LUK 17
17
Neak
(Mt 18.6-7,21-22; Mk 9.42)
1Jisunü api jingyanrübo ki tha, “Mihtsürünü neak yihbeakshihpü adünjipü lah, tüshe shepü hode ju dünjishihbanü are! 2Harü anini bolung khülang neak yihbeakshihpü kheaknü a api hung kheak hizübe-lung rhükkihbah keto ching jipyukkhi atsübe labah. 3#Mt 18.15Nüsa küdah thsüde kurhangang. Nü keoniorünü nü azhihde neak yihbeaksho api thürühang; tüsho apinü mulong müthrisho api neak bahjang. 4Apinü nü azhihde nimung khülang chingnü thüne ki neak yihbeaksho, tüsho nimung khülang ching nü ki thüne ki alode arübah, ‘I mulong müthrichoh’ de thasho, nünü api neak bahjang.”
Akin
5Amüsüh-thsangyurübonü Atungpuh ki tha, “Isa akin tode kamshang.” 6Atungpuhnü tha, “Nüsa akin woninji dükhüh lasho, nüsanü ha ayihkoso dung ki thabah, ‘Ayingnü rukkhitang tüsho keto ching khimang,’ tüsho junü nüsa ki mihyuanibah.
Yamlarü Rhimo
7“Tüsho nüsa shepünü yamlarü khülang wochakkhi yungsho namfimihnu neakkhi thulu chingnü alungchoki, ‘Nahnah arang tüsho binbah yimtsühang’ de athaba? 8Tüshe apinü anihbuh ki, ‘I tsühyungpü thsakhamang, tüsho I mütsühyungyi khiungde thsakhambah aleangang, tüsho ju dunglim nü tsühyungang’ de athapü yung de? 9Apinü anihbuh ki thiyukhüm jihkhi rhimomonü apinü yamlabuh ki makshe jihcho de? 10Junangde küyimki nüsa ki thiyukhüm jihkhi nüsanü arhimobanü, thaang, ‘Isa a müthülünkhi yamlarübo ah. Isanü arhimobe lang isanü rhimodo.’ ”
Jisunü Aphamrü Thürü Thsüngukhi
11Kheakü api Jirusalem lim yüchoki Samaria tüsho Galilee dükeaknü hode yü. 12Api kiulong khülang ching yüzahchoki, aphamrü mihtsürü 10 limshude zhipbah api shoru. 13Tüsho arünü arü düsheak zhide tha, “Atungpuh Jisu isa ki muzhoang!” 14Jumonü apinü arü ngübah tha, “Yüang, nüsabo amükeamrübo ki huhang.” Junangde arü yübah müsühde kam. 15Kheakü khülang buhnü api thsüngukhi ngübah alode yü tüsho düsheak achangnü Thrünpuh mung shi, 16tüsho api jing ki ami mükhümbah makshe jih. Tüsho api ju Samariarü lakheah. 17Jumonü Jisunü tha, “Arü 10 müsühkhitkhi yung de? Tüshe arü 9 küching la? 18Ha khiungkerü kheak hode alode arübah Thrünpuh mung shipü she mülakhea de?” 19Tüsho apinü anihbuh ki tha, “Asürang, nü limro ching yüang. Nü yo akinnü nü thsüngudo.”
Kiulongthsü Arükhi
(Mt 24.23-28,37-41)
20Pharisirünü Thrünpuh kiulongthsü küyimki arüba de api ki keokhichoki, apinü arü ki alo tüsho tha, “Thrünpuh kiulongthsü ju angüpü thsüde marü, 21yungsho mihtsürübonü mütha, ‘Ha kheak,’ yungsho ‘Ju kheak lah,’ tümütüsho Thrünpuh kiulongthsü ju nüsa bolung lah.”
22Judüki apinü ajingyanrübo ki tha, “Nüsanü Mihtsürü Tsührü nimungbo kheahnepü kim arado, tüshe nüsanü ju müngü. 23Tüsho arünü nüsa ki thabah, ‘Halim kheahang!’ yungsho ‘Julim kheahang!’ Arü dunglim yande düyü. 24Tümütüsho chinchobenü thüning thripkhühnü thüning khülim khiungde aphürapkhi nangde Mihtsürü Tsührü ju api nimung ching jude alabah. 25Tüshe akhuhde apinü hihde thsünübah tüsho ha lünnü abahyukbah. 26Noa nimungbo ching nangde, Mihtsürü Tsührü nimungbo ching labah: 27Arünü Noanü sangkung ching yüzahkhi, tüsho keking arübah arü alala müdükheakyi khiungde tsühyung, niuberübo lu, arübo rhangshih. 28Lot nimungbo ching nangde: Arünü tsühyung, thulo, yin, khim, thsü; 29tüshe Lot Sodom chingnü wukhiuk nimung yinmi chingnü mo tüsho molung akibah arü alala dükheakshih. 30Mihtsürü Tsührü amikheak akhiukkhi nimung ching junangde alabah. 31#Mt 24.17,18; Mk 13.15,16Ju nimung shepü thüyam-mün kheak lanü api kukrukbo thüyam ching lakhi lupü dakishih, tüsho junangde shepü thulu ching lanü dalunglo. 32Lot niube lümkhitang. 33#Mt 10.39; 16.25; Mk 8.35; Lk 9.24; Jhn 12.25Shepünü nihbuh rhangdung khümkhitpü yimchonü adükheakbah, tüsho shepünü nihbuh rhangdung dükheakchonü akhümkhitbah, 34Inü nüsa ki thachoh, ju tsüngre mihtsürü mahne yapkiu khülang ching labah: khülang bea lubah tüsho khülang bahjihbah. 35Aliberü mahne hi chude alabah: khülang bea lubah tüsho khülang bahjihbah. 36Mihtsürü mahne thulu ching labah; khülang bea lubah tüsho khülang bahjihbah.” 37Arünü alo tüsho tha, “Atungpuh, küching a?” Jumonü apinü arü ki tha, “Kürü ching mi labanü, ju ching müleangbo mukhungbah.”
Currently Selected:
LUK 17: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
