LUKA 7
7
Romram Saîbe gu Tâka’ngguapeu je Tewka’mmibe
(Mat 8.5-13)
1Baudime pe kuâ ka’ngkingbe gene pe sam satud kai lu dege, Kaperna-um ge gut ti de lei. 2Zai hangkat sipai haîmuiteipeu pe gu kebang, pa kehungpeu ’nrâ ze chai ra gum bam lei. 3Zai Isua rasam pa seu lu dege, wang ze pe gu kebang je tew’mmi gai ra pechu kû ra Judame ruage gechîngme je pe dage pa lang gai de lei. 4Dadege penui Isua tailam wangchang dege, pechu penui kiâm ze, “Aize nang ne pe hangge tew gai ra yi sing lei, 5anui zat je pa ne hung, zai anui gu ka’nduibeki du pa ne tew gai de lei,” ze penui kacheu de lei. 6Dadege Isua penui je nguatat ti de lei. Zai pa pe ki changzi gu dadege, sipai-haîmuiteipeu ne pe dage pe kangme je lang gai ze pechu, “A Wang gau, ning runne ningchu tewhereu se lau, a ki lungge nang ne gut ra hangge kebuibe ga de lei; 7chipauziegene ning dage I wang ra ’nning-suadu mak lei. Kane sam runne rang gai bei ze peize a guâ ka’ngguapeu je yi de lau. 8Zai I du rezieteibe kau hangkat lei, zai a kangge sipaime I ne hangkat je ‘Tat lau,’ bei dege pa tat, zai kêdapeu je I ne, ‘Wang lau,’ bei dege pa wang lei; zai a gu kebang je ‘Ai tew lau,’ bei dege pa tew ze bam lei,” ze pa kacheu de lei. 9Aipau sam ze Isua ne seu lu, pechu ’nningdaulak ti de lei, dadege ’nreiwang lu baudime pe chaisuime je, “Ningnui je I rang lei, aigumbe keneibe tak ze Israel ge ’nsangdu I ne ngaudau merei de lei,” kacheu de lei. 10Dadege pa langgaime kilûng ’mbe wang dai dege, chi kebang yi di laleube penui ngau de lei.
Kemîpui Na je Isua ne Kuakchugaibe
11Zai mâtiegemakse kelua ze keloa kat Nain kacheube ge pa tat ti de lei, zai pe gu kenieme benai baudime misongga pechu nguatat ti de lei. 12Namdi keriekemui changzi ra dege, pie le lau, hangkat chaidipeu je hela ’mbe puapat dau de lei, kemîpui na ’mpeumi hangkat runne bambe zeu; zai namdi ge misongga bamme pe dage bam lei. 13Zai Heguang ne pechu ngau lu dege, pechu pa ngau’nggia-desang di ze pechu, “Hap se lau,” kacheu de lei. 14Dadege pa wang lu, kechingkuak ze pa deîtau gai de lei, dadege chi kechingkuak puame sapmang gai de lei. Zai pa ne, “Rehang’mpeu gau, chu de lau, I ne ningchu rang lei,” ze kacheu de lei. 15Zai chaidipeu ze chu’ntau lu, sam sachu di de lei. Dadege Isua ne pe pui dage pechu pei gai bei de lei. 16’Nteumena ngauhing kam di de lei; zai Hera je penui toa ze “Anui ruage kemeu kedibe zuachu la de lei!” zai “Hera ne pe gu ziemmename je ’ngkiâmie bei de lei!” ze penui kacheu de lei. 17Zai aipau rasam ze Judia leine ge, zai pehuâzie ge bamme leine dage chîpakpat ti de lei.
Johanbe Baptistewpeu dagene Hepâupaume
(Mat 11.2-19)
18Zai Johanbe gu kenieme ne aipau rasam leine Johanbe je salia bei de lei. 19Dadege Johanbe pe gu kenieme hangna je kû lu, Heguang tailam acheu ze ’nneu ra lang gai de lei, “Wangkeurapeu ze nang de mei, nune kêdapeu je anui heguîkua ra lau?” acheu zeu. 20Zai penai pe dage wang dege penai ne, “Johanbe Baptistewpeu ne anai je ning dage lang gai de lei, ‘Wangkeurapeu ze nang de mei, nune kêdapeu je anui heguîkua ra lau?’ ze acheu zeu,” ze kacheu de lei. 21Zai chipau luage Isua ne penui keteu-keneube zat ramme bamme, zai herarît kesiabe ramme bamme, zai herui kesiabe ramme bamme je misongga tew’mmi gai bei de lei, zai pemikchitme je du ngau ra pa ne pei bei de lei. 22Dadege Isua ne penai je, “Tat ze Johanbe dage ningnai kengaube benai keseube ze ranglia be lau: mikchitme mâ-ngau la da, zai pîsiame tat la da, ka’mpame je tew’nchi gai ’nda, kunpangme seu la da, kechaime je kuakchu gai ’nda, zai kelaksiame dage samyibe pau gai ’nde lei. 23Zai mi-mige de achu ’nning’nsiamakme yi de lei, acheu zeu,” ze acheu bei de lei.
24Zai Johanbe gu kenieme tat dai di dege, Isua ne baudime je Johanbe rasam salia ze: “Ningnui ’ndaikau pie ra hênamkang ’mbe pat lau? Hekubang tingkai ne guika’ngngaibe mei? 25Acheuzaine ’ndaikau pie ra ningnui pat lau? Ziemmena hangkat paî ka’nnuaibe bâbe pie ra mei? Pie le lau, paî pengêudibe bâme benai lungkatemime â Heguangme ki ramme ge la de lei. 26Acheuzaine ’ndaikau ningnui pie ra pat lau? Kemeu’mpeu je mei? Eu lei, I ningnui je rang lei, kemeu’mpeu suadu pengêudibe kau (Johanbe) la lei. 27Chi pe rasam rawdiakkaibe ze â aipaupeu de lei,
‘Pie le lau, a gu hepâupaupeu je ning sua ’mbe I ne lang gai lei,
ning suage ning gu ’mpuî teleukuarapeu zeu,’ kacheube zeu.
28Ningnui je I rang lei, ’mpuimi ramme dagene lungkeume ruage Johanbe sua â dibe mî de ga lei; acheuleusedu Hera gu heguangram lungge cheilangbe kau â, pa sua â di lei,” kacheu de lei. 29(Penui ai ramme seu lu dege baudime benai ’mpuâhame ’nteumena ne Johanbe gu baptisma gene baptistew ze Hera gu je ’nning’nzei gai kam di de lei; 30kane Pharisaime benai hingde geteiliame â penui hangge Hera gu maningtak bambe ze tuâpat kai nan ze Johanbe ne baptistew gai mak tai de lei.)
31“Acheuzai ’ndaikau je aipau rehei gu ziemmename je I ne tei’nda gai ra lau, zai penui ze ’ndaigumbe kau mei be zeu? 32Penui a napoine ramme hechaikining ge ’ntau lu kat-kat je kû ze,
‘Ningnui je anui metiam ’mmut kai bei ze ningnui lim mak tai lei;
kadesuibe leu anui tewlia bei ze ningnui hap mak tai lei,’ ze kacheume gum de lei.
33Johanbe Baptistewpeu tingku de teu mak zai wain de sak mak ze wangkeu de lei; zai ningnui ne, ‘Pa â herasiabe ngua la lei,’ ze kacheu de lei. 34Ziemmena Na ne teu de teu, sak de sak ze wangkeu de lei; zai ningnui ne, ‘Pie le lau, pateusuaradibe kau, zai meneuchibe kau, ’mpuâhame benai hemuipungme kangpeu!’ ze kacheu de lei. 35Acheusede kaningchingbe ze â pe name ’nteumena ne ’nning’nzei gai bei de lei,” ze kacheu de lei.
Pharisai’mpeu Simonbe ki ge Isua bambe
36Pharisaime ruage hangkat pe dage mâ-nguateu ra pechu kû de lei, dadege Pharisai’mpeu ki ge pa gut lu, mâ-teube bâm ge pa ’ntau gai de lei. 37Zai, pie le lau, namdi ge hemui kau ’mpuimi hangkat Pharisai’mpeu ki ge Isua mâ-teu ze ’ntau la lei be pa chî lu dege, taudui perîmyibe kaibe alabastarbung tei lu wang de lei, 38zai pe chai ’mbe pe pî taige sap lu, hap ze pe mikdui ne pe pîdei tewchim lu, pe peîtam ne nui ze pe pî kakeput te lei, zai taudui perîmyibe ’nnuk kai de lei. 39Dadege pechu kûgaipeu Pharisai’mpeu chize ngau lu dege pe lung ge acheu ’nning ze, “Aize kemeu’mpeu dizai â, pechu deîbepui ze châu mei be, zai ’ndaigumbe kau mei be pa chî ra yi lei, aipau pui ze â hemui kau daseu,” ze pa kacheu de lei. 40Dadege Isua ne kak ze pechu, “Simonbai ning dage I mâ-rang gai ra la lei,” ze kacheu de lei. Dadege pa ne kak ze, “Chize ’ndaikau lau, Geteiliabepeu gau,” ze kacheu de lei. 41Dadege Isua ne, “Mige rangkâng hepukkaipeu pe gu hepâupungme hangna bam lei; hangkat ne denari haî mengeu hepâupung, zai hangkat ne rengeu hepâupung lei. 42Penai peiruî ra changlak bei dege, penai hangna je pa ne lun gai bei de lei. Chunage penai ruage, châu ne pechu hung’nteu ra lau?” acheu bei de lei. 43Simonbe ne kak ze, “I ne ka’nnumbe â lun-’ngkiegaibeipeu ze lei,” ze acheu bei de lei. Dadege pa ne pechu, “Nang rangbe tâu de lei,” ze kacheu de lei. 44Zai ’mpuimi lam ’nreipie lu Simonbe je, “Ai ’mpuimi je nang ngau mei? I ning ki ge gut bei ze, a pî hui ra nang hedui pei mak, kane pa â pe mikdui ne a pî tewchim ze pe peîtam ne nui lei. 45Nang â achu keput kai mak, kane aipaupui â I gutbe gene seu ze pa a pî keput sau mak larei lei. 46Nang a peî ge taudui ’nnuk mak, kane pa â taudui perîmyibe ne a pî ka’nnuk lei. 47Chidaze I ningchu rang lei, pe gu hemui misongga bambe ze lun gai bei de lei, pa ne misongga hung bei dadegeu; kane kecheîne runne lun-gaibeipeu â kecheîne runne hung lei,” acheu bei de lei. 48Dadege pa ne ’mpuimi je, “Ning gu hemui ramme lun gai bei de lei,” acheu bei de lei. 49Dadege pechu mâ-nguateume penui karai acheu sa ze, “Hemui ramme ’nsangdu, lunpeu aize châu se lau?” ze kacheu de lei. 50Dadege pa ne ’mpuimi je, “Nang keneibe ne ningchu tew’nring gai bei de lei, temichai ze tatchu lau,” acheu bei de lei.
Currently Selected:
LUKA 7: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
