JENESIS 13
13
Abrambe benai Lotbe Karimnabe
1Abrambe â pe nâu zai pe gu bambe ramme leine tei kam lu Ijipram gene tingpeî ’mbia Kanaanram gene tingpî ’mbia Negeb ’mbe tat ti de lei, zai Lotbe du pe dage tat ti de lei. 2Abrambe â kaurui, zai gechâk, gepût lam ge keheupeu lei. 3Chidadege Negeb sâu nan ze Bethel riâ tat dai di de lei, besua’ngka ge Bethel benai Ai kakge pe gu hetiamki bambe, 4keraîbe ting ge herâtewbe-bâmra pa tewgaibe bâm ge zeu; zai chige Tingwang je pa kakellum de lei. 5Lotbe, Abrahambe benai tatpeu gu du meli ramme, getum ramme, zai hetiamki ramme bam de lei, 6chidadege penai heurâ misongga bamdibe ziegene penai hangna bamherua ra pebâm hang hung di de lei, 7dadege Abrambe gu kauruidung je reîme benai, Lotbe gu kauruidung je reîme hegeipat chu di de lei, chipau ting ge Kanaanme benai Perizme chipau dei ge lung bam rei de lei.
8Chidadege Abrambe ne Lotbe je, “Anai â mi kiduîme karai da ze anai gu ziemmena ramme kakge peize hegei mak ra de lei. 9Ning suage heram kedi la mak mei? Chidaze anai bamchâm kei lei, nang ne heku’mbia lu, zai I ne hezat’mbia tat ra de lei; makchai nang ne hezat’mbia lu, zai I ne heku’mbia tat ra de lei,” ze acheu bei de lei. 10Dadege Lotbe heguarua gai dege, Jordan geuki kâm, Zoar riâ changbe hedui kie-sangkiebe, Tingwang gu merie gumbe, zai Ijip dei gumbe ngau de lei; aize â Tingwang ne Sodom benai Gomorra tew’nsiarabe suage bambe dei de lei. 11Chidadege Lotbe â Jordan kâm leine pe hangge kelâng lu naimik pat ’mbia lungmie di de lei; aigum ze penai hangna rimna di de lei. 12Abrambe â Kanaanram ge bam di, zai Lotbe â ’nggeukâm ge namdi ramme ruage bam ze Sodom hiage lung ze bam di de lei. 13Sodom ge bamme â ziemmena kesiame zai Tingwang masuage hemuika’ndime ramme de lei.
Hebron ’mbe Abrambe Tatbe
14Lotbe pe dagene tatchâmdibe chângge, Abrambe je Tingwang ne rang gai ze, “Nang chuna bambe bâm gene pie’mmi ze tingpeî, tingpî zai tingbia tingrun ’mbia heguaruatuipik kai ni lau; 15nang ngaube dei leine ze nang benai ning chaname hangge betingbeta hang I pei gai gu de lei. 16Ning chaname je kedeiniamoîne gum ze I tew gai gu lei; chidezai kedeiniamoîne mige ne â seichi duî zai â ning chaname je du seichi dui le ra hangge zeu. 17Chunage tat ze heram ze pedit petâ ruatuipik le zu lau, ning hangge I pei gai gu daseu,” ze acheu bei de lei. 18Chidadege Abrambe pe gu hetiamki puipat lu, Hebron ge Mamre gu ’mpubang ramme hiage lung ze bam de lei; zai chige Tingwang hangge herâtewbe-kaira hang pa tew gai de lei.
Currently Selected:
JENESIS 13: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
