JENESIS 11
11
Babel ge Hekihube
1Railangbe ting â kedeireime leine helad kat runne bam zai samkie ramme du ’nzuâkam ze bam de lei. 2Tingbia ’mbia ne hetîtigut dadege Shinar ramme bekâm yibe ngau lu chige lung di de lei. 3Penui karai kat-kat je sa ze, “Kei lei! hegamkâng ramme teleu lu rû zu kei lei” ze kacheu de lei. Chidadege teleurabe hang hegam zai pecham hang mâta bam di de lei. 4Penui ne sa ze, “Namdi tewchu ze hulangbe ’mpûm ze â tinggîm tûngchangrabeki tew zu kei lei, chidezai kedeirei ge anui ji di ze anui je tewtimrarip kai mak ra hangge zeu,” ze kacheu lei. 5Chidadege ziemmena name ne tewgaibe namdi benai heki hube pie ra hangge Tingwang wangkeu de lei, 6zai pa ne rang ze, “Pie le lau, penui ’nteumena zat kat zai hekuâ-helad kat runne rei de lei; chuna â penui tew ra ka’nningbe ze bepîbang runne rei de lei. Penui tew ra ’nningpatkaibe tewchilakrabe mâ de bam dai ra mak te lei! 7Kei lei, wangkeu zu kei lei, zai penui lad tewteguak kai be kei lei, dezai peize kat-kat lad chita de ra hangge zeu,” ze kacheu de lei. 8Chigum ze Tingwang ne penui je kedeirei pebâm gechâm-châm ’mbe hûrarip kai bei de lei, zai penui namdi tewchube ze sau di de lei. 9Chipauziegene chi namdi ji ze Babel ze ku de lei, chige Tingwang ne kedeireime leine lad tewteguakkaibeibe ziegeneu, zai chipau bâm gene Tingwang ne penui je kedeu ’mbe kedeirei pebâm gechâm-châm ’mbe hûtimrarip kai bei de lei.
Shembe Chaname
(1 Kr 1.24-47)
10Aime bau ze Shembe dagene piakeume bau de lei. Shembe pe tingkum haî kat chang di dadege, pe na ’mpeumi, Arpakshadbe je duinaibe châng pakenabe kum ge lung de lei; 11zai Arpakshadbe je lunglube chângge, Shembe kum haî mengeu ring-hang gai dai ze pe name kêdame ’mpeumi benai ’mpuimi je du lungkeu gai kadai de lei.
12Arpakshadbe kum himreu ze mengeu chang di dadege, pe na hangkat bam di de lei, chize Shelabe de lei; 13chipau chângge du kum haî medai ze kechum ringchang gai lu pe name kêdame ’mpeumi benai ’mpuimi je du lungkeu gai kadai de lei.
14Shelabe pe tingkum himreu ge pe na ’mpeumi hangkat bam di de lei, pe ji â Eberbe de lei; 15chipau chângge du, kum haî medai ze kechum ring gai lu pe name kêdame ’mpeumi benai ’mpuimi ramme je du lungkeu gai kadai de lei.
16Eberbe pe tingkum himreu ze medai chang dege, pe na ’mpeumi, Pelegbe bam di de lei; 17chipau chângge du, pa kum haî medai ze himreu ring gai lu pe name kêdame ’mpeumi benai ’mpuimi je du lungkeu gai kadai de lei.
18Pelegbe pe tingkum himreu chang dege, pe na ’mpeumi, Reube bam di de lei; 19chipau chângge, kum haî na ze sekui ring gai lu pe name kêdame ’mpeumi benai ’mpuimi je du lungkeu gai kadai de lei.
20Reube pe tingkum himreu ze kena chang dege, pe na ’mpeumi, Serugbe bam di de lei; 21chipau chângge, kum haî na ze sena ring gai lu pe na kêdame ’mpeumi benai ’mpuimi je du lungkeu gai kadai de lei.
22Serugbe pe tingkum himreu chang dege, pe na ’mpeumi, Nahorbe bam di de lei; 23chipau chângge kum haî na pa ring gai lu pe name kêdame ’mpeumi benai ’mpuimi je du lungkeu gai kadai de lei.
24Nahorbe pe tingkum ’ngkai ze sekui chang dege, pe na ’mpeumi, Terabe bam di de lei; 25chipau chângge, pa kum haî kat ze kereu ze sekui ring gai lu pe name kêdame ’mpeumi benai ’mpuimi je du lungkeu gai kadai de lei.
26Terabe pe tingkum riaksena chang dege, pe na hangchum, Abrambe, Nahorbe, zai Haranbe bam di de lei.
Terabe dagene Piakeume
27Abrambe, Nahorbe, zai Haranbe peu Terabe dagene piakeume ze aime bau de lei. Haranbe ze Lotbe peu de lei, 28zai Babilonram (Kaldia) ge pechu lungkeugaibe namdi Ur gene pe peu ring bam ze Haranbe â chai di de lei. 29Abrambe nâu ji â Saraile lei, zai Nahorbe nâu ji â Milkale lei, Milkale benai Iskale peu â Haranbe lei. 30Saraile â pe na ga ze bam bam de lei.
31Terabe ne pe na Abram benai pe chapeu Lotbe, Haranbe na zai pe mupui Saraile Abrambe nâu je ngua lu Babilonram ge Ur namdi sâu ze Kanaanram ’mbe tat ti de lei. Haran riâ penui tatchang ze chige lung ze bam di de lei. 32Zai Terabe pe tingkum haî na ze mengeu ring gai lu ze Haran gene chai di de lei.
Currently Selected:
JENESIS 11: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
