PONGWANG LAIPEX 3
3
Khünake Kax ma Chilaxkya
1 #
Mik 12.9; 20.2. Athax Jowanpae zingkya zünmok pangnu thakma huxtsing-loptsang akhokya a pu tüikya. Pue shekocha ma atüi: “Zang-e hünkhi ang tsawatkha angkya pünziak chemchu taxsax-ole thüipu lea?”
2Shekochae pu ang thüi: “Tsawatkha angkya pünziak kwome sax ang tsuak, 3ikoxlechu Zang-e ‘Tsawat osungkha angkya pünziak taxsax tamchu ija to twonchu taxtwon, ile jangchangba hünzom ziüi’, le akaxdaoa.”
4Ikoxlechu pue mixcha ang thüi: “Ija otsing münchang, hünzom münziüi; 5ikoxle hünzome ija pünziak saxkya füi tomle hünzom ang mikdapüi tamchu omüi-oma awanle Zang#3.5: Zang; chichangba baozangbu. lailaile changüile awanpu ilaxle omüi-oma#3.5: chem müipuix ilaxle chem chimüipuix, ija awanüi; chichangba pangnuli awanle changüi. tsingle changüi.”
6Chemtue ija mixchae pünziak a saxkoxle müi ang asusule mik-hu zongma tüle müile ngünle laxpuix, jetüi-hwonlangle chang angkya to mongzalo laxle ija pün angkya oziak khaile sax; ilaxle she füi tomle tüikya ma kakopa ang chuwüi hidaole kox; chixe chuwüi ija sax. 7Ifüima hokhi pangnyi ang wüi mikdap, ilaxle hokhi a ohua ma tüikya awanle lax. Okhie fup chak khaile sing ilaxle makeke ma tho.
8Hansong zangwin wuwule tüipongma tsawat khato Jowanpa ahamkya hokhie atatle lax. Okhi a chix thoto khünle ngo. 9Ikoxle Jowanpae khünak lomle nyak “Nang ojongma tüi?”
10Chixe lan: “Kue tsawat mongto nang nguikya ozing atatlaxle za üntoxle ku a ohua ma tüikya khoma ku lualua to khünle ngopu.”
11Zang-e atüi: “Nang a ohua ma tüile le owae thüipu? Kue taxsax-ole abaxkya pünziak nange saxdaopia?”
12Khünake lan: “Nange ku füi tomle ngo ang apüile fakya shekochae ija pünziak ku ang koxkya kue saxdaokoxa.”
13 #
2 Ko 11.3; 1 Ti 2.14. Ifüima Jowanpae shekocha ang thüi: “ija ile chemthüikoxle mok?” Shekochae lan: “Ija naxsax ang pue ku dyenkya khoma kue ija saxdaongüna.”
Zang-e Kaxfün Fakya
14 Jowanpae pu ang thüi: “Nange ija ile mokkya khoma, müibu hia zünmok pangnu khama nang to thuakzompu; nang wokzutle ahamüi ilaxle nang tsün-tsün ma nange haxbu saxüi. 15#Mik 12.17.Kue nang hia shekocha hünkhi bama tamchu nangsix-nangli hia she sixli hwom bama zan zingpu. She susa hwome nang khang thuple akhixüi ilaxle nange she susa#3.15: she sixli; chichangba hwom. hwom chidua ma tuüi.” Hwom chidua ma tuüi.
16Mixcha füi chuwüi chixe akax: “Kue nang ang naotüikya zuma sikngün sisile achenüi ilaxle nao ngünkya fuxtsüi-zolitle ngün ang tomüi, ikoxlechu ma kakopa to mongzalokya nang ma tüile ngoüi ilaxle nang a chix fang-fang ma wüi ngoüi.”
17 #
Ibr 6.8. Üntoxle lükapa füichu chixe akax: “Nange nang kakonu kax ma laxle tüikya khoma, tamchu kue taxsax-ole kaxtom koxle thomkya pünziak saxkya bama, nang khokho ma haxtok to thuakzomle changdaoa; nang tsün-tsün ma nange ikha angkya sikngün laxle tix saxlaxle changüi. 18Haxtoke nang fum-hing hia kongbüibu anyemüi, ilaxle nang haxtok angkya fumchakbu saxüi. 19Nang haxtok to chatle machat-machatle ma khangpong angkya zangmukti laile tix nange süt sax ang ataküi; ija makhange zingkya daile nang a hax changpu, ikhoma nang tamchatle hax towüi chatüi.”
20Adam-e#3.20: adam: Ija mün a Ibri kax ma “Khünaknüsa” chix kakonu ang Ef#3.20: ef: Ija mün a Ibri kax ma “Ozün”, le thüikya kaxhuak füi tuita ningle tüile oja “khünaknüsa”, lechu chang ang tsuak. le mün kox, chemthüikoxle she a ozün ma tüikya nok honu changle. 21Khünak hia chix kakonu hokhi hanpakma Jowanpae müikhwon makhange nyi sing ilaxle ibu füi hokhi tsangtsa to chwople kox.
Adam hia Ef nyi a Tsawat kha angkya Apao
22 #
Mik 22.14. Ifüima Jowanpae thüi: “Hulax, omüi-oma#3.22: omüi-oma awan ang tsuakle; chichangba jalinusa awankya je. awan ang tsuakle khünak a kem khama tuita ningle changdaoa. Khüzün koxkya pün angkya pünziak hwom lailai to khaile sax ang danlaxle tamchu chizile ngo ang müntom angkya oli changle.” 23Ikhoma Jowanpae, oja makhange chix zinglaxpuix, ija haxtok thomo-manzaile saxle ngo angkya hanpakma Zang-e hokhi a Eden Tsawat kha angkya koto alai. 24Chixe khünak jwonle alai, ilaxle Eden Tsawat zongma handün chima, khüzün pün hato lekya lom nyele Cherubim hia wünle füikya changlo#3.24: ozün zünmokbu: Kaxhuak Laiza to hulax. dan.
Currently Selected:
PONGWANG LAIPEX 3: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
