Ngāue 1
1
1‘E Tiofilusi, Ko ‘eku ‘uluaki tohi atú, na‘á ku fakamatala ai ki he ngaahi ngāue mo e ngaahi fakahinohino na‘e fai ‘e Sīsū mei he kamata‘angá 2‘o a‘u ki he ‘aho na‘e ‘ohake ai ia ki he langí. ‘I he te‘eki ai ke ‘ohake iá, na‘á ne fai ha tu‘utu‘uni ki he kau ‘apōsetoló, ‘a ē na‘á ne fili kinautolu ‘i hono tokoni‘i ia ‘e he Laumālie Mā‘oni‘oní.
3Na‘e fe‘unga mo ha ‘aho ‘e fāngofulu mei he falengā mamahi ‘a Sīsuú ‘a ‘ene toutou fakamo‘oni‘i ki he‘ene kau ‘apōsitoló ‘okú ne mo‘ui, mo ‘ene toutou fakamatala ange kiate kinautolu e anga ‘o e pule‘anga e ‘Otuá. 4Pea lolotonga ‘enau kei nofo fakatahá, na‘á ne tala ange kiate kinautolu,
“Mou nofo ai pē ‘i Selusalema ‘o talitali ki hano foaki atu ‘e he Tamaí ‘a e Laumālie Mā‘oni‘oní, ‘o hangē pē ko ‘ene tala‘ofa na‘á ku tala atú. 5He na‘e papitaiso vai kimoutolu ‘e Sione, ka ‘o ka hili pē ha ngaahi ‘aho si‘i pea ‘e papitaiso kimoutolu ‘aki e Laumālie Mā‘oni‘oní.”
Ko e Hā‘ele Hake ‘a Sīsū ki he Langí
6‘I he kei nofo e kau ‘apōsitoló mo Sīsuú na‘a nau fehu‘i ange, “‘Eiki, te ke toe fokotu‘u leva ‘a e pule‘anga ‘Isilelí?”
7Pea tali ange ‘e Sīsū, “‘Oku ‘ikai ko kimoutolu ke mou ‘ilo e ngaahi kuongá. Ko e Tamaí pē ‘okú ne fokotu‘utu‘u e ngaahi kuongá. 8Ka ‘e ha‘u e Laumālie Mā‘oni‘oní ‘o fakaivia kimoutolu. Pea te mou hoko ai ko ha kau fakamo‘oni kiate au ‘i Selusalema, mo Siutea kātoa, mo Samēlia, mo e tapa kotoa ‘o māmani.” 9Pea hili pē ‘ene fakamatala ko iá, na‘e ‘ohake ia ki he langí ka nau sio pē, pea hoko ai pē mo ‘ene pulia ‘i ha konga ‘ao.
10Pea fakafokifā pē kuo tutu‘u mai ha ongo tangata teunga hina. 11Pea pehē mai ‘e he ongo tangatá, “Kau Kāleli, ko e hā ‘oku mou mo‘usioa ai ki he langí? Kuo ‘osi ‘ohake ‘a Sīsū ki he langí, ka te ne toe foki mai. Pea ko e anga ‘o ‘ene foki maí, ‘e tatau pē mo ‘ene ‘alu na‘a mou mamata ki aí.”
Ko ha Fetongi ‘o Siutasi
12-13Na‘e foki leva ‘a e kau ‘apōsitoló ki he Mo‘unga ko ‘Ōlivé, ‘a ia ko hono vāmama‘o mo Selusalemá ko e vauea nai ‘o e maile. Pea nau a‘u atu ki ai, ‘o hū ki honau loki ‘i he fungavaka ki ‘olunga ‘o e fale na‘a nau nofo aí, ko Pita, mo Sione, Sēmisi, ‘Anitelū, Filipe, Tōmasi, Pātolomiu, Mātiu, mo Sēmisi ‘a e foha ‘o ‘Alefiusí, mo Saimone Mamahi‘i Fonua, pea mo Siutasi ‘a e foha ‘o Sēmisí.
14Na‘e fa‘a lotu fakataha ‘a e kau ‘apōsitoló. Pea na‘e fa‘a kau ai e kau fefiné, mo Mele ‘a e fa‘ē ‘a Sīsuú, pea mo e ngaahi tehina ‘o Sīsuú.
15Pea ko e ‘aho hono hokó, kuo ‘i he toko teau uofulu ‘a e kāinga lotu ‘oku nau nofo fakatahá. Pea tu‘u hake ‘a Pita ‘o lea kiate kinautolu,
16“Kāinga, na‘e pau pē ke fakahoko e folofola na‘e fakafou mai ‘ia Tēvita ‘e he Laumālie Mā‘oni‘oní, ‘a ē ‘oku kau kia Siutasí, ‘a e tangata na‘á ne taki ange ‘a e fa‘ahinga na‘a nau puke ‘a Sīsuú. 17Na‘e kau foki ‘a Siutasi mo kitautolu, pea na‘e ‘oange hono fatongia ke fai. 18Ka na‘e fakatau ‘e Siutasi ha konga ‘api ‘aki e pa‘anga na‘e totongi ange ki ai ke ne fai e kovi ko iá, peá ne tō tū‘ulu he konga ‘api ko iá ‘o mafa‘a hono keté, pea mahua ki tu‘a hono to‘oto‘ongá. 19Na‘e ‘ilo ki ai e kakai nofo Selusalemá, pea nau ui leva ‘a e ‘api ko iá ko ‘ĀKELETAMA. Ko e ‘uhinga ‘o e ‘Ākeletamá ‘i he he‘enau leá ko e “‘Api ko Toto.” 20He kuo tohi he Tohi Sāmé,
‘Tuku ke lī‘aki ai pē hono ‘apí,
‘Oua ‘e nofo ai ha taha.’
Pea mo eni,
‘Tuku ke fai ‘e he taha kehe
‘a hono fatongiá.’
21-22Pea ‘i he‘ene peheé leva, kuo pau ke tau fakanofo ha taha kehe ke kau mo kitautolu ‘i hono fanongonongo e fokotu‘u ‘o Sīsū mei he maté. ‘Oku ‘aonga pē ha taha kuo talu ‘etau kau fakataha mei he kamata‘angá--mei he papitaiso ‘o e ‘Eiki ko Sīsuú ‘o a‘u ki hono ‘ohake ki he langí.” 23Pea ko e ongo tangata ‘e toko ua na‘e fokotu‘u hona hingoá. Ko Siosifa na‘e ui ko Pāsapa, ka ko hono fakaikú ko Siusitasa, pea mo Mataiasi.
24Na‘e fai leva ‘enau lotu, ‘o nau pehē ‘i he‘enau lotú, “‘Eiki, ‘oku tokaima‘ananga kiate koe ‘a e loto ‘o e kakai kotoa pē. Faka‘ilo mai mu‘a kiate kimautolu ‘a e toko taha kuó ke fili ke ne hoko ko e ‘apōsetolo 25‘o fetongi‘i ‘a Siutasi, ‘a ē kuó ne kai e nunu‘a ‘o ‘ene fai koví.” 26Pea nau fai leva ‘enau talotalo, ‘o toho e hingoa ‘o Mataiasí. Pea nau tānaki ia ki he kau ‘apōsitolo ‘e toko hongofulu mā taha ko eé.
Currently Selected:
Ngāue 1: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
