METIU 7
7
Ammem Kcba:ba:nam
(Lu:k 6.37-38,41-42)
1“Ammem tadjvgtarrom tadyoka, nolumsin tadjvg-tarrom tadma:dopc. 2Kapila:nc noluk tadjvgtarro tadnam agomv:dokki nolumsin tadjv tarrom tadycku; odokkc nolu oko kvnanckokki kvycnc nolusin cdc kvnancdcm pa:yc. 3No kapila nok bvrodok takotdcm ka:don, cmpige:la nok avkc amikdok du:nc vsvng sv:po:dcm ka:suma:pc? 4Cdcmanggom, no kapc nok bvrodcm lulangkan, ‘nok takotdcm la:pakpo:biso cmna,’ nok avkc amikdo vsvng sv:pongko du:motu:la? 5Nolu agom lc:sula lunnc, nok amikdok vsvng sv:po:dcm la:pakpo:tok, odokkc odopak no aiyo:pc ka:begycpc nok bvrodok amikdo du:nc vsvng sv:po:dcm la:pakpc.
6“Iki:kvdv:dcm okko angundagnc cdcm biyoka, odokkc e:g kcra:lo noluk mukuta: doksori:ycm cryilvgyoka, ckvma:mvulo bulu lctvkokki cdcm bulum sanggc:yc odokkc nolum gampc cmna duga:yc.
Kotok, Matok, Piku:tok
(Lu:k 11.9-13)
7“Kotoka, odokkc cdcm nolum biycpc; matoka, odokkc nolu pa:yc; piku:toka, odomvlo nolu moge:biycpc. 8Kapila:nc sc:kobvi koycnc pa:dag, odokkc sc:kobvi madonc pa:dag, odokkc piku:ncdcm moge:biyc, 9Cdcmanggom nolukkolok oko tani:dc, awodc bvkkolok pitangko koycmvlo, bvm vlvngko bido cmna? 10Cdcmmanggom ongo apirko koycmvlo, tabv adorko bidocmna? 11Odomvlo nolu, sc:kobulu aisi:ma:ncnc, kapc ainc amancm noluk ommangkvdv:dcm bikindagnc, cdcmyam cddvko noluk taycng amo:tok Abukc ainc attarcm kanckvdv:dcm biycnc! 12Cmpila tani:kvdv:dc nolum kapci inamdcm aipc mc:dagnc, bulum ila:sa:langka cdcmv:pc, kapila:nc cdcna lujvglurodc:lang lungor lunckvdv:dok agomc.
Ponme:nc Yabgodc
(Lu:k 13.24)
13“Ponme:nc yabgodok gva:toka; kapila:nc pontanc yabgodc odokkc gvponc lambcdc, appvngc singapkolo:pc gvbodag odokkc odok gvnctani:kvdv:dc bojcrungko: 14Kapilainc yabgodc ponme:la odokkc lambcdc gvnyi:ncdc, turkolo:pc gvbodag, odokkc cdcm pa:nckvdv:dc adji:ko.
Vsvng Amvngkolang Odok A:yc
(Lu:k 6.43-44)
15“Lume:ycm lungorla lunc tani:kvdv:dcm ansuka:sulangka, sc:kobulu nolukkolo:pc bera soben galugcm gcge:la gva:dagnc cmpige:la asin ara:bo gamke:nc ra:m iki:ycnc. 16Nolu buluk a:yckvdv:dcm ka:la kangkinyc. Ta:ngkanc vsv:lokkcm angura:ycm pvrdolang, cdcmanggom sa:lenowonc ta:ng vsvng amv:lokkcm tajvg a:ycm pvrdolang?
17“Cdcmpidag, appvng ainc vsvngc ainc a:ycm e:dag, cmpige:la aima:nc vsv:dc aima:nc a:ycm e:dag. 18Ainc vsvngc aima:nc a:ycm e:la:mang, cdcmpcmanggom aima:nc vsv:dc ainc a:ycm e:la:dolang. 19Ainc a:yc e:ma:nc vsvng appv:dcm tc:tapdo odokkc vmvlo cra:lvgla rompakdo. 20Cdcmpc idag nolu cdcmbulum buluk aiyckvdv:dokki kangkinnang.
Ngo Cdvlosin Nolum Kimmangai
(Lu:k 13.25-27)
21“Ngom ‘Ru:tuma, Ru:tuma,’ cmnc appv:dci taycngamong migom dokodo:pc gvangkuma:yc, cmpige:la sc:kobvi taycng amo:tok du:nc ngok Abukc mcngkamdcmpc agercm gerycnc bv:ong gva:ycku. 22Odo longcdo bojcrungkonc luyc ngom, ‘Ru:tuma, Ru:tuma, ngolu nok aminno lungorla lunam agomcm lubigo:ma:lang, odokkc nok aminno uikvdvngcm mcnpagmangalang, odokkc bottc bottcnc agercm bojcrungko nok aminno germangalang? 23Odo bulum ngo appvng kindopc lutadla lubiyc, “Ngo cdvlosin nolum kinmangai; ngokkolokkc gc:ramkang, nolu aisi:ma:nc ager gernckvdvnga.”
Okum Monc Tani: Annyi
(Lu:k 6.47-49)
24“Appvngc cdcmpila sc:koi sc ngok agomkvdv:scm taddonc oddokkc cdcmbulum lukamdcmpc agercm gerdonc cdc kinncpa:nc tani:koncmpc iyc sc:ko bvk okumdcm rakud adi: taycngkolo modagnc; 25Odokkc pcdong okang, pu:mi: assc tclubkang, odokkc csarc yula cdc okumdcm nvnga:to, ckvdaggom cdc dvrpentomang, kapila:nc cdcm vlvng tayc:lo motungai. 26Odokkc sc ngok agom appv:scm tadnc odokkc cdcmbulum lukamdcmpc ima:ycnc cdc monsimonba:nc tani:koncmpc innc sc:kobv bvk okumdcm sulli:lo modonc; 27odokkc pcdo:dc owangkang, pu:mi: asidc tclubbomkang, odokkc csardc sara:la cdc okumdcm nvnga:to, odokkc cdc dvrpenkang; odokkc cdc mosv:langkuma:dopc dvrmvg dvrsvgkang.”
Jisukc Ilang-gvlang
28Odokkc Jisubv sc agom appv:scm cdvlo lungaptonc, yadkumsunc tani:kvdv:dc Bvk luyirnam agomkvdv:dcm tadla mcngapla:tomang, 29Kapila:nc Bv bulum aipc kinnc-pa:ncdcmpc luyirto, odokkc buluk poyirnckvdv:dcmpc imangai.
Currently Selected:
METIU 7: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
