MARKA 14

Jesu Tha Ding Dan A Ngaituanau

(Mat 26.1-5; Luk 22.1-2; Joh 11.45-53)

1 # Pdt 12.1-27 Chiakân kût leh vaithum thawipanglo kût bawlna dingin ni ni a um nalai a. Thiampulalte leh lekhazikte chun, lungthim thiam ah mat ah tha theina ding a hawl tau a;

2himaleh, “Kût ni’n vang hi ki’hen, achutiloleh, mipi lak ah buaina hung um kha’n a,” a tiu a.

Bethani Khua Mari’n Jesu Sathau A Nu’

(Mat 26.6-13; Joh 12.1-8)

3 # Luk 7.37,38 Bethani khua phâk, Simon In ah ankuang a up pet in, numei pakhat spiknard thau gimtui man tam tak, alabastar bûk ah hun chawi in a hung lut ah; a bûk chu a hun tatkêk ah, a luchung ah chun a hun sung a.

4Zia tak ah um khenkhatte chu a lungawi ta puau a, “Bangatia, zia sathau hi hiti suk pâmmai mai mai a hem?

5Dangka za thum vêl ah zok ah, mi gentheite kiang ah piak zawk ding a hia,” ti’n, ama chu a phun khum tau a.

6Jesu chun, “A hi’ hi’ chu hi’sak tau in, bangatia la sukbuai uh a hem? Ka chung ah hin thilpha tak a bawl ahi.

7 # Dan 15.11 Migentheite chu la kiang un a um zing un, a chung un la nop hun hun un thilpha la bawl piak thei ui, kei vang la lak un um zing lo ding ka hi.

8Ama hin a theitawp a sua ahi; ka taksa hi vui dingin thau ei la nu’ khol ahi hilam.

9Titakzet in ka hil la hiu, khawvel pumpi chanchinpha kigenna taphot ah, zia a thilbawl hile ama hetzingna dingin gen khawm pek in au,” a tia.

Jesu Matpiak Ding Juda’n Lem A Guat

(Mat 26.14-16; Luk 22.3-6)

10Chun, Juda Iskariot, sawm leh nite lak ah pakhat chu ama mat piakna ding lemchâng ngaitua in, thiampu lalte kiang in a vachia a.

11Zia thu chu a la het un a kipak ma mau ah, dangka piak dingin a la tiam tau a. Zia kipat chun a mat ding dan a ngaitua pan tai.

Chiakân Kût Mang Ding ah Kisakna

(Mat 26.17-25; Luk 22.7-14,21-23; Joh 13.21-30)

12Vaithum thawipanglo Kût bawl ni, ni masa pen ah, Chiakân Kûtna ding gancha a tha niu ah chun, a nungzuite chun a kiang in, “Chiakân Kût jan an nêkna ding mun, ka vachiau ah, ka va guanggalna ding uh chu khoi tak a hem?” a tiu a.

13Ziaphatchun, a nungzuite lak ah pani a sawl a, a kiang un, “Khawpi valut leu chin pawsal khat tuibêl pua vamu’n la tiu in, zia pa chu zui unla.

14Ama lutna In pen ah chun, a Inneipa kiang in, ‘Ka hotupau in, Malzin pindan chu khoi tak a hem, ka nungzuite tawh jan an ka upkhawmna ding uh chu?’ a tii, vati leu chin,

15ama chun, Indan chungnung lam ah pindan kiningting tak chu hun kawkmu intin, zia tak ah chun va guanggal un,” a tia.

16Tichun, a nungzuite chu a chiau a, khawpi chun a lut ua, a kiang ua a gen gual gual khan a vamu ngal ziang un; zia tak ah chun Chiakân Kût jan an ding chu a guanggal tau hi.

17Nitâk ah chun, sawm leh nite tawh a hung khawm tau a.

18 # Sam 41.9 Tichun, a kichuu a, ankuang a hun ûm phat un Jesu chun, “Titakzet in ka hil la hiu, ka an nêkpi, la lak ua pakhat hin ei matsak ding la hiu,” a tia.

19Amau haw chu a hung lungkham tau ah, pakhat khat in a kiang ah chun, “Kei vang hi pua’ng ka maw?” ti’n a dong chiat tau a.

20Chun, ama chun a kiang un, “Nang uh sawm leh nite lak ah pakhat, ka kuang ei sawkpi pa hi ahi.

21Mihing Chapa hi, a chung thu a la kizik gual in um ding him chu ahi; himaleh, Mihing Chapa matsak ding pa chung chu a gik hi! Ama chu a la pianda mai leh ama â dingin phazaw ding ahi,” a tia.

Lalpa janan Bawl Patna

(Mat 26.26-30; Luk 22.14-20; 1 Ko 11.23-25)

22Chutia, an a nêk lai ua chun, Jesu’n vaithum chu a la, a maljawl ah, a phelsua ah a kiang un a pia, “La un, zia hi ka taksa ahi,” a tia.

23Zia gual ma chun, no chule a la, kipak thu a gen zaw in a kiang un a pia, a leng un a dawn chiat tau a;

24 # Pdt 24.8; Jer 31.31-34 Jesu’n a kiang un, zia hi ka thisan, mi tam tak â ding ah pawt, thuthung chu ahi.

25Titakzet in ka hil la hiu, Pathian gam ah a thak ah ka dawn ding ni a tun kit masia, zia grep tui hi dawn kit talo ding ka hi, a tia.

Peter in A Kilepsan Ding A Genlawkna

(Mat 26.31-32; Luk 22.31-34; Joh 13.31-38)

26La pakhat a sak zawu chun Oliv tâng lam in a chiau a.

27 # Zek 13.7 Jesu’n a kiang un, “Tu’jan ah hin la leng un ei tai taisan ding la hiu;

‘Belampu chu vua’ng ka tin,

belamte chu jam chek sik sek in au,

ti kizik gual ah khan’.

28 # Mat 28.16 Himaleh, ka hung thawkit nung tak leh, la malam un Galili lam ah a la chia ding ka hi,” a tia.

29Ziaphatchun, Peter in a kiang in, “Midang zosia jam leule kei chu jam pua’ng ka,” a tia.

30Jesu’n a kiang in, “Titakzet in ka hil la hi, Tu’ni, tu’jan ngei ngei ah hin, âk nivei a khuan ma’n thumvei ei kilepsan ding la hi,” a tia.

31Himaleh, ama chun, titakzet in a gen a, “La thi thina thi ding hiziang lengle hun kilepsan lo hial ding ka hi,” a tia. Zia gual chun a hun ti chiat un.

Gethsemani ah Jesu Pauchpna

(Mat 26.36-46; Luk 22.39-46)

32Ziazaw chun, Gethsemani a tiu mun chu a tung ua; a nungzuite kiang ah chun, “Ka pauchap sung in zia tak ah hin a la chuu in,” a tia.

33Peter, Jakob tawh Johan chu a pui chuam ah, nasa tak ah thavai in a lungkham ma ma a.

34Ziaphatchun, a kiang un, “Thivang hial ah lunggim ka hi, zia hin a la um unla, a la hak zing un,” a tia.

35Chun, a malam deu un a vachia a, leitual in a kiseppai ah, a thei ahileh zia hunbî chun a pêltheina dingin a pauchap a:

36“Abba, he pa, nang â dingin thil bangkim hi’thei ahi’n, ziaziakchun, zia no hi ei lakmang piak mai in; himaleh, keima thu hilo in, nangma thu hizaw hen,” a tia.

37Chun, a hung ah, amau haw chu ipmu’n a hung mu ta’n, Peter kiang in, “Simon, ipmu la hi maw? Dakkâl khat sung ziang le hak zo lo la hi em?

38Thepna la lut lona ding un kiging zingin pauchap un, thagau in vang a ngapcha’n, taksa vang a hat lo ahi,” a tia.

39Chun, a vachia kâng deu kit ah, a gen ngai ma kha gen in a vapauchap kit a.

40A hung kit ahileh amau haw chu ipmu ma’n a hung mu kit ah, a i-mut uh a suak ma ma ngal ua, dawnhu ding dan le a he ta puau hi.

41A hung kit thumveina chun a kiang un, “Ipmu ah kichawl zing nalai ding la hiu em? tu’hin vang a hun ahi tai, a hun tung ma ahi tai; Mihing Chapa hi migilote khut ah matsak ah um ding ahi tai.

42Kipan unla, chia tai tiu, en tiam un, ei matsak ding pa saw a hung tung ding ma ma ahi tai,” a tia.

Jesu A Matnau

(Mat 26.47-56; Luk 22.47-53; Joh 18.3-12)

43Zia thu a gen lai tak chun, Juda chu a kiang a hung tung ngal ta’n, ama chu sawm leh nite lak ah pakhat kha a hia. Ama’n a hun pui Thiampulalte leh lekhazik upate tawh mipite chu, chemjam tawh, khetbûk tawh a hung tung ngal tau hi.

44Ama matsak ding pa chun a kihiat tuana ding un, “Ka chawp pen pen chu hiding ahi, zia mi chu man in, bit tak in pui mai un,” a la ti’sa ahi.

45Tichun, a hung tun phatin a hun zuan a, “Hotupa,” ti’n a chawp a.

46Tichun, ama chu a man ua a pui tau hi.

47A kiang ah ding pakhat chun a chemjam a hun jukdok ah, thiampu lianpen suakpa chu a hun sat leh, a bil a satthâk piak a.

48Ahi’n, Jesu’n a kiang un, “Suammang man ding gual ah ei man ding ah chemjam tawh, khetbûk tawh hung kuan la hiu maw?

49 # Luk 19.47; 21.37 Tempul ah thu zilsak ah ka um lai khan la lei man puau a; himaleh, Pathian Lekha thu chu a guitung ding him ahi,” a tia.

50A leng un ama chu jamsan in, a tai mang tau hi.

51Chun, tangval kua a hem pakhat hin, puan malngat bep sil in a hun zui ah. Ama chu a la man ua,

52ahi’n, a puan malngat sil lai chu nusia in, a ngawn chang in a tai mang tai.

Jesu Vaihawmte ma-âng ah A Dinna

(Mat 26.57-68; Luk 22.54-55,63-71; Joh 18.13-14,19-24)

53Tichun, Jesu chu thiampu lianpen kiang in a pui un; thiampu lalte, upate, lekhazikte a hung khawm un.

54Peter in gamla tak in a zui a; thiampu lianpen In tiang in a zui tung a; zia tak ah chun vêngtute tawh mei awi in a kichuu a.

55Thiampu lalte tawh vaihawm pawl zosia chun Jesu chu a tha theina ding un, a hêkna ding a hawl ua; himaleh, a mu zo puau a.

56Mi tam tak in juau in suanlam a siam ua; himaleh, a suanlam siamteu chu a kituak thei puai.

57Dik lo tak ah hêk ding kua lawi a hem khat a hung kipan un, hiti hin a tiu a:

58 # Joh 2.19 “Zia pa hin, ‘Zia tempul khut ah kisa hi susia’ng ka tin, khut ah sak lo, ni thum sung in tungding ing ka,’ a tii,” a tiu a.

59Himaleh, chutichun le a hêkna thuu chu a dik thei diak puai.

60Ziaphatchun, thiampu lianpen chu a lak un a hung ding ah, Jesu kiang ah chun, “Bangma dawnhuna ding neilo la hem? Bang a hem a hun heknau hi?” ti’n a dong a.

61Himaleh, ama chu a thip bik bek ah, bangma cha’n a dawnhu puai. Ziaphatchun, thiampu lianpen chun a dong kit a, “Messiah, Maljawlna Chapa chu la hi em?” a tia.

62 # Dnl 7.13 Jesu chun:

“Ka hi. Dan tak leh Mihing Chapa hi,

thil hitheipa khut changlam ah kichu, van sûmpi ah hung suk,

hun mu ding la hiu,” a tia.

63Ziaphatchun, thiampu lianpen chun a puan a hun botthêk ah, “Hêkna dang bang a kul nalai em?

64 # Thp 24.16 A Pathian gensiatna nangmau ngei inle la he tau hilo maw? Bangti’n la ngai awm?” a hun tia. A leng un ama chu thitâk in a guat tau hi.

65Khenkhat in a chil uh sekkhum in, a mai a tuam piak ua; a bêng un, a hil lut lut un, “Thu gen in,” a tiu a. Vêngtute chun a tûk kawm un a bêng malam pek tau a.

Peter in Jesu A Kilepsanna

(Mat 26.69-75; Luk 22.56-62; Joh 18.15-18,25-27)

66Peter chu nuai lam Intual ah a um pêt in, thiampu lianpen suak numeite lak ah pakhat a hung a.

67Peter mei-awi chu a mu phât in a vak en a, “Nangle Nazareth Jesu lawite hilo la hem?” a tia.

68Ama chun, “La thugen chu ka hekha puai, a ngaina le ka hepuai,” ti’n a kilep ah, Intual lam in a vapawt ah, tichun, âk a hung khuang tai.

69Chuleh, numei chun a hun mu kit phatin, a kiang ah dingte kiang ah chun, “Zia pa hile a lak ua mi ahi,” a tia.

70Himaleh, a kilep kit a; chuleh, sawt lo nung in a kiang ah dingte chun Peter kiang in, “Nangle a lak ua mi la hi ngei hi, Galili mi la hingal in,” a tiu a.

71Himaleh, ama chun, “Zia la mi gen pau chu ka he him him puai,” ti’n a kikhâm hial a.

72Zia lai tak chun âk a ni veina a hung khuang tai. Ziaphatchun, Peter in a kiang ah Jesu’n a gen: “Nang in âk nivei a khua’n ma’n thumvei ei kilepsan ding la hi,” a ti kha a hun hedok ta’n; tichun, leitual ah kichu suk in a kap tai.

Currently Selected:

MARKA 14: VAIPBSI

Highlight

Copy