JENESIS 2
2
1Zai chigum ze ting benai kedei zai pelung ge bambe zat leine ’ndam kam gai de lei. 2Zai pasenabe mai â pe tâ tewrabe leine tew kam lu, pasenabe mai ge ’ntak bam de lei. 3Chidadege chi pasenabe mai ze Hera ne ’nnam gai lu tew’nchi gai de lei, chipau mai ge Hera ne pe tâ leine tew kam lu ’ntakbambe ziegeneu.
4Airamme ze ting-kedei ka’ndambe rasam ramme de lei.
Eden Merie
Tingwang Hera ne ting benai kedei ka’ndambe mai ge â 5kedei ge mâ de bekiak puakpat mak, zai pebang puakpatbe du ga lei—kedei ge tingruikeu gai ra Tingwang Hera ne pei gai mak, zai kedei ge tâtew-teurabe kau mî de ga rei dadegeu; 6kane kedei ’mbene hedui ramme chu lu kedeirei leine ge ruîset kai bei de lei— 7chidadege kedei gene kedeinia tei lu Tingwang Hera ne ziemmena luî chiam gai lu, zai pe nêuki ge keringbe chuilu ’mmut kai bei de lei; zai ziemmena ze keringbe kau chang di de lei. 8Chidadege Tingwang Hera ne naimikpat ’mbia ge Eden ge merie tew gai de lei; zai chige pa ne chiamgailube ziemmena je kai de lei. 9Zai Tingwang Hera ne peluiyi zai ngauyi-kadesangbe zai mi hetak hang yibe chingbang zat kedei gene puakpat ra tew gai bei de lei, sumzui ge du keringbe chingbang, zai mâ-keyi-kesia-chibe chingbang puakpat ra tew gai bei de lei.
10Merie ge hedui zuâ ra Eden gene ’nggeuki kat luapat te lei, chipau bâm gene ’nggeuki medai luahangpat kadai de lei. 11Railangbe geuki ji â Pishon de lei; aipau geuki ne Habilaram gechâk bambe heram luaguâ de lei; 12zai chipau dei gu gechâk â yibe kau de lei; dellium benai oniks tingchu ramme chige bam lei. 13Pakenabe geuki ji â Gihon de lei; aipau geuki ne Kusram pelane luaguâ de lei. 14Zai pakechumbe geuki ji â Tigris de lei, aipau geuki ze â Assiriaram gene naimik pat ’mbia lua gai lei. Zai pamedaibe geuki ji â Euphrates de lei.
15Tingwang Hera ne ziemmena je Eden merie ge kedei tâ tew-teu ze chize reî ra kai bei de lei. 16Zai Tingwang Hera ne ziemmena je, “Merie ge mâ-hêrachi zat leine nang teu dui kam lei; 17kane keyi-kesiachibe bang rachî ze â nang teu mak ra lei, chipau rachî nang teugaibe mai ge nang chai gu daseu,” ze acheu samdie gai bei lei.
18Chidadege Tingwang Hera ne, “Ziemmena pe runne bam ra yi me lei; I ne pe kang hang kebuibe kau tew gai gu lei,” ze kacheu de lei. 19Chidadege Tingwang Hera ne kedei ge hekaune zat leine benai ’nruine liamruabe zat leine kedei ne teleu lu penui ji ramme ’ntak kai be ra hangge ziemmena suage teiwang gai de lei; chigum ze ziemmena ne ’ntakkaibeibe zene pe ji-ji hang chang kam di de lei. 20Ziemmena ne mi perui ji leine, ’nruine zat ji leine, zai hênam ge hekaubena bambe zat ji leine ’ntak kai de lei; kane ziemmena hang â pe kang hang kebuibe ngaudau mak ze bam lei. 21Chidadege Tingwang Hera ne ziemmena je jeihungkeu gai de ra tew gai bei de lei, zai pa jeikeugaidibe luage pe tura kat lupat lu ze pe chie ne chize tewpui gai dai bei de lei; 22zai chi pe tura kat Tingwang Hera ne ziemmena dagene lupatbe zene ’mpuimi hang chiam gai lu ziemmena dage teiwang gai bei de lei.
23Chidadege ziemmena ne,
“Chuna â aize a ra gene lupatbe ra,
zai a chie gene lupatbe chie chang de lei;
pa ze ’mpuimi ze kû ra de lei,
pechu â ziemmena ’mpeumi dagene lupatbe ziegeneu,” ze kacheu de lei.
24Chipauziegene ziemmena â pe pui benai pe peu je sâu ze pe nâu dage ’mpeûgit ze bam de ra chang lei, zai penai pum kat chang di de lei.
25Zai ’mpeumi benai pe nâu penai hangna pumlâng bam gai di de lei, zai mâ de ’ngngam mak ze bam lei.
Currently Selected:
JENESIS 2: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
