ABEKHIT 3
3
Thrünpuhnü Mosa Jikhi
1Kheakü Mosanü Midiarü amükeamrü akü Jethro yo namfimihnubo neakde alakheah. Apinü namfimihnubo ju loshelo hode bede yübah Thrünpuh wung Horeb ching arü. 2Tüsho sangrung phulung motru khülang ching Atungpuh yunirü api ki akhiuk. Sangrung kheak mo trude lalashe sangrung ju mütak. 3Mosanü lüm, “Ha khide amüyinsahbe ah, tümü thsükhi sangrung mütakchonü inü thüninde yübah kheahanü.” 4Mosa thüninde arükhi küyimki Atungpuhnü angükhea, sangrung phulung chingnü Atungpuhnü Mosa jide tha, “ Mosa! Mosa!” Apinü alo, “I ha kheak lah.” 5Thrünpuhnü tha, “Ha dangpung thüninde darü; nü jingkhümpü yihkhitang, tümütüsho nü zhipkhi dangpung ju amüsüh lo ah.” 6Kheaküshe apinü tha, “I nü pü Abraham, Isak tüsho Jakob Thrünpuh ah.” Judüki Thrünpuh kheak kheahpü trekhinü Mosanü amiro khuramabah.
7Tüsho Atungpuhnü tha, “Inü atsütsü I mihtsürübo Ijip lomi ching dukmüsüpkhi ngüdo; arü azhorü kuhi chingnü khümkhitpü zhikhi inü sodo; arü thsünü alala inü mükheahlah. 8Ijiprü khah chingnü arü khümkhitpü tüsho ju lomi chingnü bekhitbah alomi atsü tüsho niuhke le mukhuke bukkhi Kananrü, Hitrü, Amorrü, Perizrü, Hivrü tüsho Jebusrü lapung bede ayüpü I akikheah. 9Kheakü Israelrübonü azhikhi inü sodo, tüsho Ijiprübonü arü thsümüchikhi inü ngüdo. 10Jumonü kheakü Ijip lomi chingnü I mihtsürübo bekhitpü inü nü Pharao kilim yüshihchoh.” 11Tüshe Mosanü Thrünpuh ki tha, “Pharao kilim I yüpü tüsho Ijip chingnü Israelrübo bekhitpü I she a?” 12Thrünpuhnü alo, “I nü lung labah, tüsho küyimki nünü I mihtsürübo Ijip chingnü bebah akhiukbanü nüsanü ha wung kheak I kingaünbah tüsho junü inü nü yüshihkheah de amütsan thsübah.”
13Mosanü Thrünpuh ki tha, “Küyimki I Israelrübo kilim yübah, ‘Nüsa bebuhrü Thrünpuhnü I arüshihkheah’ de athaba tüsho arünü I ki, ‘Api mung she a?’ de keokhisho inü arü ki tümü thaba?” 14Thrünpuhnü Mosa ki tha, “I JU I AH . Nünü arü ki hade thaang, ‘I AH de athabuhnü I nüsa kilim arüshihkheah.’ ” 15Kheaküshe Thrünpuhnü Mosa ki tha, “Israelrübo ki ha thaang: Atungpuh nüsa jipürü Abraham, Isak tüsho Jakob Thrünpuhnü I nüsa kilim arüshihkheah. Ha kamruhroro thsungkheak I mung ah, tüsho arübe lün alala thsungkheak ha I mung labah. 16Yüang tüsho Israel azothsürübo bemukhungbah thaang, Atungpuh nüsa jipürü Abraham, Isak tüsho Jakob Thrünpuh I ki akhiukbah tha, I nüsa kilim arükheah tüsho Ijiprübonü nüsa kheak rhimokhi alala ngüdo. 17Inü nüsa Ijiprü azhorü kuhi chingnü bekhitbah Kananrü, Hitrü, Amorrü, Perizrü, Hivrü tüsho Jebusrü lomi niuhke tüsho mukhuke bukkhi lomi ching bebah ayüpü alokhido. 18Nünü athakhi I mihtsürübonü anibah, judüki nü tüsho azothsürübo alala Ijip kiulongthsüpuh ki yübah thaang, ‘Atungpuh Ibrirü Thrünpuh isa ki akhiuka huhdo. Jumonü isanü Atungpuh isa Thrünpuh ki kingaünpü sunglo ching nimung mahsam hantsah yüshang de mushuchoh.’ 19Wuto khahnü api ki münimkihsho, Ijip kiulongthsüpuhnü nüsa müyüshih de inü mükheahlah. 20Tüshe inü I khah chungde Ijip kheak lakbah, junangde khinthiyinbebo rhimobah. Jushu apinü nüsa yüshihbah. 21Inü Ijiprübo ki nüsa muzhoshihbah tüsho küyimki nüsa yübanü khahkeang mutso. 22Aliberü abannü nihbe yamhingrü Ijipberübo ki tüsho Ijipberü khürü anihbe yam ching larü lasho arübo ki khimmih, suna, shotoyinchi tüsho shotolungbo kheanga lubah tüsho Israelrübonü jurübo arü tsührü athrürü le aliberü kheak phungyukjihbah; junangde nüsanü Ijiprü lakhit hanbah ayübah.”
Currently Selected:
ABEKHIT 3: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
