Ma‘ake 13

Ko e Fakahā ‘e Si̇̄sū e Pau ke ʻAuha ʻa e Temipalé

(Mātiu 24:1-2; Luke 21:5-6)

1Pea ʻi he kamata mavahe atu ʻa Si̇̄sū mei he Temipalé, naʻe pehē mai ‘e he toko taha heʻene kau akó, ‟Vakai atu, Tangata‘eiki Faiako, ki he faka‘ofo‘ofa ‘o e ngaahi maká mo e ngaahi falé!”

2Pea pehēange ‘e Si̇̄sū, ‟‘Okú ke tokanga‘i koā ʻa e ngaahi fu‘u fale ko ʻeni̇́? ʻi ai ʻa e ʻaho ‘e holoki ai. Pea ‘e ‘ikai ʻaupito toe tuku ha foʻi maka heni ‘o taʻeholoki.”

Ko e Fakatokanga ki ha Faingata‘a ʻAmui

(Mātiu 24:3-14; Luke 21:7-19)

3Pea ʻi he nofo hifo ʻa Si̇̄sū ʻi he Moʻunga ko ‘Ōlivé, ‘o feʻunga atu mo e Temipalé, naʻe haʻu kiate ia ʻa Pita, mo Sione, mo Sēmisi, pea mo ʻAnitelū ‘o nau fehuʻi fakaekinautolu pē kiate ia. 4Pea nau pehēange kia Sīsū, ‟Talamai muʻa pē ʻe hoko ʻafē ʻa e ngaahi me‘a ‘okú ke laú? Ko e hā ha fakaʻilonga ‘o e teu hokomai ʻa e ngaahi meʻa ko iā?”

5Pea pehēange ‘e Si̇̄sū kiate kinautolu, ‟Vakai na‘a takihala‘i kimoutolu ‘e ha taha! 6He ‘e hū mai ha tokolahi ʻi hoku hingoá, ʻo talamai, Ko au ia, pea te nau takihēeʻi ha tokolahi.

7Pea ka moú ka fanongo kuo fai ha ngaahi tau, pē ko ha talanoa ki ha tau, pea ‘oua te mou manavasi‘i ai. He ko e ngaahi me‘a pē ia kuo pau ke hoko. Pea ‘oku ‘ikai ko ha faka‘ilonga ia kuo hoko mai ʻa e ngata‘angá. 8He ʻe tau ʻa e fonua mo e fonua, ʻa e pule‘anga mo e pule‘anga. ‘E mofuike ʻa e ngaahi feitu‘u lahi, pea ʻe mate ha tokolahi ʻi he ngaahi honge. Ka ko e kamata‘anga pē ia ‘o e ngaahi mamahi̇́.

9Ka mou tokanga! He ‘e puke kimoutolu ‘o ‘ave ki he ngaahi fale hopó, pea ʻe tāaʻi kimoutolu he ngaahi falelotú. Pea ‘e fakamaauʻi kimoutolu ʻe ha kau taki mo ha ngaahi Tuʻi koeʻuhi̇̄ ko au, kae lava ke nau fakamoʻoniʻi hoʻomou tui̇́. 10He kuo pau ke tomu‘a malanga ʻaki ʻa e Ongoongo Lelei̇́ ki he fonua kotoa pē.

11Pea ka puke kimoutolu ‘o ‘ave ki he fale hopó, pea ‘oua ‘e hoha‘a homou lotó pē ko e hā ha‘amou fakamatala ‘e fai. He ‘e ‘oatu pē ha fakamatala ke mou fai. Pea ko e ngaahi lea te mou lea‘aki̇́, ‘oku ‘ikai ko ha ngaahi lea ʻamoutolu, ka ko e ngaahi lea mei he Laumālie Mā‘oni‘oni̇́. 12‘E hanga ‘e ha ni‘ihi ‘o lavaki‘i honau fanga tokoua ke ‘ave ‘o tāmate‘i. ‘E fai pehē mo ha ngaahi tamai ki he‘enau fānaú. ‘E ʻi ai ha fānau te nau fakasi̇̄tu‘a‘i ʻenau mātu‘á ‘o fekau ke ‘ave ‘o tāmate‘i. 13‘E fehi‘a kiate kimoutolu ʻa e kakai kotoa pē koeʻuhi̇̄ ko au. Ka ko ia ‘e kātaki ke a‘u ki he ngata‘angá, ‘e fakamoʻui ia.”

Ko e Me‘a Fakalilifu Ange Fau

(Mātiu 24:15-21; Luke 21:20-24)

14‟Pea ‘e faifai̇́, te mou mamata ki he Me‘a Fakalielia ange fau ‘oku tuʻu he feitu‘u naʻe ‘ikai totonu ke tuʻu ai̇́. (Tauange ke mahino ia kiate koe ‘okú ke lau eni̇́.) Pea ko kinautolu ‘oku ʻi Siutea he ʻaho ko iā, ke mou hola ki he ngaahi moʻungá! 15Pea ka ai ha taha ‘oku nofo ʻi ha funga falé he ʻaho ko iā, pea ‘oua ‘e toe hifo ki fale ke to‘o mei ai ha me‘a ke hola mo ia. 16Pea ka ai ha taha ‘oku ʻalu ki ʻuta he ʻaho ko iā, pea ‘oua ‘e toe foki ki ʻapi ke to‘o hano pulupulu ke ʻalu mo ia. 17‘E faka‘ofa ʻa e kakai fefine feitamá mo e kakai fefine toʻotamá! 18Mou lotu ki he ‘Otuá ke ‘oua na‘a hoko ʻeni he fa‘ahi ta‘u momokó. 19He ko e toki faingata‘a lahi ia talu mei he kamataʻangá, ʻi hono fakatupu ‘o māmani̇́, ‘o a‘u mai ki he ʻahó ni. Pea ‘e ‘ikai ʻaupito toe ai hano ua. 20Ka naʻe ‘ikai ke fakanounou ‘e he ‘Otuá ʻa e lahi ‘o e ngaahi ʻaho ko iā, pehē ‘e ‘ikai ha taha ‘e toe hao. Ka kuó ne hanga ‘o fakanounou ia, koeʻuhi̇̄ ko e kakai kuó ne filí. 21Pea kapau ‘e pehē atu ‘e ha taha, ‛Sio mai! Ko e Mi̇̄saiá ʻeni!’ pē te ne pehē: ‛Ko e Mi̇̄saiá ena!’ pea ‘oua te mou tui ki ai. 22He ‘e hopo hake ha kau mi̇̄saia loi, mo ha kau palōfita loi. Peá te nau fai ha ngaahi mana mo ha ngaahi me‘a fakaofo ke takihala‘i ʻaki ʻa e kakai̇́. Pea na‘á mo e kakai ʻa e ‘Otuá, te nau tūkuingata ke takihala‘i. 23Ka mou tokanga, kuo u ‘osi talaatu kei mama‘o ʻa e ngaahi me‘á ni!”

Ko e Hoko Mai ʻa e Foha ‘o e Tangatá

(Mātiu 24:29-31; Luke 21:25-28)

24‟Peá ka hili ʻa e ngaahi faingata‘a he ngaahi ʻaho ko iā, pea ‘e fakapoʻuli leva ʻa e laʻaá, pea ‘e ‘ikai toe huhulu ʻa e māhiná. 25‘E ngangana foki ʻa e ngaahi fetuʻú mei he langi̇́, pea ‘e ngalulululu ʻa e ngaahi mafai ‘oku ʻi he ngaahi langi̇́. 26Pea ‘e toki ʻasi mai ʻa e Foha ʻo e Tangatá he ngaahi ʻaó kuó ne teunga ʻaki ʻa e mālohi lahi mo e lāngilangi. 27Pea te ne toki fekau atu ʻene kau ʻāngeló ke tānaki mai ʻene kakai kuó ne fili̇́ mei he tapa kotoa pē ‘o māmani mo langi.”

Ko e Ako mei he Fu‘u Fikí

(Mātiu 24:32-35; Luke 21:29-33)

28‟Pea ko eni, mou ako mei he fu‘u fiki̇́. Ka muimuia mo talamuka hono laú, pea mahino, ko ʻene ofi ia ʻa e fa‘ahita‘u māfaná. 29Ko ia, ka moú ka sio leva kuo kamata hoko ʻa e ngaahi me‘a ‘oku ou laú, pea mou ‘ilo kuo vave ʻene hoko mai̇́, he kuo mei aʻu mai ia ki he matapaá. 30Ko hono mo‘oni̇́ ʻeni ‘oku ou talaatú, ‘e pau ke hoko ʻa e ngaahi me‘a ‘oku ou lau ki ai̇́, ‘oku te‘eki ke mate kotoa ʻa e toʻutangata ko eni̇́. 31‘E faifai pē pea ʻauha ʻa e langi̇́ mo māmani, ka ‘e tolonga pē ʻeku ngaahi leá ‘o ta‘engata.”

Ko e ‘Ikai ke ‘Ilo Hono Houá

(Mātiu 24:36-44)

32‟Ka ‘oku ‘ikai ha taha te ne ‘ilo pē ‘e hoko fakakū mai ʻa e ʻaho ko iā. Na‘a mo e kau ʻāngelo ʻi he langi̇́, mo e ʻAló foki, ka ‘oku ‘ikai te nau ‘ilo, ko e Tamai̇́ pē toko taha ʻokú ne meaʻi̇́. 33Mou tokanga pē, pea mou teuteu. He ‘oku ‘ikai te mou ‘ilo pē ‘e hoko fakakū ʻa e taimi ko iā. 34‘E hangē ko ha taha naʻe teu ʻalu ki muli, pea naʻe tukuange hono ʻapi̇́ ki heʻene kau tamaio‘eiki̇́ ke nau tokangaʻi, ʻo ne tuku ki he tamaio‘eiki takitaha hono fatongia, mo ne fekau ʻa e le‘o matapaá, ke ‘ā pē ‘o le‘o. 35Ko ia, mou ‘ā ‘o le‘o! He ‘oku ‘ikai te mou ‘ilo pē ‘e foki fakakū mai ʻa e ʻeiki ʻo e ʻapi̇́. Na‘a ha‘u efiafi ia, pē vaeuapō, pē ʻi he ‘uʻua ʻa e moá pē ʻi he hengihengi̇́. 36Vakai na‘a fakafokifā pē kuo ha‘u ia, ʻo ʻilo ‘oku mou mohe! 37Ko e fakatokanga ‘oku ou fai kiate kimoutolú, ‘oku ou fai ia ki he kakai kotoa pē. Mou le‘o!”

Currently Selected:

Ma‘ake 13: TCNT

Highlight

Copy