PONGWANG LAIPEX 11
11
Babilon angkya Long-hom
1Owangpong ma zangfang angkya khünaknu nok wüi kax tuita ma akaxle tüikya ilaxle hwome zangwün tuita ma wün. 2Hwom handün chito hamhamle lekya zuma Shinar le nyakkya haxshanu hato ngui ilaxle ikhama tingtan-nokzingle ngo. 3Hwome tata füi ile akax: “Oman, kemepi haxhuak-long zinghax.” Ile hwome long lüi ma haxhuak-long lax ilaxle ibu to atsam ang hwome kom-hax lax. 4Ifüima hwome thüi: “Kem mün naxngo ang tamchu kem fong chifan angkya hanpakma, oman, kemepi tingnu tuita zingle alaihax ilaxle ikhama ding to thukya longhom tuita zaile alaihax.”
5Ifüima khünakbu zingkya tingnu hia longhom to hu ang Jowanpa ngui. 6Ilaxle chixe thüi: “Hulax hwom a khünaknu tuita, hwom ang zangwün tuita wüi changle; ija a hwome mok angkya sütwang-mwotwang tix changpu. Hwome mok ang azuakya mwot pangwüi mokle tsuak angkya changa! 7Oman, juhax! Hwom ang tsaikho-kaxkho asamle koxhax, ikoxtix hwome tata zangwün chitsingle changüi.” 8Ile Jowanpae hwom ikha angkya chaxwannu thün awangle chiakle pao ang tom. Hwome zingle ngokya longhom a chitsuak homle athole tox. 9Idaile ikha ang “Babel”, le nyak, chemthüikoxle ikhama Jowanpae zangfang angkya khünaknu zangwün matsai-makaxkax ang achangle koxkya changle; ikha angkya hwom Jowanpae chaxwannu thün awangle chiakle asam.
Shem Sixlibu
(1 Pp 1.24-27)
10Ibu a Shem sixlibu changle. Shem zanglao 100 nguikya zuma chix a Arfakshad hopa ang achang. Ija a tinu-mualyem füima zanglao anyi-lükya changpu. 11Arfakshad puxkya füima Shem zanglao 500 tsünlole ngo. Ipongma chixe su-sa hwom mamabu su-sa wüi pux-paile chang.
12Arfakshad zanglao 35 tsongle hüi füima chix a Shelah hopa ang achang. 13Shelah pux füima Arfakshad a zanglao 400 tsünlole ngo. Ipongma chixe su-sa mamabu su-sa wüi pux-paile chang.
14Zanglao 30 tsongle hüikya zuma Shelah a Ebar hopa ang achang. 15Ebar pux füima Shelah a zanglao 403 tsünlole ngo. Ipongma chixe su-sa hwom mamabu su-sa wüi pux-paile chang.
16Chemtue Ebar zanglao 34 nguile hüipuix, chix ang Peleg le amünle sasün tuita pux; 17ifüima chix chatle zanglao 430 tsünlole ngo ilaxle mama su-sa hwomchu wüi pux-paile chang.
18Chemtue Peleg zanglao 30 nguile hüipuix, chix a Reu le amünle sasün tuita ngün; 19ifüima chix zanglao 209 tsünlole ngo ilaxle su-sa hwom mamabu su-sa wüi pux-paile chang.
20Chemtue Reu zanglao 32 nguile hüipuix, chix a sasün tuita Serug ngün; 21ifüima chix zanglao 207 tsünlole ngo. Ipongma mama su-sa hwomchu wüi pux-paile chang.
22Chemtue Serug zanglao 30 nguile hüipuix, chix ang sasün tuita Nahor pux; 23ifüima chix zanglao 200 tsünlole ngo. Ipongma chix ang su-sa hwom mamabu su-sa wüi pux-paile chang.
24Chemtue Nahor 29 nguile hüipuix, chix ang sasün tuita Terah pux; 25ifüima chix zanglao 119 tsünlole ngo. Ipongma chix ang su-sa hwom mamabu su-sa wüi pux-paile chang.
26Terah zanglao 70 nguile changpongma, chix a Abram, Nahor hia Haran hwom hopa ang achang.
Terah Sixli Hwom
27Ibu a Terah sixli hwom changle; chix a Abram, Nahor hia Haran hwom hopa changkya. Haran a Lot hopa changkya. 28Haran a Babilon chaxwan tokya Ur nok, chix tingsho ma zi. Ipongma hopa a mazikya. 29Abram-e Sarai lax, ilaxle Nahor-e Haran sacha Milkah lax. Haran a Iskah hopa su-sa wüi changkya. 30Sarai-e supux-sapaile chichang.
31Sasün Abram, hosu Lot, chix a Haran sasün changkya, ilaxle honomcha Sarai, she a Abram kakonu, hwom bibi koplaxle Terah a Ur tingnu dantoxlaxle Kanan haxtok ma ngo ang Babilon nok to pao. Hwom a Haran alople ka ilaxle ikhama hom-hax zaile ngo. 32Terah a ikhato zanglao 205 ma zi.
Currently Selected:
PONGWANG LAIPEX 11: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
