MARKA 9
9
1Zai pa ne penui je, “Pelingsing ze ningnui je I rang lei, aige sapme ruage hanggesame â, Hera gu heguangram tâtewchibe ne wangbe ze penui ngau mak tâne â, kechaibe ’ndâumerame la lei,” kacheu de lei.
Pe Luî Tewkakelibe
(Mat 17.1-13; Luk 9.28-36)
2Zai hezie seruk ne châng dege, Peterbe, Jakobbe, zai Johanbe je Isua ne ngua lu, peloa kehu ’mbe penui runne tatchâmtat ti de lei; dadege penui suagene pe luî tewkeli gai bei de lei, 3zai pe paîni ramme ’ngngûpchup zai pring-ring tai de lei, zai kedeirei ge paî kagetame ne chigum geta’ngngûppatchi lak lei. 4Zai chige penui je Mosabe dage Elijabe bambe lia de lei, Isua je penai ’mpau bam lei. 5Dadege Peterbe ne Isua je, “Geteiliapeu gau, anui aige bam ra yi lei; hetiamki kechum, ning hang kat, Mosabe hang kat, Elijabe hang kat, anui ne liâm gai be che lei,” acheu bei de lei. 6Penui ne hing’nteuzû’ndibe ziegene pa ’ndaikau sa ra mei be pa chî ta di de lei. 7Dadege kemâu ne penui je sungnam ’ndi de lei, zai kemâu gene sam pat ze, “Aize A Na I hunglangpeu lei, pe kuâ ’ngking lau,” kacheu de lei. 8Zai kelua ze penui heguarua gai ze, mî je de penui ruage ngau ta di lei; kane Isua runne penui dage laleu de lei.
9Zai chi peloa kehu ’mbene penui wangkeube luage ziemmena Na, kechaime ruagene chu dai mak tâne penui ngaulube ze, mî suage de salia mak ra pa ne rang sing gai bei de lei. 10Chigum pa rangbe sam ze penui dage runne tei ze, kechaime ruagene chukadaibe ze ’ndaikau rimba mei be penui karai runne hekî ze bam lei. 11Dadege penui ne pechu mâ-’nneu ze, “’Ndaitew ze leisirawme ne Elijabe ne wangkeurai sing gu lei ze kacheu lau?” ze kacheu de lei. 12Dadege pa ne penui je, “Elijabe ze mâgetaleine teleu’mmi dai ra wangkeurai lei; zai ziemmena Na deu ge ’ndaigum ze raw gai ’ndi lau, pa â mâ-mâ ramme misongga ze hereulie ra chang gu, zai ngau’nna ra tew gai gu lei be zeu? 13Kane Elijabe â wangchang ze la de lei be I ningnui je rang lei, zai pe rasam hangge acheu rawgai’ndibe luigum ze pe peireige penui tewnei-neibe tew gai de lei,” kacheu de lei.
Isua ne Napoine Heruisiabe bambe Tewka’mmibe
(Mat 17.14-21; Luk 9.37-43)
14Zai penui kenieme tailam wang dege, baudime misongga penui je guâgit bambe, zai leisirawme ne penui je sam tu ze bambe penui ngau de lei. 15Zai baudime ’nteumena pechu ngaugap lu dege, ’nningdaulak-desang di de lei; zai pe tailam pakzuahang ze pechu ka’mpau de lei. 16Zai pa ne penui je, “Penui dage ningnui ’ndaikau kahekî lau?” ze ka’nneu lei. 17Zai baudime ruagene hangkat ne pechu kak ze, “Geteiliapeu gau, ning dage a na ’mpeumi napoine je I nguawang de lei, pe dage sam sapatlakbe herui bambe ziegeneu; 18zai chi herui ne pechu nîm-nîmbe bâm ge pechu chuikau gai gai lei; zai pe mui gene pe tâm luapat ze pe geukegit zai pe pum ’ngkuwang-wang lei; zai I ne ning kenieme je chize kelitua gai ra rang gai da, kane penui â tewchi lak lei,” ze kacheu de lei. 19Dadege pa ne penui je kak ze, “Hei neimakme rehei nung gau, ’ndaitiege ningnui dage I bam be ra lau? Zai ’ndaitiege ningnui je I liebe ra lau? Pechu a tailam nguawang lau,” ze acheu bei de lei. 20Zai napoine je pe dage penui ne nguawang bei de lei; zai chi herui ne pechu ngau lu dege, luakatne napoine ze tew’nteukala gai bei ze, kedei kangge pa kâukeu lu, ’ngkuatat ti ze, pe mui ge pe tâm pehûp-rum ze bam de lei. 21Dadege Isua ne pe peu je ’nneu ze, “Pa aigum bambe ’ndaitie di lau?” ze kacheu de lei, zai pa ne, “Hena ’ngka gene di de lei. 22Zai pechu tew’nsia ra hemi ge zai hedui ge du chui gai ka’nsui de lei; kane nang ne tew’mmichi duî zai â anai je ’nggia gai lau, zai anai je ’ngngâ gai lau,” kacheu de lei. 23Dadege Isua ne pechu, “Nang ne dauduî zai! ’Nnumka’mmibe kau hang â mâ-leine pe hangge changdui kam lei.” Acheu bei de lei. 24Luakat ne napoine peu ’nrungpat ze, “I ’nnum’mmi lei, I ’nnum’mmimakbe ze ’ngngâ lau!” kacheu de lei. 25Zai baudime pak’nduiwangbe Isua ngau lu dege, chi herui kahebâbe je pa ne ’ngngiam ze, “Nang sam sapatlakbe benai gepangbe herui pe dagene nang zuapat te ra ningchu I die gai lei, zai mâtew-tewsede pelung ge nang gut dai se lau,” acheu bei de lei.
26Zai ’nrungpat kai ze pechu tew’nteukalagailube châng dege chi herui zuapat ti de lei, zai napoine â kechaipum gum bam di de lei; chidadege â penui misonggame ne, “Pa â chai di kau de lei,” kacheu de lei. 27Kane Isua ne pe ba tei lu kuakchu gai bei ze pa zuachu di de lei. 28Zai pa kilûng ge gut dege, pe gu kenieme ne reine ze pechu mâ-’nneu ze, “’Ndaitew bei ze anui chize kelituachi lak tai lau?” ze kacheu de lei. 29Zai pa ne penui je, “Aipau zat â teseurei ze kakellumbe ne makchai â, mâkedabe ’mpuî gene kelituachi lak lei,” kacheu de lei.
Isua ne Pa Chairabe rasam Sakadaibe
(Mat 17.22,23; Luk 9.43-45)
30Zai chigene Galili penui tatpela ze tat ti de lei. Zai mige de chî ra pa lunei mak lei; 31“Ziemmena Na je â ziemmename ba ge pei gai gu, zai penui ne pechu tewchat kû, zai pechu tewchat lu hezie kechumne châng dezai pa chu dai gu lei,” acheu ze pe gu kenieme je pa ne geteilia dadegeu. 32Kane pa rangbe sam ze penui ’nningchi lak, zai pechu ’nneu ra du penui ’nneuhing di de lei.
Châu ne Dilang ra lau?
(Mat 18.1-5; Luk 9.46-48)
33Zai Kaperna-um ge penui wang gai de lei; zai kilûng ge pa bambe luage penui je, “’Mpuiki ge ningnui ’ndaikau sam kahekî lau?” ze ka’nneu lei. 34Kane penui ne penui kuâneu mak bam lei; châu ne dilang mei ze ’mpuîki ge penui karai kahekîbe ziegeneu. 35Dadege pa ’ntaukeu gai lu penui je kûwang gai de lei; zai pa ne penui je, “Mige raîlangbe changneibe kau â, haimena ruage pa ne nâlangbe chang zai haimena guâ ka’ngguapeu chang ra lei,” kacheu de lei. 36Zai napoine hangkat je pa ne ngua lu penui zuilung ge kai de lei; dadege pe ba ne napoine je pua lu penui je, 37“Mi-mige de aigumbe kau napoine je a ji gene ka’nchâbe kau â, achu ka’nchâ de lei; zai mi-mige de achu ka’nchâbe kau â achu ka’nchâ mak ze, kane achu langgaipeu je ka’nchâ de lei,” kacheu de lei.
Anui je ’Nggimakbe kau â, Anui lam kau lei
(Luk 9.49,50)
38Johanbe ne pechu, “Geteiliapeu gau, hangkat ning ji gene herasiabe ramme je kelituabe anui ngau lei, zai pa anui chai suimakbe ziegene pechu anui ne nam ’ndi de lei,” kacheu de lei. 39Kane Isua ne, “Pechu nam se lau; a ji gene tâ kedibe tewbe kau â achu tiakkai’nnuarabe mi de chang mak daseu. 40Anui je ’nggimakbe kau â, anui lam kau de lei. 41Pelingsing ze ningnui je I rang lei, Krista ji ningnui pungbe ziegene hedui piak sak ra ningnui je peime je â, mâtew-tewsede pe hangge getoabehi ga ra mak lei.
Hemuitew ra Keduaibe ramme
(Mat 18.6-9; Luk 17.1,2)
42“Achu ’nnumka’mmime aime napoine ruage hangkat je hemui ge gut kai ra tewgaibe kau je â, pe guang ge mâ-niakbe chukâng kedibe ret kai lu, sungkling ge pechu tuâgai’ndibe pe hang yi gu lei. 43Zai ning ba ne ningchu hemui ge chui gai dizai â chize dângtua ne lau; ba na pung lu ze gehenna hemi ’mmitdaimakbe ge tat ra sua â, ning ba tud ze keringbe ge gutbe ning hang yi gu lei. 44(Chige tingsî bambe ze bamsau dai ra mak, zai hemi du ’mmit dai ra mak lei.) 45Zai ning pî ne ningchu hemui ge chui gai zai â dângtua ne lau; pî na pung lu ze gehenna ge tuâ gai ra sua â, ning pî sia ze keringbe ge gutbe ning hang yi gu lei. 46Chige tingsî bambe ze bamsau dai ra mak, zai hemi du ’mmit dai ra mak lei. 47Zai ning mik ne ningchu hemui ge chui gai dizai â lattua ne lau, mik na bam lu gehenna ge tuâ gai ra sua â, mik kat bam ze Hera gu heguangram ge gutbe ning hang yi gu lei. 48(Chige tingsî bambe ze bamsau dai ra mak, zai hemi du ’mmit dai ra mak lei.) 49Ziemmena leine je hemi ne tew’nchaî gai gu lei. 50’Nchaî â yi lei; kane ’nchaî ne tâm dizai â, ’ndaigum ze ningnui ne ’nning gai sua dai ra lau? Ningnui ge peize ’nchaî bam lau, zai kat-kat je desieyichi ze bam lau,” kacheu de lei.
Currently Selected:
MARKA 9: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
