah chun mei a sêm phat un, Peter le a lak un a vakichu.
56Himaleh, suak numeite lak ah pakhat hin, mei vakna a la kichu chu a hun mu ta’n, a hun enchian a, “Zia pa hile a lawi lak ua mi ahi,” a hun ti tai.
57Himaleh, ama chu a kilep a, “Numei, ama chu ka hekha puai,” a hun tia.
58Ziazaw sawt lo ah chun midang pakhat in a hung mu kit ah, a kiang in, “Nang le a lak ua mi la hi,” a tia. Peter chun, “Ka hitalojen hi,” a hun ti kit a.
59Chuleh, dakkal khat vêl zaw in midang khat in, “Zia pa hile a kiang ua um kha ahi ngei ngei hi; Galili mi ahi hilam,” a hun tichak kei ziang a.
60Peter chun, “La thugen chu ka he puai,” a tia. Zia a gen lai tak chun âk a hung khuang ngal tai.
61Ziaphatchun, Lalpa a hung kihei a, Peter chu a hun en ah; Peter in, Lalpa‘n a kiang ah a la gensa, “Nang in âk khuan ma’n thumvei ei kilepsan ding la hi,” a ti kha a hun hedok tai.
62Peter chu a pawtdok a, ha’kâ in a vakap tai.
Jesu A Engbawlnau
(Mat 26.67-68; Mar 14.65)
63Jesu man pawlte khan ama chu tawtbawlna mang in a bêng ua.
64A mai a tuam piak ua, “Kua a hem a hun vua chu, gen in,” ti’n a dong ua.
65Tichun, ama enghona’n thu tam tak a gen tau hi.
Jesu Vaihawmna Ma ah
(Mat 26.59-66; Mar 14.55-64; Joh 18.19-24)
66Khua a hung vak phatin, mipi lak ah upate leh, thiampu lalte leh lekhazikte chu a hung kikhawm ua, vaihawmna mun lam in a pui tau a.
67“Messiah chu la hi tak tak em? ei gen in,” a tiu a. Ama chun, “Gen lengle taksang pua’n lau;
68thil hun dong lengle ei dawnhu nuam pua’n lau.
69Himaleh, tunung tak leh Mihing Chapa hi Pathian thilhitheina khut changlam ah kichu ta’n a,” a tia.
70A leng un, “Pathian Chapa la hi chu la maw?” a tiu a. Ama chun, “Ahi lei tiu hilo a hem?” a tia.
71Amau chun, “Bang hiatpitu dang I ngai nalai ua a hem? Ama kamsuak ngei ah kipat in I he tau hi lam,” a hun ti tau a.
Currently Selected:
LUKA 22: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
