THRÜNTAN 21
21
Isak Zübekhi
1Apinü athakhi nangde Atungpuhnü Sara rhua kheah, tüsho apinü alokhikhi nangde Atungpuhnü Sara thsungkheak rhimo. 2Tümüde Thrünpuhnü api ki akhukhi kim ching Sara mübünkeangde kam, tüsho Abraham anihbuh ashinbuhrü lachoki tsührü khülang zübejih. 3Tüsho Saranü api kilim zübejihkhi atsührü mung Abrahamnü Isak de ji. 4Judüki Thrünpuhnü api ki thiyukhüm jihkhi nangde atsührü Isak nimung tizheah bankhitchoki Abrahamnü tsütabah. 5Isak zübechoki Abraham kam 100 azorü lakheah. 6Tüsho Saranü tha, “Thrünpuhnü I kilim amünepü hande arüjih, tüsho ha dünkheak sorü abannü I ki münejihbah.” 7Alibenü tha, “Saranü tsührü khülang mütrübah de Abraham ki shepünü thaa laba? Tütüshe inü anihbuh ashinbuhrü kamchoki api kilim tsührü khülang zübejihdo.” 8Khungarü ju zode arü tüsho niuh cham, tüsho Isak niuh cham nimung Abrahamnü thünio ato khülang thsakham.
Hagar tüsho Ishmael Tsoshihkhi
9Tüsho Ijiprü Hagarnü Abraham kilim zübejihkhi azürü ju apheanaleangde Saranü ngü. 10Jumonü alibenü Abraham ki tha, “Ha azhorü liberü tüsho anihbe tsührü yankhita bahang; tümüde ha azhorü tsührünü I tsührü Isak lung yamrüplurüp mulushih.” 11Tüsho atsührü dünkheaknü Abraham khide masühde alakheah. 12Tüshe Thrünpuhnü Abraham ki tha, “Azürü tüsho nü yo azhorü liberü dünkheaknü nü masühde düla. Saranü tümüpürü nü ki thadünü, anihbe yu aniang; tümütüsho Isak hode inü alokhikhi nü tsühsoniusobo labah. 13Tütüshe inü azhorü liberü tsührü she trükshih khülang kamshihbah, tümütüsho api nü müjih ah.” 14Jumonü Abrahamnü yapsu mükikde asürü, tüsho yikhap le shihküp-keluh lubah Hagar dubuh kheak yihkihjih tüsho azübuh ju bebah thiyia tsoshih. Alibenü chamachih tüsho Beersheba sunglo ching rümde tsah.
15Küyimki shihküp-keluh ching yo ke bankhea, alibenü azübuh ju sangrung khülang khüp zojih. 16Tüsho alibenü limthrip 100 bande yübah bin, tümüde anihbenü lüm, “Inü azübuh shekhi mükheahkhuk.” Alibe ju ching binchoki atrippü tankih.
17Tüsho Thrünpuhnü azübuh tripkhi so. Judüki Thrünpuh yunirünü yinmi chingnü ji tüsho tha, “Hagar, nü tümü thsüa la? Dütre, tümüde azübuh kükheak lanü Thrünpuhnü api düsheak sodo. 18Asürübah azübuh shuhmusuang tüsho nü khahnü shuhang, tümüde inü api trükshih ato khülang kamshihbah.” 19Thrünpuhnü alibe mükbo khimshuhjih, tüsho kekhip khülang ngü. Alibenü yübah shihküp-keluh ching ju ke yuk, tüsho azübuh ju yungshih. 20Junangde azübuh lung Thrünpuh lakheah; api zode asürü tüsho sunglo ching lade sanglüh-kiprü khülang kam. 21Api Paran sunglo ching la; tüsho abenü Ijip lomi chingnü aniube lujih.
Abraham le Abimelek dükeak Thiyuchihchim
22Ju kim ching Abimelek tüsho api bonungrü limthobuh Phikol anenü Abraham ki tha, “Nünü arhimokhi lüpdükhi ching Thrünpuh nü lung lah. 23Jumonü kheakü, I le I tsührü yungsho I tsühsoniusobo kheak mülimde mürhimopü I ki thiyuchihchimang. Nü hanrü thsüde alakhi lo ching inü nü ki huhkhi nangde I tüsho alomi ki amuzho huhang.” 24Abrahamnü tha, “Inü thiyuchihchimbah.”
25Judüki Abimelek yamlarübonü kekhip khülang jangkhikhi dünkheaknü Abrahamnü Abimelek ki atsang. 26Tüsho Abimeleknü tha, “Ha shenü arhimokheanü inü mümükheah; nünü I ki mütha, yungsho khihni khiungde inü ju muso.” 27Jumonü Abrahamnü namfimihnu tüsho moshipungbo lubah Abimelek kilim jih, tüsho anenü thiyuchihchim thsü. 28Abrahamnü mihnu boto chingnü namfimihnunu dre 7 büthsüde zo. 29Abimeleknü Abraham ki keokhi, “Namfimihnunu 7 nünü büthsüde azokhi ha amütsan tümü a?” 30Tüsho apinü alo, “Nünü harü namfimihnunu 7 I khah chingnü alubah, junangde ha kekhip inü akiukheah de jurünü thiyumütsan thsübah.” 31Jumonü apinü ju dangpung ki Beersheba#Thiyuchihchim kekhip yungsho thüne kekhip. de ji, tümütüsho anenü ju ching thiyuchihchim thsü. 32Hanangde anenü Beersheba ching thiyuchihchim thsü dunglim Abimelek tüsho api bonungrü limthobuh Phikol ane Filistia lomi lim alode yü. 33Abrahamnü Beersheba ching tamarisk sang khülang khim tüsho ju ching apinü akheam müla Thrünpuh, Atungpuh mung ji. 34Tüsho Abrahamnü Filistia lomi ching kim ashang tsotsahde la.
Currently Selected:
THRÜNTAN 21: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
