WANGSHEMBU MWOT 8
8
Sol-e Müimüithom Zothup
1Ija nyix wüi Jerusalem angkya müimüithom khünaknue zothuple sikngün apong angkya owang wang. Wangshembu tata dantoxlaxle mongong mixbu pangwüi Jehudi hia Samaria chaxwan to afale pao. 2Züizüi zanglom to mongkoxkyabue akhongle sopngale Stefen mangtsa ilaxle akhün.
3 #
Mwt 22.4,5; 26.9-11. Ikoxlechu Sol-e müimüithom pün ang azong. Chix hom-hom to ngui ilaxle mongong mixbu sheko lüka pangwüi linle alai ilaxle hwom pangnusa wüi kun ma sho.
Samaria to Kaxho Müikya Apuk
4Afale paokya mongongmixbu pangnu khato wüi kaxho apuk le hwon-ano le pao. 5Filip Samaria angkya chongkya tingnu to ngui ilaxle ikhato khünaknu hama Messaiah bama apuk-apua. 6Filip-e akaxkya kax to khünaknue mongkox. Hwom pangnue chix kax to natha le apa ilaxle chix makhange khomtsikya mwot mokkyabu ngün. 7Khünak obiobi angkya haxshix chasabu awaole soplaxle laile pao; tsangtsa amok ang chimüile faile kakkyabu hia cha-chak faikyabu huanuma amüi. 8Idaile Samaria angkya tingnu ma tüikya khünaknu huanuma mongmüi.
9Ija tingnu ma Simon le amünkya mixsün tuita tüikya. Onox ma chixe Samaria angkya khünaknu chix chajik-muashem#8.9: chajik-muashem: Khun-hing twonkya hia jadu-montro mwot mokkya. makhange azale thom. Chixe alüile achuakle wün. 10Ija tingnu ma tüikya chongkya hixkya noke, pangnu tsünthome chix to mongkox. Hwome thüi: “Simon a ‘akhokya tsakzong’ le keme nyakkya zang achangkya changüi.” 11Chixe otsingtsingsa ma hwom khompua atsikdaoa, ikhoma hwome chix lwot to angkya lai. 12Ikoxle otue hwome Zang Wangting hia Jisu Khrista mün bama Kaxho Müikya Filip makhange atatle laxpuix, hwom sheko lüka pangwüi tima bapti. 13Simon-e ngaxchu wüi Jisu Khrista to ong; ilaxle bapti lax füima Filip füi asüi le ngo, üntoxle chixe Filip-e mokle ngokya khomtsikya hia ohünotün mwotbu ngünlaxle chixchu wüi abüt.
14Samaria tokyabue Zang kax pongle kopdaoa ta le Jerusalem tokhange wangshembue atat; idaile hwome ibu hato Pitar hia Juhan nyi tsanle akat. 15Hwome ikha alopkya zuma, Otsao Chasa naxkop ang mongong mixbu hanpakma zangjople fa. 16Chemthüikoxle hwom owawa machu Otsao Chasa mahüi; hwom a Jowanpa Jisu mün ma bapti lanlan laxle ngotan. 17Ifüima Pitar hia Juhan nyie hwom khangkho ma chak danlaxle zangjop, ija ma hwome Otsao Chasa pongle lax.
18Wangshembue hwom khangkho ma chak danlaxle zangjop pongma Zange hwom ang Otsao Chasa koxkya Simon-e ngünle lax. Ikhoma chixe Pitar hia Juhan nyi ang ngun kox, 19üntoxle thüi: “Kue twonkyabuechu pangnusae wüi Otsao Chasa kop ang tsuak angkya kuxma, ku angchu wüi ija tsakzong laxhüi!”
20Ikoxle Pitar-e chix kax to lan: “Nange Zang hingho ngun füi shak ang thoüile thütkya khoma, nang ilaxle nang ngun a haolum to leün. 21Kwom mwottho ma nang kwom üitho jao münchang, chemthüikoxle Zang miksho ma nang mong ojao münsu. 22Nange ija ochax lom to thütkya nang mong achatlax, ilaxle ija ningle nang mongto chichangle thüt-pan daokya hanpakma Jowanpa to joplax ikoxletix chixe nang ang thailak faüi. 23Chemthüikoxle nang a osing nüfuxe awangle tüile, ilaxle ochax kun ma kople thomkya mix changa le kue ngünle.”
24Simon-e Pitar hia Juhan nyi ang thüi: “Hünkhie akaxkya ku hato chemchu chingui angkya hanpakma chingchalaxle ku bama Jowanpa to jop-hüi.”
25Jisu Khrista bama tsingwankya khünakbu hama kaxkhi koxle wünle Jowanpa kaxho apuk-apuale chang füima Pitar hia Juhan nyi Jerusalem to chat. Okhi chatüi lom ma Samaria tingkhuabu to Kaxho Müikya apuk.
Filip hia Etheopia Nok Nyi
26Jowanpa kaxtaimixe Filip füi akax: “Nang achwonlax üntoxle Jerusalem tokhange Gaza to lekya lom shuathongchi lom ma lelax.” (Ija lom a awütle thomdaokya lom changkya). 27Filip achwon ilaxle pao. Iponge Etheopia nok mixsün tuita eunak (zwom züidaokya mix) apong. Chix a Etheopia wangcha Kanda khwa ma, she tuina to hume angkya mix alixachong tuita changkya, 28üntoxle chix a hom to chatüi man-kanlin#8.28: man-kanlin: Mane linkya zyen. khoma ngalaxle ajepa Isaia Laipex akhongle enga le hüi. 29Otsao Chasae Filip füi akax: “Ija man-kanlin hato alople hüikox ilaxle pyapyale ahamkox.” 30Ikoxle Filip-e ija hato zikle alop ilaxle ija mixsüne ajepa Isaia lai ekya atat. Filip-e atüi: “Nange ekyakha chem hanpak hex awanchami?”
31Chixe lan: “owawae ku hama apuale chifa thüikoxle kue chemle awan manüi?” Chixe Filip ang thüi: “Oman ngahüi ilaxle ku füi tomle kanlin dingma ahamhax.” 32#Isa 53.7,8.Chixe ekya Otsao Lai ofong a ija changkya:
“Chix a lang ang paokya,
chun tuita ningle;
omun sexkya ma chingaokya,
tuita chun hosa ningle;
chixe kaxfa tuita chizex.
33Chix tha ajao pongma,
sukya kaxfün fa ang chitom.
Chix sixli pak owae tiktsuaküi?
Chemthüikoxle chaxwannu angkya,
chix tsün a paodao khato.”
34Ija alixachonge Filip ang thüi: “Ku hama siapuahüi, ajepae owa bama akax ngopuix, chix bama hia mama owawa bama hex?” 35Filip-e akax ang sütle Otsao Lai ofong ija makhange owang wanglaxle chix hama Jisu Khrista bama Kaxho Müikya apua. 36Ile hokhi lomjang fole ahamle hüi pongma jongta kha ti tüikya nui to ngui, ilaxle ija alixachonge thüi: “Ikhama ti hidaole atungle tüingünlaxle! Chemtan-chemnye ngoüi, athax wüi baptiüi jangwüia?” 37Filip-e chix ang thüi: “Nange nang mong tokhange abakle jangong thüikoxle nang bapti ang tsuaküi.” Chixe lan: “Kue ongle, Kue Jisu a Zang Hosa changle le ongle.”
38Ija alixachonge kanlin azak, ilaxle hokhi pangnyi wüi, Filip hia ija alixachong nyi tikha to ju, üntoxle Filip-e tima chix bapti le kox. 39Okhi tikha tokya laikya zuma Jowanpa Chasae Filip tswonle pao. Ija alixachonge chix tamchatle chingün, ikoxlechu mongmüi atungle chix hom to chat. 40Filip a chix lualua to Ashdot to bang; ilaxle chixe Kaisaria ma-alop ma-alop le lomjang fole pangnu tingsho towüi Kaxho Müikya apukle chat.
Currently Selected:
WANGSHEMBU MWOT 8: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
