WANGSHEMBU MWOT 10
10
Pitar hia Kornelia Nyi
1Kaisaria ma Kornelia le amünkya mixsün tuita tüikya; chix a Itali nok süpahi lompa changkya. 2Chix a zanglom tokya mixnok sün tuita changkya. Chix üntoxle chix homkha pangnue Zang shwom. Chixe Jehudi nok chitüi chinangkyabu to huanuma fong ilaxle tuthütthüt ma zangjople nui. 3Nyixta tsomfüi azom baji shen changkya, Chixe mikngün ohün tuita ngün. Ijama chixe Zang kaxtaimix nguikya atsingsho le ngün ilaxle chixe mün lünle nyak: “Kornelia.”
4Chix a Zang kaxtaimix thua za ang süt ilaxle thüi: “Alixachong, Ija a chempang?”
Kaxtaimixe lan: “Zange nang zangjop atatdaoa üntoxle nang mwot müikya ngünle laxdaoa, ilaxle ibu khoma nang füi Jowanpa ang mongmüikya tüile. 5Üntoxle athax a Simon Pitar le amünkya mixsün tuita se ang Chopa to khünak tsanle apaolax. 6Chix a tinu kax ma ngokya müikhwon singmix Simon hom ma mixwün tuita ang nguile tüile.” 7Ifüima chix füi akaxle ngokya kaxtaimix pao. Kornelia-e chix da anyi boma chix mwot-kat to hu ang huaksüi le thomkya khama zanglom tokya mix süpahi sün tuita, le se. 8Hwom hama chemle changpuix ibu wün ilaxle hwom Chopa to mwottsan le apao.
9Ofüi nyix hwom ahamle lomba to Chopa aloptu nguile tüipongma tungtoe, Pitar homkho ashale tüikya khato zangjop ang dong. 10Chix ang wok ano ilaxle fong sung, ilaxle fonglak to humele ngopongma chixe mikngün ohün ngün. 11Chixe zangkangting ka daple ngün üntoxle imakhange chongkya tsap ningle oli tuita ozong ali ma koplaxle chaxwannu to athaile ngün. 12Ija khama müi oli pangwüi, pusi-maksa, ilaxle fao osabu tüihukya. 13Kaxzing tuitae chix füi akax: “Ajonglax, Pitar! Langlax üntoxle saxlax!”
14Pitar-e lan: “Jowanpa, ile otuechu münchangüi! Kue chisax chilingkya olile atsaokya jatjat kue otuechu münsax münlingüi.”
15Ija kaxzinge anaolechu wüi chix füi akax: “Zange sax angkya oli changpu le thüikya tütalichu chisax chilingli ang taxachang.” 16Ile othom azom ma chang; ifüima ija jali zangkangting to chatle dün.
17Pitar-e chixe ngünkya mikngün ohün hanpakma chem tsyen hexsi le awan ang azongle ngotanto Kornelia-e tomle apaokya khünakbue Simon ngokya kha awanle lax, ilaxle athax a hwom zünkai ma ajongle tüikya. 18Hwome nyak ilaxle atüi: “Ikhama Simon Pitar le amünkya mixwün tütüicha?”
19Athaxchu Pitar-e mikngün ohün bama awan ang azong ngoponge Otsao Chasae thüi: “Apalax! Mixsün azome nang lomle ikhama tüile. 20Nang achwonlax üntoxle julax, ilaxle hwom füito pao ang mong taxao, chemthüikoxle hwom a kue ahüikya changle.” 21Ikoxle Pitar thaile ju ilaxle ibu ang thüi: “Hünzome lomle hüikya khünak a ku changpu. Hünzom büle ole hüikya?”
22Hwome lan: “Kwom a lompa Kornelia mwottsan to hüikya changpu; chix a tuita müikya khünak changle tamchu Zang shwomkya mix changle ilaxlechu Jehudi nok pange wüi chathua zale e-sekya mix changle. Nange akax angkya oli tsai-kax apale kop angkya hanpakma chix hom to nang se angkya Zang kaxtaimix tuitae chix füi akaxdaoa.” 23Pitar-e ibu khünak hommong to sele dün ilaxle ija ja wünpom ang kox.
Ofüi nyix chix achwon laxle hwom füi tomle pao; ilaxle Chopa angkya tüinao tuita anyi chix füi tomle laxlax tox. 24Ifüi nyix hwome Kaisaria alop, ikoxle Kornelia a chixe ahyenle apüikya kako homkhabu hia zuikhuibu füi hwom tanle nui. 25Hwome hom alople Pitar nopüi khakha tüipongma Kornelia-e chix wünpwonle Pitar chato twonle akhuxle shwom. 26Pitar-e chix ajong, üntoxle thüi: “Ajongün, chemthüi ang ku shwompu, ku chuwüi hünzom ningkya khünak tuita changpu.” 27Pitar a Kornelia füi kaxkaxle hommong to dong. Ikhato chix tanle asox ngokya khünakbu huanuma bang. 28Chixe hwom ang thüi: “Jehudi khünak tuita a mixnok hom to nop-le angkya hia saxmok angkya wanlom ma müntüile hünzome mamüile tsingle ngopu. Ikoxlechu Zange ku hama khünak opupuchu chitsaokya chichangba oma ang taxlax le ahodaoa. 29Idaile hünzome se-lomkya ningle ku mong tochu aokya chemchu chitüi homle nguipu. Athaxpi kue hünzom ma atüifang, hünzome ku hato khünak chem hanpakma akatkya hex?”
30Kornelia-e thüi: “Ipongkhae shongnyix nyix azom thoto ku azom baji shene hom ma tsomfüi zangjop hanpak laxle ngokya. Tüle nyankya nyiza awunlaxle ku thüntho ma mixsün tuita ajong, 31üntoxle chixe thüi: ‘Kornelia, Zange nang zangjop atatdaoa, ilaxle nang chingcha mwotchu ngünle laxdaoa. 32Simon Pitar le amünkya mixsün se ang Chopa to khünak tsanle apaolax. Tinu kax ma ngokya müikhwon singmix Simon hom ma chix mixwün ang nguile tüile!’ 33Ikhoma kue nang hato akhangle tsanle akatpu, ilaxle nang nguikya tüle müile. Athax a Zange nang ang akax ang tomkya kax pangwüi to apa ang kwombibi ima tüile.”
Kornelia Homkha ang Pitar Kaxho
34 #
Tsk 10.17. Pitar akax ang süt: “Zange khünak nok to chipai chizün le tomwüi hule le athax kue awan ang kopdaoa. 35Chix tüta jat-li wüi changkoxlax, chix chathua zale tüikya mix tamchu sukya mwot mokkya mix chix zongma sukya mixmix wüi changpu. 36Khünak noknusa hopunu Jowanpa, Jisu Khrista makhange tumüi bama Kaxho Müikya apukle chixe Israel khünaknu hato fakya kaxho hünzome awanle ngopu. 37Juhan-e baptikya bama apukkya füima, Galili ma owang wanglaxle Israel haxtok pangnu khato chempang bama azingle wünle hüidaopuix ibuchu hünzome awan ngopu. 38Hünzome, Nazareth nok Jisu bama, ilaxle Zange chix ang Otsao Chasa tamchu tsakzong koxkya bamachu awanle ngopu. Chix pangnu khato aham, üntoxle Zang chix füi tüikoxle khünaknu zongma müikya mwot chixe mok üntoxle haxshix zonge kople thomkyabu pangwüi chixe amüi. 39Jehudi chaxwan pangnu khato ilaxle Jerusalem ma chixe mokkya mwot pangnu bama kwom a kaxkhibu changpu. Hwome chix pünsak ma takle lang. 40Ikoxle Zange chix nyix azom lükya to chatle azangle zo ang kox, ilaxle ngaile sün aho ang tom. 41Jehudi khünak pangnu hato wüile münchang, ikoxle chixe amiba wüi chix kaxkhibu ang zünle kopdaokya kwom tata hato laile aho. Chix azangle zokya füima kwome chix füi tomle sax-lingle chang. 42Üntoxle chixe kwom ang Kaxho Müikya apuk ang anaolechu ozün hia omang nyi bama kaxfün fa ang Zange kamle kopkya a chix wüi changpu le angai angkya kaxtom fa. 43Chix mün ma tüikya zong makhange chix to ongkyabu ang ochax thailak faüi, le chix bama ajebu pangnue wüi akax.”
Kornelia Homkhae Otsao Chasa Kop
44Pitar-e zangwün ngoponge, chix Kaxho apale ngokyabu pangnu hato Otsao Chasa ngui. 45Chopa tokya Pitar füi tomle nguile tüikya Jehudi nok mongong mixbue ija ngünlaxle, Zange mixnokbu angchu wüi chix hingho Otsao Chasa koxtüia le abüt. 46Chemthüikoxle ijabue chitsingkya kax ma zangwünkya hia Zang achuak achenkya hwome atat. Pitar-e hwom ang thüi: 47“Keme kopkya lailaile ibuechu wüi Otsao Chasa kople. Jangchang thüikoxle hwom tima bapti angkya to owawae abaxkya tüiangcha?” 48Idaile chixe hwom ang Jisu mün ma tima bapti ang tom. Ifüima hwome chix ang hwom füi tomle hanpak hidaole nuile toxkoxle müisele akax.
Currently Selected:
WANGSHEMBU MWOT 10: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
