JUHAN 18
18
Jisu Kopkya
(Mat 26.47-56; Mrk 14.43-50; Luk 22.47-53)
1Ijabu kax zexle zangjopkya füima Jisu a wangshembu füi Kidron shuanu tachi to pao. Ikhato tsawat tuita tüikya. Chix ma wangshembu füi ikha to dong. 2Khohangkya mix Juda-echu ijakha awanle ngokya. Chemthüikoxle obithomthom ma hexle Jisu-e chix wangshembu füi ikhato apong. 3Ikoxle Juda, chix füi tomle Roman süpahibu othom tuita tamchu nguapabu hia farisibue tsanle apaokya Zangshwom-Hom nyetmixbu züita koplaxle ija tsawat khato ngui. Hwom a chang hia paxbu koplaxle, wüntik hia wünnan thopbu füi tüikya. 4Jisu-e chix to chempang le chang angkya hex, ibu pangnu awanlaxle, thochi to achale hüi ilaxle hwom ma atüi: “Hünzome owa lompu?”
5Hwome chix ang thüi: “Nazareth nok Jisu!” Jisu-e hwom ang thüi: “Ku chix changpu.” Ija pongma chix khohangkya Juda chuwüi hwom füi tomle ajongle tüikya. 6Hwome lomkya khünak chix changpu le Jisu-e hwom füi akax pongma, hwom füichi to atsutle chatle nguak. 7Ija koxle chixe hwom ma chatlechu atüi: “Hünzome owa lompu?” Hwome lan: “Nazareth nok Jisu.”
8Jisu-e lan: “Ku chix changpu le ami wüi kue hünzom ang thüidaokya a? Ikoxchu hünzome ku lomkya jangchangba ija khünakbu pao ang laxkox.” 9Ija a (Nange ku ang koxkya khama tuitachu chimax) le thüikya kax ngai angkya hanpakma ile chang.
10Ija pongma Simon Pitar ma changlo tuita asu, ija syet laxle, nguapa akhokya da ang ngokya mixsün tuita tsaxchi na suakle adüt. Ija da ang Malka le amünkya. 11#Mat 26.39; Mrk 14.36; Luk 22.42.Jisu-e Pitar ang thüi: “Chang a züpak ma latdao! Apae ku ang koxdaokya sikngün wansa kue chiling koxle müisele nange texpia?”
Anna Thüntho ma Jisu
12Ifüima Roman süpahibu akhokya hia Jehudi nok apün-awangkyabue Jisu kop ilaxle kha; 13ilaxle pongwang ma chix Anna hato apüi. Chix a Kaifa hohochong; kaifa a ija zanglao ma nguakho ang ngokya. 14#Jhn 11.49,50.Jehudi onok hanpakma mixhuak tuita zikya wüi amüikya changüi le pünpa-chongwangbu hama hwon apua ngokya mix a Kaifa changkya.
Pitar-e Jisu Müntsing le Akaxkya
(Mat 26.69-70; Mrk 14.66-68; Luk 22.55-57)
15Simon Pitar hia mama füizuimixbue Jisu man tole hüi. Mama füizuimix tuita owa sün nguapa akhokya mixe awanle ngopuix, chix nguakho hom hommong kaxfün nui to nop; 16Ipongma Pitar a owang angkya homtho fülom ma ajongle ngokya. Ikoxle mama füizuimix tuita owae nguapa akhokya mixe süntsing le ngokya hex, chix lai laxle nyet mix füi akax üntoxle Pitar hom mongto dün. 17Luapox nyele ngokya naochasae Pitar ang thüi: “Nangchu Jisu wangshembu khama tuita changle.” Pitar-e lan: “Ku chichang khato.”
18Zang tüle kongkya khoma, dabu hia apün-awangkyabu, wünhandix taklaxle ija ma hangle ngo. Pitar chuwüi hwom füi tomle wünzui ma hangle ajong ngo.
Nguakhoe Jisu ma Kax Atüi
(Mat 26.59-66; Mrk 14.55-64; Luk 22.66-71)
19Nguakho-e Jisu ma chix wangshembu hia chix hwon-nwot bama atüi. 20Jisu-e chix kax to lan: “Kue otsingtsing ma akaxpu, kue khünaknu tusox ma hia Zangshwom-Hom tamchu sinagokbu to hwon anopu; kue khom-pyenle otuechu hwon anokya nox chitüi. 21Idaile nange ku hwon-nwot atatkyabu hama wüi atüi angpu? Ku ma büthüi ang atüi ngopu? Ku tsai ku kax komle hwome awan ngopu.”
22Jisu-e ija akaxkya zuma, soxle asukya nyetmix tuita chix to wyen ilaxle thüi: “Nange Nguakho kax to ile chem ang lanpu?” 23Jisu-e chix ang thüi: “Kue chisukya akax daobachu pangnu thüntho ma ija kaxthai ngaile fahüi; ikoxle changkya kax akaxkya jangchangba nange ku to chem ang fitpu?”
24Ifüima Anna-e chix khalaxle wüi akhokya Kaifa hato apao.
Anaolechu Pitar Atsekya
(Mat 26.71-75; Mrk 14.69-72; Luk 22.58-62)
25Ipongma Simon Pitar a wünzui ma hangle ngokya. Ikha angkyabue chix ang thüi: “Nangchu chuja mixsün wangshem khama tuita münchang hexnyi?” Chixe atse le lan: “Münchang, ku chichang khato.”
26Pitar-e na suakle adütkya mixsün zongto kako homkha tuita nguapa akhokya da ang ngokya mixsüne thüi: “Kue nang chix füi tomle tsawat khato ngünkya münchang lea?”
27Pitar-e imachu wüi atse le lan: “Chichang khato”. Ija pongkhae O ha.
Jisu a Pilat hato Apüi
(Mat 27.1-2; Mrk 15.1-5; Luk 23.1-5)
28Huazunge hwome Jisu Kaifa hom angkya Wanghom khwa to pao; ilaxle hwome nak chilyen homle Kaitox Pangpwon sax tsuak angkya kuxma, pünpa-chongwangbu a wanghom ngwotnui to chidong. 29Ikoxle Pilat mix hwom hato lai laxle atüi: “Hünzome ija mixsün ma kaxhux fekya chem bama changkya?”
30Hwome chix ang thüi: “Ija khünak a müt kopdaokya mix chichang thüikoxle kwome nang hato owüiole chikoxse.”
31Ija khoma Pilat-e hwom ang thüi: “Hünzome wüi chix paolaxle hünzom lualua to hünzom wanlom ma tüikya ningle kaxfün lax.” Jehudi khünakbue chix ang thüi: “Kwome khünak lang angkya oli münchang.” 32#Jhn 3.14; 12.32.Ija a, Jisu-e chix oja zik ma zi angkya bama akaxle ngokya hex, ija kax ngai angkya kuxma ile chang.
33Ija khoma anaolechu Pilat khwa mongto donglaxle Jisu se üntoxle chix ang thüi: “Nang a Jehudi nok wanghom changkoxcha?”
34Jisu-e lan: “Ija nange ku bama nang lualua to akax pia hia owawae nang hama wünle fakya kax?”
35Pilat-e lan: “Nange ku Jehudi nok le texpia? Nang nang, nang füikyabue tamchu nguapa akhokyabue tix ku chak to koxkya changwüi, Nange chem mokdao kox?”
36Jisu-e lan: “Ku wangting a ija chaxwannu wangting münchang; ku wangting a ija chaxwannu wangting hex thüikoxle, Jehudi nok pünpa-chongwangbu chak to ku chikox angkya bama ku füito azuikyabu azanse; ikoxle ku wangting a ikha tokya chichang!”
37Ikoxle Pilat-e chix ang thüi: “Jangchangba nang wanghom hia?”
Jisu-e lan: “Ku wanghom changpu le nange akaxle. Ku a otsingtsing bama kaxkhi fa ang ija chaxwannu ma puxpu, tamchu ija hanpakmale ku chaxwannu to nguipu. Otsingtsing kux opang hex hwome ku kax atatle.”
38Pilat-e chix ma atüi: “Ija Otsingtsing a chem?”
Jisu Lang angkya Kaxfün Tsuak
(Mat 27.15-31; Mrk 15.6-20; Luk 23.13-25)
ija akax füima chatlechu homtho to lai laxle Pilat-e Jehudi khünakbu füi akax: “Kue ija khünak ma thaikya chemchu münatak. 39Ikoxle Kaitox Pangpwon tuk ma, kople thomkya danle kox angkya hünzom wanlom ma tüikya ningle kue danle hüipu; ija ningle anyixchu kue hünzom hato Jehudi nok wanghom danle kox angkya hünzom ang mongtsucha?”
40Ikoxle anaolechu akhongle hwome lan: “Ija khünak chichangle Barabba mix danhüi.” (Ija Barabba a mixkux mixka pa-lole ngokya khünak changkya).
Currently Selected:
JUHAN 18: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
