SIEMCHILBU 19
19
Lot In vansawlsiengte Sodom khopi a avaidawn
1Tualeh vansawlsieng ni, nitah lamin Sodom khuo ah ahing peisuh ua, Lot pen Sodom Kul kotkhah#Kulkotkha: O.T. hunlai in kulpi kotkhah bul khu mun poimawtah ahi, vaihawmna, thukhenna leh upate kimukhawmna ahi. ah anatou a, Lot in amauh amutahin, a lamtuo dingin ading khie a, tualeh tuol a bawhkhup in chibai abuh hi. 2Tualeh aman, “Ngaivawi un, ka mangpate aw, hepitahin nasuoh uh inn ah hing lut tadi unlen, gieh un; tualeh na kengte uh zong sil unlen, tuachi’n zingmawng matah in na thou ding ua, na pei na ding uhi” achi hi. Hinanleh Amaun, “Hilou e, kholai ah gieh nava ung,” achi uhi.
3Hinanleh aman azawl paupau a, tuachi’n a kungah apei ua, a inn ah alutta uhi. Tuachi’n aman me ahuon pieh a, tolsawlou tanghou a kanga, tuachi’n aneta uhi. 4Hinanleh alup masang un, khopi mite, Sodom mite ngel in ateh akhang, veng chin a mi zousien a inn ahing im kimkotta uhi. 5#Vai. 19.22-24Tualeh Lot ahan ua, a kungah, “Tuzan a na inn a hing tungte heisungah aumta uoi? Ka luppi theina dingun ka kung uah hing puidohin” achi uhi.
6Tuachi’n Lot kotkhah zungah akung uah ava pawtdoh a, kot anua kha a; 7Tualeh “unaute hichi talawm in gilou sih ve un,” 8“Ngaivawi un, pasal toh kithuo nailou tanu ni ka nei a, amauh hing puidoh vangin na law law uh lawta un; tammite pen bangma law vawtsih un, aziehpen tami zieh a ka inn a hinglut uh na sasih uh amah,” achi hi.
9Tualeh amaun kinuakhin in achi ua, “Tuachi’n amaun”, “Tampa lihleh tanah a hing tenglut a, thukhen vaihawm a um atum phuat a, tunvang amauh sangin nangma tungah ka bawlse zaw ding uh” achi ua, kotkhah suhsiet atumta uhi. 10Hinanleh tua miten akhut uh azandoh ua, Lot innsungah akailut ua, kot akhahta uhi. 11#2 Leeng. 6.18Tualeh kotkhah bul a mite alien aneu amit uh atosahta ua, tuachiin kotkhah mutheilou in akimaimaw ta uhi.
12Tuachi’n tua miten Lot kungah “Tamte chilou tanah mi dang aum nai mah? Na mahpa; na tanu, na tapa leh tam khopi a na neiteng tammun apat puidoh in. 13Aziehpen akikou thawm uh Mangpa masang a akhawh seng ziehin, tami khuo suse ding ka hi uh. Tualeh Mangpa’n asumang ding a kou ahing sawl ka hi uh,” achi uhi. 14Tuachi’n Lot apawtdoh a, atanute kitenpi amahpate kungah ava hil a, “Kisa unlen tam mun akipat in pawtkhie un, Mangpa’n tami khopi asuhmang ding ahi,” achi hi. Hinanleh a thugente amahpate ngaiin chiemnui bawl abang giap hi.
Sodom kisuhsietna
15Tualeh a zingmawng phalvah in, Vansawlsiengten Lot kungah, “Kisa inlen, tana um na zi leh natanu tegel puiin, ahisihleh tam khopi gawtna ah ka mang khava uteh” chi’n anawta uhi. 16#2 Pet. 2.7Tualeh ama awl awl in akisa nalai a, Mangpa mi hepisiem ahiziehin tua miten ama leh azi leh atanute akhut un aman ua, apuikhie ua, khopi pulamah akoita uhi. 17Tuachi’n hichi ahing ahia, amaute pulama apuidoh zaw un, aman, “Na hinna uh bitna ding in taikhie un, na nualam mawngmawng uh ensih unlen, phaijang mawngmawng ah zong khawlsih un. Tua muol ah tai un, tua chilouin katum khava uteh,” achi hi.
18Hinanleh Lot in akung uah, “Ka Mangpate aw, tuachi vang hida heh. 19Ngaivawi, tuin na suohin na deisahna ka muta a, tualeh na khotuona na liensah a, na khotuona in ka hinna humbitin ka tungah na sulangta hi. Hinanleh tua muol ah vang taisuoh zousih vang, sil hoilou in hing lap phadinga ka shi kha ding hi. 20“Ngaivawi, tam khopi khu taina dingin nainou khat ahia, tualeh khopi neunou zong ahi. Hepitahin khunah hing taisah zaw maiin (Khopi neunou ahisih amah?) tuachi’n ka hing ding hi” achi hi.
21Tualeh aman akungah, “Ngaivawi tam sil tungtang ah zong na thu ka pom a, tua na khopi gen zong ka sumang sih ding hi. 22Manlangin khunah tai mengin, khuna na tun masangsie bangma bawl theilou ding ka hi” achia, tuaziehin tua khopi min Zoar#Zoar: ‘Neu’ china ahi a chi ta uhi.
23Lot Zoar a alutin tua gamah ni ahing suohta hi. 24#Mat. 10.15; 11.23,24; Luk. 10.12; 17.29; 2 Pet. 2.6; Jud. 1.7Tuachi’n Mangpa’n Sodom leh Gomorrah tungah van a Mangpa kunga kipat in Mei leh Kat azusahta hi. 25Tuachi’n tua khopite leh phaijang zousie leh khopite a mi zousie leh leitunga sil pou pouma a unin asumang siengta hi. 26#Luk. 17.32Hinanleh azi in Lot nualam akipat in anualam a en a, tuachiin chikhuom asuoh ta hi.
27Tualeh Abraham zingmawng matahin athou a, Mangpa masang a adinna munah ahawtou hi. 28Tuachi’n Sodom leh Gomorrah lam leh Phaijang gam zousie a ensuh a, tualeh ngaivawi, tua gam meikhu khu hal tuina meikhu bangin azamtou hi. 29Tualeh hichi ahing hi a, Pasian in phaijang khopite asuhmang laiin Pasian in Abraham athei ngitnget a, tualeh Lot tenna asuhmang laiin, Lot khu manthaina lah a kipat in asawlkhie hi.
Lot leh atanute
30Tualeh Lot Zoar nuasie in apeitou a, taangah ateng a, atanu nitegel zong akungah ateng uhi. Zoar a aten ngamlou ziehun, atanu nitegel toh leihawm sungah ateng uhi. 31Tualeh a u nu’n anaunu kungah, “I pa lah atehta a, leitung pumpi tawndan dungzui in, eitegel hing luppi ding leitungah pasal khat zong aum nawnsih hi. 32Hing peiin ipa zu dawn khamsah vaiin, asuon man louna dingin luppi vai” achi hi. 33Tuachi’n khum zanin, apa uh uain adawn khamsahta ua, tualeh a unu alut a apa toh alumkhawm ta hi. Tualeh aman alup lam leh athawkia lam athei sih hi. 34Tualeh azingni’n tambang ahing hia, a unuin anaunu kungah “Ngaivawi, zani zanin ka pa toh ka lumkhawm a, tuzan in zong uain dawn khamsah vaiin, tualeh nang lut inlen va luppi in, ipa’n hahlesuon anei theina ding in,” achi hi. 35Tualeh khumi zan in zong apa uh uain adawn khamsah ua, tualeh anaunu athou a, akung ah ava lum a, aman alup lam leh athaw lam athei sih hi. 36Tambangin Lot tanute gelin apa u’lah apat nau ahing paita uhi. 37Tualeh a unu in tapa khat anei a, amin Moab#Moab, kichi ‘ka pa apat’ china ahi ahisah hi. Amapen tudongin Moab mite suongpa ahi hi. 38Tualeh anau nu in zong tapa khat anei a, amin Ben-Ammi#Ben-ammi kichi “Ka innkuonpi tapa” china ahi. ahisah hi. Amapen tudonga Ammon hahlesuonte suongpa ahi.
Currently Selected:
SIEMCHILBU 19: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
