JENESIS 34
34
Dinale peireige Ka’ngngambe Tâ Tewgaibe
1Zai Leale ne Jakobbe dagene lungkeugaibe na heleu’mpui Dinale ze chipau heram ge bamme ’mpuimi ramme je ’ngkiâmie ra zuapat te lei; 2zai Hib’mpeu Hamorbe na Shekembe chipau heram gu heguangsinpeu ne pechu ngau lu dege pechu nîm lu pe dage jei gai ze pechu tewhelêu gai bei de lei. 3Zai Jakobbe na Dinale dage pe lung’nchut ti de lei; chi heleu’mpui je pa ngau’nchâ di dege, renuahuai ze pechu ka’mpau de lei. 4Dadege Shekembe ne pe peu Hamorbe je ’mpau ze, “Aipau pui je a nâu hangge lu gai lau,” ze kacheu de lei. 5Pe na heleu’mpui Dinale je Shekembe ne tewhebâ ’ndi de lei be Jakobbe seu di de lei; kane pe na ’mpeumi ramme hênam ’mbe pe gu kaurui reîtat ti rei de lei, chipauziegene penui wang mak tâne Jakobbe â pe kuâneu mak ze bam lei. 6Zai Jakobbe je ’mpau ra Shekembe peu Hamorbe tat ti de lei. 7Chipau rasam seu lu dege Jakobbe name hênam ’mbene wang de lei; chime bau ze penui lunggailak ze penui râta-desang di de lei, Jakobbe na heleu’mpui je kakeleube gene Israel zat ge kemiebe tâ pa tewgai’ndibe ziegeneu, chigumbe â tew gai ra besie mak daseu. 8Kane penui je Hamorbe ne ’mpau ze, “A na Shekembe pe lung gene ning na ’mpuimi je lunei de lei, pechu a na nâu hang kai be lau. 9Anui dage henâuhegai le lau; ningnui na ’mpuimi ramme je anui je pei lau, zai anui na ’mpuimi ramme je ningnui hangge lu le lau. 10Dezai anui dage ningnui lungherua gu de lei; zai heram ze ningnui hangge lat kai bu lei; chige lung ze helîhedet zai chige ningnui heu hang ngau le lau,” ze kacheu de lei. 11Zai Shekembe ne du Dinale peu benai pe sikina ’mpeumi ramme je, “Ningnui mikngau ge a peireige hesuiyibe I ngau ra pei lau, zai ningnui rang leine I tewpui gai bu lei. 12Henâu mî benai kela misongga ze a dage kie lau, dezai ningnui rangbe luigum ze I pei gu lei; sede chi heleu’mpui je a nâu hangge pei lau,” kacheu de lei.
13Penui kiduî’mpui Dinale je tewhebâ’ndibe ziegene Jakobbe name ne Shekembe benai pe peu Hamorbe je ’nnaha ze samkak dai bei de lei. 14Penui ne chime je, “Anui â aigumbe tâ tewchi lak lei, rumgetenmakbe kau dage anui kiduî’mpui je pei gai zai â anui je tewkahelêube chang gu daseu. 15Aipau ’ndeu ge runne anui ningchu hezuâ gai le dui lei: chize â nang du anui gum chang ra zai ningnui ruage ’mpeumi leine rumgeten kam ra lei. 16Chidezai anui na ’mpuimi ramme je ningnui dage pei gai gu, zai ningnui na ’mpuimi ramme je anui nâu hangge lu gu lei, zai ningnui dage anui lungherua gu, zai zat kat chang gu lei. 17Kane ningnui ne anui kuâ ’ngking mak, zai rumgeten makchai â ’mpuimi je anui ne lupat ’ndu, zai anui â tatrimna du lei,” ze acheu bei de lei.
18Penui sam seu lu, Hamorbe na Shekembe benai Hamorbe penai suiyi de lei. 19Zai rehang’mpeu ze chipau tâ tew ra hangge gesutrutbe tew ta di de lei, Jakobbe na heleu’mpui je pa ka’nchâbe ziegeneu. Pa â pe kiduîme ruage hengêu-peilangbe kau de lei. 20Dadege Hamorbe benai pe na Shekembe namdi keriekemui ’mbe pat lu penai gu namdi ge bamme je rang gai ze, 21“Aime â anui nguaka’ngkaime bau lei, peize anui dage lung ze helîhedet ze bam zu lau, ni, penui hangge heram â di-desang la daseu; penui name je anui henâu hang lu kei, zai anui na ’mpuimi ramme je penui hang pei kei lei. 22Anui ruage ngualung ze bam ra zai zat kat chang ra aipau ’mpuî ge runne penui kahezuâ lei; chize â penui rumkageten gum ze anui ruage ’mpeumi leine rumgeten ra lei. 23Penui gu getumdung, penui heurâ zai penui gu kaurui ramme leine anui gu chang gu de mak semei? Penui je hezuâ gai be kei lei, dezai anui ruage penui ngualung ze bam du de lei,” kacheu de lei. 24Zai namdi keriekemui ge zuapatme leine Hamorbe benai pe na Shekembe kuâ pheu gai de lei; zai pe gu namdi keriekemui ge zuapatme ’mpeumi leine rumgeten gai de lei.
25Pakechumbe mai ge, penui jâm teutelai ze bambe ting ge Jakobbe na hangna Simeonbe benai Lebibe Dinale sipeu hangna penai gu hiazutkie tei lu, reine ze wang de lei, zai ’mpeumi leine je tewchat kam ’ndi de lei. 26Hamorbe benai pe na Shekembe je penai ne hiazutkie ne tewchat lu, zai Shekembe ki gene Dinale je lupat lu tat ti de lei. 27Zai gîchat’ndibe kechaipum ramme peireige Jakobbe name wang lu namdi kagechim de lei, penui kinapui je tewkesu’ndibe ziegeneu; 28penui gu kaurui ramme, getumdung ramme, hekunmerângne ramme, zai namdi ge benai heluzam ge bambe leine penui ne tei ’ndi de lei; 29zai penui heu leine, penui name hename leine, zai penui nâu ramme leine je penui ne sut kam lu, zai heki lungge bambe merua leine du sut kam ’ndi de lei. 30Chidadege Jakobbe ne Simeonbe benai Lebibe je, “Kanaanme benai Perizme heram deiname achu ngaugailak ra ningnai ne achu tewgai’ndibe ziegene a peireige ningnai ne kahereube teiwang gai de lei, a gume â cham zai penui wangherua lu achu ’nggi dizai â I benai a kiduîme je â tew’ngga gai gu de lei,” ze kacheu de lei. 31Kane penai ne, “Anai kinapui je pe pum zuateupui hangge pa ne tew gai ra semei?” kacheu de lei.
Currently Selected:
JENESIS 34: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
