Ma‘ake 8

Ko e Fafanga ‘e Si̇̄sū e Toko Fā Afe

(Mātiu 15:32-39)

1ʻI he ngaahi ʻaho ko iā, naʻe toe fakataha mai ha fu‘u kakai tokolahi kia Si̇̄sū. Pea koeʻuhi̇̄ naʻe ‘ikai ha me‘a ke nau kai, naʻe ui mai ‘e Si̇̄sū ʻene kau akó, pea naʻá ne pehē ange kiate kinautolu; 2‟‘Oku fonu hoku lotó ʻi he ‘ofa ki he fuʻu kakai ko eni̇́, he kuo lava ʻeni ʻa e ʻaho ‘e tolu mo ʻenau nofo mo au, ka ‘oku teʻeki ha me‘a ke nau kai. 3Kapau te u fekau ke nau foki fiekaia ki honau ngaahi ʻapi̇́, te nau si‘i pongia ʻi he halá, he ko e ni‘ihi ai, ko e ō mai mei he ngaahi feitu‘u mama ʻaupito.” 4Pea pehēange ‘e he kau akó, ‟Ka ʻe ma‘u mei fē he fu‘u toafá ni ha me‘akai ‘e feʻunga mo ha kakai tokolahi pehē?”

5Pea tali ‘e Sīsu, ‟Ko ho‘omou fo‘i mā ‘e fiha ‘oku maʻú.” Pea nau talaange, ‟‘E fitu pē!”

6Pea fekau leva ‘e Si̇̄sū ʻa e kakai̇́ ke nau taʻutu ki lalo. Pea naʻe toki to‘o mai ʻa e fo‘i mā ‘e fitú ‘o fai ʻene fakafeta‘i. Pea naʻe pakipaki ‘o ‘ange ki he kau akó ke nau tufotufa ki he kakai̇́. Pea nau tufa. 7Na‘e toe ʻi ai foki mo ʻenau fanga ki‘i mata‘i ika. Pea toe tāpuaki‘i mo ia ‘e Si̇̄sū, ʻo ne toki fekau ʻa e kau akó ke nau tufotufa mo ia ki he kakai̇́.

8Pea na‘e kai kātoa ʻa e kakai̇́ ‘o mākona, pea hili iá naʻe tānaki ʻe he kau akó ʻa e toengá maá ʻo fonu ai ha kato lalahi ʻe fitu.

9Naʻe feʻunga mo e toko fā afe ʻa e kinautolu naʻe kai̇́, pea naʻe toki tukuange kinautolu.

10Pea naʻe heka leva ki ha vaka, ʻe ia mo ʻene kau akó, ‘o nau tuku folau ki he feitu‘u Talamanutá.

Ko e Fiema‘u Faka‘ilonga mei Langi

(Mātiu 16:1-4)

11Pea na‘e omi ha kau Fālesi ‘o nau fakafehuʻi ʻa Si̇̄sū, ko ʻenau feinga ke tauhele‘i ia, ʻo nau kole ke ne fai ha mana ke fakamo‘oni kiate ia, mei langi. 12Pea ‘ai leva ʻa e fu‘u māpuhoi ʻa Si̇̄sū, ʻo ne toki pehē: ‟Ko e hā fau ʻa e holi ʻa e kakai̇́ ni ke maʻu ha faka‘ilonga mei langi! Ko hono mo‘oni̇́ ʻeni ‘oku ou tala atú, ‘e ‘ikai teitei fai ha faka‘ilonga mei langi maʻae to‘utangata ko ʻeni̇́!”

13Pea mavahe leva ʻa Si̇̄sū meiate kinautolu, ‘o ne heka ki he vaká ‘o folau ki he kauvai ‘e tahá.

Ko e Lēvani ʻa e Kau Fālesí mo Hēlota

(Mātiu 16:5-12)

14Pea na‘e ngalo ʻi he kau akó ke nau ōmai mo ha mā ‘e feʻunga mo kinautolu, he ko e fo‘i mā pē ʻe taha naʻa nau maʻu ʻi he vaká. 15Pea fakatokanga ai ʻa Si̇̄sū kiate kinautolu, ‟Mou tokanga! Malu‘i kimoutolu ke mou ‘ʻata‘atā mei he lēvani ʻa e kau Fālesí mo e lēvani ʻa Hēlotá!”

16Pea fepehēʻaki ʻe he kau akó, ‟Na‘a ko ʻene lau peheé koeʻuhi̇̄ ko e ‘ikai ke tau ōmai mo ha maá.”

17Pea ‘ilo ‘e Si̇̄sū ʻenau muhumuhú, pea naʻe fehu‘i ange kiate kinautolu, ‟Ko e hā ‘oku mou felāuʻaki ai ʻi he ‘ikai ha‘amou fo‘i mā? ‘Oku te‘eki koā ke mahino kiate kimoutolu ʻa e maá? ‘Oku fefeka pehē koā homou lotó? 18‘Oku mou mata pē koā ka ‘oku ʻikai te mou mamata? Pea ʻoku mou telinga pē koā ka ‘oku ʻikai te mou fanongo? Kuo ngalo vave leva ʻiate kimoutolu ʻa e meʻa naʻá ku fai̇́? 19ʻI he‘eku pakipaki ʻa e fo‘i mā ‘e nimá ma‘a e toko nimaafé, Ko e kato ‘e fiha na‘e fonu ʻi he mā na‘e toé?” Pea nau tali ange, ‟‘E hongofulumāua.” 20‟Pea ʻi heʻeku pakipaki ʻa e fo‘i mā ‘e fitú ma‘a e toko fāafé, ko e kato ‘e fiha na‘e fonu ʻi he toetoenga mā na‘a mou tufi̇́?” Pea nau tali, ‟ʻE fitu.” 21Pea pehē ʻe Si̇̄sū kiate kinautolu, ‟Pea ‘oku te‘eki ai koā ke mahino atu ʻa e me‘a ‘oku ou laú?”

Ko hono Fakamo‘ui ‘e Si̇̄sū ha Tangata Kui ʻi Petesaita

22Pea nau a‘u atu ki Petesaita, pea taki mai ai ‘e ha ni‘ihi kia Si̇̄sū ha tangata na‘e kui, ‘o nau kole ange ke ne ala ki ai. 23Pea puke leva ‘e Si̇̄sū e nima ‘o e tangatá, ‘o taki ia ki tuʻa ‘ākolo. Pea naʻe ʻaʻanu ki he ongo fo‘i mata ‘o e tangatá, ʻo ne toki hilifaki hono nimá kiate ia. Pea naʻe folofola ki ai, ‟‘Okú ke lava ‘o sio ki ha me‘a?” 24Pea hanga hake leva ʻa e tangatá, pea naʻe toki pehēange, ‟ʻio, ‘oku ou lava ‘o sio ki he kakai, ka ‘oku nau hangē mai ha ʻulu ʻakau ‘oku laka takai holó.” 25Pea toe ala ʻa Si̇̄sū ki he mata ‘o e tangatá. Pea toki ʻā ai ʻa e tangatá, ‘o moʻui hono matá, ʻo ne lava ‘o sio lelei ki he me‘a kotoa pē. 26Pea toki folofola ʻa Si̇̄sū ki ai, ‟ʻAlu ā ki ʻapi. ‘Oua te ke toe foki ki he koló.”

Ko Hai ʻa Si̇̄sū?

(Mātiu 16:13-20; Luke 9:18-21)

27Pea mavahe ʻa Si̇̄sū mo ʻene kau akó mei he feitu‘u ko iá ‘o nau ō ki he fanga ki‘i kolo he feitu‘u Sesalia Filipai̇́. Pea lolotonga ʻenau kei fononga atú, naʻe fehu‘i ange ‘e Si̇̄sū ki he‘ene kau akó, ‟Ko hai au ʻi he lau ʻa e kakai̇́?”

28Pea nau pehēange, ‟Ko e lau ʻa e ni‘ihi, ko Sione Papitaiso koe, pea lau ʻe he ni‘ihi ko ‘Ilaisiā. Pea toe lau ʻa e ni‘ihi, ko ha taha koe he kau palōfitá.”

29Pea toki fehu‘i ange ‘e Si̇̄sū kiate kinautolu, ‟Ka ko hai au ʻi ho‘omou lau ʻamoutolú?” Pea pehēange ‘e Pita, ‟Ko e Mi̇̄saiá koe.”

30Pea tuʻutuʻuni ‘e Si̇̄sū kiate kinautolu; ‟ʻOua te mou fakahā ʻa e meʻá ni ki ha taha.”

Ko e Fakahā ‘e Si̇̄sū ʻEne Mamahi̇́ mo ʻEne Pekiá

(Mātiu 16:21-28; Luke 9:22-27)

31Pea kamata mei ai ʻa e fakahinohino ‘e Si̇̄sū ʻene kau akó, ‟ Kuopau ke moʻua ʻa e Foha ‘o e Tangatá ʻi ha mamahi lahi, pea ‘e fakasi̇̄tuʻaʻi ia ‘e he kau mātuʻa ʻo e lotú, mo e kau taula‘eiki pulé, mo e kau faiako Lao ʻa Mōsesé, pea ʻe tāmate‘i ia. Ka ʻi he ʻaho hono tolu mei ai̇́, te ne toetu‘u.” 32Na‘e mātu‘aki mahino ʻaupito ʻene fakamatala naʻe fai̇́, pea hanga ai ‘e Pita ‘o taki ʻa Si̇̄sū ki he tafa‘aki̇́, ‘o valoki‘i ia. 33Kae tafoki hake ʻa Si̇̄sū ‘o hanga ki he‘ene kau akó, pea naʻe toki folofola kia Pita, ‟ʻAlu kituʻa, Sētane! He ‘oku ‘ikai ko e fakakaukau fakaʻotua ‘okú ke fai̇́, ka ko e fakakaukau fakaetangata pē!”

34Pea ui mai ‘e Si̇̄sū ʻa e kakai̇́ mo e kau akó, ʻo ne pehē kiate kinautolu, ‟Kapau ‘oku loto ha taha ke muimui mai kiate au, kuo pau ke ne fakangalongalo‘i ‘e ia ia, pea kuo pau ke ne fua hono kolosí ‘o ne muimui kiate au. 35He ka ai ha taha te ne loto ke fakahaofi ʻene moʻui̇́ kuó ne tuku ia ke mole. Peá ka ai ha taha te ne loto ke mole ʻene moʻui̇́ koeʻuhi̇̄ ko au mo e Ongoongo Lelei̇́, kuó ne fakahaofi ia. 36He ko e hā hano lelei ki ha taha ‘okapau te ne ma‘u ʻa māmani kātoa kae mole ai ʻene moʻui̇́? 37He ko e hā ha me‘a ‘e lava ʻe ha taha ‘o ‘oatu ke fakatauʻaki mai hono laumālié? 38Peá ka ai ha taha te ne maa‘i au mo ʻeku akonaki̇́ ʻi he kuonga taʻelotu mo faiangahala ko eni̇́, ‘e maa‘i foki ʻa e toko taha ko iā ‘e he Foha ‘o e Tangatá ʻi heʻene hā‘ele mai mo e lāngilangi ‘o ʻene Tamai̇́ mo e kau ʻāngelo mā‘oni‘oni̇́.”

Currently Selected:

Ma‘ake 8: TCNT

Highlight

Copy