Mātiu 13

Ko e Faa‘i Kelekele

(Ma‘ake 4:1-9; Luke 8:4-8)

1Pea ‘alu ‘a Si̇̄sū ʻi he ‘aho ko iá mei he ‘api na‘e nofo ai̇́ ki he matātahi ʻo e Tahi Kāleli̇́, pea naʻá ne nofo hifo ai ke faiako ki he kakai̇́. 2Pea tupu mei he fu‘u tokolahi ʻa e kakai na‘e fetaʻomi mai kiate iá, na‘á ne heka ki ha ki‘i vaka ‘o nofo mei ai, kae tutu‘u atu e kakai̇́ mei ʻuta. 3Pea fai ‘e Si̇̄sū ki he kakai̇́ ʻene ngaahi talanoa fakatātā ko ʻeni:

‟Na‘e ‘alu atu ha tangata ngoue ‘o fai ʻene tō uite. 4Pea naʻe laku atu ʻene pulopulá, ‘o ngangana ʻa e ni‘ihi he veʻehalá. Pea puna mai ʻa e fanga manupuná ‘o nau tosi ia ‘o ‘osi.

5Pea ngangana ʻa e pulopula ʻe niʻihi he feitu‘u naʻe makamaka pea manifi ai ʻa e kelekelé. 6Pea ʻi he hopo hake ʻa e laʻaá naʻe velahia ai ʻa e pulopulá koeʻuhi̇̄ ko e teʻeki ke loloto hono aká, pea vave ai ʻene mae hifo ‘o mate.

7Pea ngangana ʻa e pulopula ʻe niʻihi ki he feitu‘u vao talatala‘ia, pea toe tupu mo ia. Kae teʻeki fuoloa, kuo kāsia ia ‘e he vao talatalá.

8Ka ko e pulopula na‘e ngangana ki he kelekele lelei̇́, na‘e tupu hake ia ‘o fua. Na‘e fuo teau ʻa e ni‘ihi, pea fuo onongofulu ʻa e ni‘ihi, pea fuo tolungofulu ʻa e ni‘ihi.”

9Pea toki pehē ange ‘e Si̇̄sū ki he kakai̇́, ‟ʻIlonga ha taha ʻoku maʻu telingá, ke ne fanongo ke mahino ki ai.”

Ko e ʻUhinga Hono Ngāueʻaki e Ngaahi Talanoa Fakatātaá

(Ma‘ake 4:10-12; Luke 8:9-10)

10Pea omi ai ʻa e kau akó kia Si̇̄sū ‘o nau pehē ange: ‟Ko e hā ʻa e ʻuhinga ‘okú ke faiako ʻaki ai ʻa e ngaahi talanoa fakatātaá?”

11Pea tali ʻe Si̇̄sū ʻo pehē: ‟Ko e ngaahi fakapulipuli ‘o e Pule‘anga ‘o Hēvani̇́, kuo fakahā atu ia kiate kimoutolu, ka kuo te‘eki ke fakahā ki he kakai̇́. 12He ka ʻilonga ha taha kuó ne ma‘u ha me‘a, ‘e toe ‘oange ki ai mo ha me‘a. Ka ko ia ‘oku ‘ikai ha‘ane me‘a ‘e ma‘ú, ‘e toʻo meiate ia ʻa e me‘a na‘á ne ‘osi ma‘ú, neongo ai pē ʻene si‘isi‘i̇́. 13Ko e ʻuhinga ia ‘oku ou faiako ʻaki ai ʻa e ngaahi talanoa fakatātaá.

‛Ke sio ai pē ‘a e kakai̇́,

kae ‘ikai te nau ‘ilo ha meʻa.

Pea nau fanongo aipē,

kae ‘ikai te nau ongo‘i ha meʻa.’

14Pea toki mo‘oni ai ʻa e lau ʻa e palōfita ko ‘Aiseá:

‛Ko e kakai ko ená te nau fanongo mo fanongo,

kae ‘ikai te nau ongo‘i ha meʻa.

Te nau sio mo sio,

kae ‘ikai te nau ‘ilo ha meʻa.

15He kuo pāngata‘a honau lotó.

Kuo fakaongotuli honau telingá.

Kuo nau fakakuikui honau matá.

He kapau naʻe ‘ikai, pehē te nau mei lava ‘o mamata pē fanongo

ke nau ‘ilo ha me‘a,

ʻi honau lotó,

ka nau tafoki mai kiate au,

ka u fakamo‘ui kinautolu.’

16Ka ko e toki kakai monū‘ia kimoutolu! He ‘oku mou lava ‘o ‘ilo mo ongo‘i. 17Ko hono mo‘oni̇́ ʻeni ‘oku ou tala atú, na‘e tokolahi ʻa e kau palōfita mo e kakai ʻa e ‘Otuá na‘á nau mātuʻaki fakaʻamu ke mamata ki he ngaahi me‘a ‘oku mou mamata ki ai̇́, mo fanongo he ngaahi me‘a ‘oku mou fanongo ki ai̇́, ka na‘e ‘ikai te nau ma‘u faingamālie.”

Ko e Fakaʻuhinga ‘e Si̇̄sū ‘a e Talanoá

(Ma‘ake 4:13-20; Luke 8:11-15)

18‟Ko ia, mou fanongo lelei mai, ka mou ‘ilo ʻa e ʻuhinga ‘o ‘eku talanoa fakatātā ki he tangata ngoué. 19Ka ʻi ai ha taha kuo fanongo he ongoongo ‘o e Pule‘angá ka ‘oku ‘ikai ke mahino ia kiate ia, ‘okú ne hangē ko e pulopula na‘e ngangana ki he veʻehalá. ‘Oku ha‘u ʻa e toko taha kovi̇́ ia ‘o taʻaki ʻa e pulopula ko iá.

20Ko e pulopula na‘e ngangana ki he kelekele makamaká, ko ha taha ia ‘oku fanongo ki he Folofolá pea naʻe tali leva ia mo e loto fiefia; 21Ka koeʻuhi̇̄ ‘oku ‘ikai ke aka loloto ia heʻene moʻui̇́, ko ia ai ‘oku ‘ikai te ne lava ‘o kātaki fuoloa. Pea ko ʻene fetaulaki pē mo ha faingata‘a, pē ko ha fakatanga, koeʻuhi̇̄ ko e Folofolá, pea fo‘i.

22Ko e pulopula na‘e ngangana ki he loto vao talatalá, ko ha taha ia ‘oku fanongo ki he Folofolá, ka ‘oku hoha‘a ki he ngaahi meʻa ʻo māmani pea ‘ofa he koloá, pea kāsia leva ai ʻa e Folofolá, ‘o ‘ikai ma‘u hano fua.

23Ka ko e pulopula na‘e ngangana ki he kelekele lelei̇́, ko ha taha ia ‘oku fanongo ki he Folofolá pea mahino leva ia, pea ʻokú ne fua. ‘Oku a‘u ki he fuo teau ʻa e ni‘ihi, pea fuo onongofulu ʻa e ni‘ihi, pea fuo tolungofulu ʻa e ni‘ihi.”

Ko e Vao mo e Uite

24Na‘e fai foki ‘e Si̇̄sū mo e talanoa ko ʻeni̇́: ‟Ko e Pule‘anga ‘o Hēvaní ‘oku hangē ko e lulu ‘e ha tangata ha pulopula lelei heʻene ngoué. 25Pea lolotonga ʻa e kei mohe ʻa e kakai̇́ he pō ‘e taha, kuo ha‘u ha fili ‘o lulu ha pulopula vao he ngoué, pea naʻe ‘alu. 26Pea tupu hake ʻa e uité ‘o kamata fua; pea ‘asi ai foki mo e vaó. 27Pea omi ʻa e kau tamaioʻeiki ʻa e tangata ngoué ‘o ‘eke ange: ‛Tangata‘eiki, ‘ikai koā ko e pulopula lelei na‘á ke lulu ‘i ho‘o ngoue‘angá? Ka ko e vao ʻeni mei fē?’

28Pea naʻe talaange, Ko e ngāue ʻeni ‘a ha fili

Pea ‘eke ange ‘e he kau tamaioʻeiki̇́: ‛Te mau ō ‘o taʻaki e vaó?’ 29Pea ne talaange, ‛‘Oua! Na‘á ‘iloangé ʻi hoʻomou ta‘aki ʻa e vaó pea mata‘aki ai mo e uité. 30Tuku pē ke na tupu fakataha kae ‘oua kuo motu‘a ʻa e uité. Peá te u toki fekau ʻa e kau tānaki̇́ ke nau tomu‘a ta‘aki ʻa e vao kovi̇́ ‘o ha‘i ke ‘ave ‘o tutu, pea toki tānaki ʻa e uité ‘o fa‘oaki ki he tānakiʻanga uité.’ ”

Ko e Tengaʻi ‘i Mūsita

(Ma‘ake 4:30-32; Luke 13:18-19)

31Na‘e fai foki ‘e Si̇̄sū mo e talanoa ko ʻeni̇́: ‟Ko e Pule‘anga ‘o Hēvani̇́ ‘oku hangē ha tengaʻi mūsita na‘e hanga ‘e ha tangata ‘o tō heʻene ngoué. 32Ko e fōsi‘i taha ia ‘i he tengaʻi ʻakau kotoa pē. Ka ko e fu‘u ʻakau naʻe tupu mei ai̇́, ko e lahi taha ia ‘i hono fa‘ahingá. ‘Oku hoko ia ko e fu‘u ʻakau lahi, pea ‘oku puna mai ai ʻa e fanga manupuná ‘o ngaohi pununga ‘i hono ngaahivaʻá.”

Ko e Lēvani

(Luke 13:18-21)

33Ko e talanoa fakatātā ʻeni ‘e taha na‘e toe fai ‘e Si̇̄sū: ‟‘Oku hangē ʻa e Pule‘anga ‘o Hēvani̇́ ko ha me‘i lēvani na‘e toʻo ‘e ha fefine ‘o natu ʻaki ha ipu mahoa‘a ‘e tolu, kae‘oua kuo ma‘u kotoa ia ‘e he lēvani̇́, ‘o tupu.”

Ko e ʻUhinga Hono Ngāueʻaki ‘e Si̇̄sū e Ngaahi Talanoa Fakatātaá

(Ma‘ake 4:33-34)

34Ko e ngaahi akonaki ko ʻeni ‘a Si̇̄sū ki he kakai̇́, na‘e fai ʻaki pē ʻa e ngaahi talanoa fakatātā. Ko ʻene fakahinohino kotoa pē, na‘e ‘oatu ʻaki ha talanoa fakatātā. 35Pea mo‘oni ai ʻa e lau ʻa e palōfitá:

‟Te u leaʻaki ha ngaahi talanoa fakatātā.

Te u fakahāaʻi kiate kinautolu ʻa e ngaahi me‘a kuo teʻeki ʻilo ki ai ha taha,

talu mei hono tanupou ‘o māmani.”

Ko e Fakaʻuhingaʻi ‘e Si̇̄sū ‘a e Talanoa ki he Vao Kovi̇́

36Pea mavahe ʻa Si̇̄sū mei he kakai̇́ ‘o hū ki loto fale, pea toki omi ʻene kau akó ‘o kole ange, ‟Fakamatala mai mu‘a ho‘o talanoa ki he uite mo e vao he ngoue‘angá.”

37Pea tali ‘e Sīsuú, ‟Ko e toko taha na‘á ne lulu ʻa e pulopula lelei̇́, ko e Foha ia ʻo e Tangatá. 38Ko e ngoue‘angá ko māmani ia, pea ko e pulopula lelei̇́ ko e kakai ia ‘o e Pule‘angá. Ko e vaó leva, ko e kakai ia ‘oku kau mo e toko taha kovi̇́.

39Ko e fili na‘á ne lulu ʻa e pulopula vaó, ko e tēvoló ia. Ko e ututaʻú, ko e ‘aho fakamui̇́ ia. Pea ko e kau tānaki̇́, ko e kau ‘āngeló ia.

40Pea hangē ko e tānaki ‘o e vaó ‘o tutú, ‘e pehē pē he ‘aho fakamui̇́. 41He ‘e fekau atu ai ‘e he Foha ‘o e Tangatá ʻene kau ‘āngeló ke nau tānaki kotoa mai ʻa e kau fakakovi̇́ mo e kau faikovi̇́ mei hono pule‘angá. 42Pea ‘e laku kinautolu ki he ngotoʻumu kakahá, ki he feitu‘u ‘e fai ai ʻa e tangi mo e fetoʻeaki. 43Ka ‘e hangē ko e ulo ʻa e laʻaá: ʻa e ngingila ʻa e teunga ‘o e kakai ʻa e ‘Otuá ‘i he Pule‘anga ‘o ‘enau Tamai̇́. Ko kimoutolu kuo fanongo ki he‘eku ngaahi fakahinohinó, mou ongo ki ai.”

Ko e Tanunga Koloa Fufū

44‟Ko e Pule‘anga ‘o Hēvani̇́ ‘oku hangē ko e me‘a ‘e hoko ‘oka fai angē kuo ‘ilo ‘e ha taha ha koloa na‘e tanu ‘i ha ngoue‘anga pea naʻe toe tanu pē ia ai, pea ko e meʻa heʻene fiefia lahi̇́, naʻá ne ‘alu ‘o fakatau atu ʻa e me‘a kotoa naʻá ne ma‘ú, ka naʻe fakatau mai ʻa e ngoue‘anga ko iá.”

Ko e Mata‘itofe Mahu‘inga.

45‟Ko e Pule‘anga ‘o Hēvani̇́, ‘oku hangē ko e me‘a ‘e hoko ‘oka ‘alu ha taha ‘o kumi mata‘itofe lelei. 46Pea faifai kuó ne ‘ilo ha mata‘itofe ‘oku fu‘u mahu‘inga lahi, pea toki ‘alu ia ‘o fakatau atu ʻene me‘a kotoa ‘oku ma‘ú ka naʻe fakatau mai ʻa e mata‘itofe ko iá.”

Ko e Kupenga

47‟Mo ʻeni foki, ko e Pule‘anga ‘o Hēvaní, ‘oku hangē ko e me‘a ‘e hoko ‘oka toho ha kupenga ʻi tahi̇, ‘o ma‘u ai ʻa e faʻahinga ika kehekehe. 48Pea ʻi heʻene fonu leva ʻa e kupengá, pea nau toho ia ki ʻuta. Pea nau toki nofo hifo ‘o vahe ʻa e iká, ‘o fa‘o kato ʻa e ika lelei̇́, kae liʻaki ʻa e ika ta‘e‘aongá. 49‘E pehē tofu pē ‘o ka hoko mai ʻa e ‘aho fakamui̇́. ‘E ō atu ʻa e kau ‘āngeló ‘o tānaki ʻa e kakai kovi̇́ ‘o vahe‘i kinautolu mei he kakai lelei̇́. 50Pea ‘e laku ʻa e kakai kovi̇́ ki he ngotoʻumu kakaha, ʻa e feitu‘u te nau tangi ai mo fetoʻeaki.”

Ko e Koloa Fo‘oú mo e Koloa Motu‘a

51Pea fehu‘i ange ‘e Si̇̄sū ki he kau akó, ‟Kuo mahino nai kiate kimoutolu ‘eku ngaahi fakahinohino kuo fai atú?” Pea nau talaange, ‟ʻio, kuo mahino.”

52Pea talaange leva ‘e Si̇̄sū kiate kinautolu, ‟ʻIlonga ha tama ako Folofola kuo toe hoko ko e tama ako he Pule‘anga ‘o Hēvani̇́, ‘oku hangē ia ko ha taha ‘okú ne fakatou toʻo mai mei he ʻene tuku‘anga koloá ʻa e koloa fo‘ou mo e koloa motu‘a.”

Ko e Fakafisinga‘i ‘e he Kakai Nāsaletí ‘a Si̇̄sū

(Ma‘ake 6:1-6; Luke 4:16-30)

53Pea hili hono fai ‘e Si̇̄sū ʻa e ngaahi talanoa fakatātā ko eni̇́, pea naʻe ‘alu mei he feitu‘u ko iá; 54ʻO ne ʻalu atu ki he kolo na‘á ne nofo ai̇́. Pea ne faiako ai he falelotú. Pea ofoofo ʻa e kakai̇́ mo nau pehē: ‟Ko e poto mo e ivi mei fē fua ‘oku ma‘u ‘e he tangatá ni? 55‘Ikai ko e foha ʻeni ‘o e tufungá? ‘Ikai koā ko Mele ʻene fa‘eé? Pea ko Siosifa, mo Saimone, mo Siutasi ‘a hono fanga tehiná? 56‘Ikai ‘oku nofo heni mo hono fanga tuofāfiné? Ko ʻene ma‘u mei fē ʻa e ngaahi me‘á ni?” 57Pea na‘e ‘ikai ke tali lelei ʻa Si̇̄sū ‘e he kakai̇́.

Kae talaange ‘e Si̇̄sū kiate kinautolu, ‟‘Oku faka‘apa‘apa‘i ʻa e kau palōfitá ‘e he kakai kotoa pē, tuku kehe pē ʻa e kakai ‘o honau koló pea mo honau kāingá.” 58Pea na‘e ‘ikai loko fai mana ‘a Si̇̄sū ‘i ai, koeʻuhi̇̄ ko ʻenau ta‘e tui̇́.

Currently Selected:

Mātiu 13: TCNT

Highlight

Copy