JOHAN 9
9
Mük Tuka Zübekhi Thsüngukhi
1Kheakü Jisu hode alachoki, apinü mük tuka zübekhi mihtsürü khülang ngü. 2Tüsho api jingyanrübonü api ki keokhi, “Rabbi, api mük tuka zübekhi ju ha mihtsürünü a shi api berübuhrünü neak yihbeakkhea?” 3Jisunü alo, “Ha mihtsürü yungsho api berübuhrünü she neak müyihbeak, tüshe Thrünpuh rhimo api kheak akhiukpü lah. 4Nimung lachoki I thiyibuh rhimobo inü arhimobeah; shenü she mürhimokhukpü thsüde azhing arüchoh. 5#Mt 5.14; Jhn 8.12I alomi ching la khiungdüa, I alomi ayinatrüm.” 6Küyimki apinü harü thakhea, alo kheak mukhiuk tüsho mükeke bede alo neam; tüsho apinü tuka lakhi mihtsürü mük ju mujujih. 7Tüsho apinü anihbuh ki tha, “Yübah Siloam (amütsan yüshih) kekhip chingnü müsühang.” Jumonü apinü yübah müsüh tüsho ngüde alodarü. 8Jumonü yamhingrübo le püpüki api mük tuka ngürünü tha, “Ha kakheangde abinkhi thsü yung de?” 9Khürünü tha, “Ha api ah.” Püpürünü tha, “Api ju buh ruk ah.” Apinü tha, “I api ah.” 10Jumonü arünü api ki tha, “Küde thsah nü mükbo khimshuhkhea?” 11Apinü alo, “Jisu de ajikhi mihtsürü khülangnü alo mülebah I mükbo kheak mujujih tüsho I ki tha, ‘Siloam kekhip ching yübah müsühang.’ Jumonü inü yübah müsüh, tüsho I mük khimshuh.” 12Judüki arünü api ki tha, “Api küching la?” Apinü alo, “Inü mümükheah.”
Athsüngukhi dünkheak Pharisirünü Akeokhikhi
13Püpüki mük tuka labuh arünü Pharisirü ki bedarü. 14Kheakü Jisunü alo neambah api mükbo khimshuhkhi ju Amuni lakheah. 15Jumonü künangde api mük khimshuhkheanü Pharisirünü api ki keolo. Apinü arü ki tha, “Apinü I mükbo ching alo yukjihbah I müsühde kam tüsho inü ngüchoh.” 16Jumonü Pharisirü khürünü tha, “Ha mihtsürü ju Thrünpuh kilimnü yung, tümütüsho apinü Amuni mümungchoh.” Püpürünü tha, “Aneakrünü küde thsah hadürü khinthiyinbe rhimokhukcho?” Tüsho arü bolung achamnak lakheah. 17Arünü mük tuka lakhi mihtsürü ki thalo, “Nü mük khimshuhkhi hode nünü api dünkheak küde thacho?” Apinü alo, “Api wukihrü khülang ah.”
18Tüshe arünü mük khimshuhbuh bebuhrü müjiyi khiungde api mük tukbah akhimshuhkheah de Jihudarünü akin mülakheah. 19Tüsho arübonü arü ki keokhide tha, “Nüsanü athakhi nüsa tsührü ha mük tuka zübekhea de? Dale küde thsah apinü kheakü ngücho?” 20Api bebuhrünü arü ki alo, “Ha isa tsührü ah de isanü mükheahlah, tüsho api mük tuka zübekheah; 21tüshe küde thsah kheakü apinü ngücho, yungsho shenü amükbo khimshuhjihkheanü isanü mümükheah. Api azorü kama lale api ki keoang. Apinü aküdah thsüde athabah.” 22Jihudarü tremonü api bebuhrünü jude athakheah, tümüde shepünü api ju Khrista ah de athabanü sinagog chingnü api yankhitbah de Jihudarünü münrüna lakheah. 23Jumonü api bebuhrünü, “Api azorü kama lale api ki keoang,” de tha.
24Jumonü arünü mük tuka lakhi mihtsürü ju ji tüsho api ki tha, “Thiyuro thapü Thrünpuh miki alokhiang! Ha mihtsürü aneakrü ah de isanü mükheahlah.” 25Apinü alo, “Api aneakrü a shi yungnü inü mümükheah. Inü amükheahkhi khülang ju: I mük tuka lakheah tüshe kheaküa inü ngüchoh.” 26Judüki arünü api ki thalo, “Apinü nü ki tümü thsükhea? Küde thsah apinü nü mükbo khimshuhkhea?” 27Apinü arü ki alo, “Inü nüsa ki thaabahdo tüsho nüsanü mani. Tümüde nüsanü ju solopü künla le? Nüsa she api jingyanrü kamnela de?” 28Judüki arünü api ki mükhemükimde tha, “Nü api jingyanrü ah tüshe isa a Mosa jingyanrübo ah. 29Thrünpuhnü Mosa ki asukdo de isanü mükheahlah; ha buh ju küchingnüanü isanü mümükheah.” 30Mihtsürü junü arü ki alo tüsho tha, “Tümü thsükhi, api küchingnüanü nüsanü mümükheah dükhi ju amüyinsahbe ah, tütüshe apinü I mükbo khimshuhjih! 31Thrünpuhnü a aneakrü ki manijihchoh de kheakü isanü mükheahlah; tüshe khürünü ju Thrünpuh kingaünrü thsüde api lümkhi rhimosho, apinü anihbuh ki anijihchoh. 32Khürü mük tuka zübekhi khimshuhchoh de alomi tankihchokinü musoakheah. 33Ha mihtsürü ju Thrünpuh kilimnü yungkhülaa apinü tümü müthsükhukde alabah.” 34Arünü api ki tha, “Nü a neak chingnü zübemusukheah, tüsho nünü isa thsangyucho de?” Tüsho arünü api yankhitabah.
Me ching Müktukkhi
35Arünü api yankhitdo de Jisunü so; tüsho apinü anihbuh ngübah tha, “Nünü Thrünpuh tsührü kheak kincho shi?” 36Apinü alo tüsho tha, “Atungpuh, inü anihbuh kheak kinpü thsüde api ju she a?” 37Tüsho Jisunü api ki tha, “Nünü api ngüdo tüsho shepünü nü ki asukachihchonü api ah.” 38Judüki apinü tha, “Atungpuh, inü kinchoh!” Tüsho anihbuhnü api kingaün. 39Tüsho Jisunü tha, “Mahkhappü thsungkheak ha lomi ching I arükheah, junangde shepünü müngünü angübah, tüsho shepünü ngülanü mük tukbah.” 40Judüki api lung larü Pharisirü khürünü harü yubo sobah api ki tha, “Isa she mük tuka la de?” 41Jisunü arü ki tha, “Nüsa mük tukkhülaa neak müyihbeaka labah; tüshe kheakü nüsanü, ‘Isanü ngülah’ de thachoh, jumonü nüsa neakbo lah.”
Currently Selected:
JOHAN 9: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
