JENESIS 18
18
Abrahambe na Lung ra Samriagaibe
1Zai tîngna lumperîsi ge Abrahambe pe ki kemui ge ’ntau lage pechu Tingwang ne Mamre gu ’mpubang zeu gene liâ de lei. 2Pe ma-’ngngangrakchu lu pie gai de lei, zai pie le lau, ziemmena hangchum pe suage sap laleu de lei, penui je pa ngau lu dege, penui je hedau ra pa hetiamki kemui gene pakpat ti de lei, zai kedei ge kâukeu ’ngkumpit kai lu ze, 3pa ne, “A pau gau, ning mikngau ge ngau’nggiaduibe zat I chang zai â ning guâ ka’ngguapeu je tat’ngka se lau. 4Hedui kecheîne teipat lu ningnui pî hui gai che lei, zai hingbang kang gene sau zun gai le lau, 5peize ningnui ranchi bi ra ningnui hang tingku kâng I tei gu rei lei, chipau châng dezai ningnui tat ra de lei, ningnui guâ ka’ngguapeu dage ningnui ne zuamie bei daseu,” ze acheu bei de lei. Dadege penui ne kak ze, “Nang ne sabe luî ze tew zu lau,” ze kacheu de lei. 6Zai Abrahambe ne hetiamki lung ’mbe Sarale tailam pakchin gut lu, pechu, “Kelua ze dekuî yilangbe gum chum tuakpat lu zai kenei lu ze hemang gene lang gai zu lau,” ze rang gai bei de lei. 7Zai Abrahambe â pakpat lu pe gu kauruidung ruage getumpoine hemei ’nchiap zai teuyi-peretsetbe kau kelâng lu, pe guâ ka’ngguapeu, kelua ze helangrapeu je pei bei de lei. 8Zai pa ne tungdui tewhialube zai tungdui zai getumpoine pa ne penui hang langgailube hemei ji ze teipat lu penui suage kaipat kai bei de lei; zai penui mâ-teube luage pa â hingbang kangge penui taige sapkua bam de lei.
9Penui ne pechu, “Ning nâu Sarale ’ndaige la lau?” ze ka’nneu de lei. Zai pa ne, “Hetiamki lungge pa â la lei,” ze acheu bei de lei. 10Tingwang ne, “keriakting dezai I wang dai sing gu lei, zai ning nâu Sarale ’mpeumi napoine lungkeu gu lei,” ze rang gai bei de lei. Zai Sarale â pe chai ’mbe kemuiki ge sap lu ze ’ngking bam de lei. 11Abrahambe benai Sarale â chîng-kezuzie di de lei; zai Sarale â ’mpuimi tak gene pe nîsiabe sau di de lei. 12Chipauziegene Sarale pe runne pe lung gene ’nnui ze, “I chîng di chaine zai a napeu lei ze chîng di chaine I a pumritpat ku rei semei?” ze kacheu de lei. 13Tingwang ne Abrahambe je, “’Ndaitew ze Sarale ’nnui ze, ‘I chîng di chaine henalung gu run semei,’ ze kacheu lau? ze kacheu de lei. 14Tingwang hangge mâ de tewchilakrabe la se mei? Ranggai’ndibe hî keriakting ge ning dage wang dai sing gu zai Sarale ’mpeumi napoine lungkeu gu de lei,” ze kacheu de lei. 15Kane hingdibe ziegene Sarale ’ngkim ze, “I â ’nnui me lei,” ze kacheu de lei. Kane pa ne, “Nang ka’nnui sing de lei,” ze kacheu lei.
Sodom hang ziegene Abrahambe Hera je Kiambe
16Chidadege chipau bâm gene ziemmena ramme zuapat lu Sodom ’mbia heguapie gai de lei; zai Abrahambe ne penui je ’mpuîki ngualia gai ra ngua-gepâupat te lei. 17Tingwang ne, “I tâtewrabe ze Abrahambe dagene I tei’mbai ra se mei? 18Abrahambe â pezat dibe benai peranchibe zat chang gu, zai pa gene kedeirei pezat leine je ’nnam gai gu lei be ngaukâ lu zeu? Chize mak lei, 19pe name benai pe kiduîme pe chaige rehei lunghangdairamme je peling benai ka’nzeibe tâ tewbe gene Tingwang gu ’mpuî ge tatchi le ra penui je gecheu gai ra I ne pechu kelâng gai ’nde lei; chidezai Tingwang ne pa sam hatkai’ndibe ze Abrahambe peireige teiwanggaichi le ra hangge zeu,” ze kacheu de lei. 20Chidadege Tingwang ne Abrahambe je, “Sodom benai Gomorra je sa’nsia ze ka’nrungbe kuâ kie-desangdibe ziegene zai penui hemui-desangdibe ziegene, 21penui je saka’nsiabe kuâ a dage seuchangbe luigum ze tâu mei be pie ra I wangkeu gu lei; zai chize acheu me lei dizai â I chî gu lei,” ze kacheu de lei.
22Chidadege ziemmena hangna â chipau bâm sâu ze Sodom ’mbe tat ti de lei; kane Abrahambe â Tingwang suage sapbam gerei lei. 23Dadege Abrahambe Tingwang taige wang ’nna bi lu, “Ziemmena kapelingbe kau je du nang ne ziemmena kesiame suage tew’ngga gai ra run de semei? 24Namdi lungge ziemmena kapelingbe kau hangrengeu bâm lêuzai chige hangrengeume bambe ziegene du namdi ze ’nzâ makze nang tew’ngga gai ra semei? 25Chigumbe tâ tewgairabe ze ning dagene deutau ze peize bam de lau, kapelingbe kau je kesiame ruage tewchat’mpam gai ra zai â pelingtewbe kau lei ze ziemmena kesiame riâ ge keu gai gu de zeî lau! Ning dagene chize peize deutau de lau! Kedeirei leine gu samrampeu ne tâ peling tew mak ra semei?” ze kacheu de lei. 26Tingwang ne kak ze, “Sodom ge ziemmena kapelingbe kau hangrengeu I peudau lu zai â penui ziegene namdi luî I ’nsak kai gu lei,” ze kacheu de lei. 27Abrahambe ne sa dai ze, “Pie le lau, I kedeiniamoîne benai timbun gumbe runne kau ne Tingwang je ’mpau ra a runne achu peipat kai de lei. 28Samne-sam hangrengeu chang ra hangge hangmengeu ’nsang mak lêuzai se? Hangmengeu ’nsangmakbeibe ziegene namdi luî nang ne tew’nsia kam gai gu mei?” ze kacheu de lei. Dadege pa ne, “Hedai ze mengeu bâm laleu bei zai â chize I ne tew’nsia ra mak lei,” ze kacheu de lei.
29Pa ne pechu ’mpau dai ze, “Samnesam hanghedai dau lêuzai se?” kacheu de lei. Pa ne kak ze, “Hanghedai hang ziegene chize I tew’nsia ra mak lei,” ze kacheu de lei. 30Dadege pa ne “Hei peize Tingwang pe râta gai se lau, I sa gai gu rei lei. Samnesam hanghimreu runne dau lêuzai se?” ze kacheu de lei. Pa ne kak ze, “Hanghimreu chige bamdau zai â chipau tâ ze I tew gai ra mak lei,” kacheu de lei. 31Pa ne, “Pie le lau, I gumbe kau ne Tingwang je ’mpau ra a runne achu peipat kai de lei. Samnesam hang’ngkai dau lêuzai se?” kacheu de lei. Pa ne kak ze, “Hang’ngkai ziegene chize I tew’nsia ra mak lei,” ze kacheu de lei. 32Dadege pa ne, “Hei peize Tingwang pe râta gai se lau, luakat I sahekap kai gu rei lei. Samnesam hangkereu dau lêuzai se?” ze ka’nneu de lei. Pa ne kak ze, “Hangkereu hang ziegene chize I tew’nsia ra mak lei,” ze kacheu de lei. 33Dadege Tingwang ne Abrahambe je ’mpau kam gai lu dege, Tingwang â tat ti de lei; zai Abrahambe pe ki lam helatwang dai di de lei.
Currently Selected:
JENESIS 18: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
