Luke 14
14
Ko e Fakamo‘ui ‘e Si̇̄sū ha Tangata Mahaki
1Pea ʻi he ʻaho Sāpate ‘e taha, ʻi haʻane ʻalu atu ki ha ʻapi ʻo ha taha ʻo e kau Taki ʻo e Fālesi, naʻá nau siosiofi ia ai. 2Pea ʻiloangé, naʻe ʻi ai ʻi he ʻapi ko iā ha tangata na‘e fefulofulai hono sinó. 3Pea fehuʻi ange ʻe Si̇̄sū ki he kau faiako Lao ʻa Mōsesé mo e kau Fālesi, ʻo pehē: ‟‘Oku ngofua koā ke fai ha ngāue fakamoʻui mahaki ʻi he Sāpaté pē ʻikai?” 4Ka na‘e ‘ikai ke lea mai ha taha. Pea ala atu leva ʻa Si̇̄sū ki he tangatá ‘o fakamo‘ui ia, pea naʻe talaange ke ʻalu ā.
5Pea pehēange ‘e Si̇̄sū ki he kakai̇́: ‟Kapau ko ha taha ʻokimoutolu ʻe ai hano foha pē ko ha‘ane pulu, kuo tō ʻi ha vaitupu, he ʻaho Sāpate, ʻikai te ke fusi hake ia, neongo ko e ʻAho Sāpaté?” 6Ka na‘e ‘ikai pē ha‘anau tali ‘e fai kiate ia.
Ko e ‘Ulungāanga ke Fai ʻi ha Fakaafe
7Pea ʻi heʻene fakatokanga‘i ʻa e feinga ʻa e ni‘ihi ke ma‘u ʻa e ngaahi nofo‘anga ʻi muʻa ʻi he fakaafé, naʻá ne fai ʻa e talanoa fakatātā ko eni̇́, ʻo ne pehē kiate kinautolu,
8‟Ka fakaafe‘i koe ki ha kātoanga mali, ‘oua te ke ʻalu ʻo feinga ki he ngaahi nofo‘anga ʻi muʻá, naʻa kuo fakaafe‘i mai ki ai ha taha ʻoku mā‘olunga ange ʻiate koe. 9He ka pehē: ʻe ha‘u ʻa e toko taha naʻá ne fakaafe‘i koé ‘o pehē atu, ‛Faka‘atā ange muʻa ʻa e nofoʻanga ko ʻená maʻae toko taha ko eni̇́.’ Peá te ke toki mā ai, ʻo ke hiki ki he nofo‘anga mā‘ulalo tahá.
10Ka ʻoka fakaafe‘i koe ‘e ha taha, peá ke ʻalu ‘o nofo ʻi he nofo‘anga mā‘ulalo tahá, koeʻuhi̇̄ ka haʻu leva ʻa e toko taha naʻá ne fakaafe‘i koé, te ne toki pehē atu kiate koe, ‛iʻoku kāinga, kātaki mai koe ki muʻa!’ Peá te ke toki lāngilangi‘ia ai ʻi he ha‘oha‘onga ‘o e kau fakaafe ki he kātoangá.
11He ko ia kotoa pē ʻoku māʻolunga ʻene fakakaukau kiate iá, ‘e tuku hifo ki lalo. Pea ko ia ʻoku anga fakatōkilalo, ‘e hākeakiʻi ia.”
12Pea toki pehēange ‘e Si̇̄sū ki he tangata naʻá ne fakaafe‘i iá: ‟Ka fai leva ha‘o fakaafe, pē kātoanga kai, pea ‘oua te ke fakaafe‘i pē ho ngaahi kaungāmeʻá, mo ho kāingá, pea mo ho ngaahi kaungā‘api tu‘umālié. He te nau toe fakaafe‘i pē koe ki haʻanau kātoanga, ko e fetongi ho‘o ‘ofá.
13Ka ʻoka ke ka fai leva ha‘o kātoanga, peá ke fakaafe‘i mai ʻa e kau masivá mo e kau mamateá, mo e heké, mo e kui̇́. 14Pea ‘e tāpuaki‘i ai koe. He neongo ʻe ʻikai te nau toe lava ke totongi atu kiate koe, ʻe toki totongi kiate koe ‘e he ‘Otuá, ʻi he ʻaho ‘o e toetuʻu ʻa e kau lotumoʻoni̇́.”
Ko e Kai Kātoanga ʻi he Pule‘anga ‘o e ‘Otuá
(Mātiu 22:1-10)
15Pea ʻi he fanongo ki ai ha toko taha naʻe kau he kau fakaafé, naʻá ne pehē kiate ia: ‟Ko ha taha monūʻia ia ʻe kau he kai kātoanga ʻi he Pule‘anga ‘o e ‘Otuá!”
16Pea pehēange ‘e Si̇̄sū kiate ia: ‟Na‘e ʻi ai ha tangata naʻá ne tokonaki ha fu‘u kātoanga kai, pea naʻe fakaafe‘i ha tokolahi ki ai.
17Pea ʻi he maau ʻa e fakaafé, naʻá ne fekau atu ʻene tamaio‘eiki̇́, ke ʻalu ‘o tala ki he kau fakaafé, ‛Kuo maau ʻa e meʻa kotoa! Mou meʻa mai ā ki he kātoangá.’
18Ka naʻa nau poaki tahataha mai, ʻe ʻikai te nau lava mai ki he fakaafé. Na‘e pehē ‘e he ‘uluaki̇́, ‛Kātaki, ko aú, naʻá ku toki fakatau ha ku konga kelekele, pea kuo pau ke u ʻalu au ‘o sio ki ai. Ko ia, he‘ikai te u lava atu ki he fakaafé.’
19Pea ko hono uá, naʻá ne pehē: ‛Kātaki, ko aú, naʻá ku toki fakatau mai ʻeku hoa‘i fanga pulu toho palau ‘e nima! Pea kuo pau ke u ʻalu ‘o ʻahiʻahiʻi ia. Ko ia, he‘ikai te u lava atu ki he fakaafé.’
20Pea ko hono tolú, naʻá ne pehē: ‛Kātaki, naʻá ku toki mali au. Ko ia, he‘ikai ke u lava atu ki he fakaafé.’
21Pea foki ʻa e tamaio‘eiki̇́ ‘o fakahoko ʻenau ngaahi li̇̄pooti ki hono ʻeiki̇́. Pea tuputāmaki ai hono ʻeiki̇́, ʻo ne talaange ki heʻene tamaio‘eiki̇́, ‛Fakato‘oto‘o atu ki he ngaahi hala pule‘anga kotoa pē mo e ngaahi hala loto koló! Fakaafe‘i kātoa mai ʻa e kau masivá, mo e kau mamateá, pea mo e kau kui̇́, mo e kau heké, ke nau haʻu ki heni.’
22Pea foki mai ʻa e tamaio‘eiki̇́ ‘o tala ki hono ʻeiki̇́, ‛Tangata‘eiki, ko ʻeni kuo ‘osi fai ʻa e meʻa kotoa naʻá ke tu‘utu‘uni mai̇́. Ka ‘oku kei ʻatā pē ʻa e kātoangá ki ha kau fakaafe.’
23Pea talaange ‘e hono ʻeiki̇́, ‛ʻalu atu ki he ngaahi hala ‘utá mo e ‘ū hala lotó ‘o toe fakaafe mai mei ai ha kakai kae‘oua leva kuo fonu hakehake hoku ‘api̇́. 24He ko ʻeni ‘oku ou tala moʻoni atu, he‘ikai pē ke toe ʻinasi ʻi heʻeku kātoangá, ha taha he faʻahinga naʻá ku fuofua fakaafe‘i̇́.’”
Ko e Faingataʻa e Kau he Muimui kia Sīsuú.
(Mātiu 10:37,38)
25Pea fononga atu ʻa Si̇̄sū mo ha fuʻu kakai tokolahi, pea naʻe tafoki ‘o talaange kiate kinautolu,
26‟Ka ʻi ai ha taha ʻoku haʻu kiate au kae ‘ikai hulu atu ʻene ‘ofa kiate aú ʻi heʻene ‘ofa ki heʻene tamai̇́ mo ʻene faʻeé, mo hono mali̇́, mo ʻene fanaú, pea mo hono fanga tokouá mo hono fanga tuofāfiné, pea naʻá mo ʻene mo‘ui̇́, ʻe ʻikai ʻaupito lava ʻe ia ke hoko ko e tokotaha ako ʻaʻaku.
27Peá ka ʻi ai ha taha ʻoku ʻikai te ne fua hono kolosí ‘o muimui mai kiate au, ʻe ʻikai ʻaupito lava ʻe ia ke hoko ko e tokotaha ako ʻaʻaku.
28Tau lau ko ha taha ‘iate kimoutolu ‘okú naʻe fakakaukau ke ne langa taua. ‘Ikai te ne tomuʻa ta‘utu hifo ‘o fika‘i pē ‘e fiha ʻene fakamolé, mo vakai pē ‘oku fe‘unga ʻene pa‘angá ki hono fakakakato ʻo e ngāue ʻe fai̇́? 29He kapau te ne kamata ʻene langa tauá, kae ‘ikai te ne lava ke fakakakato, ‘e kata‘i ia ‘e he kakai kotoa pē te nau sio ki ai. 30Peá te nau pehē: ‛Ko e tangatá ni naʻá ne kamata ʻene langá, ka kuo ‘ikai lava ke ne faka‘osi.’
31Pea kapau ko ha Tuʻi ‘oku teu laka atu ke faitau mo ha tu‘i ‘e taha. ‘Ikai te ne tomuʻa nofo hifo ke fakapapau‘i pē ‘e fe‘unga ʻene kau tau ‘e toko taha manó ke ikuna‘i ʻa ia ‘oku ha‘u mo ʻene kau tau ‘e toko ua mano? 32Pea kapau te ne pehē ‘e ia ‘e ‘ikai ke ne lava ‘o ikuna‘i hono fili̇́, ‘ikai te ne fekau atu ha kau talafekau ke nau ō ‘o alea melino, lolotonga ʻoku kei mama‘o ʻa e tu‘i ‘e tahá? 33Pehē foki, kapau he‘ikai ke mou lava ‘o tukuange kotoa ho‘omou koloá, he‘ikai ke mou lava kimoutolu ‘o kau he‘eku kau akó.
Ko e Māsimá
(Mātiu 5:13; Ma‘ake 9:50)
34Ko e meʻa ʻaonga ʻa e māsimá. Ka ‘oka mole hono konokoná, pea ‘e fēfē hano toe fakakonokona‘i ia? 35‘Oku ‘ikai kei ʻaonga ia ki he kelekelé, pē ki he tuʻungavevé, ka ʻoku laku atu ia kituʻa. Ko ia ‘oku lava ‘o fanongó, peá ke ne tokanga ki he meʻa ʻoku ou leaʻaki̇́.”
Currently Selected:
Luke 14: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
