PONGWANG LAIPEX 6
6
Khünaknu Chinguichiwangkya
1 #
Job 1.6; 2.1. Chemtue khünaknu chaxwan pangnu khato pu-tsale paopuix, tamchu sucha hwom pux-paile changpuix, 2züizüi zangkho tokyabue#6.2: zangkho tokyabu; chichangba Zangsu-Zangsabu. ibu shekobu tüle osün müile ngün, ikhoma hwome mamong atsutsu tuipong tswonle lax. 3Ifüima Jowanpae thüi: “Kue khünakbu a chizi-chimaxle ngo ang müntomüi; hwom a zi angkya changle. Athax makhange hwom a zanglao 120 tok to kaile owachu tsünlole münngoüi.” 4#Huak 13.33.Ipongma, ilaxle ifüima su-sa wüi, zangkho tokya Zangsu-zangsabu hia shekobu makhange pux-paile changkya tomchong-hualo khünakbu tüikya. Kaipongma hwom a mixtsak-naomüibu tamchu zangle wünkya khünakbu changkya.
5 #
Mat 24.37; Luk 17.26; 1 Pit 3.20. Chemtue Jowanpae chaxwan tok angkya pangnusa wüi chichang-chizangle tamchu jento tutex chimüikyae awangle ngokya ngün ang koppuix, 6chixe ibu zingle alailaxle chaxwan tok ma danle toxkya bama chix mongto ile chichanghaxkuxle thüt. Chix mongto tüle kaklaxle 7chixe thüi: “Kue zingle alaikya khünak ibu kue bakle amütüi. Müi-nyax hia o-juxbu su-sa wüi amütüi, chemthüikoxle ibu pangwüi zingle alaikya bama ku ang mongmale.” 8Ikoxlechu Jowanpa ang Noa füi mongzom müikya tüi.
Noa
9-10 #
2 Pit 2.5. Ija a Noa pukax changle. Chix ang Shem, Ham üntoxle Jafet le sasün hwom azom tüikya. Chix tsündang khama thaikya chemchu chitüikya khünak mixmüi a Noa chix tata wüi changkya. Chix a Zang füi notom-tusüi ma ngole hüi. 11Zang miksho ma mamabu ang pangwüi thaile tüikya, ilaxle pangnu khato wüi changnong-pünthom tatale tüikya. 12Zang-e chaxwannu to hule ano koxle ija a ochax ang changdaoale ngün, chemthüikoxle khünaknu pangwüi chichang-chizangle ngole tüikoxle.
13Zang-e Noa ang thüi: “Kue khünaknu pangwüi amüt angkya mongzangwünle tsuakdaoa. Kue hwom komkaile amütüi, chemthüikoxle chaxwannu a tata zan to kakkya chimüikya hwom mwote awangdaoa. 14Müikya pün füi khua tuita zinglax; ija omong khato nuibu zinglax ilaxle omongchi hia kotokchi pangkha towüi nüi füi lile chwoplax. 15Ija a olwot ma su 450, okhao ma su 75, ilaxle ochuak a su 45 le zinglax. 16Ija hom a loxtok#6.16: loxtok; chichangba thangmik. füi zinglax ilaxle ija loxtok#6.16: loxtok; chichangba thangmik. hia homsam nyi bama sokta tukux toxlax. Ija a tanlya azom füi zinglax ilaxle homsam ma fülom panlax. 17Ozün ma tüikya zünmok pangwüi amüt angkya hanpakma kue chaxwan tok to tinu-mualyemle chang ang tomüi. Chaxwan tok ma atüitüi komkaile zile paoüi, 18ikoxlechu kue nang füi tsaotsüt tüiüi. Nang kakonu, hünsa hwom hia hwom kakonubu füi nang khua mongto donglax. 19-20Ibu oli chiamüt angkya hanpakma nang füi tomle khua mongto honu-hola honu-hola le müi hia o-jux oli akiakle koplax. 21Hünzom hanpak ang tamchu ibu pangwüi hanpak ang hünzom füi tomle osüt-oling pangwüi koplax.” 22#Ibr 11.7.Zang kaxtom lailaile Noa-e pangwüi mokle tsuak.
Currently Selected:
PONGWANG LAIPEX 6: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
