METIU 21

Jerusalemdo Mopvla Rc:batla Gva:nam

(Mark 11.1-22; Lu:k 19.28-40; Jo:n 12.12-19)

1Odokkc cdvlo bulu Jerusalem anindo:pc gvpv:tonc odokkc Betpage:pc gvpv:tonc, Olib Adi:do:pc, odo Jisubv agom tadjvgla gvmvnnc tani: anyiko mclvgto, bulum scmpc lula. 2“Noluk clc kcrangkc ka:begnam do:lungolo:pc gvkang, odokkc lomdanna nolu rvnna lc:nam vnc gadong adorko pa:ycpc, odokkc odok lcdudo awo gadongkosin: cdcmbulum ngokkoso:pc go:bomlangkuka. 3Sc:kai nolum atvko luycmvlo, nolu lubilang, ‘Ru:tumbv cdcmbulum madag,’ odokkc bv cdcmbulum lomdanna mclvgycpc.”

4Cdc cdcmpc ikang Ru:nckc agom lungorbinckvdv:dok lukampci idopc, scmpc lunamdc:

5“Jionolok omckvdv:dcm lubitoka,

ka:tok, noluk migomdc nolukkolo:pc gvdo,

asin ansv:la, odokkc vnc gadong gure:adorkolo sa:la,

awo gadong gure: taycngkolo, gado:lok awokolo.”

6Agom tadjvgla gvmvnnc tani:kvdv:dc Jisubv bulum lulvgnammardcmpc ito; 7bulu vnc gado:dcm odokkc gado: awodcm go:to, odokkc buluk gcnam bomnam kvdv:dcm odokbuluk tayc:do pulvgto, odokkc Bv odo taycdo sa:to. 8Yadkumsunc tani:kvdv:dok abaya:ngc buluk gasor-bcsor kvdv:dcm ali: lambcdo pungapto, odokkc akedc vsvng rcngke:ycm vsvnglokkcm page:la ali: lambcdo pulvgamto. 9Odokkc Bvm gvpong gvpo:la gvnc odokkc Bvk lcdudok gvnc tani:kcrc:dc gvmvnge:la jc:to, “Vrroi Dawidkc Awodokkc! Ru:tumkc aminnok gvncdc aipai pa:nc! Appvngcmyam tayc:to Vrroi!”

10Odokkc Bv Jerusalempc cdvlo gva:tonc yadkumsunc tani: kcrcng appv:dc urratkang, scmpc lula, “sc sc:koncm:”

11Odo yadkunsunc tani:kcrc:dc luto, “Galilolok Najaretdokkc Ru:nckc agom lungorbinc Jisubv sc:na.”

Jisubv Kumko Okumpc Gvnam

(Mark 11.15-19; Lu:k 19.45-48; Jo:n 2.13-22)

12Odokkc Jisubv Ru:nckc kumko okumdo:pc gva:to odokkc attar konnclang rcnc kvdv:dok tcbulkvdv:dcm kurratdambito odokkc cdc parong konckvdv:dok dungko kvdv:dcm. 13Bv bulum luto, “Scmpc attak, ‘ngok okumdcm kumko okum cmna luyc;’ Cmpige:la nolu cdcm rotkutnc dungkopc idung.”

14Odokkc miglunckvdv:dc odokkc lambc gvla:ma:nc kvdv:dc kumko okum ara:do Bvkkodo:pc gva:to, odokkc bulum Bv csa:motoku. 15Ckvdaggom dormo ager gergurnclok bottarya:nc kvdv:dc odokkc poyirnc kvdv:dc Bvk inam mcngapla:ma:nam agerkvdv:dcm ka:to, odokkc kumko okumdo ko:kangkvdv:dok jc:la “Vrroi Dawidkc Awodokkc!” Cmna lunamkvdv:dcm tadla, bulu aglvngc okopci ikang; 16odokkc bulu Bvm tauto, “No tadbegdagyc sc:bulu okkomna ludagji?” Odokkc Jisubv bulum lubito, “C:; nolu cdvlosinyc pokvma:n. ‘Kowaukvdv:dok odokkc anyug tv:nckvdv:dok nappa:lokkcmsin aropakpc luidla lunamcm pa:to.’ ”

17Odokkc bulum mcge:la, Bv nogordok moro:pc Betani:pc gvlento odokkc du:yubsuto.

Jisubv Tajvg-vsv:dcm Pelvgnam

(Mark 11.12-14,20-24)

18Ro:dcm, Bv nogordo:pc gvlatdokudcm, Bv kcnongkang. 19Odokkc lambc ru:yido tajvg vsvng amvngko ka:begsula:yam Bv odopc gva:to, odokkc okkomsin pa:tomang cmpige:la annongc dungai. Odokkc Bv cdcm luto, “Nokkolo cdvlosin lckoda a:yc e:mangka:langka!” Odokkc cdc tajvg vsvng amv:dc oddung sanangkang.

20Cdvlo agom tadjvgla gvmvnnc tani: kvdv:dc ka:tonc bulu mcngapla:ma:pc ikang, scmpc lula, “Kapc sc tajvg amv:sc vgcmpc sanka:ncv?”

21Odokkc Jisubv bulum lubito, “Aroru:pc, ngo nolum lubidung, nolukkc mc:jvgc du:ru:mvlo odokkc cdvlosin mc:moma:mvlo, nolu tajvg vsv:dcm kapc itonc cdcmo:pc ima:yc, cmpige:la sc adi:scmci lumvlo, ‘Gvpakla sokkc siycngolo ojvngkangka cmmvlo,’ cdcmpc iyc. 22Odokkc nolu kumna okodcmci koycnc, nolu pa:yc, nolukkc mc:jvgc du:mvlo.”

Jisukc Ilang-gvlangnam Agom Tawunam

(Mark 11.27-33; Lu:k 20.1-8)

23Odokkc Bv kumko akumdo:pc gva:to, tani:kvdv:dok dormo agerlok igur-gvgurncdok bottar-ya:nckvdv:dc odokkc abv:nc kvdv:dc Bvkkolo:pc gva:to Bv luyirra du:dodcm, odokkc tauto, “No oko miganki sc agerkvdv:scm gerdu:n, odokkc nom sc:ko sc migangscm bitu:n?”

24Jisubv bulum lubito, “Ngo:sin nolum tadnam agomko tawuyc; odokkc nolu ngom lubimvlo, odopak ngo:sin nolum oko migangki ngo scmblum idu:nc lubiyc. 25Jo:nkc baptismo:dc, okolokkcm pa:ton? Taycng amo:tokka:nci tani:kvdv:dokka:nci?” Odokkc bulu akonc akoncm agomcm svgka:mvnsuto, “Taycng amo:tokkc, cmna ngolu lumvlo, Bv ngolum luyc, ‘Kapila cmpcmvlo bvm mc:jvgtoma:n?’ 26Cmpige:la tani:kvdv:dokkc cmna, ‘ngolu lumvlo,’ ngolu yadkumsunc tani:kvdv:scm pcsodag; kapila:nc appvng taddag Jo:nbv:jc Ru:ncpvnckc agom lungor lunckai cmna.” 27Cdcmpila bulu Jisumc lubito, “Ngolu kinmang.” Odokkc Bv bulum luto, “Ngo:sin nolum lubimang oko migangki ngo sc agerkvdv:scm gerdu:ji.

Awo Anyidok Kvkanla Kvnam Do:ying

28“Nolu okkomna mc:dang? Tani: akolokkc awo anyiko dungai; odokkc bv abv:ncdcm gvangge:la luto, ‘Awosa, silo clc angurarvgolo:pc gvkang odokkc ager gerta:ka.’ 29Odokkc bv luto, ‘ngo ima:yc;’ ckvdaggom lcdupc bv asindc mcdvrra mc:latsutoku odokkc gvkang. 30Odokkc bv akondo:pc gvto odokkc luto cdcmv:pc odokkc bv luto, ‘Ngo gvyc, ba:ba,’ cmpige:lagom bv gvtomang. 31Anyidok okodc buluk abudok mcngkamdcmpc iton?” Bulu luto, “Abv:ncdc.” Jisubv bulum lubito, “Aroru:pc, ngo nolum, lubidung, migom murkong urkumsunckvdv:dc odokkc sibe:be:nc nc:ngkvdv:dc nolukkcmyam Ru:ncpvnckc migom dungko mo:pvdo gva:po:ycku. 32Kapila:nc nolukkolo:pc dormokancpc ila Jo:nbv gvtungai, odokkc nolu bvm mc:jvgtomang, ckvdaggom migom murkong urkumsunckvdv:dc:la sibe:be:nc nc:ng kvdv:dc bvm mc:jvgto; odokkc nolu cdcm ka:begdo:sinci, nolu lcdupc asinc mcngkutsutokumang odokkc bvm mc:jvtomang.

Angur Arvgdo Ager Gernckvdv:dok Kvkanla Kvnam Do:ying.

(Mark 12.1-12; Lu:k 20.9-19)

33“Kvkanbila kvnam do:ying akoda tattok. Okum ru:tumko dungai sc:ko angurarvgko itungaji, odokkc cdcm appv:dcm korungcm ngunritungai, odokkc odo ara:do mankoko ngunnvgto, odokkc po:yubkosin po:lvgto, odokkc arvg inc kvdv:dcm togc:lvgge:la akon mo:di:kolo:pc gckang. 34Cdvlo a:yc e:dv bvrdug angka:ji, bv bvk pagbokvdv:dcm arvginckvdv:do:pc mclvgto, bvk a:yckvdv:dcm la:dopc, 35odokkc arvginckvdv:dc bvk pagbokvdv:dcm sogabamto odokkc akoncm dcmbito, akoncm moketo, odokkc akoncm vlvngkokki gcketo. 36Lckoda ager gerya:nckkcm bv mclvgto, mclvgpo:nam dcmbulum abayangko; odokkc bulu cdcmv:pc cdcmbulumsin ito. 37Lcdulo bv bvk awodcm bulukkodo:pc mclvgto, scmpc lula, ‘Bulu ngok awoscm mcnggcsuycpc.’ 38Cmpige:la cdc arvg inc kvdv:dc awodcm kangge:la, bulu ayv ayvkvdv:dc lusuto, ‘Sc:ma:lang ro:yampokc ru:tumdc; kai bvm mokelai odokkc bvk pa:pcnamkvdv:dcm la:lai.’ 39Odokkc bvm sogabge:la angur arvgdokkc crrenvgto, odokkc bvm moketo.

40“Cdcmpinamc cdvlo angur arvgdo:pc gva:yckunc, okkom cdc arvginckvdv:dcm iycsong?”

41Bulu Bvm luto, “Bv cdc midin donckvdv:dcm ayang-abo kama:pc mokeycku, odokkc angur arvgdcm angu arvginc tani:ycm bipagyc sc:kobv bvrduglo bvm a:ycm biyckuji.”

42Jisubv bulum luto, “Nolu cdvlosinci Ru:ncpvnckc agom potindo pokvma:n:

‘Okum monckvdv:dc mcpaknam vlvngardc sungkendok mogappo:nampc ikang;

Cdc Ru:tumkc inamai,

odokkc cdc ngoluk amikki ka:pc mcngapla:ma:nammc?’

43“Cdcmpc idag Ngo nolum lubidung, Ru:ncpvnckc migom dungko mo:pvdcm nolukkolokkcm bompakycku odokkc ope:koncm biycku odok a:ycm e:moncm.” 44Odokkc sc:kobv odo vlvng tayc:do otapycnc intungintu:pc otu:yc; cmpige:la cdc akonkolo cdvlo ogcmycnc cdc oke-oyeyc.

45Dormoager igur-gvgurnc kvdv:dclang Parisi:kvdv:dc cdc kvkanbinam do:yv:dcm cdvlo tattonc, bulu mcngkinsuto Bv:jc buluk agomcm ludung cmna.

46Ckvdaggom cdvlo bulu Bvm ycnggapc cmna anka:la ka:tonc, bulu yadkumsunc tani:kvdv:dcm pcsokang, kapila:nc bulu Bvm Ru:nckc agom lungorbincko cmna mc:jvgdagai.

Currently Selected:

METIU 21: MISIBSI

Highlight

Copy