JOHAN 8

Numei angkawmlai matna

1Hinanleh Jesu Olive muol ah apeita hi. 2Zingmawng matah in biehinn ah ahing pei kia a, mi zousie akungah ahing pei ua, tualeh ama atou a, amauh thu ahilta hi. 3Tuachi’n laigielmite leh Pharisaiten numei khat angkawmlai amat uh, akungah ahing zawpi ua, alaikim tah uah ading sah ua, 4a kungah “Siepa, tam numei a angkawm laitah a kiman ahi. 5#Siempu. 20.10; Danp. 22.22-24Dan laibu ah Mosi in tambang mi khu suonga selup ding thu ahing pie hi. Hinanleh Nang bangchi ding na chi ei?” achi uhi. 6Tam pen Ama hehna ding amu theina ding ua, aze etna ua agen uh ahi. Hinanleh Jesu akunsuh a, amaute thugen zalou bangin akhutme in lei lah agiel hi.

7Tuabanga a doh mun seng zieh un, Ahing dahtou a, akung uah, “Na lah ua khelna neilou pen in amanu sep masa heh,” achi hi. 8Akunsuh kia a leilah agiel kia hi. 9Tuachi’n amaun tam thu azah un, asie leh pha theina un mawpai in, a upa pen a kipat atawp dongin khat khat in apei mang ta ua, Jesu leh alai a ding numeinu maimai anuasieta uhi. 10Jesu adahdoh tahin, “Numeinu chilou midang koima amuta sih a, akungah, Numei nang hing hehte heia umta uh ahiei? Koiman siemlou hing tangsah lou hi maw?” achi hi. 11Amanu’n “Mangpa koiman siemlou ang tangsah sih,” achi hi. Jesu’n akungah “Ken zong siemlou ka hing tangsah sih hi, pei inlen khiel kia nawn sin,” achi hi.

Jesu leitung khovah ahi

12 # Mat. 5.14; Jn. 9.5 Tuachi’n akung uah “Kei leitung vah ka hi; kei hing zui pouma miel ah akhohei sih dinga, hinna vah anei zaw ding hi,” achi hi. 13#Jn. 5.31Tuaziehin Pharisaiten akungah, “Nang leh Nang kitheipi na hi bou hi. Na theipina thu adih sih hi,” achi uhi. 14Jesu’n adawnga akung uah, “Kei leh kei kitheipina thu gen hitaleng zong, ka theipina thu adih ahi, aziehpen heisunga hing kipan a heilang pei ding ka hiei chi ka thei hi. Hinanleh nouten ka hing kipatna na thei sih ua, heilang a pei ding ka hiei chi zong na thei sih uhi. 15Nouten tahsa dan in vai na hawm ua, Ken koima tungah vai ka hawm sih hi. 16Vaihawm pieh na hita leng zong ka vaihawm adih hi; aziehpen kei ngentang ka hi sih a, Kei leh ka Pa ahing sawlpa ka hi zaw uhi. 17#Danp. 19.15Na dan laibu sung uah zong, mi ni thutheipi khu adih ahi, chi akigiel hi. 18Kei pen keima thutheipi khat ka hi a, tualeh Pa ahing sawlpa’n ka thu ahing theipi ahi,” achi hi.

19Tuachi’n amaun akungah, “Na Pa hei a um ahiei?” achi uhi. Jesu’n adawnga, “Nouten kei lah nang thei sih ua, ka pa zong na thei sih uhi; Kei hing thei u’lachin ka Pa zong theita ding hi ve u’chin,” achi hi. 20Tam thute Jesu’n biehinn huongsunga sillatte koikhawmna mun a athuhil laia agen ahi, tualeh koiman atungah khut aha sih uhi, ahun atun nailou ziehin.

Jesu’n apeimang thu agenlawhna

21Jesu’n akung uah agen kia a, “Ka peimang ding a nouten na hing sui ding ua, na khelna uah na shi ding ua, Ka peina ah na hing pei thei sih ding uhi.” 22Tuachi’n Judaten “Ama leh Ama kithat ding adiei, ka peina ah na hing pei thei sih ding uh achi ziehin?” akichi uhi. 23Tualeh Aman akung uah, “Noute pen nuoi lam a kipan na hi ua, Keipen tunglam a kipan ka hi; Noute tam leitunga na hi ua, Keipen tam leitunga ka hi sih hi. 24Tuaziehin na kung uah, Na khelna uah na shi ding uh, aziehpen Kei ama ka hi chi na gintat sih u’leh, na khelna uah na shi ding uh, ka chi ahi,” a chi hi.

25Tuachi’n amaun akungah, “Nang koi na hiei?” achi uhi. Jesu’n akung uah, “Achiil a na kung ua ka gen mama khu ka hi, achi hi. 26Na tungtang thu uah gen ding leh vaihawmna ding tampi ka nei hi; hinanleh ahing sawlpa pen adih ahi, Ama apata ka zahte leitung mi zousie kungah ka gen zel hi,” achi hi.

27Aman Pa thu amaute kunga agen ahi chi athei sih uhi. 28Tuachi’n Jesu’n akung uah, “Mihing Tapa na khaikang zou chiengun, Kei ama ka hi chi leh. Keima thuin bangma ka bawl sih a, hinanleh ka Pa’n ahing hil bangin tam thute ka gen zaw ahi, chi na thei ding uhi. 29Ama kei hing sawlpa ka kung ah a um hi. Pain Kei ngentangin ahing nuasie sih hi, Ama kipahnalam silte ka bawl ngitnget ziehin,” achi hi. 30Tam thute agen lai in mi tampi in Ama agingta uhi.

31Tuachi’n Jesu’n Ama gingta Judate kungah, “Ka thu a na um zing u’leh ka nuazuite na hi tahtah uhi. 32Tualeh thutah na thei ding ua, tua thutah in noute ahing suohtasah ding hi,” achi hi. 33#Mat. 3.9; Luk. 3.8Amaun adawng ua, “Koute Abraham hahlesuonte ka hi ua, koima suoh leh sal in ka taang ngai sih uhi; bangchidan a noute suotatsah na hi ding uh, na hingchi ahiei?” achi uhi. 34Jesu’n amauh adawnga, “Chitahtahin ka hing hil ahi, Koizong khelna bawl pouma khelna suoh ahi. 35Suoh pen kumtawnin inn ah a umden sih a, hinanleh tapa pen kumtawn in a umden hi. 36Tuaziehin Tapa in ahing suotatsah leh na suohta tahtah ding uhi. 37Abraham hahlesuonte na hi uh chi ka hing thei hi; hinanleh nouten kei tha na hing tum uhi, ka thu nouma lungsim a a umlou ziehin. 38Ken ka Pa kunga ka mute ka gen a, nouten na pa uh kunga na mute uh na bawl uhi,” achi hi. 39Amauten adawng ua akungah, “Abraham ka Pa uh ahi,” achi uhi. Jesu’n akung uah “Abraham tate hi u’lachin Abraham nasepte na sem ding uhi. 40Hinanleh tu in Kei Pasian kunga kipata ka zah thutah hing hilpa tha na hing tum uhi. Abraham in tambangin abawl sih hi. 41Nouten na pa uh silbawlte na bawl uh ahi,” achi hi. Tuachi’n amaun akungah, “Koute zawlta ka hi sih uhi. Pa khat ka nei uh, tuakhu Pasian,” ahi achi uhi.

42Jesu’n akung uah, “Pasian na Pa uh hileh kei na hing itta ding uhi, aziehpen Pasian a kipat a hing pei ka hi a, Keima thu a hing pei ka hi sih a, Ama sawl ka hi zaw hi. 43Bangchidan a ka thugen theisiemlou na hi uoi? Ka thugen na pom theilou zieh uh ahi. 44Noute na pa uh dawimangpa a na hi ua, na pa uh deilam na bawl uhi. Ama khu achiil a kipata tuolthatpa ahia, ama thutah ah aumlou ziehin thutah ah ading sih hi. Zuou agen lezong ama a um khu agen ahia, aziehpen ama zuoutheipa ahia, tualeh zuouna pa zong ahi. 45Thutah ka gen ziehin nouten na hing gingta sih uhi. 46Na lah uah koi ahiei khelna thu a siemlou hing tangsah? Thutah ka gen leh bangdinga hing gingta lou na hi uoi? 47Pasian a kipan mi in, Pasian thute angaikhie hi. Tuaziehin Pasian a kipat na hi lou zieh un, Ama thu na ngaikhe nuom sih uhi,” achi hi.

48Tuachi’n Judaten a dawng ua akungah, “Nang Samari mi na hi a, dawi zawl na hi ka hing chi uh, ka chi dih mama uh hilou ahiei amah?” achi uhi. 49Jesu’n adawnga “Kei dawi zawl ka hi sih a, Ka Pa ka pahtawi ahi zaw, nouten kei na hing pahtawi sih uhi. 50Ken keima thupina ka sui sih a, vaihawmna sui mi khat a um hi. 51Chitahtah in ka hing hil ahi, mi koipouin ka thu azui leh shina achiem kha ngai sih ding,” achi hi.

52Tuachi’n Judaten akungah, “Tuinvang dawi zawl na hi chi ka hing theita uh, Abraham ashita a, guolneite zong ashita uh, hinanleh Nang, mi’n ka thu azui leh shina achiem kha ngai sih ding na chi hi! 53Ashisa ka pu uh Abraham sangin Nang na thupi zaw amah? Guolneite lah ashita uh; Nang leh nang koi a hing kibawl na hiei?” achi uhi.

54Jesu’n “Kei leh Kei kipahtawi hitaleng, ka kipah tawina bangma ahi sih ding, ahing pahtawi khu ka Pa, nouten Ka Pasian uh ahi na chipa uh ahi. 55Hinanleh nouten Ama na thei sih ua, ken Ama ka thei hi. Ama ka thei sih chileng noute banga mi zuou ka hita ding hi, hinanleh Ama ka thei tahtah a, athu zong ka zui hi. 56Na pu uh Abraham in ka ni mu ding anuom mama a, amuta ngei a, akipah mama hi,” achi hi.

57Tuachi’n Judaten akungah, “Nang kum sawmnga zong ching nailouin Abraham na mu khata amah?” achi uhi. 58Jesu’n akung uah, “Chitahtah in ka hing hil ahi, Abraham um masangin ka umta hi,” achi hi. 59Tuachi’n amauten asena dingin suong ala ua, hinanleh Jesu akiphuol a, biehinn a pat apawtkhie a, alah ua peisuoh in apeita hi.

Currently Selected:

JOHAN 8: ZOUBSI

Highlight

Copy