METIU 25
25
Ko:ncng Vyvngdok Kvkan Do:yvng
1“Odo taycng among migom du:tcng mo:pvdcm alagdo saki: bomge:la magbo yamrvgsukapc gvnc mvmbvr ko:ncng vyvngko luyv:suyc. 2Odokbuluk anggokonc mcngcsagc kama:nc, odokkc anggokonc kinnc-pa:nai. 3Kapila:nc cdvlo cdc mcngcsagc kancdc:bulu buluk saki:kvdv:dcm bomkanc, bulu tulangcm buluk lcdulo bomtomang; 4cmpige:la kinnc pa:nckvdv:dc buluk lcdulo tula:bomnanclo tulangcmsin bomka. 5Magbodc yampvnggorma:la:yam, bulu appv:dc mcrmcr scrscrpcyupto.
6“Cmpige:la yumc yorang kvdvsudodo jc:namko tadbegto, ‘Clckkai, magbodc! Kajc bvm yamrvgsukapc gvlenka:boi.’ 7Odo cdc mvmbvr Ko:ncng appv:dc darobamto odokkc buluk saki:dcm araipc bulenge:la ba:nodamto. 8Odo angkori:nkvdv:dc kinnc-pa:nckvdv:dcm luto, ‘Ngolum noluk tulangkvdv:dok bisuipcn, Kapila:nc ngoluk saki:kvdv:sc midamdung.’ 9Cmpige:la kinnc-pa:nckvdv:dc luto, kapcji: ‘ila ngolukkcpc odokkc nolukkcpcsin pv:ma:ycpc; cdcmyam tulang konckvdv:do:pc gvkang odokkc noluk avkc lcga:pc rcsuta:ka.’ 10Odokkc bulu rckapc gcnamc, magbodc pvnga:dobong, odokkc sc:kobulu mosv:sula dungganc bvk lcdulo gvmvnkang mida:dok dokotvngkopc; odokkc yabgodcm mokapto.
11“Lcdupc ake mvmbvr ko:ncng kvdv:dc:sin gva:toku, scmpc lula, ‘Ru:tuma, ru:tuma, ngolum moge:bitei,’ 12ckvdaggom bv luto, ‘Aropakpc, ngo nolum lubidung ngo nolum kinmang.’
13“Darra toya:la du:lang cdcmpidag, kapila:nc nolu Longcdcm cdcmanggom ayirdcmsin kinmang.
Ager gerya:nc Awumdok Kvkan Do:yvng
(Lu:k 19.11-27)
14“Kapila:nc cdc scmpc iyc tani:akonc okolai gvpcnampc ila:yam bvk ager gerya:nckvdv:dcm gokkumsuge:la bulum bvk attar kvdv:dcm bigapto; 15akoncm bv bito cdum pvngoko, akoncm pvnyiko, akoncm apvko, ako akko:pc buluk torvgsula:namdcmpci. Odokkc bv gvpakkang. 16Sc:ko cdum pvngoko pa:tagaji lomdanna gvla odokbulukki beparcm moto; odokkc bv cdum pvngokoda molento. 17Cdcmv:pc, sc:ko cdum pvnyiko langkaji pvnyikoda cdumcm molento. 18Cmpige:la sc:ko cdum apvko la:rvgsukanc gvla amo:lo arungcm ngunto odokkc bvk ru:tumkc murko:dcm lc:sito.
19“Cdcmpc idodcm bojcrungko ayir lcdudo cdc ager gerya:nc kvdv:dok ru:tumdc gvlattoku odokkc kvnamcm kvkanmotoku. 20Odokkc sc:kobv cdum anggoko torvgsukanc gva:to, cdum anggokoda boma:setla, scmpc lula, ‘Ru:tuma, no ngom cdum pvngoko bitungai; sc:na ngokkc cdum pvngokoda pa:tonc.’ 21Bvk ru:tumdc bvm luto, ‘no adjiodo:sin mc:dap darapto, ngo nom bojcru:lokkcp togc:lvgyc; nok ru:tumkc mc:podo mc:pomvntoka.’
22“Odokkc sc:ko cdum anyiko pa:tungaji bv:sin gva:to, scmpc lula, ‘Ru:tuma, no ngom cdum anyiko bitungai; sc:na ngo cdum anyikoda mobartonc.’ 23Bvk ru:tumdc bvm luto, ‘Aroru:pc aipc ito, ainc odokkc mc:dap-darapnc ager gerya:na; no adjio:doksin mc:dapdarapto, ngo nom bojcru:lokkcpc tolvgyc; nok ru:tumkc mc:pokolo mc:pomvntoka.’
24“Cdum akkongko pa:ncdc:sin gva:to, scmpc lula, ‘Ru:tuma ngo kindagai no:jc tornc amiko cmna, okolo pidmangaji odok gaddakku, odokkc okolo no cpoki kapmangaji odok jongkumsudakku; 25cdcmpila ngo pcsodungai, odokkc ngo gvla nok murkongcm amo:lo yusito. Sc:na no cdc okodcm bikaji.’
26“Cmpige:la bvk ru:tumdc bvm luto, ‘C:i aima:nc odokkc magbagnc pagba! No kindaganci ngo:jc okolo ngo kappu manganc odo ringkumsudagkuji? 27Odogmvlo no ngok murko:dcm murkong kvnam kvya:nc kvdv:do lc:pcnammai, odokkc ngok gvlatdokudo ngo lc:rcm pa:tc:la pangkupai. 28Cdcmpila cdumdcm bvkkolokkcm la:toku, odokkc sckkc cdum pvyingko dunganc bvm bito. 29Kapila:nc sc:ko sc:kokci du:nc bvmmci bojcyangko biyc, odokkc bvkkc bojcru:yangkopc iyc; cmpige:la sckkc kama:ycnc, okodc du:nc cdcmsinci la:pakyc. 30Odokkc arc kama:nc pagbodcm mo:rongkc Kcmmolo crpakyc; olo tani:kvdv:dc kaptaksuyc odokkc buluk a:yckvdv:dcm dokcrcbamsuyc.’
Kcba: Ba:tcrnamdc
31“Cdvlo tani:kc awodc Bvk migangki, odokkc appvng taycng among lutad lunckvdv:dokki gvyckunc odo Bv Bvk migangki migom dungkodo du:ycku. 32Bvk kcra:do appvng opvncm langkumsuycku, odokkc me:rsoben rakinc ako akko:pc berasobencm sobennokkcm sopansukampc sopansuycku. 33Odokkc me:r sobenkvdv:dcm alag lakkepc mcyc. 34Odo cdc Migomdc alag lagbvgpc du:nckvdv:dcm luyc, ‘Kajc, ngok Abukc aipai pa:nckvdvnga, noluk lcga:pc mosv:la lc:nam migom mo:pvdcm dungkonsubomtoka tani:amo:scm mododokkcbong. 35Kapila:nc ngo kcno:dagai odokkc nolu ngom tv:nam asscm bito, ngo mibopc gvdungai odokkc nolu ngom goga:to,
36“Ngo akudali:la dungai odokkc nolu ngom molvgto, ngo mola:mangai odokkc nolu ngom gvka:la ka:to, ngo makana:lo dungai odokkc nolu ngokkolo:pc gvto.’
37“Odo dormo kanckvdv:dc luyc Bvm, ‘Ru:tuma, cdvlonu ngolu nom kcno:dopc ka:ton odokkc domotv:mokan, cdcmpcmanggom tv:lv:layam odokkc nom tv:namcm bikan? 38Odokkc ngolu cdvlo nom kangkinma:nam tani:pc ka:la nom gogangkan, cdcmanggom akudali:dopc ka:la attarcm molvgkan? 39Odokkc cdvlo nom ngolu ramdopc ka:la cdcmanggom makana:lo du:dom nom gvka:la kangkan?’ 40Odokkc cdc Migomdc bulum lubiyc, ‘Aroru:pc, ngo nolum lubidung, nolu sc ngok ame:yarnc bvrokvdv:sok akoi cdcmpc itomvlo, nolu cdcm ngommvn iton.’
41“Odokkc Bvk lakkekc du:nckvdv:dcm Bv luyc, ‘Gc:ramkang ngokkolokkc, nolu pelvgnamkvdvnga, uidcm odokkc bvk lutad lunckvdv:dok lcga:pc romla lc:nam cdvlosin midma:nc vmvdo:pc; 42kapila:nc ngo kcno:dagai odokkc nolu ngom oko donamkosin bitomang. Ngo tvlv:dagai odokkc nolu ngom atv tv:namkosin bitomang, 43Ngo kangkinma:nam ammai odokkc nolu ngom goga:tomang, attar gcnam kamangai odokkc nolu ngom attarcm molvgtomang, mola:mangai odokkc makana:lo dungai odokkc nolu ngom gvka:la ka:tomang.’
44“Odo bulusin luyc, ‘Ru:tuma, ngolu cdvlo nom kcno:dopc cdcmanggom tv:lv:dopc, kangkinma:nampc, attar gcma:dopc, mola:ma:dopc cdcmanggom makana:lo du:dopc ka:ton, odokkc nom ka:sv:mosv:toma:n?’ 45Odo bulum Bv luyc, ‘Aropakpc, ngo nolum lubidung, sc adjio:nc kvdv:sok akoncm nolu imangarnammcmpc, nolu ngomsin itomang’ 46Odokkc bulu lo:dvscm du:tvnc dcmke-mokekodo:pc gvyc, cmpige:la dormokanc kvdv:dc lo:dvscm du:tvnc turnamdo:pc gvyc.”
Currently Selected:
METIU 25: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
