AGER KVDVNG 19
19
Poulbv Ipesu:do
1Apollo:bv Korintodo du:dodcm, Poulbv dagdung mo:tak-dok gvko:la gvto odokkc Ipesu:do:pc gvto. Odo bv agom tadjvgla gvmvnnc tani:ckkc pa:to. 2Odokkc bv bulum luto, “Nolu mcjvgdodcm Angunnc yalodcm pa:tungayc?” Odo bulu luto, “Ma:, ngolu cdvlosin Angunnc yaloko dung cmna tadkvsincimang.” 3Odokkc bv luto, “Cmpcmvlo oko lcgangc nolu baptismongcm la:ton?” Bulu lubito, “Jo:nkc baptismo:dcmna.”
4Odokkc Poulbv luto, “Jo:nbv asin mc:dvrra mc:latsukunamdok baptismongcm bito, bvk lcdupc gvncdcm mc:jvgdopc tani:kvdv:dcm lubila, cdcyam, Jisubv.”
5Cdcm tadge:la, bulu Ru:tum Jisukc aminno baptismongcm la:to. 6Odokkc cdvlo Poulbv bulum alagcm pigabla kumtonc, Angunnc Yalodc bulukkolo:pc pvngangkang; odokkc angu angu agomki agomcm luto odokkc lungor agomcm luto. 7Odo bulu vyvngkolang anyikopc appv:dc idagai.
8Odokkc bv kumko okumdo gva:to odokkc po:lo puwumkopc a:ng pvtala luto, agom svkka:mvnsula odokkc Ru:ncpvnckc Migomdoko mo:pvdok lcgangc lubila; 9ckvdaggom cdvlo akke asin torla odokkc mc:jvgtoma:nc, Lambcdok agomcm aimang cmna mondoli:dok tani:kvdv:dok tadkolo lutoji, bv bulukkolokkc gvpakkang, bvk lcdulo agom tadjvgla gvmvnnc kvdv:dcm gvbola, odokkc Tiranu:dok gvkumsuko okumdo longgcm agomcm svkka:mvnsuto. 10Cdc dv:tak anyikopc itvkang, odoyam Asia:dok du:nc-dagnc appv:dc Ru:tumkc agomdcm, Jiwuclang Girik anyipagc tadbegto.
Iskeba:kc Awokvdv:dc
11Odokkc Ru:ncpvncbv anggoscscmpc mcngapla:ma:nam agercm Poulkc alagkki gerto, 12cdcmpc ika:nc jc bvk amvrdok migmo tidsunanc gain cdcmanggom dumcrcm kinc tani:kvdv:do:pc bomycmvlogom, odokkc kinamkvdv:dc bulukkolokkc aidungakui odokkc aima:nc uikvdv:dc bulukkolokkc gvpakdungai. 13Odo alcki gvgo:la ainc agom luyirra gvgo:nc Jiwuckkcnc Ru:tum Jisukc amindcm lugo:pc irobbomkang sckkc sckkclo aima:nc yalokvdv:dc dungaji, scmpc lula:lula “Ngo nolum ludung Jisukokki sc:kom Poulbv lutadbidu:ji.” 14Jiwukolok awo kvnvdkonc Skeba: cmnamkonc cdcm idungai.
15Cmpige:la aima:nc yalodc bulum lutadsuto, “Jisumc ngo kingdag, odokkc Poulmc ngo kindag, cmpige:la no sc:kon?”
16Odokkc oko tani:do cdc aima:nc yalodc dungaji buluk tayc:do berangkang odokkc, appv:dcm motabamto, odokkc bulum mopvamto, odoyam bulu odo okumdokkc pvtsula odokkc mojogmorogamla duglenamkang. 17Odokkc Ipesu:dok dungko appv:do cdcm kinabto, Jiwukvdv:dc:lang Girikkvdv:dc; odokkc buluk appv:dokkc pcsso angkang; odokkc Ru:tum Jisukc amindcm airu:pc aidag cmna lugo:to. 18Odokkc odolo:pc mc:jvgnc kvdv:dok bojcrungc gva:to, buluk itv gvtvla du:namkvdv:dcm lude:sula odokkc lude:amsula. 19Odokkc mejik lcngkannc bojcrungc sc:kobulu idagaji buluk potinkvdv:dcm lckopc gingkumsuto odokkc cdc appv:dcm buluk appvngkc kangkolo rompakto; odokkc bulu odokbuluk arckvdv:dcm kvla cdcbulu murkong lv:ying yi:ngokopc ikang. 20Cdcmpila Ru:tumkc agomdc bojcbomkang odokkc kvnggv:pc gvbarbomkang.
Ipesu:do Rcngamc Momvnsunam
21Cdcmpc odok inamkvdv:dok lcdudokkc Poulbv Yalodokki Makedonia:pc asinc mcnguto odokkc Akaia:pc odokkc Jerusalempc gvdopc, scmpc lula, “Ngo olopc gvge:la ngo Romclcmsin ka:pcru:nammc.” 22Odokkc Makedonia:pc bvk idum-gvdumsunc anyiko, Timoti:mc:lang Irastu:mc, mclvgge:la bv avdc Asia:do asudo:ko du:to.
23Odo ayirdo Lambcdok lcgangc adjio:kosin lumvnsunam kamangai. 24Kapila:nc Dimetriu cmnam tani:konc, murkong attar moncko, sc:kobv Artemi:kc murkong dungkodcm murti:dcm motoji, cmmum agercm attar monckvdv:dcm bitomang; bv bojcrungko attarmonckvdv:dcm agercm bito; 25cdcmbulum bv lckko:pc ager gernc tani:kvdv:dokki langkumsuto, odokkc luto, “Tani:kvdvnga, nolu kindag jc sc konam-rcnamsokki ngolu mitc-mircmcm pa:dag. 26Odokkc nolu ka:tok odokkc tadtok jc Ipesuo:do:mang cmpige:la Asiang appv:do:sin sc Poulbv agomcm mcnga:moto odokkc pv:namkopc tani:kvdv:dokkcm ajoncm gvyotmoto, scmpc lula jc alakkokki monam uikvdv:dc uimang. 27Odokkc sc ngoluk konam-rcnam soggongkcpc bidopc aima:nc aminc gvnamc kama:yc cmpige:la jc bottapaknc nc:ng ui Artemi:mcsinci okopcsin kvma:ycpc, odokkc bvm unjvgla dungkodcmci la:pakycpc, sc:kobvm Asia:dc:lang odokkc mo:pvsc kumdagji.”
28Cdvlo bulu cdcm tadtoji bulu dungkin-yckinma:pc aglvng sangkang, odokkc jc:la lusa:bomkang, “Ipesiang kvdv:dok Artemi:dc bottcru:nc!” 29Cdcmpila nogordc mc:murmc:yarsukang; odokkc bulu lckko:pc so:ng mokodo:pc dugangkang, buluk lcdulo Gaiumclang Aristarkumc soa:bomna, Makedonia kvdv:dcm sc:kobulu Poulkc ajona:ji gvdodcm. 30Poulbv yadkumsunc tani:kvdv:dok ara:do:pc gva:lv:dagai, cmpige:la agom tadjvgla gvmvnnc kvdv:dc bvm gvmvnmotomang; 31Asiarkdok akkesin, sc:kobulu bvk gvjona:nc, bvm kumna:sola: luto odokkc so:ng mokodo gva:ma:dopc luto. 32Cdcmpidodcm akke agom abangko jc:la lusangkang, akke angnuko, kapila:nc gvkumsunc tani:kvdv:dc mc:murmc:yaramsukang, odokkc bulukkolok bojcya:ngc kapila lckko:pc gvkumsukaji kinmangai. 33Yadkumsunc tani:kvdv:dok akke Alekjandarmc lukonsula luto, sc:kom Jiwu kvdv:dcm lurasunamko lukvpc cmna, lagc lagkurto. 34Cmpige:la cdvlo bulu kangkinto jc bv Jiwuko, gonta ayir anyikvramkopc bulu alvng akkongkopc jc:la lusangkang, “Ipesiangkvdv:dok Artemi:bv bottcru:nc!”
35Odokkc tawonolok kerani:dc yadkumsunc tani:kcrc:dcm aso:pc du:motonc, bulu luto, “Ipesu:dok tani:kvdvnga, oko tani:yc du:n sc:kobv kinma:nc jc Ipesiangkvdv:dok nogorc Artemi:kc kumko okumdcm kanggabya:nc cmna, odokkc angunnc vlv:dc do:mvrtokkc kcdledncdcm? 36Cdcm bulum lumurgu:mang cmna kangge:la, nolu aso:pc du:pcnammc odokkc nolu cmpcsin mc:mur mc:yarpcnammang. 37Kapcnc nolu sc tani: kvdv:scm gva:botonc sc:kobulu tayumpcnama:sin cdcmanggom ngoluk nc:ng uidcm aimang cmna lunckosinmang. 38Cdcmpidag Dimetriu:bv odokkc bvk lcdulok modunmonc tani:kvdv:dc sc:kai akomum lujckko ludungamvlo, kcba: bangko okumkvdv:dc moge:la dung, odokkc motaklok migom donckvdv:dc dung; bulum akonkc lcgangc akoncm lujcmmvlo lua:motoka. 39Cmpige:la nolu atvko odok mabarmvlo, cdcm lo:dcm gvkumsula kcba: bangkodo momityc. 40Kapila:nc ngolu silo airu:pc pcsopcnampc idung pamvnsula nvjcmla, oko lcgangcsin kamang ngolu arro cmna lupc sc urratscm.” 41Odokkc cdvlo bv cdcm lutoji, bv yadkumsunc tani:kvdv:dcm mcpan-mcranlvgtoku.
Currently Selected:
AGER KVDVNG 19: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
