MARKKC 4
4
Amni: Pidnc Tani:dok Kvkan Do:ying
(Met 13.1-9; Lu:k 8.4-8)
1Lckoda siycng asi ru:yido luyirrobbomkang. Odokkc Bvk dungkodo bottcru:nc tani:kcrcngko yadkumsukang, cdcmpc ika:nc Bv ollungkolo angkang odokkc odo tedtungkang siycng ara:do ollungkolo a:la; odokkc tani: kcrcng appv:dc siycng ru:yido amo:do dungkang. 2Odokkc bojcrungko agomcm kvkanbinam do:yvngki bulum luyirto, odokkc Bvk luyirkodo Bv bulum luto:
3“Tattoka! Amni: pidnc tani:konc pidkapc gvkangai. 4Odokkc bv pidla gvnamc, amni: akke lambc ru:yido kcdledkang odokkc pcttangkvdv:dc dcnga:la pala dopagamto. 5Ake amini:kvdv:dc vlvng kanc amo:lo oledkang, okolo bojcko among kamangaji, odokkc lomdanna cdc sangkang, cdc amongc ara:bo:pc kama:la:yam; 6Odokkc cdvlo do:nyidc sangka:nc cdcm ka:sanbomkang, odokkc cdcbulu appvr kama:la:yam sanpakkang. 7Ake amni:dc ta:ngara:lo odokkc ta:ngkvdv:dc sangkang odokkc ta:ngkvdv:dc ma:rumbomkang, odokkc cdc a:yc e:tomang. 8Odokkc ake amni:kvdv:dc ainc amo:lo dc:yi:kang odokkc a:yc engkang, sangkang odokkc bojcbomna vyvng awumko odokkc vyvng akkcngkopc odokkc lvngkokopc.”
9Odokkc Bv luto, “Sc:kkc yerungc du:nc tadpc, bvm tadmotoka.”
Kvkanbila Kvnam Do:yv:dok Lcgang
(Met 13.10-17; Lu:k 8.9-10)
10Odokkc cdvlo Bv atcrong dunganc, Bvk lcdulo sc:kobulu du:mvndunganc vyvngkolang anyidokki lckopc Bvm tawuto kvkanna kvbinam do:yv:dok agomcm. 11Odo Bv bulum lubito, “Nolum Ru:ncpvnckc migom dunggcnam amo:dok ncrkvg agomdcm lubitung, cmpige:la mo:rongkc du:nckvdv:dcm appvng agomdcm kvkanbinam do:yvngki lubidung; 12Odomvlo bulu aroru:pc ka:yc ckvdaggom mcngkima:yc, odokkc aroru:pc tadycpc ckvdaggom tadkinma:yc; ckvma:mvlo bulu gvlatycku, odokkc mc:yinsuycku.”
Jisubv Amni: Pidncdok Agomdcm Lulenluwa:la Lubinam
(Met 13.18-23; Lu:k 8.11-15)
13Odokkc Bv bulum luto, “Nolu sc kvkanbila kvnam do:yv:scm tadkinma:lang? Kapc cmpcmvlo appvng kvkanbila kvnam do:yvngkvdv:dcm tadkinycn? Amni: pidncdc agomdcm piddag. 14Odokkc lambc ru:yidokkc kvdv:dc, okolo agomdcm pidlvgdaganc; 15cdvlo bulu taddaganc, Satandc:sin oddung gva:dag odokkc agomdcm la:pakdag bulukkolo pidlvgnamdcm. 16Odokkc sc:bulu cdcmv:pc vlvng kanc amo:lo pidnamkvdv:dc, sc:ko, cdvlo bulu agomdcm tadycnc, oddung cdcm mc:popc tadlvgsudag; 17Odokkc bulukkc ayvkc appvrc kasumang; cmpige:la asudowongko du:dag; odokkc, cdvloi asin mc:dvrmc:songc cdcmanggom ipusire:yc lenycnc agomdok lcgangc, oddung bulu avkc kumnamcm mcpakdag. 18Odokkc akedc cdcbuluna ta:ng ara:do pidnamkvdv:dc; bulu cdc bulu sc:kobulu agomdcm taddagnc, cmpige:la mo:pvsok mc:namsagnamkokki, 19odokkc mircmnammcm mc:bola, odokkc ake attar lcgangc mcngkolo, odokkc agomdcm nv:rumbomdag, odokkc cdc attv kamang cmna lcngkandag. 20Cmpige:la cdc ainc amo:do pidnamkvdv:dcbuluna sc:kobulu agomdcm taddagnc odokkc cdcm torvgsudag odokkc a:ycm e:dag, vyvng awumkopc odokkc vyvng akkcngko odokkc lvngkokopc.”
Saraki: Ako Tvgcnancdok Kcvgdo
(Lu:k 8.16-18)
21Odokkc Bv bulum luto, “Saraki akoncm tvgc:nancdok kcvgdoi lc:pcnammcn, cdcmanggom yubnanc asub kcyvglo:nci, odokkc cdcmanggom tvsa:la lc:nanc taycngkolo:ma:lang? 22Kapila:nc okkomsin lc:sinam kamang, lcngkanpc lcgangcmamvlo; cdcmpcmanggomsin lc:sila lc:mang. 23Tani:akomumlokkc tadnannc ycrungc du:mvlo, bvm tadmotoka.”
24Odokkc Bv bulum luto, “Ansulangka nolu okkom taddoji; nolu okoki kvla biycnc odok kvddvngko nolu pa:yc, odokkc nolu bojcyangkoda pa:yc. 25Kapila:nc sckkc bojcyangko du:nc bvm bojcyangko biyc; odokkc sckkc kama:nc, bvkkolokkcm okodc du:nc cdcmsinci bompakycku.”
Sa:nc Ammodok Kvkan Do:yvng
26Odokkc Bv luto, “Ru:ncpvnckc migompc dungko amo:dc amo:lo amni: pidnc tani:koncmpc innc, 27Odokkc yummcm longgcm yubdom darobdowcm, cdc amni:dc sa:la bottcdag, bv kinmang kapci sa:dagnc. 28Amongc cdcm avyc lenmodag, lenpongarpc anncdc lendag, odokkc jamsutla lennc tu:bvdc odokkc odo jamkodo appvng a:ycdc. 29Cmpige:la cdvlo a:yc appv:dc minycnc, lomdanna bv gadnanc kasscm bomna gaddag, kapila:nc a:m gaddv angka:bong.”
Pctu A:ycdok Kvkan Do:ying
(Met 13.31-32,34; Lu:k 13.18-19)
30Odokkc Bv luto, “Okokokki ngolu Ru:ncpvnckc migompc ila du:tcng amo:dcm luyv:suycn, cdcmanggom oko kvkanbila kvnam do:yvngcm cdcm kvnaycn? 31Cdc pctu ammo apirkoncmpc idag, okodc, cdvlo amo:do pidlvgycnc, appvng ammolokkcmyam pirme:ya:ncpc mo:pvso idag; 32ckvdaggom cdvlo cdcm pidlvgycnc cdc sa:dag odokkc mv:me:nc appvng agrubnc vsvngkvdv:dcmyam bottaya:dag, odokkc bottapaknc rcngke:ycm rc:lendag, do:mvrtok dcngo:nc pcttang kvdv:dc:sinci odok rcngke:do asubcm mola:dag.”
33Cdcmpinc bojcrung kvkanbinam do:yvngki Bv agomdcm bulum lubito, bulu cdcm tadla:namkopc; 34Bv kvkanbinam do:yvngkokkima:pc bulum agomcm lutomang, ckvdaggom Bvk avkc agom tadjvgla gvmvnnc tani:kvdv:dcm Bv appv:dcm lulenlua:la lubito.
Jisubv Bottcnc Csar-Pcdongcm Rimapnam
(Met 8.23-27; Lu:k 8.22-25)
35Longckoncm, yumc ayir a:namc, Bv bulum luto, “Kajc kekonolo:c gckongkai.” 36Odokkc yadkumsunc tani:dcm mcge:la, bulu Bvm ollu:do ko:bomkang, kapc Bv dungaji cdcmv:pc. Odokkc ake ollungkvdv:dcsin Bvk lcdulo dungai. 37Odokkc bottapaknc csarko sarrobkang, odokkc lu:nc asikvdv:dc ollu:dcm lu:rumbomkang, ollu:dc cdcmpila assc bingkang. 38Ckvdaggom Bv ollu:dok kungko:bo dungai, mittukdcm dumpa:do dumjcmla yubla dungai; odokkc bulu Bvm urrobge:la luto, “Luyirna, ngolu singapmvlo no ka:ma:bo:nci?”
39Odokkc Bv darobge:la csardcm morvdtto, odokkc siycng asidcm luto, “Aso:pc du:tok! Aso:pc du:tok” odokkc csardc yungasukang, odokkc odo aipakpc ronggamkang. 40Bv bulum luto, “Kapila nolu pcsodon? Nolukkc mc:jvgc kama:nci?”
41Odokkc bulu aipakpc pcsokang, odokkc akonc akoncm luka:mvnsuto, “Sc cmpcmvlo sc:koji, Bvmjc csarcla: siycng asscsin lukamdcmpci taddagnc?”
Currently Selected:
MARKKC 4: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
