AGER KVDVNG 2
2
Angunnc Yalodok Gvinam
1Yi:ngko longcdok inam dopundojardc cdvlo pvngangka:nc, bulu appv:dc du:tcng akkongkolo lckko:pc dungai. 2Odokkc vgcmpc taycng tokkc kvnggv:pc bottcpc yunc csarcmpc ngomna gomugko dc:yi:do, odokkc cdc buluk dungko okumdo ngombungkang. 3Odokkc odo bulum vmmcmpc ayokvdv:dc lcngkansuto, dorbu:la odokkc buluk appv:dok ako akolok tayc:lo dcnggabamkang. 4Odo bulu appvdc Angunnc Yalodc bingkang odokkc angu angu agomcm lurobbomkang, Yalodc bulum lunamdcmpci.
5Cdcmpinamc odo Jerusalemdo Jiwuyc, odokkc Ru:ncpvncmc aipc mc:nc tani:yc do:mvr kcvgso du:nc appvng opvnlokkc dungai. 6Odokkc odo bc:namdokki kcrcng tani:kvdv:dc lckko:pc gvkumsukang, odokkc bulu mcngkin-mc:para:tomang, kapila:nc bulu appv:dc buluk av avkc agomcm lusudopc tatto. 7Odokkc bulum mc:la mcngapla:ma:pc odokkc mcngkesula du:la:yam, scmpc luto, “Sc agom lunc kvdvng appv:sc Galilolokkc ma:lang? 8Cmpige:la cdc kapc ngolu tadbegdu:n, ngolu appvngc av avkc du:tc:lok agomcm? 9Partiankvdv:dokkc, Media:dokkc, Ilamitedokkc, Mesopotamiangdo du:nc-dagnckvdv:dc Judia odokkc Kappadokia, Pontus dokkc Asia, 10Prigia odokkc Pampilia, Igipt odokkc Libiadok mo:takkolok Sirenedokkc, odokkc Ro:mdok kanggongkapc gvnnckkc, Jiwu kvdvngclang avkc dormo mcpaknc, 11Kretan kvdv:dc odokkc Arabi kvdv:dcm, ngolu bulum noluk avkc agomlok ludopc tadbegdung Ru:ncpvnckc bottcru:nc ager gernamcm.” 12Odokkc appv:dc tadngagamsukang odokkc mcngkinmc:parangtomang, akoncm akonc, “Cdcmpc lunamdc okko cmdang?” Cmna lukangam mvnsula.
13Cmpige:la “Bulu vrnc apongcm tvngvrsungapto,” cmna luyo-luka:la luto.
Pitorkc Lulenluwang Lubinam
14Cmpige:la Pitorbv, vyingkolang akodokki dagbosuge:la, bvk agomcm bottapc lusuto odokkc bulum lukanbito, “Judia:sok tani:kvdvnga odokkc Jerusalemdok du:nc-dagnc appvnga, scm nolu appvngc kintoka, odokkc ngok agom kvdv:scm yerungcm toka:la tattoka. 15Kapila:nc sc tani:kvdv:sc, noluk mc:namdcmpc torvgsumang, su:pak longgc ayir awumongko idunggong; 16cmpige:la sc lungor lunc Joelbv okkom lutoji cdcmvn:
17‘Odokkc gvngab longcdo cdcmpc iyc Ru:ncpvncbv luto,
jc Ngok Yallom ngo tani: opvn appv:lo to:rumlvgyc,
odokkc noluk awokvdv:dc odokkc noluk omckvdv:dc
lungor agomcm lugo:yc,
odokkc noluk ya:me
ko:kvdv:dc kangorcm ka:yc.
18C:, odokkc ngok ager gerya:nc milbong tani:kvdv:dc odokkc ager gerya:nc nc:ng tani:kvdv:dc odo longckvdv:dok ara:do Ngok Yallom ngo pvrumyc; odokkc bulu lungorcm luyc.
19Odokkc ngo tayc:to kangaksunam ka:namcm lcngkanyc
odokkc kcvgso mo:pvso kanggodcm, i:ycm,
odokkc vmmcm, odokkc yv:paknc mukkangcm;
20do:nyitc kcmopakyc odokkc po:lotc i:pc,
Ru:nckc longcdc pvngangma:dapc,
cdc bottcru:nc odokkc ka:begpcnam longcdc.
21Odokkc odo cdcmpc iycnc jc sc:kobvi
Ru:tumkc amincm gogycnc mopvtyc.’
22“Israelsok tani:kvdvnga, sc agom kvdv:scm tadtoka: Najaretdok Jisubv, Ru:ncpvnckokki nolukkolo du:jonsumoto bottcru:nc ager germola odokkc mcngapla:ma:nam agercmlang odokkc kanggod kvdv:dokki okodcm noluk ara:lo Ru:ncpvncbv Bvkkokki gertoji, nolusin avyc kindagnc cdc Jisudcm. 23Ncrkvgpc tarung ru:namdcmpc topaklvgto odokkc Ru:ncpvnckc kinpo:namdcmpc, nolu Kuruslo pvtjonto odokkc lujvgluro kinma:nc tani:kvdv:dok alakki moketo. 24Ckvdaggom Ru:ncpvnbv Bvm turmotoku, sinamlok kinamcm moturtoku, kapila:nc cdc Bvkkcpc odokki yc:tumnamna:mang. 25Kapila:nc Dawidbv Bvk agomcm lutag,
‘Ngo lo:dvscm Ru:tummc ngok kcra:pc ka:begto,
kapila:nc ngo cngunma:ycpc cmna
Bv ngok lagbvk alagpc dung;
26cdcmpila ngok asinc mc:pola dungai,
odokkc ngok aiyyo mc:poto;
cdcmsinyamsin ngok adinc mc:tinsula du:yc dagyc.
27Kapila:nc no ngok yallom uiamo:bo topakledma:yc,
cdcmanggom nok Angunnc Akodcm
aima:pc ager gernamkvdv:dcm ka:begmoteika.
28No ngom turnamsok lambckvdv:dcm kinmoto;
nok du:tcngkokki ngom no mc:pomolang.’
29“Bvrrang kvdvnga nolum abukvdv:lok abu Dawidkc agomcm mc:tindanna lubila:dung jc bv sikang odokkc agolo lc:to, odokkc silolo:pc bvk agodc ngoluk ara:lo dung. 30Cdcmpidag lungorla luncpc itu:la:yam, odokkc Bvm Ru:ncpvncbv pesunamko pebito cmna kinna:yam jc Bvk opvnko Bvk migom dungkodo lc:yc cmna, 31Bv kangorko ka:no:to odokkc Kristokc sikolokkc turkunamdcm luto, jc Bvm Uiamo:bo tolvgtomang, cdcmanggom Bvk adinc aima:pc ager gernamc ka:tomang. 32Cdc Jisumc Ru:ncpvncbv turmotoku, odokkc odokkcpc ngolu appvngc lukan lubinc. 33Cdcmpila Ru:ncpvnckc lagbvg alakdo:pc la:sa:langkula:yam, odokkc Abudokkcm Angunnc Yalodok pesubinamdcm pa:la:yam, Bv scm to:lvgtag okodcm nolu ka:begdu:nc odokkc tadbegdu:nc. 34Kapila:nc Dawidbv taycng amo:pc dc:sa:tokumang; cmpige:la bv avdc luto,
Ru:tumdc ngok Ru:tummc luto,
Tedtok ngok lagbvgpc.
35Ngo nok mirukvdv:dcm nok alckvdv:dok
lcga:pc kungke:pc ima:sisscm.
36“Israelkc ope: appv:dcm aroru:pc kinmotoka jc Runcpvncbv Bvm Ru:tumpclang Kristopc imoto, cdc Jisumc sc:kom nolu kuruslo pvtketoji.”
37Cdcmpinamc bulu cdcm tadge:la buluk asinkvdv:dcm nvgjonamto, odokkc Pitormclang agom tadla gvmvnnc akekvdv:dcm luto, “Bvrokvdvnga, ngolu kapc iycn?”
38Odo Pitorbv bulum luto, “Asinc mc:dvrra mc:latsutokuka, odokkc noluk appvngc Jisu Kristokc aminno baptismongcm la:tok noluk pa:pkvdv:dcm mc:yinsunam lcgangc; odokkc nolu Angunnc Yalodok amandcm pa:yc. 39Kapila:nc pesula lunamdc nolukkcpc odokkc noluk ommang kvdv:do:pc odokkc mo:tc:pc du:nc kvdv:do:pc, Ru:tumdc ngoluk Ru:ncpvncbv Bvkkolo:pc gogangkunam appv:dcm.”
40Odokkc bv agom bojcrungkoda lula lukanbito odokkc angu agomkokkisin luyirra bulum luto, scmpc lula, “Nolu av avyc sc yadkuknc opvnsokkcm mopvtsutoka.” 41Cdcmpila cdc sc:kobulu bvk agom kvdv:dcm torvgsutoji baptismongcm langapto, odokkc odo baptismongcm bisetla bulu lv:ying awum kvramko yallo idagai. 42Odokkc bulu avkvdv:dc mclvgla ager germonam tani:kvdv:dok luyirnamlo:lang lckopc dungkolo, pitangcm penpansula dokolo odokkc kumkolo dunggabla du:mvnto.
Mc:jvgnc kvdv:dok Turnam
43Odokkc appvng yalokvdv:dc pcsso angkang; odokkc bojcrungko kangaksunam agercmlang kanggodcm mclvgla ager germonam kvdv:dokki gerto. 44Odokkc mc:jvgnc kvdv:dc lckopc dungai odokkc appvng attarcm lcko-lakkopc lcngkumsuto; 45odokkc bulu arckan attar kvdv:dcmlang attarkvdv:dcm kopagamto odokkc cdcmbulum bulu appv:dcm orpanamsuto, buluk sc:ko sc:kobulu manamdcmpci. 46Odokkc longgcm longgcm, kumko okumdo lckopc gvkumsunamcm odokkc buluk okumkvdv:do pitangcm penpansula bulu mc:po:pc odokkc asin akko:pc mc:la apincm dobosuto, 47Ru:nc pvncmc aipai lula odokkc appv:tani:lok aipc mcngkosula. Odokkc Ru:tumbv bulum longgcm longgcm sc:kobulum moturtoji: mca:lvgsetbomto.
Currently Selected:
AGER KVDVNG 2: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
