AGER KVDVNG 22
22
1“Bvrrang kvdvnga odokkc abukvdvnga, ngok lurasunamscm tadtoka okodcm noluk kcra:lo ngo ludu:ji.” 2Odokkc cdvlo bv bulum Hibriu agomki lusa:namdcm tadtoji, bulu ngag cmkang. Odokkc bv luto:
3“Ngo Jiwuko, Kilikia:do onamko, cmpige:la so nogorso Gamalielkc kcra:do svsa:nc, ngoluk abukvdv:dok kvnggv:pc lujvgluro lukam-gvkamdcmpc ponamcm posa:nammc, Ru:ncpvnckc lcgangc kvnggv:pc asin dvgla nolu silo longcsok ikamarscmpc. 4So lambcsok gvnckvdv:dcm ngo sigcdopc mogvtomomatto, ycnggabamge:la bulum makana:lo:pc tumlvgla nc:ngcmna milbongcm anyipagcm, 5kumnam ager gernckvdv:dok bottarya:nclang abv:nc kvdv:dok mondoli:dc ngom ka:nai. Bulukkolok ngo bvrokvdv:do:pc do:jvg adnamcm pa:to, odokkc Damasku:pc gvto sc:kobulu odo dunggaji bulum ycngge:la Jerusalempc bomnangkula mogvtmatpc cmna.
Poulbv Mc:jvgla Gvmvnnamdcm Lubisunam
(Ager 9.1-19; 26.12-18)
6“Ngo darobla gvnamc odokkc Damasku: aninpc pvnga:nammc, longc duporia:do taycng tokkc kvnggv:pc unjvgnc pvangko ngom pvkanto. 7Odokkc ngo amo:bo kcdpakledkang odokkc ngom agomko lunamko tadbegto, ‘Soula Soula, no kapila ngom mogvtomomatdu:n?’ 8Odokkc ngo tawuto, ‘No sc:kobv:n, Ru:tuma?’ Odokkc ngom luto, ‘Ngo Najaretdok Jisubv sc:kom no mogvtmomatdu:ji.’ 9Cdcmpc idodcm cdc ngok lcdulo du:mvnnc kvdv:dc pva:dcm ka:begto cmpige:la alv:dcm tadbegtomang ngom sc:ko ludagaji. Odokkc ngo luto, ‘Ngo okkom iycn, Ru:tuma?’ 10Odo Ru:tumbv ngom luto, ‘Darobtoka, odokkc Damasku:pc gvangkang, odokkc olo nom nok ipcnam ager appv:dcm lubiyc.’ 11Odokkc cdvlo cdc unjvgnc pva:dokki ngo ka:begtoma:ji, ngok lcdulo gvmvnnc kvdv:dok alagkvdv:dokki ngo sogabla gvmvnto, odokkc Damasku:pc gva:to.
12“Odokkc Anania cmnamko, lujvglurodcm kvnggv:pc aipc mc:jvgla Ru:ncmc kumnckonc odok du:nc Jiwu kvdv:dc aipc aidag cmna lunamkonc, ngokkolo:pc gva:to, 13odokkc ngok kcra:do dungge:la ngom luto, ‘Bvro Soula, no ka:beg kangkulangka.’ Odokkc oddung vgcmna ngo ka:begtoku odokkc bvm ka:pa:to. 14Odokkc bv luto, ‘Ngoluk abukvdv:dok Ru:ncpvncbv nom totag Bvk mcngkamcm kindopc, Aroncdcm ka:dopc odokkc Bvk nappa:dok gomugcm taddopc; 15Kapila:nc no Bvklcga:pc appvng tani:ycm lukan lubincpc iycpc no okodcm ka:toji odokkc tadtoji. 16Odokkc no kapila su:pak toya:la du:n? Darobtok odokkc baptismongcm la:to, odokkc nok pa:pkvdv:dcm Bvk amincm minna vrpu:tok.
Poulmc Angu Tani:kvdv:dcm Lutad Lubidopc Gognam
17“Cdvlo ngo Jerusalempc gvlattokuji odokkc kumko okumdo kumla dungaji, ngo siangkang odokkc ngo Bvm ngom ludopc ka:begto, 18‘Lomtoka odokkc Jerusalemsokkc mcna:pc gvpakkang, kapila:nc bulu no ngok agomcm lukanbinamdcm torvgsuma:yc.’ 19Odo ngo luto, ‘Ru:tuma, bulu avkvdv:dc kinsudag jc appvng kumko okumlop ngo gvka odokkc makana:lo tumka nom cdc mc:jvgnc kvdv:dcm dcmna. 20Odokkc nok agom lukanbinc Stipenkc i:ycm bidmotonc, ngo:sin kcra:do dagla dungge:la aidag cmna tolvgka, odokkc sc:kobulu mokekaji buluk bcdugasor kvdv:dcm kanggabya:la.’ 21Odokkc bv ngom luto, ‘Gvkang; kapila:nc ngo Angu tani: mo:tc:pc du:nc tani:kvdv:do:pc nom mclvgyc.’ ”
22Cddvlo:pc bulu bvk agomdcm tadmi:la tadto; odokkc bulu buluk alvgncm bc:dopc jc:sangkang, “Sc mo:pvsokkc cdcmpinc tani:dcm la:paktoka! Kapila:nc bv turra du:pa:mang.” 23Odokkc bulu jc:sa:nammc odokkc gcnam attarkvdv:dcm crsangamlvgla odokkc among koiyang tayc:pc crsangamlvgto, 24Kcba:ba:ncdc bvm mimag monckvdv:dc dungkodo:pc langa:dokupc lulvgto, odokkc bvm sabukki dcmna kangkvdopc lulvgto, kapila bulu bvk birudi:pc jc:sangkaji cdcm tadlenpc cmna. 25Cmpige:la cdvlo bulu bvm suktung rvbvkvdv:dokki ycnggappc cmna itoji, Poulbv mimag monclok lvngkolok gvgcncdcm sc:ko kcra:do dagla dungaji luto, “Roman amo:lok tani:ko nolukkc sabukki dcmpc lujvglurodok lukampc idaglang, odokkc imur-gvmur okosin kama:nckoncm?”
26Lvngko mimag monclok gvgcncdc cdvlo cdcm tattoji, bv kcba: ba:ncdo:pc gva:to odokkc bvm luto, “No okkom ipc cmna idu:n? Kapila:nc sc tani:sc Roman amo:lokkc.”
27Cdcmpila cdc kcba:ba:ncdc gva:to odokkc bvm luto, “Ngom lutei, no Roman amo:lok tani:koi?”
28Odo bv luto, “C:v” Kcba:ba:ncdc luto, “Scm ngo bojcrungko murkongcm bige:la rcto.” Poulbv luto, “Cmpige:la ngo ola pa:namc.”
29Cdcmpila sc:kobulu bvm kangkvpc cmna itoji bvkkolokkc oddung gc:ramkang; odokkc kcba:ba:ncdc:sin pcsokang, kapila:nc bv mcngkvla ka:toku jc Poulbv Roman amo:lok amiko odokkc bv bvm ycnggabto.
Poulbv Kc:ba:do
30Cmpige:la longkondo, Jiwu kvdv:dc kappiarla bvm lujckko cmna lutoji kinpc cmna; bv bvm yc:namdcm sarrvgto, odokkc kumnam ager gernclok bottarya:ncdcm lulvgto odokkc kcba:ba:nc appv:dcm gvkumsudopc lulvgto, odokkc bv Poulmc la:yi:ge:la buluk kangkolo bvm du:moto.
Currently Selected:
AGER KVDVNG 22: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
