MARKA 12
12
Grep Huan Bawl Mi nunsiate Tekhinthu
(Mat 21.33-46; Luk 20.9-19)
1 #
Isa 5.1,2 Ziaphatchun, a kiang un tekhinthu mang in thu a gen pan a: Mi pakhat in grep huan a bawl a; dâi pha tak in a bawl ah, a sûkna khûk dingle pha tak in a siam ah, a vênna ding Insâng le a sa’n; tichun, lou bawlte kiang in a sân in a pedok a, gam gamla takin a zin mang tai.
2A ga law hun ahi’phatin a sân la dingin lou bawlte kiang in a suak pakhat a sawl a.
3Himaleh, zia pa chu a la man in a vuau ah, khutngawn in a chia kitsak tau a.
4Ziaphatchun, suak dang pakhat a sawl kit a; ama chu suang ah sep in, a luchang sukliam piak in, mualpho tak in a la bawl kit tau a.
5Ziazaw chun midang khat a sawl kit a; zia pa vang chu a la that tau a; zia gual ma chun midang dang le, a khen a la vuau a, a khen a la that tau hi.
6A chapa khat neisun a doichuam ma ma chu a um nalai a; ama chu a nunung pen in a sawl ah, “Ka chapa hi vang a la ja deu in au,” a tia,
7Himaleh, lou bawlte chun, “Zia hi a go lua ding pa chu ahi; that hitiu, chutileh a go chu chang mai ding I hiu,” a la tiu a.
8Tichun, a la man in, a la that tau a; grep huan ah kipat chun a paidok tau hi.
9Ahileh, zia grep huan neipa chun bang a hun law ta diam? Hung intin a lou bawlte chu hung sumangthai intin, a grep huan chu midang kiang in pedok ta’n a.
10 #
Sam 118.22,23 Zia gual ah Lekha Thiangtho ah kizik hi a la sim kha lo la hiu em?
“Insate’n a doi lo uh suang kha,
zia suang ma kha,
a kil ah suang phachuam pen a hung hi’n;
11zia hi Lalpa thilbawl chu ahi,
I mit muu in a lamdang ahi,
ti a kizik kha,” a tia.
12Zia thu chu amau demna a gen ahi ti a het phat un, ama chu mat a nuam tau a; himaleh, mipite chu a lau tau a; tichun, ama chu nusia in a chia mang tau hi.
Leiman Piak Ding Thu ah Dotna
(Mat 22.15-22; Luk 20.20-26)
13Pharisaite khenkhat leh Herod pawl ah mite a thugenna kipat matna ding hawl in a hun sawl ua.
14A hung tun phat un a kiang in, “Hotupa, midik tak la hi, kuama khawksak chuam la nei pua’n, kuama khen chuam nei diak lo in, thutak in Pathian lampi chu la zilsak zaw sek hi, ti ka hiau hi. Aleh, Kaisar kiang ah leiman piak hi a thiang em, thiang lo?
15Pia ding ka hiu em, pelo ding?” a hung tiu a. Himaleh, ama chun a dawhau a la hia, a kiang un, “Bangatia ei ze-et la hiu em? Dangka thik denarii khat ei hun etsak tiam un,” a tia.
16Tichun, a hun lau ah, ama chun a kiang un, “Zia hi kua luchang lim leh kua min a hem?” a tia. Amau chun, “Kaisar,” a tiu a.
17Ziaphatchun, Jesu’n a dawnhu a, “Kaisar thilte chu Kaisar kiang in piau inla, Pathian thilte chu Pathian kiang in piau in,” a tia. Amau chun lamdang a sa ma mau hi.
Thawkitna Thu A Dotnau
(Mat 22.23-33; Luk 20.27-40)
18 #
Nas 23.8
Ziazaw chun, thawkitna a um puai tite Sadukai haw lak ah khen khat a hung un, zia gual hin a hung dong tau a:
19 #
Dan 25.5
Hotupa, Mosi khan zia gual hin a la zik a, “Pawsal khat in cha nei man lo in a ji chu thi’san ta leh, a suapipa’n lua in, chi a suan piak ding ahi,” ti ahi.
20Unau pawsal pasagi a um un, a upa pen chun ji a nei ah, suan bei in a thi ta’n;
21chuleh, a pani’na pa chun a lua a, suan bei ma’n a thi kit a; a pathumna pa chunle chutima chun a kichenpi kit a;
22a pasagina tiang in a kichenpiu a, pakhat chânle suan a nei ta puau a, a tawp in numei chule a hung thi tai.
23Thawkit hun ah chun ama chu kua pen ji a hita diam? Pasagite chun a kichenpi chiat tangal un, a tiu a.
24Jesu’n amau haw chu a dawnhu ah, a kiang un, “Pathian lekha thu leh Pathian thilhitheina la het lo ziak ua ngaikhial sek hilo la hiu em?
25Mithite a thawkit tak leh vang, kichenpi ti leh kichensak ti bangma um ta pua’n tin; vansawlchâkte gual in um zaw ta’n au.
26 #
Pdt 3.6
Mithi thawkitna thu Mosi lekhabu chun, chîmbuk ah Pathian in, ‘Kei Abraham Pathian, Isak Pathian, Jakob Pathian ka hi,’ tia a gente kha sim kha’lo la hiu em?
27Ama chu mithite Pathian a hipua’n, a hingte Pathian ahi zawi; la ngaikhial nasa ma mau hi,” a tia.
Thupiak Thupipen
(Mat 22.34-40; Luk 10.25-28)
28Chun, lekhazikte lak ah mi pakhat a hung ah, a lawite kinialna chu a la ngaitha zing ah, Jesu’n amau chu a dawnhu dikten hi ti a het phatin, a kiang in, “Thupiak zosia lak in khoi hi a thupi pen diam?” ti’n a hung dong a.
29 #
Dan 6.4,5 Jesu’n, “Thupiak lak lak ah thupi pen chu zia hi ahi: ‘Aw Israel, ngai tiam un! Lalpa I Pathian uh chu Lalpa pakhat bep ahi.
30Ziaziakchun, Lalpa la Pathian chu la lunggil zosia’n, la thagau zosia’n, la lungthim zosia leh la hatna zosia’n la hepi ding ahi,’ ti hi.
31 #
Thp 19.18
A zaw ah zia hi ahi: ‘Nangma la kihepi gual in la vêngte le la hepi ding ahi,’ ti hi. Ziate sâng ah thupiak thupi zaw him him a um puai,” ti’n a dawnhu a.
32 #
Dan 4.35
Ziaphatchun, lekhazikpa chun a kiang in, “A phai, Hotupa, thudik tak la gen hi: Pathian chu pakhat bep a um in, ama tilo chu a dang a um puai;
33 #
Hos 6.6
ama chu lunggil zosia, hetthiamna zosia, thagau zosia leh hatna zosia ah hepi ah, eima kihepi gual ah vêngte hepi chu hâlmang thillat leh kithoina sâng inle a thupi zaw ma ma hi, ti la gen dik hi,” a tia.
34 #
Luk 10.25-28
Pil tak in a dawnhu hi ti Jesu’n a mu in, a kiang in, “Pathian gam chu la gamlat ta puai,” a tia. Zia nung ah chun min thu a dong kit ngam ta puau hi.
David Chapa Thu ah Dotna
(Mat 22.41-46; Luk 20.41-44)
35Jesu’n tempul ah thu a zilsak lai in, “Bangatileh, lekhazikte khan Messiah hi David Chapa ahi, ti sek a hiu em?
36 #
Sam 110.1
David khan la, Thagau Thiangtho in, a kam ngei in,
‘Lalpa chun ka Lalpa kiang ah:
La mêlmate la keng nuai ah ka koi piak masia,
ka changlam ah kichu’n,’ a la ti’n,” a tia.
37David ngei khan ama chu, “Lalpa a ti’n; bangatileh, a chapa hi ziang thei ahi diam?” a tia. Mipi vantangte chun kipak tak in a thugen chu a ngaithau a.
Jesu’n Lekhazikte A Demna
(Mat 23.1-36; Luk 20.45-47)
38A thu zilsakna chun, lekhazikte lak ah pilvâng un; amau chun puanâk chual âk ah vâk vêl vêl a nuam un, kaithial lai ah chibai kibûk haw hi a nop lam uh ahi’n;
39sunagog ah chutna hoi pen bang, ankuang ûmna mun hoi pen bang a doichuam sek ui.
40Meithâite sum a ne zo un, mi thepna’n sawtpi pi a pauchap ui. Ziate chun thiamlo channa huaisia zaw tuak in au, a tia.
Meithâinu Thilpiak
(Luk 21.1-4)
41Jesu chu thawlawm bawm zawn in a kichu; thawlawm bawm ah mi sum khiak dante chu a en a. Mi hausate chun tam tak tak a khiau a.
42Zia hun ah chun meithâi chaga tak khat a hung ah, sum-eng paisa pani a hung khia, zia chu thik paisa khat tawh kibang bep ahi’n.
43A nungzuite chu a kiang in a ko ah, a kiang un, “Titakzet in ka hil la hiu, thawlawm bawm ah khiate zosia lak in zia meithâi chaga tak hin a khia tam pen hi.
44Midang zosia khan a neival uh a khiak uh ahi’n; ama hin chu a nei sun sun, a hinpi ding cheng chu a piak ziang ahi,” a tia.
Currently Selected:
MARKA 12: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
