YUNIRÜBO RHIMO 9
9
Saul Mulong Müthrikhi
(Yunir 22.6-16; 26.12-18)
1Tüshe Saulnü judü lang Atungpuh jingyanrübo thsümüchide laksahde alakheah. Apinü achangbe amükeambuh ki yü 2tüsho athrürü yungsho aliberü thsüthsü apinü limro ching ngüsho Jirusalem lim rhüka lubah arüpü Damaska ching sinagogbo kilim kihüm jihang de api ki keokhi. 3Tüsho api hantsahde alachoki Damaska thüninde arü, tüsho zukleangnü thüning limnü api mükamde ayin tahkhi. 4Judüki api alo kheak keam, tüsho api ki thakhi düsheak so, “Saul, Saul, tümüde nünü I thsümüchicho?” 5Tüsho apinü tha, “Nü she a Atungpuh?” Atungpuhnü tha, “I nünü athsümüchibuh Jisu ah; 6tüshe asürang tüsho kiuto ching yüzahang, tüsho tümü rhimobeanü nü ki thabah.” 7Api lung tsahkhi mihtsürübo ju düsheak a sobah she mülakhi hode thiyu müthade zhip. 8Saulnü alo kheaknü asürü; tüsho küyimki api mükbo khimshuhkhea, apinü tümü mükheahkhuk; jumonü arünü akhahnü thobah Damaska ching arü. 9Tüsho nimung mahsam apinü mükheahkhukde mütsühyungde alakheah.
10Kheakü Damaska ching Khristanrü amung Anania lakheah. Atungpuhnü michih ching api ki tha, “Anania.” Apinü alo, “I ha ching lah, Atungpuh.” 11Atungpuhnü api ki tha, “Langakindo alakhi kiudunglimro kheak Juda yam ching yüang tüsho Tarsa chingnü mihtsürü khülang amung Saul dünkheak keokhiang, tümüde api tamkhüntamnüde lah. 12Tüsho mihtsürü khülang amung Anania arübah api mük bitshihpü anihbuh kheak akhahbonü nimde michih ching ngüdo.” 13Tüshe Ananianü alo, “Atungpuh, ha mihtsürünü Jirusalem ching nü yo amüsührübo kheak küdükhüh amütsü rhimokheanü ahihdo kilimnü inü sodo; 14tüsho ju ching nü mung jirü alala rhükpü amükeam putungrübo kilimnü api thiyukhüm-sühmüh lah.” 15Tüshe Atungpuhnü api ki tha, “Yüang, tümüde api ju khiungkerü le kiulongthsürübo tüsho Israel mihtsürübo ki I mung mükheahshihpü thsüde I tankihpü inü mokhitdo; 16tümütüsho I mung dünkheaknü küdükhüh thsünübeanü inü api ki huhbah.” 17Jumonü Ananianü tsahmusu tüsho thüyam ching ju yüzah. Tüsho akhahbo api kheak nimde tha, “Keoniorü Saul, nü mük bitshihpü tüsho Amüsüh Menü mide akamshihpü, limro ching nü ki akhiukbuh Atungpuh Jisunü I nü kilim thiyikheah.” 18Tüsho zukleangnü tümüanü thüngüh küpbo nangde api mükbo chingnü ayokhi tüsho api müknü ngüde kam. Apinü wusu tüsho bapti, 19tüsho tsühyungbe tsühbah reangzahde kam.
Saulnü Damaska ching Thsangyuthsangrakhi
Nimung ashang api ju jingyanrübo lung Damaska ching lakheah. 20Tüsho zukleangnü apinü sinagogbo ching Jisu dünkheak zhiyukde tha, “Api ju Thrünpuh tsührü ah.” 21Tüsho api yu sorü alalanü müyinsah tüsho tha, “Api ju Jirusalem ching ha buh mung jirü thsümüchibuh yung de, tüsho arübo rhüka bede yünü amükeam putungrübo kilim jihpü ha ching arükhi yung de?” 22Tüshe Saul sühmüh alü düküngde kam, tüsho Jisu ju Khrista de mütsanjihkhinü Damaska ching lakhi Jihudarübo yingyingde kamshih.
23 #
2 Kor 11.32,33 Nimung ahihkhüh ho dunglim, Jihudarübonü api laksahpü rük yim, 24tüshe arünü rük thsükhi Saulnü mükheahabah. Arünü api laksahpü azhing ayin chipi ripit neakde alakheah; 25tüshe api jingyanrübonü azhing ching bea lu tüsho muluk chingnü rhü yande akishih.
Saul Jirusalem ching
26Tüsho küyimki api Jirusalem ching arükhea, apinü jingyanrü bolung bepü mürang; arü alalanü api tre, tümüde api ju jingyanrü khülang ah de arünü akin müla. 27Tüshe Barnabanü api bea lubah amüsühthsangyurübo kilim arü, tüsho apinü Damaska limro kheak anihbuh ki asukbuh Atungpuh ngükhi tüsho Jisu mung chingnü mulong tode Damaska ching thsangyuthsangrakhi thaa huh. 28Jumonü apinü Jirusalem ching arü bolung yüla arüla de, 29Atungpuh mung ching mulong tode thsangyuthsangra. Apinü Greek-yu tharü Jihudarü azhihde tha; tüshe arünü api laksahpü yim. 30Küyimki keoniorübonü ju mükheahkhea, arünü api Kaesarea ching bede aki, tüsho Tarsa lim yüabahshih.
31Junangde Judea, Galilee tüsho Samaria ching borü alala mungtsü lade tankih-a lakheah; tüsho Atungpuh trekhi ching tsahde tüsho Amüsüh Menü mulong shukheamkhi ching wüh bude kam.
Peter Lydda tüsho Joppa ching
32Peternü lomi dangpung alala hode yü, junangde Lydda ching lakhi amüsührübo kilim she aki. 33Ju ching apinü kam tizheah thripshe tukthsükhi amung Aenea ngü. 34Tüsho Peternü api ki tha, “Aenea, Jisu Khristanü nü thsüngujihchoh; asürang tüsho nü yapkiu lukang.” Tüsho apinü nahdü lang asürü. 35Lydda tüsho Sharon ching larü alalanü api ngü, tüsho Atungpuh kilim rholo.
36Joppa ching aliberü akinrü amung Tabitha (Greek yunü Dorka, amütsan shihmüchi) lakheah. Alibe ju rhimo atsü tüsho rungzürungdo rhimonü mide alakheah. 37Ju kim ching alibe tukthsü tüsho sheabah; alibe pang ju müsüh tüsho achangbe khiungshak ching yapshih. 38Lydda ju Joppa phünide alakhinü ju ching Peter lah de akinrübonü sobah api ki mushushihpü mihtsürü mahne yüshih, “Muzhobah mashude isa kilim arang.” 39Jumonü Peternü tsahmusubah ane lung yü. Tüsho küyimki api arükhea, arünü api achangbe khiungshak ching bede yükih. Khimoberü alala api rheang ki tripde zhip, tüsho alibe arü lung lachoki Dorkanü pangkhümpü le khimmihbo keakkhi huh. 40Tüshe Peternü arü alala wungdo wukhiukshihbah khukning tüsho tamkhüntamnü; jushu pang lim ju rholode apinü tha, “Tabitha, asürang.” Alibenü amükbo rheak tüsho küyimki anihbenü Peter ngükheanü dukomusua bin. 41Apinü akhah chunga yüshih tüsho anihbe thomusu. Judüki akinrübo le khimoberübo jibah alibe ju arhang kama arü kilim jih. 42Ju Joppa alala ching mükheahde kam, tüsho ahihkhühnü Atungpuh kheak kin. 43Tüsho apinü Joppa ching nimung ashang shihküp-rhimorü Simon lung la.
Currently Selected:
YUNIRÜBO RHIMO 9: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
