SIEMCHILBU 21
21
Isaak pienna
1Tualeh Mangpa’n agensa bangin Sarah ave a, tualeh Mangpa’n agensa bangin Sarah tungah abawlta hi. 2#Heb. 11.11Tuachi’n Sarah agaita a, Pasian in a akunga agensa hun guot tahin Abraham ateh nua in tapa khat anei sahta hi. 3Tualeh Abraham in, Sarah in ahin pieh atapa min Isaak aphuota hi. 4#Siem. 17.12; Nasep. 7.8Tuachi’n, Abraham in Pasian in a tung ah athupieh bangin atapa Isaak nigiet a chin in atep atanpieh tahi. 5Tualeh atapa Isaak anei laiin, Abraham kum zakhat ahita hi. 6Tualeh Sarah in, “Pasian in ahing nuisah ta a, aza zousie’n ahing nuipi ding uh” achi hi. 7Tualeh Amanu mamain, Abraham kunga “Sarah in naungehte ahing pomding chia, genna dan thei ding koi ahiei? ateh nuain tapa ka hinpiehta thuoi a” achi hi.
8Tuachi’n naungeh ahing khanglien a, nawi neh atawp sahta ua, tualeh Isaak nawi neh tawp niin Abraham in annkuong thupitah alui hi.
Hagar leh Ishmael adel dohna
9Tualeh Izipt mi Hagar tapa, Abraham a dinga ahinpieh pa’n anuisan lai Sarah in amu a. 10#Gal. 4.29,30Tuaziehin aman Abraham kungah “tam suohnu leh atapa notdoh in; suohnu tapa in ka tapa Isaak gou aluopi sih ding hi,” achi hi. 11Tualeh tamthu, atapa ziehin, Abraham a dingin lungkim a huoi vawtsih hi. 12#Rom. 9.7; Heb. 11.18Tualeh Pasian in Abraham kungah, “Naupang leh na suohnu ziehin lungkimmaw sin, Sarah in agen zousie zuiin, Isaak akipat in nahah nasuon akichi pan ding hi. 13Tualeh suohnu tapa akipat in zong, Nam khat ka siem doh ding hi aziehpen ama zong na suon ahi.”
14Tuachi’n Abraham zingmawng matahin athou a, tanghou leh tuithawl ala a Hagar apie hi, aliengkou ah aposah a, tualeh naupang zong asawldoh ta hi. Tualeh amanu zong apei a, Beersheba gamdai ah avahvaita hi. 15Tualeh Tuithawla tui ahing beita a, tuachiin naupang khu sawlbawh nuoi khat ah akoita hi. 16Tuachi’n apei a “Naupang shiding ka mu ngam sih achi ziehin,” amatoh kitang gamla simtah thaltang tuhphah na ding munah atouta hi; Tuachi’n amasang zawn a touin, aw ngaitah in akikou a, akapta hi.
17Tualeh Pasian in naupang aw aza a, tuachi’n Pasian Vansawlsieng in van a kipat in Hagar ahan a, a kungah “Bangin ahing buoisah ahiei? Hagar zausin, aumna a naupang kikou aw Pasian in aza hi. 18Thou inlen naupang domtou inlen, na khut in tuin, ama nam thupitah a siem ding ka hi,” achi hi. 19Tualeh Pasian in amit avahsah a, tui khuh khat amu a, tuachiin ava pei a tuithawl athal dima adawnsah ta hi. 20Tuachi’n Pasian naupang toh aumkhawm a, ahing khanglien a, Gamdai ah ateng a, thalkap siem mi ahing hita hi. 21Paran gamdai ah a tenga, anu’n Izipt gam apat azi ding aguon hi.
Abraham leh Abimelek kikaala thuhun
22 #
Siem. 26.26
Tualeh khum hun laiin hichi ahing hi a, Abimelek leh a galkap pawl lamkai lienpen Phikol in Abraham kungah “Na silbawl tapou ah Pasian in ahing umpi zel hi. 23Tuaziehin tuin tam mun ah Pasian min in kei leh katu kata leh kahah kasuonte tung ah zong sol bawllou in, ka hing na hepitah mabang in kei leh na tenna gam hepina toh thuh sam dingin ka kung ah kichiem in,” achi hi. 24Tualeh Abraham in, “Kichiem vang” achi hi.
25Tuachi’n Abimelek suohten tui khuh khat alahpieh ziehun Abraham in Abimelek khu aphawh hi. 26Tualeh Abimelek in tam sil koi bawl ahiei, ka thei khavawtsih hi achia, nang zong lah nang hil kha nai vawtsih a, tualeh tuni chilou zah zong ka zakha naisih hi,” achi hi. 27Tuachi’n Abraham in, Belamte leh Bawngtalte ala a Abimelek apia a, tuachiin ani un thuhun asiemta uhi. 28Tualeh Abraham in belam hon lah ah belamnou anu sagi akoi tuom a. 29Tuachi’n Abimelek in Abraham kungah, tana belamnou anu sagi na koi tuomte bang china ahiei? achi hi.
30Khumin aman, “Tam tui khuh khu keima ngel tawdoh vawt ahi chi nahing theipina dingin belamnou anu sagi ka khut akipat na lah ding ahi” achi hi. 31Tuaziehin khum mun khu Beer-Sheba #“Beersheba kichiemna tuikhuh china ahi.” a kichita hi, tua mun a ani ua akichiem taah zieh un.
32Tuabangin Beersheba ah thuhun ahung ua, tuamin Abimelek leh agalkap pawl lienpen Phikol khu ading khie ua, Philistinte gamah akile kiata uhi. 33Tualeh Abraham in Beersheba ah tasing asuon a, khunah Mangpa tangtawn Pasian min alou hi. 34Tuachi’n Philistinte gamah Abraham sawtpi aumta hi.
Currently Selected:
SIEMCHILBU 21: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
