Ma‘ake 5

Ko e Tangata na‘e Ma‘u ‘e ha Laumālie Kovi

(Mātiu 8:28-34; Luke 8:26-39)

1Pea nau a‘u atu ki he kauvai ʻe tahá, ki he feituʻu ‘o e kau Kelasini̇́. 2Pea ʻi he hifo atu ʻa Si̇̄sū mei vaká, naʻe fakafetaulaki mai kiate ia ha tangata mei honau ngaahi faʻitoká, ʻa ia naʻe uluisino ai ha laumālie ʻuli; 3Ko e tangatá ni, na‘e nofo holo pē he ngaahi fa‘itoká, pea naʻe ʻikai lava ʻe ha taha ke haʻiʻaki ia ha meʻa, ʻo aʻu pē ki ha sēini ukamea. 4He kuo tā tuʻo lahi hano ha‘i sēini hono nimá mo hono va‘é, mo ʻene toutou motuhi pē ʻe ia ʻa e seini̇́ pea mo e ngaahi ukamea na‘e ha‘i ʻaki hono ongo va‘é, pea na‘e ‘ikai ha taha te ne lava ke mapule‘i ia. 5Pea ko e ʻaho mo e pō mo ʻene ʻalu takai pē he ngaahi fa‘itoká mo e ngaahi moʻungá ‘o kaikaila holo ai mo ne fakalaveaʻi pē ia ʻaki ʻa e maka.

6Pea ʻi heʻene sio mei he mama‘ó kia Si̇̄sū, naʻá ne lele ‘o tō tūʻulutui atu kiate ia. 7Pea naʻe kalanga le‘olahi, ʻo pehē: ‟‘E Si̇̄sū, ʻAlo ‘o e ‘Otua Fungani̇́! ‘Oku ou kole fakamātoato atu ʻi he huafa ‘o e ‘Otuá ke ʻoua te ke fakamamahi‘i au!” 8Ko ʻene kaila peheé, he kuo ‘osi folofola ʻa Si̇̄sū kiate ia, ‟ʻA e Laumālie ʻuli! Hū kitu‘a mei he tangatá!”

9Pea ʻeke ange ‘e Si̇̄sū kiate ia, ‟Ko hai ho hingoá?” Pea naʻe talaange, ‟Ko hoku hingoá ko Kongakau, he ‘oku mau tokolahi.” 10Pea naʻe toe kole fakamātoato kia Si̇̄sū ke ‘oua muʻa te ne fekau kinautolu ke nau mavahe mei he feituʻu ko iā.

11Pea na‘e ʻi ai ha fanga puaka tokolahi na‘e huohua he tafatafa moʻungá, he feitu‘u ko iā. 12Pea kole ange ‘e he ngaahi laumālie ʻuli̇́ kia Si̇̄sū, ‟Fekau mu‘a ke mau hū ki he fanga puaká.” 13Pea fakangofua kinautolu ‘e Si̇̄sū, ke nau mavahe mei he tangatá, ‘o hū ki he fanga puaká. Pea feleleʻi hifo leva ʻa e fanga puaká, he tafa moʻungá ki tahi̇, ‘o nau melemo ai. Ko e tokolahi‘o e fanga puaká, na‘e feʻunga nai mo e toko uaafe.

14Pea feholaki ʻa e kau tauhi puaká ‘o tala ki he kakai̇́, ʻi kolo mo ʻuta, ʻa e me‘a kuo hokó. Pea naʻe omi ʻa e kakai̇́ ke vakai ki he meʻa kuo hokó.

15Pea ʻi heʻenau a‘u mai kia Sīsuú, tā ‘oku tangutu lelei atu ai ʻa e tangata na‘e ma‘u ‘e he ngaahi kongakau laumālie ʻuli̇́, kuo ʻai vala pea kuo ʻatamai lelei. Pea na‘á nau manavahē ai.

16Ko kinautolu na‘e sio ki he me‘a na‘e hokó, na‘á nau talanoa‘i ia ki he kakai kehé; ʻa e meʻa naʻe hoko ki he tangata naʻe uluisino ai ʻa e laumālie ʻuli̇́ pea pehē pē ki he me‘a na‘e hoko ki he fanga puaká. 17Pea na‘á nau kole kia Si̇̄sū ke ne ʻalu atu mu‘a mei honau fonuá.

18Pea ʻi he heka ʻa Si̇̄sū ki he vaká, naʻe kole ange ‘e he tangata na‘e ma‘u ‘e he ngaahi laumālie ʻuli̇́, ‟‘Ai mu‘a ke ta ō!” 19Ka na‘e ‘ikai loto ʻa Si̇̄sū ke na ō, ‘o ne pehē kiate ia, ‟‘Oua! Foki pē koe ki ʻapi ki ho fāmili̇́ mo ho kakai̇́ ‘o tala kiate kinautolu ʻa e ‘ofa kuo fai ma‘au ‘e he ʻEiki̇́.” 20Pea talu ai ʻa e foki ʻa e tangatá ‘o talanoa‘i holo ʻi Tikapolusi ʻa e ngāue lahi kuo fai ‘e Si̇̄sū ma‘á ná. Pea naʻe ‘ohovale lahi ʻa e kakai na‘e fanongo ai̇́.

Ko e Ki‘i Ta‘ahine Tau‘aki pea mo e Fefine Mahaki

(Mātiu 9:18-26; Luke 8:40-56)

21Pea naʻe toe tuku folau ʻa Si̇̄sū ki he kauvai ‘e tahá. Pea fakataha mai kiate ia ha fu‘u kakai tokolahi ki he matātahi̇́. 22Pea ha‘u ai ʻa e taha ʻo e kau pule falelotú, ko Sailosi hono hingoá, pea ʻi heʻene mamata kia Si̇̄suú naʻá ne fakatōmape‘e atu ki hono vaʻé, 23‘O ne kole fakamātoato kiate ia, ʻo pehē: ‟Ko si‘oku ki‘i ‘ōfefiné, ‘oku puke lahi ʻaupito. Me‘a mai muʻa ‘o hilifaki ho nimá kiate ia ka e mo‘ui!” 24Peá na kamata ō atu mo Si̇̄sū. Pea naʻe muimui atu ha kakai tokolahi ʻo feteketeke‘i mai kiate ia.

25Pea na‘e ʻi ai ha fefine, kuo ta‘u ‘e hongofulu-mā-ua ʻene puke he ʻautotó. 26Pea ko e kau toketā tokolahi kuo nau faito‘o ia, pea kuo ‘osi ʻene pa‘angá hono totongi kinautolu mo e ‘ikai pē ke sai, kae faka‘au pē ke toe lahi ange hono faingata‘a‘iá.

27Pea kuo fanongo ʻa e fefiné he ngaahi talanoa kia Sīsuú, ‘o ne ʻalu atu mei hono tuʻá, he lotolotonga ‘o e kakai̇́, ‘o ala atu ki hono kofú. 28He na‘á ne fakakaukau loto ‘o pehē: ‟Kapau te u ala atu pē ki hono kofú, te u mo‘ui ai pē.” 29Tuaiekemo kuo matu‘u ʻene ʻautotó, pea naʻe ongo‘i hono sinó kuo fakamoʻui ia mei hono mahaki̇́.

30Ka na‘e ongo‘i leva ‘e Si̇̄sū kuo ʻalu atu meiate ia ha ivi fakamo‘ui, pea naʻe tafoki hake ki he kakai̇́, ʻo ne pehē kiate kinautolu, ‟Ko hai na‘e ala mai ki hoku kofú?”

31Pea pehēange ‘e heʻene kau akó kiate ia, ‟‘Okú ke meʻa‘i pē ʻa e feteketekeʻi mai ʻa e kakai̇́. Ko e hā ‘okú ke toe fehu‘i ai pē ko hai na‘e ala mai̇́?” 32Ka naʻe vakavakai holo pē ʻa Si̇̄sū pē ko hai na‘e ala ange kiate ia.

33Pea ʻi he ‘ilo ‘e he fefiné ʻa e me‘a kuo hoko kiate iá, naʻá ne tetetete heʻene ilifiá, ‘o ne haʻu ʻo tō hifo he veʻe va‘e ‘o Si̇̄suú ‘o fakahā ange kotoa e mo‘oni ʻa e meʻa kuo hoko kiate iá. 34Pea folofola ʻa Si̇̄sū, ‟Fefine, kuo fakamo‘ui koe koeʻuhi̇̄ ko ho‘o tui̇́. ʻAlu fiemālie ā, he kuó ke mo‘ui mei ho mahaki̇́.”

35Pea lolotonga ʻa e kei lea ʻa Sīsuú, mo e omi ha ni‘ihi mei he ʻapi ʻo Sailosi̇́, ʻa e pule falelotú, ʻo fakahā ange, ‟Kuo mate ho ‘ōfefiné. ‘Oua te ke toe fakahoha‘asi ʻa e tangata‘eiki̇́!”

36Ka na‘e ‘ikai tokanga ʻa Si̇̄sū ki he‘enau laú, ka naʻe talaange kia Sailosi, ‟‘Oua ‘e hoha‘a ho lotó, ka ke tui pē.”

37Pea naʻe ‘ikai ke ne loto ke nau toe ō mo ha ni‘ihi, tukukehe pē ʻa Pita, mo Sēmisi, mo Sione ko e tokoua ʻo Sēmisi̇́.

38Pea ʻi heʻenau a‘u ki he ʻapi ‘o e pule falelotú, naʻa nau mamata ki ha vālautuʻu, ko e kakai naʻa nau tangi mo tēngihia le‘olahi. 39Pea hū atu ʻa Si̇̄sū ki fale, ʻo ne folofola kiate kinautolu, ‟Ko e hā fua hoʻomou vālautuʻú? Ko e hā ‘oku mou tangi ai̇́? ‘Oku ‘ikai ke mate ʻa e ki‘i ta‘ahiné, ka ʻoku mohe pē.” 40Pea kamata manuki‘i ia ‘e he kakai̇́, ka naʻá ne fekau ke nau hū kotoa kitu‘a. Pea naʻe ‘ave pē ʻa e tamai mo e fa‘ē ʻa e ki‘i ta‘ahiné, mo ʻene kau ako naʻa nau ōmai̇́, ‘o nau hū ki he loki na‘e tokoto ai ʻa e ki‘i ta‘ahiné. 41Pea ala atu leva ʻa Si̇̄sū ki he nima ‘o e ki‘i ta‘ahiné, ʻo ne folofola, ‟Tālita kumi!” ʻA ia ko hono ‘uhingá, ‟Ta‘ahine, ʻoku ou tala kiate koe, ke ke tuʻu hake!” 42Pea tuʻu hake leva ʻa e ki‘i ta‘ahiné ‘o kamata laka holo (naʻá ne taʻu taha-ua nai). Pea na‘e mātuʻaki fakatumutumu ai ʻa e kakai̇́.

43Ka na‘e tuʻutuʻuni ‘e Si̇̄sū ke ‘oua na‘á nau talanoa ki ha taha ʻa e me‘a kuo hokó. Pea ne fekau ke nau ‘oange ki he ki‘i ta‘ahiné, ha me‘a ke ne kai.

Currently Selected:

Ma‘ake 5: TCNT

Highlight

Copy