NASEPTE 3
3
Peter in kengbai asuhdamna
1Ni khat nai kuona, thunget hun lai in Peter leh Johan biehinn ah apeitou uhi. 2Tualeh apien chiil a kipat kengbai koi ahiei pasal khat ahing puo ua, tua mipa khu bieh inn a lutte kunga khutdaw dingin biehinn “Kotpi hoi” kichi bul ah nichinin alumsah zel uhi. 3Aman, Peter leh Johan biehinn huongsung a lut ding amu a, khut ana daw hi. 4Peter in Johan toh kengbaipa a ensaal den ua, “Koute gel hing en vawi,” achi hi. 5Tuachi’n aman amautegel apat bang ahiei mu kinem in a en hi. 6Tuachi’n Peter in, “Dangka leh sana bangma ka nei sih, hinanleh ka neisun ka hing pe ding; Nazareth Jesu Khrist min in thou inlen, kengin pei in,” achi hi. 7Tuachi kawm in akhut zietlam a tuin akaithou a, thakhat in akengte leh asiehmitgute, ahing hatpai ta hi. 8Tuachi’n amapa adingdoh a akengin apeita hi, tualeh akenga pei a, dieng dieng kawm leh Pasian phat kawmin, amautegel toh bieh inn huongsungah alutta hi. 9Tualeh akenga apei leh Pasian apahtawi mi zousie’n amu uhi. 10Tuachi’n amaun biehinn kotpi hoi bul a khutdaw a tou zelpa ahi chi athei ua, a tunga siltung lamdang sa sengsengin achiza vawt uhi. 11Tualeh kengbai hing dampain Peter leh Johan akhuttuh lai in mi zousie in lamdang asa sengseng ua, Solomon innliep achi uah ahing taikhawm uhi.
Biehinn a Peter thugen
12Tuachia Peter in tua khu amu tahin mipite ahoupi a, “Nou Israel mite aw, bangdinga tami lamdangsa na hi uoi mah? Ahisihleh kouma silbawltheina leh Pasian ka ngaisah zieh ua, ama ka peisah uh bang hiel a hing en na hi uoi? 13#Pawt. 3.15Abraham, Isaak leh Jakobte Pasian ipu leh pate Pasian in, atapa Jesu atawisangta ahi. Ama na mansah ua, Pilat in ha a, peisah atup lai nangawn a zong amai tanga na nuol vevawpa uh ahi. 14#Mat. 27.15-23; Mak. 15.6-14; Luk. 23.13-23; Jn. 19.12-15Hinanleh nouten Misiengthoupa leh Dihtatpa na deisih ua, tuolthatpa khat hing ha pieh dingin na ngenzaw uhi. 15Hinna siempa na that ua, hinanleh Pasian in Ama khu mishi lah akipat in akaithou kia a, koute tuami theipite ka hi uhi. 16Ama min agintat ziehin, Amin in tam mipa na mu u’leh na thei uh khu asuhatta hi; Ahi, Jesu zieha ginna hing um in, na un ua mitmuin asudam sieng vilvelta hi. 17“Hinanleh unaute aw, na lamkaite un ana bawl bangun na theiloupi ua tambanga bawl na hi uh chi ka thei hi. 18Hinanleh Pasian in a guolneite zousie kam a, Khrist in genthei athuoh ngei ding ahi chi ana genlawhsa khu tambangin atangtung sahta hi. 19Tuaziehin kisia unlen, na khelnate uh phietmang ahi theina dingin Mangpa lam ah kihei un, tuachi’n, Mangpa kunga kipat in halna hun ahing tung thei dinga; 20Tualeh Jesu Khrist noute a dinga aguotsa khu ahing sawl ding hi; 21Bangkim bawlhoi hun atun masangsie, van in Ama akem tadi ding a, tuo bawlhoi hun pen Pasian in leitung kisiemchil apat a, aguolnei Siengthoute zousie kam in ana gensa diem ahita hi. 22#Danp. 18.15,18Aziehpen Mosi in ipu ipate kungah, Mangpa Pasian in, Keima ahing siem bangin, na unaute lah ah guolnei khat ahing siem pieh ding, Aman thu zousie na kung ua agen pouma na ngaikhietpieh ding uhi. 23#Danp. 18.19Tualeh hichi ahi dinga, mi koipou tua guolnei thugen ngaikhe lou pouma mipite lah akipat suhmang ahi ding uh achi hi. 24Ahi, Samuel um akipat a guolnei zousie leh anua a, guolnei um zousie thu ana gen pouma in tulai hun ding ana genlawh chiet uhi. 25#Siem. 22.18Noute, guolneite leh thuhun tate na hi uh, Pasian in Abraham kungah, nahah nasuonte ziehin leitunga innkuon zousie guolzawl in umva uh, chiin ipu ipate kungah achiem hi. 26Pasian in a Tapa Jesu kaithouin, na khelnate uh kiheisansah ding leh guolzawl dingin, noute kungah ahing sawl masapen hi,” achi.
Currently Selected:
NASEPTE 3: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
