Ngāue 6
6
Ko e Fili e Toko Fitu ke Tokoni he Ngāué
1Faifaí pea tokolahi e kakai kuo tui kia Sīsuú. Pea na‘e ‘i ai ha ni‘ihi ‘i he fa‘ahinga na‘e lea faka-Kalisí na‘a nau kamata lāunga’i e fa‘ahinga na‘e lea faka-Hepeluú, #6:1 Ko e lea faka‘Alameá ia ‘i he kuonga ‘o Sīsuú. Koe‘uhí ko e ‘ikai ke ‘oange hanau ‘inasi he tufa e tokoni faka‘ahó.
2Pea fekau leva ‘e he kau ‘apōsitolo ‘e toko hongofulu mā uá ke kātoa mai e kāinga lotú, pea nau lea ange kiate kinautolu, “‘Oku ‘ikai ke totonu ke tuku ‘emau malanga‘i e folofola ‘a e ‘Otuá kae tufa me‘a kai. 3Kāinga, mou fili mai meiate kimoutolu ha kau tangata falala’anga ‘e toko fitu pea fonu ‘i he Laumālie ‘o e ‘Eiki mo poto. Pea tau tuku kiate kinautolu ke nau fai e fatongia ko ‘ení, 4ka mau nofo taha pē kimautolu ki he lotu mo e malanga‘i e Folofolá.”
5Na‘e fakafiemālie ki he kāinga lotú ‘a e fokotu‘u ko ení, pea nau ‘uluaki fili ‘a Sitīveni. He ko e tama tui mālohi, pea fonu ‘ene mo‘uí he Laumālie Mā‘oni‘oní. Pea nau toki fili leva mo Filipe, mo Pōkolo, Naikano, Taimoni, Pāmina, mo Nikola, ko e tama muli mei ‘Anitioke na‘e ului ki he lotu ‘a e kau Siú ki mu‘a atu. 6Na‘e taki mai e kau tangatá ni ki he kau ‘apōsitoló. Pea lotu leva e kau ‘apōsitoló, ‘o hilifaki nima ‘iate kinautolu. #6:6 Ke faka‘ilonga‘i ‘aki hono fili kinautolu ke fai e fatongia ko eni.
7Pea mafola ai pē e folofola ‘a e ‘Otuá, ‘o tupulekina ai e tokolahi ‘o e kakai ‘i Selusalema na‘e tui kia Sīsuú. Pea na‘a mo e kau taula‘eiki tokolahi na‘a nau tui kiate ia.
Ko Hono Puke Fakamālohi‘i ‘o Sitīveni
8Na‘e fakaivia ‘e he ‘Otuá ‘a Sitīveni ke fai ha ngaahi mana mo e ngaahi me‘a fakaofo, ‘o sio tonu ai e kakaí. 9Ka na‘e ‘i ai e kau Siu mei Sailine mo ‘Alekisānitia na‘e kau ki ha fa‘ahinga na‘a nau ui kinautolu ko e “Kau Tau‘atāina.” Na‘a nau kamata fakakikihi mo Sitīveni, pea na‘e kau ai mo ha ni‘ihi mei Silisia, mo ‘Ēsia. 10Ka na‘e ‘ikai te nau lava‘i ‘a Sitīveni. He na‘e hā he fakamatala ‘a Sitīvení ha poto makehe na‘e ‘oange ‘e he Laumālie Mā‘oni‘oní.
11Pea nau fakaloto‘i leva ha ni‘ihi ke nau fakahā mai, “Na‘a mau fanongo kia Sitīveni ‘oku lea kovi kia Mōsese mo e ‘Otuá.”
12Na‘e iku ai ‘o tafoki meia Sitīveni ‘a e loto ‘o e kakaí, mo ‘enau kau faiakó, mo honau kau takí. Pea nau puke ‘a Sitīveni ‘o taki atu ‘o fokotu‘u he Fakataha‘anga Lahí.
13Na‘e alea leva ‘a e ni‘ihi ke talatalaaki‘i loi ‘a Sitīveni, ‘o nau pehē ‘e kinautolu, “Ko e siana ko ení, ‘oku ‘ikai ke tuku ‘ene lea kovi ki he Temipale Tapú ni mo e Lao ‘a Mōsesé. 14Na‘a mau fanongo tonu ki ai ‘okú ne tala holo ‘e faka‘auha ‘e Sīsū mei Nāsaleti ‘a e potu toputapú ni, pea te ne liliu hotau ngaahi ‘ulungāanga kuo tukufakaholo mai meia Mōsesé.” 15Na‘e sio fakamama‘u kātoa ‘a e hou‘eiki fakatahá kia Sitīveni, pea ta kuo hā mai hono fofongá ‘o hangē ko e fofonga ‘o ha ‘āngeló.
Currently Selected:
Ngāue 6: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
