Luke 1

Ko e Talateu

1Kuo feinga ‘e ha tokolahi ke fa‘u ha fakamatala hokohoko ʻo e ngaahi meʻa kuo fakakakato ‘e he ʻOtuá, ʻi hotau lotolotongá. 2ʻA ia foki naʻa nau hikitohi ʻo tuku mai kiate kitautolu, talu mei he kamataʻangá, ʻa e ngaahi fakamatala ʻa ha ni‘ihi naʻa nau mamata tonu he ngaahi meʻa na‘e hokó, ʻa ia naʻa nau hoko ko e kau faifekau ʻo e kōsipeli. 3Ko ia ai, ʻeiki maʻulakanga Tiofilusi, naʻá ku fakatotolo tokanga ʻe au foki ʻa e meʻa kotoa pē, mei hono kamataʻangá, ke hokohoko lelei, ʻou hikotohi ia maʻau. 4Koeʻuhi̇̄ ke ke meʻa‘i kakato, ʻa e mo‘oni ʻo e ngaahi akonaki kotoa pē kuó ke ʻosi fanongo ai̇́.

Ko e Fakahaa‘imai ʻo e Fanau‘i ʻo Sione Papitaisó

5ʻI he kuonga naʻe kei Tuʻi ai ʻa Hēlota ʻi Siuteá, na‘e ʻi ai ha faifekau ʻi he haʻa ʻĀpaiá, ʻa ia ko Sākalaiá hono hingoá. Pea ko hono mali̇́, ko ʻIlisapesi, ko e fefine mo ia foki mei̇́ he matakali ʻo ʻĒloné. 6Ko e ongo mātúʻa lotumoʻoni kinaua ʻi he ʻao ʻo e ʻOtuá, he naʻá na mātuʻaki tauhi ʻo haohaoa, ʻa e kotoa ʻo e ngaahi tuʻutuʻuni mo e ngaahi fekau ʻa e ʻEiki̇́. 7Ka na‘e ʻikai ke na fanau, he na‘e paʻa ʻa ʻIlisapesi, pea kuo na fakatou motuʻa.

8Pea ko e ʻaho ‘e taha, lolotonga naʻe fai ʻe Sākalaiá ʻene ngāue fakafaifekaú, he naʻe hokosia hono taimi ke faifatongia ai̇́. 9He na‘e fai ʻa e founga maheni ʻo e ngāue fakafaifekaú, ko ʻenau toho ke vakaiʻi pē ko hai ‘e hū ki he loto Temipalé ʻo tutu ʻa e ʻinisēnisi̇́, pea naʻe ma‘u ‘e Sākalaiá. 10Ko ia, naʻe lotu pē ʻa e kakai kotoa ʻi tuʻa, ʻi he taimi naʻe fai ai ʻa e tutu ʻinisēnisi̇́.

11Pea fakafokifā naʻe hā mai kiate ia ha ʻāngelo ʻa e ʻEiki̇́ he tafatafa ʻaki to‘omata‘u ʻo e ʻōlita tutu‘anga ʻinisēnisi̇́.

12Pea ʻi he mamata ki ai ʻa Sākalaiá, naʻe kamata ke ne mātuʻaki ilifia ʻaupito. 13Pea pehēmai ‘e he ʻāngeló kia Sākalaiá,: ‟‘E Sākalaiá, ʻoua te ke manavahē, he kuo ongoʻi ʻe he ʻOtuá ho‘o ngaahi kolé. Ko ia, ʻe fā‘ele‘i ‘e ʻIlisapesi ha tamasi‘i, pea te ke fakahingoa ia ko Sione.

14Pea ʻe hoko ia ko ho fiefiaʻanga mo ho pōlepoleʻanga, pea ‘e fiefia lahi ai foki mo ha tokolahi ʻi hono fanauʻi̇́.

15He ʻe hoko ho fohá ko ha tangata mahuʻinga ʻi he ʻao ʻo e ʻEiki̇́. Pea he‘ikai te ne inu uaine, pē inu kava mālohi, ka te ne fonu he ivi ʻo e Laumālie Mā‘oni‘oni̇́, ʻo kamata pē mei heʻene kei ʻi he manava ʻo ʻene fa‘eé.

16Peá te ne hanga ʻo fakatafoki mai ha kakai ʻIsileli tokolahi ki he ʻEiki ko honau ʻOtuá. 17He te ne muʻomuʻa ʻi he ʻEiki̇́, ʻi he laumālie mo e mālohi na‘e ‘ia ʻIlaisiaá, ke ne fakatafoki ʻa e loto ʻo e mātuʻá ki he‘enau fānaú, pea mo e kakai ʻoku talangataʻa ki he ʻOtuá, ki he fakapotopoto ʻo e māʻoniʻoni̇́, ke teuteu‘i ai ha kakai maʻae ʻEiki̇́.”

18Pea pehēange ‘e Sākalaiá ki he ʻāngeló: ‟Te u ʻilo fēfē ‘e malava ke hoko ʻa e meʻa kuó ke fakahā mai? He kuo u motuʻa au pea kuo taʻu motuʻa foki mo hoku hoá.” 19Pea tali ‘e he ʻāngeló, ʻo pehē: ‟Ko Kēpaleli au, pea ʻoku ou tuʻu ʻi he ʻao ʻo e ʻOtuá, pea na‘e fekau mai aú, ke u ha‘u ʻo fakahā atu kiate koe, ʻa e ongoongo lelei ko eni̇́. 20Ka ko eni, koeʻuhi̇̄ ko e ʻikai te ke tui ki heʻeku ngaahi leá, ko ia ai, te ke noa, ʻo aʻu ki he taimi ʻe toki fakakakato ai ʻa e ngaahi meʻa kuo u fakahā atú.”

21Pea ko e talu ʻa e hū ʻa Sākalaiá ki he loto Temipalé mo e fakatatali ki ai ʻa e kakai̇́ mei tuʻa. Pea naʻá nau fifili pe ko e hā ʻokú ne fuoloa mai ai̇́. 22Pea faifai̇́ pea hū mai ʻa Sākalaiá ki tuʻa, pea naʻe ʻikai ke ne lava ʻo lea, ka naʻe tuhutuhu ange pē kiate kinautolu. Pea mahino leva kiate kinautolu kuo mata vi̇̄sone ʻa Sākalaiá ʻi he loto Temipalé, he naʻe ʻikai te ne toe lava ke lea.

23Pea ʻi he kakato ʻa e taimi fai fatongia ʻo Sākalaiá he Temipalé, naʻá ne foki leva ki hono ‘api̇́. 24Pea fuoloa si‘i pē mei ai, kuo feitama ʻa ʻIlisapesi ko hono uaifi̇́. Pea ʻosi ha māhina ‘e nima mo ʻene nofomaʻu pē ʻi honau ʻapi, he naʻá ne pehē: 25‟Kuo fai mai ‘e he ʻEiki̇́, ʻa e meʻá ni kiate au, he ʻi he taimi ni̇́, kuó ne fakahā ʻene ʻofá, ʻaki ʻene toʻo hoku māʻangá, ʻi he lotolotonga ʻo e kakai kotoa pē.”

Ko e Fakahāmai ʻo e ʻAloʻi ʻo Si̇̄suú

26Pea ʻi he ʻosi ha māhina ‘e ono mei ai, pea fekau atu ‘e he ʻOtuá ʻa Kēpaleli, ki ha kolo ko Nāsaleti, ʻi Kāleli̇́; 27Ki ha finemui ko Mele hono hingoá, ʻa ia naʻe fakama‘u mo ha tangata naʻe hingoa ko Siosifa, ko e tangata ia mei he hako ʻo Tēvitá.

28Pea ʻalu atu ʻa e ʻāngeló kia Mele, ʻo ne pehē: ‟Mālō e lelei, ʻa koe kuo toka mai ki ai ʻa e ʻaloʻofá! ʻOku kau mo koe ʻa e ʻEiki̇́!”

29Ka na‘e fihitu‘u ʻa e fakakaukau ʻa Melé, he lea naʻe fai mai kiate iá, ʻo ne fifili pe ko e hā nai hono ʻuhinga ʻo e fakalea ʻa e ʻāngeló.

30Pea pehēange ‘e he ʻāngeló kiate ia: ‟Mele, ʻoua te ke manavahē! He kuó ke maʻu kelesi ʻi he ʻao ʻo e ʻOtuá. 31Pea ko eni, te ke feitama ʻo ke fanauʻi ha tamasi‘i, pea te ke fakahingoa ia ko Si̇̄sū. 32ʻE hoko ia ko e tangata lahi, pea ʻe ui ia ko e ʻAlo ʻo e ʻOtua ʻo Langi̇́, pea ʻe fakanofo ia ʻe he ʻEiki ʻOtuá, ki he taloni ʻo ʻene kui ko Tēvita. 33Peá te ne pule ki he hako ʻo Sēkopé ʻo ta‘engata. Pea ko hono pule‘angá he‘ikai hano ngata‘anga.”

34Pea pehēange ‘e Mele ki he ʻāngeló: ‟‘E lava fēfē ke hoko ʻa e meʻa ni, he kuo te‘eki te u feohi fakamali mo ha tangata?”

35Pea tali ‘e he ʻāngeló, ʻo ne pehē kiate ia: ‟‘E hā‘ele hifo ʻa e Laumālie Mā‘oni‘oni̇́ ʻo nofoʻia koe, pea ko e māfimafi ʻo Langi̇́ te ne fakamalumalu kiate koe, ko ia, ‘e ui ai ʻa e tama māʻoniʻoni te ke fanauʻi̇́, ko e ʻAlo ʻo e ʻOtuá. 36Pea ko ʻeni foki, ʻoku ʻamanaki ke fanauʻi ha tama ʻe ʻIlisapesi, ko ho kāingá, neongo kuó ne ta‘u motuʻa. ʻIo, ko hono ono māhina ʻeni ʻo ia ko ē, naʻe ʻikai toe ʻamanaki ha taha te ne maʻu fānaú. 37He ʻoku ʻikai ha meʻa ‘e faingataʻa ki he ʻOtuá.”

38Pea pehēange ‘e Mele ki he ʻāngeló: ‟Ko eni, ko e kaunanga au ʻa e ʻEiki̇́: Tuku muʻa ke hokomai kiate au ʻo hangē tofu pē ko e lea kuó ke fai mai̇́.” Pea toki mavahe atu leva ʻa e ʻāngeló meiate ia.

Ko e ʻAʻahi ʻa Mele Kia ʻIlisapesi

39Pea tuʻu hake ʻa Mele, ʻi he ngaahi ʻaho ko iā, ʻo ʻalu fakavave atu ki ha kolo he feitu‘u mo‘unga ʻo Siuteá. 40Pea naʻe aʻu atu ki he ʻapi ʻo Sākalaiá, ʻo ne fakafe‘iloaki atu kia ʻIlisapesi. 41Pea ʻiloangē, ʻi he ongo atu leva kia ʻIlisapesi ʻa e fakalea ʻa Melé, kuo hopohopo ʻene tamá ʻi hono manavá, pea hifo mai ʻa e Laumālie Mā‘oni‘oni̇́ ʻo nofoʻia ʻa ʻIlisapesi. 42Pea naʻe kalanga le‘olahi, ʻo pehē: ‟Kuo tāpuaki‘i koe ‘e he ʻOtuá ʻo laka hake ʻi ha toe fefine! Pea kuó ne tāpuaki‘i mo e tama ʻi ho manavá.

43Pea ko e hā kuo hoko ai kiate au ʻa e meʻa ni, ke ʻaʻahi mai kiate au ʻa e fa‘ē ʻa hoku ʻEiki̇́? 44He ko eni, ʻi he ongo mai pē kiate au ho‘o fakaleá, kuo hopohopo fiefia ʻeku tamá, ʻi hoku manavá. 45Pea ʻoku monūʻia ʻa e faʻahinga hangē ko koé, ʻa ē ʻoku tui pi̇̄kitai, ʻe fakakakato ʻe he ʻEiki̇́, ʻa e ngaahi meʻa kuó ne folofola ʻaki mai̇́.”

Ko e Hiva Fakafeta‘i ʻa Mele

46Pea pehē ‘e Mele: ‟ʻOku fakahi̇̄kihikiʻi ʻe hoku laumālié ʻa e ʻEiki̇́,

47Pea ʻoku mātuʻaki fiefia ʻeku mo‘ui̇́, ʻo makatuʻunga ʻi he ʻOtuá,

He ko ia ia hoku fakamoʻui̇́.

48He kuo toka‘i ‘e he ʻEiki̇́,

ʻa ʻene kaunanga mā‘ulalo ko aú.

He ko eni, ‘e kamata he ʻahó ni,

ʻa e lau ‘e he ngaahi toʻutangata kotoa pē,

ko e fefine au na‘e tāpuaki‘i ‘e he ʻOtuá.

49He kuo fai ‘e he Māfimafi̇́,

ha ngaahi meʻa lalahi ma‘aku.

ʻIo, ʻoku mā‘oni‘oni ai pē hono huafá.

50Pea ʻokú ne fai manava‘ofa ma‘u ai pē,

ki he kakai ʻoku ʻapasia kiate iá, mei̇́ he toʻutangata ki he toʻutangata.

51Kuo fai meʻa lalahi ‘e he ʻEiki̇́,

ʻaki pē hono nima māfimafi̇́,

Kuó ne veteveteki ʻa e kau loto taʻefiefakaongoongó,

52Mo naʻe haʻaki hifo ʻa e kau taki̇́,

mei honau ngaahi lakanga mā‘olungá,

Ka naʻe ʻohake ʻa e kau angavaivai̇́,

ʻo fakanofo ki he ngaahi tuʻunga māʻolungá.

53ʻOku foaki ʻo lahi ʻaupito ‘e he ʻEiki̇́ ki he kau fiekaiá

ʻa e me‘atokoni lelei̇́,

ka naʻe tuku atu ʻa e kau tu‘umālié

ke nau ʻalu pakupaku.

54ʻOku tokoni‘i ‘e he ʻEiki̇́ ʻene tamaio‘eiki̇́, ʻa ʻIsileli.

Peá te ne manatu ke fai manava‘ofa ma‘u ai pē kiate kinautolu.

55He ko e palōmesi ia naʻá ne fai ki hotau tupu‘angá,

kia ʻĒpalahame mo hono hakó ʻo ta‘engatá!”

56Pea na‘e nofo ai pē ʻa Mele mo ʻIlisapesi ʻi ha māhina ‘e tolu nai, pea naʻe toki foki ki hono ‘api̇́.

Ko e Fanau‘i ʻo Sione Papitaisó

57Pea faifai pea hokosia ʻa e taimi ke fā‘ele ai ʻa ʻIlisapesi, pea naʻe fanauʻi ha tamasi‘i tangata. 58Pea fanongo ai hono kaungā‘api mo hono kāingá, ki he ʻaloʻofa lahi kuo fai kiate ia ʻe he ʻEiki̇́, pea nau fiefia ai pē mo kinautolu foki. 59Pea naʻe pehē: ʻi he hili ha ʻaho ‘e valu mei ai, naʻa nau ʻomi ke fai ʻa e ouau fakakau ʻo e tamasiʻi̇́ ki he kakai ʻa e ʻEiki̇́, pea naʻa nau ‘ai ke fakahingoa ia ki heʻene tamai̇́, kia Sākalaiá, 60Ka naʻe pehēange ‘e ʻIlisapesi: ‟‘ʻIkai! Ka ʻe fakahingoa ia ko Sione!” 61Pea nau pehēange kiate ia: ‟Ka ʻoku te‘eki ai ha mou kāinga ‘e fakahingoa ko Sione!” 62Pea nau tuhu ange kia Sākalaiá pē ko e fē ʻa e hingoa te ne loto ke ‘ai ki hono fohá. 63Pea fekau leva ‘e Sākalaiá ke ʻomai ha meʻa ke ne tohi ai, pea naʻa nau ʻohovale kotoa pē, heʻene tohi ai, ʻo pehē: ‟Ko hono hingoá ko Sione.” 64Pea fakafokifā pē kuo veteange hono ʻeleló, pea naʻe fai ʻene fakamālō ki he ʻOtuá.

65Pea na‘e hoko ha manavahē lahi ki honau ngaahi kaungā‘api̇́, pea na‘e ʻosi kotoa ʻa e feitu‘u mo‘unga ʻo Siuteá hono fai holo ai ʻa e talanoa ki he ngaahi meʻa na‘e hokó. 66Pea ko e faʻahinga kotoa pē na‘e fanongo ai̇́, naʻá nau fifili loto pē ʻo pehē: ‟Peá ka lahi hake ʻa e tamasi‘i̇́ ni, ‘e hoko ia ko e hā?” He naʻe mahino kiate kinautolu ʻoku kau mo ia ʻa e ʻEiki̇́.

Ko e Hiva ʻa Sākalaiá

67Pea naʻe fakafonu ʻe he Laumālie Mā‘oni‘oni̇́ ʻa Sākalaiá, pea naʻá ne palōfisai ʻo pehē:

68‟Ke mālōʻia ai pē ʻa e ʻEiki̇́, ko e ʻOtua ʻo ʻIsileli̇́,

He kuó ne ʻaʻahi mai ke tokoni,

ʻAki ʻene fai ha huhuʻi maʻa hono kakai̇́.

69ʻIo, kuo fakanofo ‘e hotau ʻOtuá

ha mālohinga faifakamoʻui maʻatautolu,

mei he hako ʻo ʻene sevāniti ko Tēvitá.

70ʻO hangē tofu pē ko e meʻa naʻe talaʻofaʻaki mai ‘e he ʻEiki̇́ ʻi he kuonga muʻá,

ʻi he ngaahi lea ʻa ʻene kau palōfita toputapú,

71Te naʻe fakamoʻui kitautolu mei hotau ngaahi fili̇́,

peá mo e mālohi ʻo e faʻahinga kotoa pē ʻoku tāufehiʻa mai̇́.

72Ke ne ʻaloʻofa ki heʻetau ngaahi kui̇́,

Heʻene manatu ʻofa ki heʻene fuakava māʻoniʻoni ʻaʻaná.

73ʻA e fuakava naʻá ne fakapapauʻi ange ki hotau tupu‘angá,

ʻa ē naʻá ne fai kia ʻĒpalahame;

74Te naʻe fakahaofi kitautolu mei̇́ he nima ʻo hotau ngaahi fili̇́,

ʻo fakaʻatā kitautolu ke tau lotu kiate ia;

75ʻO fai ʻi he haohaoa mo e māʻoniʻoni,

ʻo tau feohi tuʻumaʻu mo ia, ʻi he ngaahi ʻaho kotoa pē ʻo ʻetau moʻui̇́.

76Pea ko koe, si‘oku foha,

‘E ui koe ko e palōfita ʻa e ʻOtua ʻo Langi̇́;

He te ke muʻomuʻa atu ʻi he ʻEiki̇́

ʻo teuteu hono hala ʻoʻoná.

77ʻAki hoʻo foaki ange ki hono kakai̇́,

ʻa e ʻilo ki honau fakamoʻui̇́,

ʻi hono fakamolemoleʻi ʻenau ngaahi angahalá;

78Ko e meʻa ʻi he fonu ʻalo‘ofa ʻa hotau ʻOtuá,

ʻa ia te ne haʻu ke tokonia kitautolu, hangē ko e hopo hake ʻa e laʻaá ʻi he langi̇maʻá.

79Ke māamangia ai ʻakitautolu ʻoku nofo he poʻuli̇́,

mo e feituʻu ʻoku maluʻaki mai ai ʻa maté.

Mo fakahinohino ai hotau vaʻé,

ki he hala te tau maʻu ai ʻa e melinó.”

80Pea na‘e tupu fakautuutu ʻa e mo‘ui fakalaumālie ʻa e tamasiʻi̇́, pea naʻá ne nofo ʻi toafa ʻo aʻu ai pē ki he ʻaho naʻá ne toki hopo hake ai ʻi ʻIsileli̇́, ʻo kamata ke fai ʻene ngāué.

Currently Selected:

Luke 1: TCNT

Highlight

Copy