Ngāue 17
17
Ko e Moveuveu ‘i Tesalonaika
1Na‘e fononga atu ‘a Paula mo hono ngaahi kaungāme‘á ‘o tuku mai ‘a ‘Amifipoli mo ‘Apolonia, pea toki hoko atu ai pē ki Tesalonaika.
Na‘e ‘i ai ha fai‘anga lotu ‘o e kakai Siú he kolo ko iá. 2Pea ‘alu ai ‘a Paula ‘o ma‘u lotu he Sāpaté, peá ne lea ki he kāinga lotú mei he Folofolá he Sāpate hokohoko ‘e tolu 3ke fakamahino kiate kinautolu ‘a e pau ke fepaki ‘a e Mīsaiá mo ha ngaahi faingata‘a, ka ‘e toe tu‘u pē mei he maté. Pea fakahā ai pē ‘e Paula kiate kinautolu ko Sīsū ‘a e Mīsaia ‘okú ne malanga‘í. 4Pea tui e kau Siu ‘e ni‘ihi ki he fakamatala ‘a Paulá, ‘o nau kau leva mo Paula mo Sailosi. Na‘e tui mo ha kau muli ‘e ni‘ihi mo ha kau fefine ‘iloa he koló.
5Ka na‘e meheka ha kau taki ‘e ni‘ihi ‘o e kakai Siú, ‘o nau uki mai ha kau haua he feitu‘u māketí ke fakatupu ha maveueu he koló. Na‘a nau ‘ohofi e ‘api ‘o e motu‘a ko Sēsoni, ko ‘enau fakakaukaú ke fau mai ai ‘a Paula mo Sailosi ‘o taki ki he kakaí. 6Pea nau ō atu kinautolu ki he ‘apí, tā ‘oku ‘ikai ke ‘i ai ‘a Paula mo Sailosi, pea talu ai pē ‘enau toho mai ‘a Sēsoni mo e ni‘ihi he fa‘ahinga na‘e tui kia Sīsuú, ‘o taki atu ki he kau ma‘u mafai ‘o e koló. Pea nau kaila, “‘Oku fakatupu moveuveu ‘a Paula mo Sailosi he feitu‘u kotoa pē. Kuó na a‘u mai eni ki hotau koló ni, 7pea kuo tali ‘e Sēsoni ke na nofo ‘i honau ‘apí. ‘Oku talangata‘a ‘a e kakai ko ení ki he ngaahi lao kotoa pē ‘a Sisá ko ‘enau tu‘uaki holo ‘oku ‘i ai e tu‘i kehe, ko e tangata ko Sīsú.”
8Na‘e ‘ita ‘a e kau takí mo e kakaí ‘i he lau ko iá, 9‘o nau fekau ‘a Sēsoni mo e kāinga lotú ke totongi ange ha pa‘anga malu‘i kae tuku ange kinautolu ke nau ō.
Ko e Hono Tali e Ongoongo Leleí ‘i Pēlea
10Ko e pō pē ko iá, na‘e tuku atu ‘e he kāinga lotú ‘a Paula mo Sailosi ki Pēlea. Peá na a‘u atu ki Pēlea, ‘o hangatonu ai pē ki he fai‘anga lotu ‘o e kakai Siú. 11Ko e kakai Pēleá, na‘a nau anga lelei ange ‘i he kakai Tesalonaiká. Na‘a nau tali fiefia ‘a e Ongoongo Leleí, ‘o nau fekumi ki he folofolá he ‘aho ki he ‘aho ke fakapapau‘i pe ko e mo‘oni e ngaahi me‘a kuo fakahā ange kiate kinautolú. 12Na‘e tui ki he ‘Eikí ‘a e tokolahi ‘iate kinautolu, ‘o kau ai mo ha kau fefine Kalisi ‘iloa, mo ha kau tangata Kalisi ‘e ni‘ihi.
13Pea ‘ilo ‘e he kau taki ‘o e kakai Siu ‘i Tesalonaiká ‘oku malanga‘i ‘e Paula ‘a e Ongoongo Leleí ‘i Pēlea, pea nau omi ‘o fakatupu maveuveu ‘aki ‘enau fakakovi‘i ‘a Paula ki he kakaí. 14Pea ‘ave leva ‘e he kāinga lotú ‘a Paula ki he feitu‘u matātahí, kae nofo ai pē ‘a Sailosi mo Tīmote ‘i Pēlea. 15Na‘e ō ai pē ha ni‘ihi mo Paula ‘o a‘u ki ‘ātenisi, pea nau toki foki mai mo e fekau ‘a Paula kia Sailosi mo Tīmote ke na ō ange he faingamālie vave tahá.
Ko Paula ‘i ‘ātenisi
16Lolotonga ‘a e kei tatali ‘a Paula ‘i ‘ātenisí, na‘e mamahi hono lotó he fu‘u lahi fau ‘a e fanga tamapua he koló. 17Peá ne ‘alu leva ki he fai‘anga lotu ‘o e kakai Siú ke lea kiate kinautolu mo ha taha pē ‘oku kaungālotu mo kinautolu. Pea ko e ‘aho ki he ‘aho mo ‘ene lea ai pē ki he kakai kotoa na‘a nau fetaulaki he feitu‘u māketí. 18Ko e ni‘ihi ai ko e kau ‘Epikuliō, pea ko e ni‘ihi ko e kau Sitoiko. Pea nau kamata fakakikihi mo Paula. Pea fe‘ekenaki e ni‘ihi, “Ko e hā koā ‘a e me‘a ‘oku valelau ki ai ‘a e sianá ni?”
Pea pehē ‘e he ni‘ihi ia, “Ngalingali ‘okú ne tu‘uaki ‘otua muli!” Ko ‘enau lau peheé koe‘uhí ko e malanga‘aki ‘e Paula ‘a Sīsū pea mo e toe tu‘ú.”
19Na‘a nau taki mai leva ‘a Paula ki he fakataha‘anga na‘e ui ko e ‘Aleopeiko, ‘o tala ange, “Fakamatala mai angé kiate kimautolu ‘a e fakakaukau fo‘ou ko eni ‘okú ke malanga‘akí. 20‘Oku mau ngalikehe‘ia he ngaahi me‘a ‘e ni‘ihi ‘okú ke tu‘uaki, pea ‘oku mau fie ‘ilo ki ai.”
21Ko e tefito‘i anga ‘o e kakai ‘o ‘ātenisí, mo e kau muli ‘oku nofo aí, ko e manako he fanongo mo talanoa me‘a fo‘ofo‘ou. 22Pea tu‘u hake ‘a Paula ‘i he ha‘oha‘ongá ‘o lea. Pea ko ‘ene lea eni na‘e faí, “Kau ‘ātenisi, ‘oku ou fakatokanga‘i ko e kakai mamahi‘i lotu kimoutolu. 23Na‘á ku takai holo ‘i homou loto koló, ‘o u mamata ai ki he ngaahi me‘a ‘oku mou lotu ki aí. Peá u a‘u ai ki he ‘ōlita ‘oku tongi ai e ngaahi leá ni, ‘Ki ha ‘otua ta‘e ‘iloa.’ Tā ‘oku mou lotu ki ha ‘Otua ‘oku ‘ikai te mou ‘ilo ki ai. 24Ko e ‘Otua ko iá, ko ia na‘á ne ngaohi ‘a māmani mo e me‘a kotoa ‘oku ‘i aí. Ko e ‘Eiki ia ‘o langi mo māmani, pea ‘oku ‘ikai ke nofo ia ‘i ha ngaahi fale lotu kuo fa‘u ‘e ha kakai. 25‘Oku ‘ikai ke toe tokoni‘i ia ‘e ha taha. Ka ko ia ‘okú ne foaki mai e mo‘uí, mo e mānavá, mo e me‘a kotoa pē, ma‘á e kakai kotoa pē. 26Na‘á ne fakatupu mei he tangata ‘e toko taha pē ‘a e ngaahi matakali kotoa ‘i māmani, peá ne tu‘utu‘uni mo e feitu‘u ‘e tu‘u ai honau ngaahi pule‘anga taki taha, mo e kuonga ‘e taki taha tupu hake aí.
27Ko e fai kotoa eni ‘e he ‘Otuá, hei‘ilo te tau fekumi kiate ia, pea tau a‘u ai kiate ia. He ‘oku ‘ikai te ne mama‘o mei ha taha ‘iate kitautolu. 28‘Okú ne ‘omi mo e ivi ke tau mo‘ui ai, mo fe‘alu‘aki ai, mo tolonga ai, ‘o hangē pē ko e lau ‘a ho‘omou punaké, ‘Ko ‘ene fānau pē mo kitautolu.’
29Pea kapau leva ko e fānau kitautolu ‘a e ‘Otuá, tā ‘oku taau ke ‘oua te tau fakakaukau ‘oku hangē ia ko ha tamapua kuo ngaohi ‘aki ha koula, pe siliva, pe maka. ‘Oku ‘ikai ke hangē ia ko ha me‘a kuo toki fakakaukau‘i hake pē ‘e ha kakai pea nau ngaohi. 30Kuo talu mei mu‘a mo e fakamolemole‘i ‘e he ‘Otuá ‘a e ngaahi fakakaukau peheé koe‘uhí ko hono fai ta‘e ‘ilo ‘e he kakaí. Ka kuó ne tu‘utu‘uni eni ke tafoki kiate ia ‘a e kakai kotoa pē ‘i he feitu‘u kotoa pē. 31Kuo ‘osi fakapapau‘i ‘e he ‘Otuá ‘a e ‘aho te ne fakamāu‘i ai ‘a e kakai kotoa pē ‘i māmani ‘aki e faitotonu. Pea kuó ne ‘osi fili e tangata ko Sīsū ke ne fai ‘a e fakamāú. Kuó ne fakamo‘oni‘i kotoa eni ‘aki ‘ene fokotu‘u ‘a Sīsū mei he maté.”
32Ko ‘ene fanongo atu pē ‘a e kakaí ki he pehē ‘e Paula kuo fokotu‘u ‘e he ‘Otuá ha taha mei he maté, pea kamata kata ‘a e ni‘ihi. Kae pehē ‘e he ni‘ihi ia, “Toki fakamatala mai ena ha ‘aho kehe.” 33Na‘e ‘alu leva ‘a Paula mei he fakataha‘angá. 34Ka na‘e tui ha ni‘ihi ai ki he ‘Eikí, ‘o nau ō mo Paula. Ko e toko taha ai, ko Taionisio hono hingoá, na‘e kau he fakataha‘angá. Pea na‘e tui ki he ‘Eikí mo ha fefine ko Temalisi hono hingoá, pea mo ha ni‘ihi kehe.
Currently Selected:
Ngāue 17: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
