LU:KKC 4
4
Jisumc Ka:bomc:bomoka:la Kangkvnam
(Met 4.1-11; Mark 1.12-13)
1Odokkc Jisub, Angunnc Yalodc pa:la:yam Jordandokkc gvlattoku odokkc yi:pi: longckopc yumra:lo Yalodc gvbola du:to, 2Uidokki ka:bomc:bomoka:la kangkosula. Odokkc Bv odo longckvdv:do okkomsin dotomang; odokkc cdcbulu gcngapnammc, Bv kcnongkang.
3Uidc Bvm luto, “No Ru:ncpvnckc Aowomvlo, sc vlvngkvdv:scm pita:pc ika:langka cmna lulvgkvka.”
4Odo Jisubv Bvm lulatsutoku, “Scmpc adtak ‘Taniyc pitangongkokki turma:yc.’ ”
5Odokkc uidc Bvm gvbokang, odokkc migyaplo mo:pvsok migom doko appv:dcm lcngkanto, 6odokkc uidc Bvm luto, “Nom ngo sc appv:sok ilang-gvlangcm odokkc odokbuluk mc:bomsunamdcmci biyc, kapila:nc cdcm ngom bitung, odokkc ngo cdcm sc:kom bilv:dagnc biyc. 7No ngom, kummvlo, cdc appv:dc nokkcpc ingapyc.” 8Odokkc Jisubv bvm lubito, “scmpc adtak,
‘Nok Ru:ncpvncdcm no kumnang,
odokkc Bvklcgangong no agercm gerrangka.’ ”
9Odokkc Bvm Jerusalempc gvbokang, odokkc kumko okumdok mv:dum tu:bokto tedmoge:la Bvm luto, “No Ru:ncpvnckc Aowomvlo, avyc sokkc kcdledsukvka; 10Kapila:nc scmpc adtak:
‘Bvk taycng among lutad lunckvdv:dcm nokkolo:pc mclvgyc,
nom ka:sv:dopc.’
11“Odokkc
‘Buluk alakkvdv:dokki nom bosa:
ycpc,
ckvma:mvlo no vlv:lo nok allcm otvrsuyc.’ ”
12Odo Jisubv bvm lulatsutoku, “Scmpc lutag, ‘Nok Ru:tum Ru:ncpvncmc no luyo-luka:la kangkvyoka.’” 13Odokkc uidc appvng ka:bo mc:bomokangcm anka:la kangaptonc, Bvkkodokkc bv gvpakkang lckoda ankang kangkvnanc ayirko pangkuma:sisscm.
Jisub Galildo Bvk Ager Gerrobnam
(Met 4.12-17; Mark 1.14-15)
14Odokkc Jisubv Yalodok ilanggvlangki Galilpc gvlattoku, odokkc Bvk ainc agomc mo:tak appv:do pvngapkang. 15Odokkc Bv buluk kumko okum okum appv:do, appvngc aidag cmna lungapdopc luyirto.
Jisumc Najaretdo Lupaknam
(Met 13.53-58; Mark 6.1-6)
16Odokkc Bv Najaretpc gvtoku, okolo Bvm usa:basa:toji; odokkc Bvk gvitnamdcmpc, kumko okumpc gvkang, ager germa:pc yodla du:do longcdo. 17Odokkc Bv popc cmna dagrobkang; odokkc scmpc adnamdcm pa:to,
18“Ru:tumkc Yalodc ngokkolo dung,
kapila:nc Bv ngom opannckvdv:dcm tadponc
do:yv:dcm lutaddopc vrtung.
Bv ngom makana:lo lvgla lc:namkvdv:dcm mclvgkunamcm
odokkc miglunckdv:dcm ka:begkunamcm lutaddopc ngom mclvgtag,
sc:kobulum nv:jcmna lc:tagnc bulum motudokupc,
19Ru:nckc torvgsukunanc
dv:tagdcm lutadbidopc.”
20Odokkc potindcm Bv tamsuptoku, odokkc cdcm igur gvgurnckvdv:dcm bitoku, odokkc tedtu:to; odokkc kumko okumdok du:nc appv:dc Bvggongkolo:pc ka:takkang. 21Odokkc Bv bulum lurobbomkang, “Silo noluk tadde:pc astrong agomdc lukamdcmpci ikang.”
22Odokkc Bvm appvngc aidag cmna lukang, odokkc Bvk nappa:dokkc lennc agomkvdv:dcm tadla tadngagamsukang; odokkc bulu luto, “Sc Josepkc awodc:ma:lang?”
23Odo Bv bulum lubito, “Mc:moru:ma:pc no ngom sc luyv:sula lunamscm luycrung, ‘C:i kinam ka:na, no avycm ka:pvtsutokuka; Kapernaumolo no okkom ika cmna ngolu tattonc, sc nok avkc among do:lu:so:sin itoka.’” 24Odokkc bv luto, “Aropakpc, ngo lubidung, oko lungor lunncmsin bvk avkc amo:do torvgsumang.
25“Ckvdaggom aropakpc, ngo nolum lubidung, Elija:kc du:dodcm bojcrungko tumbo nc:ngc Israeldo dungai, do:mvrtc dv:tag awumkolang po:lo pvkcngko cdvlo pcdongc otoma:nc, cdvlo among appv:do bottaru:nc dopa:tv:pa:ma:pc ika:nc; 26odokkc Elija:mc sckkolo:pcsin mclvgtomang cmpige:la Jarephatkollo:pc mclvgtonc, Sidon amo:dop, tumbo nc:ng akolowo:pc. 27Odokkc ngero ro:nam bojcrungko dungai Israeldo lungor lunnc Elija:kc du:dodcm; odokkc bulukkolok sc:komsin mopvtokumang, cmpige:la Siriangkolok Namano:mc mopvtoku.”
28Cdvlo bulu cdcm tattoji, kumko okumdok du:nc appv:dc aglvng sangapkang. 29Odokkc bulu darobla Bvm nogordokkcm solennvgto, odokkc oko adi:do buluk nogordcm motagaji odo adi:dok tu:bokto:pc sosa:bomkang, Bvm bulu kcvgbo:pc nv:ledlvgpc cmna. 30Cmpige:la buluk arangv:dok Bv gvlenna gvpakkang.
Aima:nc Yalopa:nam Tani:dc
(Mark 1.21-28)
31Odokkc Bv Kapernaumpc gvto, Galildok nogordo:pc. Odokkc Bv bulum yodla du:do longcdo luyirla dungai; 32Odokkc Bvk luyirnamdcm tadla tadngaksukang, kapila:nc Bvk gomug kvdv:dc ilang gvla:nam kadagai. 33Odokkc odo kumko okumdo aima:nc Yalokanc uiyc pa:nam tani:ko dungai; odokkc bv bottapakpc jc:la lukang, 34“Najaretolok Jisuno! Okkom no ngolum iycn, Aycv? No ngolum mokekapc gvdu:nci? Ngo kindag no sc:koji, Ru:ncpvnckc Angunncdc.”
35Cmpige:la Jisub Bvm morvdla luto scmpc lula, “Aso:pc du:tok, odokkc bvkkolokkc gvlentok!” Odokkc buluk ara:do uidc bvm crtapnammc, bv bvkkolokkc gvlento, bv atvkosin mojokmorokma:pc.
36Odokkc bulu appv:dc ka:la kangaksukang odokkc akonc akoncm luka:mvnsuto, “Kapinc agomcncm sc? Kapila:nc Bv ilang gvlangki odokkc migangki aima:nc Yalokvdv:dcm lutoncm, odokkc cdcbulu gvlenamkang.” 37Odokkc Bvk agomkvdv:dc appvng mo:taklo:pc dungo:ycgong appv:do pvngapkang.
Jisubv Tani:ycm Bojcrungko Csa:mokunam
38Odokkc Bvk darobla kumko okumdcm mcpagla gvla, Simonkc okumdo:pc gvangkang. Odo Simonkc ayodc kvnggv:pc ramla dungai, odokkc bulu Bvm bvk lcgangc kumna:sola: luto. 39Odokkc Bvk kcra:do dagkang odokkc ramnamdcm morvdto, odokkc cdc ramnamdc aikangku; odokkc oddung bv darobla bulum bv ila:sa:la bito.
40Cdcmpidodcm do:nyidc owa:pc ayirdo atv kinam ramnamko du:nc appv:dcm bvkkolo:pc gvangamboto; odokkc Bvk alakki appv:dcm riyitbila bulum csangammotoku. 41Odokkc uiycsin bojcru:lokkc gvlenamkang, “No Ru:ncpvnckc Awodc! Cmna jc:la jc:la.” Cmpige:la Bv bulum morvdto, lcga:dc bulu kindagai jc Bv:yvng Kristobvai.
Jisubv Kumko Okumdo Lutad Lunam
(Mark 1.35-39)
42Odokkc ro:dcm pvang pvnamc Bv gvpaktoku odokkc ronggamo:nc mo:di:kolo:pc gvkang. Odokkc tani:kvdv:dc Bvm mala gva:to, odokkc bulum Bv mcpakyoka cmna kumna luto; 43ckvdaggom Bv bulum luto, “Ngo akon nogorkvdv:do:sin Ru:ncpvnckc migom doko mo:pvdok tadponc lutaddcm lugo:ru:yc; kapila:nc ngom odok lcgangci mclvgtungai.”
44Odokkc Judia:dok kumko okumkvdv:do luyirbigo:to.
Currently Selected:
LU:KKC 4: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
