JENESIS 40
40
Josepbe ne Kebangki ge bamme Mang Sakakelibe
1Bechâng dege Ijip gu heguang je wain ka’ngguapeu benai pe gu tingku langpeu ne penui pau Ijip gu heguang ’nning makbe tew gai ’ndi de lei. 2Zai Pharaobe ne pe guâ ka’ngguame hangna wain ka’ngguabe ge besuitewpeu benai tingkulangbe ge besuitewpeu peireige pe râta di de lei, 3zai hekêtkaime ruage besuitewpeu ki ge reîka’nduibe bâm, Josepbe je bangbe kebangki ge pa ne penai je kai ’ndi de lei. 4Kebangki kereîbe ge besuitewpeu ne Josepbe ne peize penai je nguabamherua ra kai bei de lei, zai pa ne penai guâ ’nggua ze bam de lei; zai kebangki ge penui beting tiesang ze bam gai de lei. 5Zai tingmuî kat â penai hangna hemang ka’mmi de lei, kebangki ge bambe hangna Ijipram heguangpeu gu wain ka’ngguapeu benai tingkulangpeu penai mang mang ’mmichâm ze, zai hangna mang rimba du châm ze penai mang ka’mmi de lei. 6Josepbe hechua ge wang lu penai je ngau lu dege penai suikahereube ngau di de lei. 7Chidadege Pharaobe guâ ka’ngguame hangna penai pau ki ge nguabang’mpam gai ze bambe kena dage ’nneu ze, “’Ndaitew ze ningnai desungra ze bam lau?” acheu bei de lei. 8Penai ne pechu kak ze, “Anai hemang ka’mmi de lei, zai chize sakelirabe kau mî de ga lei,” kacheu de lei. Zai Josepbe ne penai je, “Sakelirabe ze â Hera gu mak semei? Chiramme achu salia be ra ningnai dage I kie de lei,” acheu bei de lei.
9Chidadege wain ka’ngguabe ge besuitewpeu ne Josepbe je pe mang salia ze, “A mang gene a suage grepchî hiâm laleu de lei, 10zai pehiâm ge grepchî keî kechum bam de lei; pengûmne tumpat gap dege bepâ du papat ti de lei; zai pehût ramme ge grepchî ramme mei di de lei. 11Pharaobe piak ze a ba ge laleu de lei, zai I ne grepchî ramme tei lu, Pharaobe piak ge pedui getui gai de lei, zai hepiak ze Pharaobe ba ge bala gai bei de lei,” ze kacheu de lei. 12Chidadege Josepbe ne pechu, “Chi sakakelibe ze â aize de lei: bekeî kechum ze â hezie kechum de lei; 13hezie kechum lungge Pharaobe ne ning peî teichu gai dai gu zai ning tâbâm luî ge ningchu kai dai gu lei, besua’ngka ge pe gu hezau ka’ngguapeu nang changbe ting ge gum ze Pharaobe ba ge nang ne pe piak ze bala bam gu lei. 14Kane ning hangge keyibe ngau dai dezai, achu ’ngngaî se lau, zai Pharaobe je a rasam salia ra zai aipau ki gene achu lupat kai ra a hangge mâ-keyibe tew gai ra ningchu I kiam lei. 15Hebraime ram gene achu â hegatat ti sing daseu; zai aige du kebangki ge achu penui kairabe hangge mâ de I tewmaube ga lei,” ze kacheu de lei.
16Sakakelibe ze ’nzei de lei be tingkulangbe ge besuitewpeu chî lu dege Josepbe je pa ne, “I du hemang ka’mmi de lei: chige tingku kuak kaibe ’ntui kechum a peî ge sing gai ze bam de lei, 17zai ’nreilangbe ’ntui ge Pharaobe hangge langlube tingku zat leine bam de lei, kane a peî ge ’ntui bambe gene ’nruine ramme ne chize teu kam ’ndi de lei,” ze kacheu de lei. 18Zai Josepbe ne kak ze, “Chize sakakelibe â aize de lei: ’ntui kechum ze hezie kechum de lei; 19hezie kechumne lungge Pharaobe ne ning peî ning dagene teichu gai gu, zai hingbang ge ningchu keî’nchie gai gu, zai ning pumji ze ’nruine ramme ne teu gu lei,” ze acheu bei de lei.
20Pakechumbe mai, Pharaobe je lungbe mai ge, pe guâ ka’ngguame leine hangge luube-teseu pa ne teleu gai de lei, zai pe guâ ka’ngguame ruage pechu hezau ka’ngguabe ge, besuitewpeu benai tingku langbe ge besuitewpeu peî ze pa ne teigetuachu gai de lei. 21Pa ne wain ka’ngguabe ge besuitewpeu je pe tâbâm luî ge kai dai bei, zai pa ne hepiak ze Pharaobe ba ge kai de lei; 22kane Josepbe ne penai je saliabe luigum ze, pa ne tingkulangbe ge besuitewpeu je â kakchat ’ndi de lei. 23Acheusede tingkulangbe ge besuitewpeu â Josepbe ji chî mak te lei, kane pechu ’ngngaî ’ndi de lei.
Currently Selected:
JENESIS 40: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
