JOHAN 5

Heduisungbe Bâm (Hezai) gene Tewka’mmibe

1Aipau chângge Judame gu kahengîbe kat bam ze, Isua Jerusalem ’mbe hang di lei.

2Zai Jerusalem lungge Meli Keriekemui taige heduisungbe kat Hebrai lad ge Beth-zatha, kacheube bam lei. Chige hezai hang heki liâmpatkaibe mengeu bam lei. 3Chige keteukeneume, mikchitme, pîsiame, pum pikatlam chaime misongga ze jeikuâ ze bam bam lei, hedui ’ngngairabe hang kuâ zeu; 4tingge dege â chi heduisungbe ge Tingwang gu angel’mpeu ne wangkeu ze hedui tew’ngngai’nrui gai bei bei lei; hedui tew’ngngaigaibeibe chângge gutrailu-lume â penui dage geteukeneube zat ramme bambe yi di di lei. 5Chige hangkat kum himreu ze desat riâ ’nrâdibe kau bam lei. 6Isua ne pechu ngau lu, zai chige pa jeitie-desangdibe chî lu dege pechu, “Ningchu tew’mmi gai be ra nang lunei mei?” ze kacheu de lei. 7Chi ka’nrâpeu ne pechu kak ze, “A pau gau, hedui tew’ngngaigaibe chângge hezai ge achu kairabe kau mî de ga lei, I gut ra heka gai dege kêdapeu ne a sua tatraî di di lei,” ze kacheu de lei. 8Isua ne pechu, “Zuachu lu ning paîzui pua lu ze tatchu lau,” acheu bei de lei. 9Dadege luakatne chipaupeu je tew’mmi gai bei de lei, zai pe paîzui puachu lu tat ti de lei.

Chipau mai ze ’ntakbambe mai lei. 10Chidadege tew’mmigaipeu je Judame ne, “Nemai â ’ntakbambe mai lei, ning paîzui pua ra besie mak lei,” acheu bei de lei. 11Kane pa ne penui je kak ze, “Achu tew’mmigaipeu ne achu, ‘Ning paîzui puachu lu tatchu lau,’ ze rang gai de lei,” ze kacheu de lei. 12Penui ne ’nneu ze, “ ‘Ning paîzui pua lu tatchu lau,’ kacheupeu ze châu lau?” kacheu de lei. 13Chunage chi tew’mmigaibeipeu â chize châu mei be chî mak lei, chipau bâm ge ziemmena kie di dadege Isua â reine ze tat ti de lei. 14Bechâng dege Isua ne pechu kellumki ge ngaudau lu pechu, “Ni, nang yi di de zeî lau! Hemui tâ tew dai ta lau, ning peireige mâ-kesiabe wang me ra hangge zeu,” acheu bei de lei. 15Chipaupeu tat ti de lei, zai pechu tew’mmigaipeu â Isua de lei ze Judame dage pauliâ gai de lei. 16Aipau ziegene Judame ne Isua je tewsâ de lei, airamme ’ntakbambe mai gene pa tewbe ziegeneu. 17Kane Isua ne penui je kak ze, “A peu â tâtew lamui rei lei, I du tew bam lei,” acheu bei de lei. 18Aipauziegene Judame ne pechu tewchat ra peuranbi-bi bam di de lei, ’ntakbambe mai reimakbe runne mak ze, Hera je pe Peu lei ze kû ze, zai pe runne pechu Hera benai ka’nsambe hang tewgaibeibe ziegeneu.

Pe Na ne Rezieteibe

19Isua ne penui je, “Pelingsing, pelingsing ze ningnui je I rang lei, pe Na pe runne suî’nning ne mâ de tewchi lak lei, Bepeu tâtewbe pa ne ngaube runne tew zangnêu; Bepeu ne tewgaibe leine ze pe Na ze du tew daseu. 20Bepeu ne pe Na je hung dadege pa tewgaibe leine pe Na je teilia kam gai bei de lei; zai ningnui ’nningdaulak ze bam ra hangge ai suadu tâ-kedibe ramme pa ne pechu teilia gu rei lei. 21Bepeu ne chaidime je kuakchu gai ze, penui je keringbe pei gum ze, pe Na ne pa ne nei-neime je keringbe pei lei. 22Bepeu â mî je du samram mak lei, kane samrambe leine pe Na dage pei gai ’nde lei, 23chidezai ’nteumena ne pe Na je hengêutew ra hangge zeu, Bepeu je penui hengêutew gum zeu. Pe Na je hengêutewmakbe kau â Bepeu pechu langgaipeu je hengêutew mak lei. 24Pelingsing, pelingsing ze ningnui je I rang lei, a sam seu ze achu langgaipeu je ’nnumka’mmibe kau â pe dage keringbe betunmakbe bam lei; pa â samrambe ge wang me lei, kane kechaibe gene keringbe ge zuapat ti de lei.

25“Pelingsing, pelingsing ze ningnui je I rang lei, panehî wangchangzi gu de lei, zai chuna ze de lei, chi chaidime zene Hera Na kuâ seurabe benai keseume leine ne ringrabe ting zeu. 26Bepeu ne pa sing ge keringbe bam gum ze, pa ne pe Na je du pa sing ge keringbe bam ra pei bei de lei, 27zai pechu samram ra rezie pei gai bei de lei, pa â ziemmena Na chang dadegeu. 28Aige ’nningdaulak ze bam se lau; heraw ge bamdime leine ne pe kuâ seu ra 29zai tâ keyibe tewme leine ne keringbe chukadaibe ge zuapat zai tâ kesiabe tewme leine ne samrambe chukadaibe ge zuapat ra panehî wangchangzi gu de lei.

Isua je Sakkitewbe

30“A runne I a gu rezie ne mâ de tewchi lak lei; I keseube luî I samram lei; zai a gu samrambe â kapelingbe lei, a suî’nning tew ra I peu mak, kane achu langgaipeu suî’nning tew ra I peube ziegeneu. 31I a runne achu sakkitew dizai â, I sakkitewbe ze kapelingbe mak lei; 32achu sakkitewpeu kêdabe la lei, zai pa ne achu sakkitewgaibe ze kapelingbe lei be I chî lei. 33Johanbe dage ningnui lang gai de lei, zai pa ne samsang ze sakkitew gai bei de lei. 34Chi sakkitewbe I ngaube ze ziemmename dagene ngaube mak lei; kane ningnui ringpat le ra hangge aize I rang lei. 35Pa (Johanbe) â hemibung getaube lerba ze bambe kau lei, zai ting kat hangge ningnui â pe gu pa’mbi gene ningnui suiyi’nta ze bam gai nei de lei. 36Kane achu sakkitewgaibe I ngaube â, Johanbe gu sakkitewbe sua â di lei; tâ ramme I tew’nsang gai ra Bepeu ne achu peibe ai I tew bambe tâ ramme zene Bepeu ne achu lang gai lei be sakkitew gai de lei. 37Zai Bepeu langgaipeu sing ne achu sakkitew gai lei. Pe kuâ ningnui mâdauge du seu mak, zai pe luî du ningnui mâdauge du ngau mak lei; 38zai pe sam du ningnui ge bam mak lei, pa ne langgaipeu je ningnui ’nnum’mmimakbe ziegeneu. 39Rawdiakkaibe ka’nchibe sam ramme je ningnui peu lei, chigezene keringbe betunmakbe ningnui ngau ra ’nnumgaibe ziegeneu; zai chi rawdiakkaibe ka’nchibe sam ramme zene achu sakkitew de lei; 40Acheuleusedu keringbe ningnui ngau ra hang a dage ningnui wang nei mak lei. 41Ziemmename dagene pengêudibe I ’nchâ me lei. 42Kane Hera kehungbe ningnui lung ge ga lei be I chî lei. 43A peu ji gene I wangkeu de lei, zai ningnui ne achu ’nchâ mak lei; kêdapeu ne pe runne pe ji gene wangkeu bei laîzaine â pechu ningnui ’nchâ gu lei. 44Ningnui kat-kat dagene pengêudibe ’nchâ ze, zai Hera katgap bambepeu dagene wangbe chi pengêudibe je peu mak ze ’ndaigum ningnui ’nnum’mmichi le ra lau? 45I ne Bepeu dage ningnui je kesia’ndamgairabe hang ningnui ’nnum gai se lau; chi Mosabe ningnui ka’nnumbe kaipeu zene ningnui je â kesia’ndam gai de lei. 46Mosabe je ningnui ’nnum’mmi dizai â, achu du ningnui ’nnum’mmi gu lei, a rasam pa ne raw gai daseu. 47Kane pa rawbe sam ramme ningnui ne ’nnum’mmi makchai â, ’ndaigum ze a sam ramme ningnui ’nnum’mmi ra lau?” kacheu de lei.

Currently Selected:

JOHAN 5: ZEMEBSI

Highlight

Copy