JOHAN 18

Jisu Ramkhi

(Mt 26.47-56; Mk 14.43-50; Lk 22.47-53)

1Küyimki Jisunü harü yubo thakhea, apinü ajingyanrübo bebah chamachih tüsho Kidron ayung hode yü. Ju dangpung ching shahwün khülang lakheah tüsho Jisu le ajingyanrübonü ju ching yüzah. 2Tüsho api yinatsühbuh Judanü she ju dangpung mükheahkheah; tümüde Jisunü ju ching ajingyanrübo alochode shorude la. 3Jumonü Judanü bonungrü khürü tüsho amükeam putungrübo le Pharisirübonü athiyikhi arüngyam aheangrübo bebah thsühnuk shuh tüsho tsünpung le tsünduphungbo hanbah ju ching yü. 4Jumonü Jisunü api kheak dünjipü alala mükheahbah mikhuhlim yü tüsho arü ki tha, “Nüsanü she yimcho?” 5Arünü api ki alo, “Nazarethrü Jisu.” Jisunü arü ki tha, “I api ah.” Tüsho api yinatsühbuh Juda she arü bolung zhip. 6Küyimki apinü arü ki, “I api ah,” de athakhea, arünü ashitlode yü tüsho alo kheak angak. 7Judüki apinü arü ki keolo, “Nüsanü she yimcho?” Arünü tha, “Nazarethrü Jisu.” 8Jisunü alo, “I api ah de inü nüsa ki thado. Jumonü I yimchosho, harübo arü limro ching yüshang,” 9junangde apinü, “Nünü sherü I kilim jihkheanü sheshe müdükheak,” de athakhi dünjipü lakheah. 10Judüki Simon Peternü nukshang dukkhitbah achangbe amükeambuh yamlarü tsülim nuku thsüpkhijih. Yamlarü mung ju Malka lakheah. 11#Mt 26.39; Mk 14.36; Lk 22.42Jisunü Peter ki tha, “Nü nukshang nuktrüp ching yukang. I Buhnü I kilim jihkhi pung inü muyungbea de?”

Anna miki Jisu

12Judüki Rom bonungrü le wühkenorübo tüsho Jihudarü torübonü Jisu rambah rhük. 13Tüsho arünü api ju akhuhde Anna kilim bede yü, tümüde api ju, ju kam achangbe amükeamrü Kaifa akü lakheah. 14#Jhn 11.49,50Mihtsürübo dünkheak mihtsürü khülang ashepü tsülah de Jihudarü ki ajuhkhi ju Kaifa lakheah.

Peternü Jisu Malokhikhi

(Mt 26.69-70; Mk 14.66-68; Lk 22.55-57)

15Simon Peter le jingyanrü püpünü Jisu dunglim yü. Kheakü jingyanrü püpü ju achangbe amükeamrünü mükheahde alakheah, tüsho Jisu lung achangbe amükeambuh yamkhuh ching yü. 16Tüshe Peter a wungdo ripit ki zhip. Judüki achangbe amükeambuhnü mükheahkhi jingyanbuhnü wukhiukbah ripit neakbe ki tha tüsho Peter ju beyuk. 17Judüki ripit neakkhi yamlaberünü Peter ki tha, “Nü she ha mihtsürü jingyanrü bolung belah yung de?” Apinü tha, “I a yung.” 18Tüsho yamlarübo le atorübo mo thsübah ju ching zhip, tümüde athsakkhinü arünü mo thüyüpde alakheah. Peternü arü lung zhipbah thüyüp.

Achangbe Amükeambuhnü Jisu ki Keokhikhi

(Mt 26.59-66; Mk 14.55-64; Lk 22.66-71)

19Judüki achangbe amükeambuhnü Jisu ki api jingyanrübo tüsho api kingaün-yakzan dünkheak keokhi. 20Jisunü api ki alo, “Inü alomi ki khipkhitde thado. Inü Jihudarü mukhungpung sinagogbo le arüngyam ching kamruhroro thsangyudo, tüsho inü ramde tümü mütha. 21Tümüde nünü I ki keokhicho? Inü arü ki thabah asorübo ki keokhiang. Inü tümü thakheanü arünü mükheahlah.” 22Küyimki apinü harü thakhea, ju ki zhiprü atorü bolung khülangnü amüyinü Jisu dambah tha, “Nünü achangbe amükeambuh ki ju ruk alobea de?” 23Jisunü api ki alo, “Inü amütsü asuka lasho, amütsü thiyumütsan thsang; tüshe atsü thsüa lasho, tümü thsükhi nünü I damcho?” 24Jushu Annanü jude rhükbah achangbe amükeambuh Kaifa kilim yüshih.

Peternü Jisu Malokhilokhi

(Mt 26.71-75; Mk 14.69-72; Lk 22.58-62)

25Kheakü Simon Peternü zhip tüsho anihbuh mo thüyüpa lu. Jumonü arünü api ki tha, “Nü she api jingyanrü bolung belah yung de?” Apinü reanglode tha, “I a yung!” 26Achangbe amükeambuh yamlarü bolung khülang, Peternü anuku thsüpkhibuh betsührünü tha, “Inü api shahwün ching ngükhi yung de?” 27Peternü kheaküshe reanglo; tüsho zukleangnü thununü khung.

Pilat miki Jisu Bedarükhi

(Mt 27.1-2,11-14; Mk 15.1-5; Lk 23.1-5)

28Jushu arünü Jisu ju Kaifa kinü kovünor yam ching bede yü, tüsho ju yapsu mükikde alakheah. Tüshe arü a kovünor yam ching müyüzah, tümüde arünü phungho-thünio tsühpü thsüde arü arüngde alakheah. 29Judüki Pilatnü arü kilim wukhiukbah tha, “Nüsanü ha mihtsürü azhihde tümü amudopü lubah arücho?” 30Arünü api ki alo, “Api amütsü rhimorü yungkhülaa isanü api nü kilim müjih.” 31Pilatnü arü ki alo, “Nüsanü api bea lubah nüsa yakzan yande mahkhapang.” Jumonü Jihudarübonü api ki tha, “Isanü sheshe asheshihpü yakzan müla,” 32#Jhn 3.14; 12.32junangde Jisunü api künangde ashebeanü amütsan thsüde athakhi dünjipü lakheah.

33Judüki Pilatnü thüyam ching yüzahlobah Jisu ji tüsho api ki tha, “Nü Jihudarü kiulongthsüpuh a de?” 34Jisunü api ki alo, “Ha nü küdahnü thacho shi dashi püpürünü I dünkheak nü ki thakhea?” 35Pilatnü alo, “I Jihudarü a de? Nü trükshih tüsho amükeam putungrünü nü I kilim jihkheah. Nünü tümü rhimokhea?” 36Jisunü alo, “I kiulongthsü ju ha lomi yo yung. I kiulongthsü ju ha lomi yo thsükhülaa, I jingyanrübonü keochihbah, junangde I Jihudarü kilim müjih; tüshe I kiulongthsü ju ha chingnü yung.” 37Jumonü Pilatnü api ki tha, “Judüasho nü ju kiulongthsürü a shi?” Jisunü alo, “I kiulongthsürü ah de nünü dükde thado. Ha dünkheaknü I zübekheah tüsho ha lomi ching arükheah, junangde inü thiyuro thiyumütsan thsübah, thiyuro yo thsürü abannü I düsheak anichoh.” 38Pilatnü api ki tha, “Thiyuro ju tümü a?” Tüsho küyimki apinü ha thakhea, apinü Jihudarü kilim wungdo wukhiuklobah arü ki tha, “Inü api kheak amülim tümü müyimkhit.

Jisu Sheshihkhi

(Mt 27.15-31; Mk 15.6-20; Lk 23.13-25)

39“Tüshe phungho-thünio ching inü mihtsürü khürü nüsa kilim dükhepü nüsa yakzan khülang lah. Jumonü inü nüsa kilim Jihudarü kiulongthsüpuh dükheshihnela shi?” 40Judüki arü alalanü zhide tha, “Ha mihtsürü yung, tüshe Baraba!” Kheakü Baraba ju jangkhijangrarü lakheah.

Currently Selected:

JOHAN 18: YIMCBSI

Highlight

Copy