JENESIS 16
16
Hagarle benai Ishmaelbe
1Chunage Abrambe nâu, Saraile henalung makze bam rei de lei. Pe luntewpui Ijip’mpui pe ji Hagarle kacheupui bam de lei; 2dadege Saraile ne Abrambe je, “Pie le lau ni, Tingwang ne achu hena bam ra pei mak te lei; a lângtewpui je ngua gai be du lau; pe dagene a hangge napoine ngau le leu gu mei zeu,” ze rang gai bei de lei. Dadege Saraile sam ze Abrambe seutâu gai di de lei. 3Chidadege Abrambe Kanaanram ge kum kereu bamdibe châng ne pe nâu Saraile ne pe lângtewpui, Ijip’mpui Hagarle je pe napeu Abrambe nâu hang peipat kai bei de lei. 4Dadege Hagarle je Abrambe ngua gai bei dege, pe pumritpat ti de lei; zai Hagarle ze pa ’mpung di de lei be chî di dege â pe pai Saraile je pa ngau’nna di de lei. 5Chidadege Saraile ne Abrambe je, “Achu tew’ngkuigai’ndibe ze peize ning peireige keu gai de lau! I ne a lângtewpui je nang ne ngua gai ra pei gai de lei, zai pa ’mpung di de lei be pa chî di dege â achu pa ngau’nna di de lei. Peize nang benai a kakge Tingwang ne samram gai be lau!” ze kacheu de lei. 6Kane Abrambe ne Saraile je, “Pie le lau, ning lângtewpui â ning gu rezie kangge lamui de zeî lau; nang ne pechu tewnei-neibe tak tew zu lau,” ze acheu bei de lei. Chidadege â Saraile ne pechu tewsâ bei de lei, zai pa paktat ti de lei.
7Shur ’mbe tatbe ’mpuîki ge, hênam ge hedui depin bambe gene Hagarle je Tingwang gu tinggîm angel’mpeu kahedau de lei. 8Dadege pa ne, “Saraile lângtewpui Hagarle gau, ’ndai’nggene nang wang, zai ’ndai’ngge nang tat kai ra lau?” ze kacheu de lei. Pa ne kak ze, “A pai Saraile dagene I pak’mbiatat lei,” ze kacheu de lei. 9Tingwang gu tinggîm angel’mpeu ne pechu, “Ning pai tailam helatwang dai ze pe guâ ’nggua dai zu lau,” ze acheu bei de lei. 10Chidadege pa ne pechu sa’nduâtat ze, “Ning chaname sei de seikamchi lak ze misongga bam ra I ne pei gai gu lei,” ze kacheu de lei. 11Dadege Tingwang gu tinggîm angel’mpeu ne pechu, “Pie le lau, nang ’mpung da, zai ’mpeumi napoine lungkeu gu de lei; pe ji â Ishmael ze nang ’ntak kai ra lei; Tingwang ne nang kahereube kuâ ’ngking gai bei daseu. 12Kane ning na â hênam gu hekunmerângne gum bam gu lei; haimena peireige pe bahuâ kai gu, zai haimena ne pe peireige du penui bahuâ kai gu lei. Zai pe kiduîme je ’ngkailak luisui ze pa bam gu lei,” ze kacheu de lei. 13Chidadege pechu ka’mpaupeu, Tingwang ji pa ne kû gai ze, “Nang â kengaube Rapeu de lei;” pa ne, “Tingwang je I ngau sing lu run de mei zai pechu I ngaulube chângge I ring ze bam run de semei?” ze kacheu dadegeu. 14Chipauziegene chipau dekua ji ze Beer-la hai-roi ze kû gai de lei; aize â Kades benai Bered kakge la lei.
15Zai Hagarle ne Abrambe na ’mpeumi lungkeu gai de lei; Abrambe ne pe na ji hang Ishmaelbe ze ’ntak kai de lei. 16Hagarle ne Ishmaelbe je lungkeube ting ge Abrambe pe kum riakdesat ze seruk chang di de lei.
Currently Selected:
JENESIS 16: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
