SIEMCHILBU 23
23
Sarah shina leh kivuina
1Sarah damsung kum za leh kum sawmni leh sagi ahia, tamte Sarah damsung kumte ahi. 2Tuachi’n Sarah Kirjath-Arba ah ashi a, tuami Kanaan gam a Hebron kichi ahia, tualeh Abraham pen Sarah suun ding leh kaa dingin ava hawta hi.
3Tuachi’n Abraham mishi luong kung apat in adingdoh a, Heth tate kungah. 4#Heb. 11.9,13; Nasep. 7.16“Na lah uah gamdang mi leh mikhuol bep ka hia, ka mishi luong ka mu nawnlou na dinga ka vui khiet theina dingin na lah uah kivuina mun ding goutan hing pie un,” achi hi.
5Tualeh Heth taten Abraham a dawng ua, a kungah. 6“Ka mangpa uh ka thugen uh ngaikhie in, ka lah uah nang lal thupitah na hi; ka han uh na deina penpen ah na mishi vuiin, na mishi vuina dingin koiman ka han uh it sih va ung,” achi uhi.
7Tuachi’n Abraham adingkhie a, tua gammi hahlesuonte kun in salam abuh hi. 8Tualeh amauh ahoupi a, a kung uah “Ka mishi ka mu lou dinga ka vui pha nang sahpi u’leh hing ngaikhie unlen, Zohar tapa Ephron kungah hing ngetpieh un. 9A loutaw a um aneisa Makpelah Kokhuh hing pie henlen, nalah ua vuina mun goutan dingin aman hun nasah zaza uh la henlen, hing pie heh” achi hi.
10Tualeh Ephron khu Heth tate lah ah atou zinga, tuachiin Hitmi Ephron in, Hitmite leh a khopi kulpi kotkha a lut zousie nangawn theiin. 11Hilou e, “Ka mangpa hing ngaikhie in lou ka hing pie a asung aum kokhuh zong kahing pie hi. Ka chipite tate mitmu in ka hing pie hi, na mishi vui in,” chiin Abraham adawng hi.
12Tuachi’n Abraham tua gam mite masang ah abohkhup hi. 13Tualeh tua gam a tengte zah in Ephron kungah, “Pha nasah leh hing ngaikhie in, louman pen vang ka hing pe ding hi. Kei a kipat la inlen khunah ka mishi ka vui ding hi,” achi hi.
14Tualeh Ephron in Abraham a dawnga a kungah, 15Ka mangpa, hing ngaikhe vawi in, “Agam khu dangka Shekel zali hugiap ahia, tuami nang leh kei kaala gentham ahi amah? tuaziehin na mishi vui mai in,” achi hi. 16Tualeh Abraham in Ephron thugen a ngaikhie a, tualeh Abraham in Heth tate theipi in Ephron genza dangka Shekel zali, Summet bawlte zah zel ate pieh a Ephron apeta hi.
17Tuachi’n Ephron lou, Mamre mazawn a Makpelah gam a um alou toh, a sunga um kokhuh toh, alou lai leh agamgi kimkot a sing umte zousie toh. 18Abraham kungah Heth tate theipi in, a khopi uh kotkhah a lut zousiete masang ah pieh kip in aumta hi.
19Tamte zouin Abraham in azi Sarah Kanaan gam a Mamre mazawn a um Makpelah lou a kokhuh ah avuita hi. 20Tuachi’n lou leh a sunga kokhuh um khu Heth taten Abraham kungah kivuina mun a nei den dingin apekipta hi.
Currently Selected:
SIEMCHILBU 23: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
